بلوچستان ءُ اسلام آباد ءَ زورانسری آوار جنی ءُ درکانودی کوش ءِ ھلاپ ءَ زھرشانی روانک کشگ بیتگ، چار بیگواھیں مردمانی لاش دزکپتگ اَنت

بلوچستان ءُ اسلام آباد ءَ زورانسری آوار جنی ءُ درکانودی کوش ءِ ھلاپ ءَ زھرشانی روانک کشگ بیتگ دومی نیمگ ءَ چار بیگواھیں مردمانی لاش دور دیگ بیتگ اَنت-

اسلام آباد ءَ جمعہ ءِ روچ ءَ بلوچ اسٹوڈنٹس کونسل اسلام آباد ءَ قائداعظم یونیورسٹی ءِ دیم ءَ زورانسری آوار جنی ءِ ھلاپ ءَ پُرایمنیں زھرشانی پند جتگ ءُ اشی ءَ پد پریس کانفرنسے برجم داشتگ – زھرشانی کنوکاں بیگواھیں نودربر سعید بلوچ ءُ فیروز بلوچ ءِ زوت ءُ پہ سلامتی یل کنائینگ ءِ لوٹ کنان ءَ گوشتگ کہ نودربر زورانسری آوار جنی ناں تھنا بُنکی انسانی ھکانی ھلاپ ورزی اِنت بلکیں اے زانشت ءِ ماھول ءُ سانمند کنگ ءَ اِنت-

پُرایمنیں پند ءَ جتاجتائیں یونیورسٹیانی نودربر، چاگردی کارکنان ءُ انسانی ھکانی نمائندگ ءَ بھر زرتگ- زھرشانی کنوکاں پلے کارڈز ءُ بینرز چست کتگ بیتگ آیانی سر ءَ زورانسری آوار جنی ءِ ھلاپ ءَ ناراہ نبشتہ بیتگ اَنت-

پریس کانفرنس ءَ چہ تران کنان ءَ بلوچ اسٹوڈنٹس کونسل ءِ رھشون ءَ گوشتگ کہ آیانی جُھد سرجمی ءَ پُرایمن اِنت، اگاں لوٹ سرجم کنگ نہ بیت اَنت گُڑا زھرشانی ءَ دراجکش کن ایں ءُ اشی ءِ پُشدر ءَ تُرندی کنگ بیت- آیاں کڈن کتگ کہ کجا ھما ناگیگیں جاورانی زمہ وار ھائر ایجوکیشن کمیشن (HEC) , قائداعظم یونیورسٹی انتظامیہ ءُ ریاستی سیکیورٹی ادارھانی سر ءَ بیت-

بلوچ اسٹوڈنٹس کونسل ءِ نمائندگ ءَ تچک کتگ کہ آ وتی سنگتیں نودربرانی یل کنائینگ ءَ تاں زھرشانی ءَ برجاہ دار ایں ءُ تھی ءُ ڈنی انسانی ھکانی گلاں چہ دزبندی کن ایں کہ آ اے جیڑہ ءِ گامگیج ءَ بہ زور اَنت- آیاں گوشتگ کہ بیگواھیں نودربرانی درگت ءَ چہ پلگاریں پٹ ءُ پول کنگ بہ بیت ءُ اگاں آیانی سر ءَ کجام وڑیں بھتامے ھست گُڑا آیاں آمیدگس ءَ پیش بہ کن اِت یا ناں گُڑا آیاں زوت یل بہ کن اِت-

نودربریں رھشوناں اے ھم گوشتگ کہ اے درگت ءَ کانودی رندگیری ءِ ھاتر ءَ وکیل ءُ انسانی ھکانی ادارھاں چہ ھال اھوال بندات کتگ دانکہ زورانسری آوار جنگ بیتگیں نودربرانی کھول ءَ انساپ دیگ بہ بیت-

ھمے وڑ اسلام آباد ءَ جمعہ ءِ روچ ءَ بی وائی سی ءِ بندیگیں سروک ءَ بیگواھیں مردمانی کھولانی زھرشانی نندانک ءَ شست ءُ شش روچ سرجم بیتگ-

اسلام آباد ءَ بی وائی سی ءُ بیگواھیں مردمانی نشتگیں کھولاں دو ماہ ءَ گیش اِنت کہ آ سارتی ءُ ھور گرم ءِ سر ءَ نشتگ اَنت آیانی ھکیں لوٹ اَنت بلے تنی وھدے سرکاری واکداراں گوں آیاں ھچ وڑیں گپ ءُ دیوان نہ کتگ نانکہ آیانی لوٹ منّگ بیتگ اَنت-

زانگ بہ بیت اے زھرشانی نندانک پیرزال ءُ چُک ھم گون اَنت آ وڑ وڑیں دلسیاھیانی دیمپان بیتگ پولیس ءُ انتزامیہ ءِ تُرسنیگ ءُ بیھار ءَ اَبید آ وتی ھکانی سر ءَ اوشتاتگ اَنت دانکہ لوٹانی سرجم کنگ ءَ زھرشانی نندانک ءِ برجاہ دارگ ءِ جار جتگ-

ھمے وڑ جمعہ ءِ روچ ءَ مند ءِ ھند سورو ءَ بلوچ راج ءَ یک زھرشانی روانکے کش اِتگ چریشی ءَ مزنیں کچے ءَ شھریاں بھر زرتگ- اے روانک شش ستمبر ءَ ڈیتھ اسکواڈ ءِ دست ءَ کُشگ بیتگیں اظھار بلوچ، ملا بھرام ءُ جلال بلوچ ءُ دوازدہ ستمبر ءَ کُشگ بیتگیں الطاف بلوچ ءِ درکانودی کوش ءِ ھلاپ ءَ کنگ بیتگ-

زھرشانی کنوکاں روانک ءِ میان ءَ ڈیتھ اسکواڈ ءِ پُرکاری رد کنان ءَ گوشتگ بلوچ راج ءِ سر ءَ آرگ بیتگیں ریاستی پالیسی گیش اوپار کنگ نہ بنت- زھرشانی کنوکاں تران کنان ءَ بھتام جتگ کہ بلوچستان، ھاسکار مکران ءِ دمگ ءَ ڈیتھ اسکواڈ ءِ انچش بے لگام کتگ اَنت کہ آ بلوچ ورنایاں نشانگ کنگ ءَ اَنت-

روانک ءِ آسری ءَ زھرشانی کنوکاں تُرندیں ناراہ جتگ ءُ لوٹ کتگ کہ درکانودی کوش ءِ درچ بند بہ کن اِت ءُ بلوچ راج ءِ ھلاپ ءَ چُکچینی ءَ زوت بدار اِت-

یک نیمگے درکانودی کوش ءِ ھلاپ ءَ زھرشانی روانک کشگ بیگ ءَ اِنت بلے دومی نیمگ ءَ زورانسری آوار جنگ بیتگیں مردمانی لاش دور دیگ بیگ ءَ اَنت-

ھمے وڑ دشت ءَ پاکستانی پوج ءَ یک دروگیں میرے ءَ چار بیگواھیں مردم کشتگ کہ آیانی تہ ءَ دو ءِ پجّار بیتگ اَنت-

کیچ ءِ دمگ دشت ءَ پاکستانی پوج ءَ ٹاہ داتگ کہ چار مردم یک میرے ءَ کُشتگ اَنت ءُ آ بلوچ سلاہ بندیں گلے ءِ سرمچار کتگ اَنت – بلے دمگی اِھوالکار ءُ کھول ءِ رِد ءَ اے چاریں مردم پیسر ءَ چہ زورانسری بیگواھیں مردم بیتگ اَنت کہ جمعہ ءِ روچ ءَ یک دروگیں میڑے ءَ کُشگ بیتگ اَنت-

کشگ بیتگینانی تہ ءَ دو ءِ پجّار ستار ء خالد ءُ طارق ء ھاجی ھمزہ ناماں چہ بیتگ اَنت کھول ءِ گوشگ اِنت پاکستانی پوج ءَ دوئیں دوازدہ نومبر 2024 ءَ آوار جنگ ءَ پد بیگواہ کتگ اَنت-

زانگ بہ بیت اے دوئیں ورنا ھما وھد ءَ آوار جنگ بیتگ اَنت وھدے دشت ءَ چہ دیم پہ گوادر ءَ پرپٹ سر ءَ روگ ءَ بیتگ اَنت کہ دورو چیک پوسٹ ءَ پاکستانی پوج ءَ چست کتگ ءُ برتگ اَنت-

زانگ بہ بیت پشمبے ءِ روچ ءَ دشت کنچتی کراس ءَ پاکستانی پوج ءِ کاروان ءَ ھواریں بس ءِ سر ءَ وتکش تراکے بیتگ اَت ءُ چریشی ءَ آ دگہ بس تیرگواری ءِ نشانگ کتگ اَنت-

اے اُرش ءِ زمہ واری بلوچ لبریشن آرمی ءِ جارکش جیئند بلوچ ءَ منّ اِتگ اَت کہ مئے جندندری یونٹ مجید بریگیڈ ءِ سے جندندریاں بھر زرتگ یکے ءَ گاڑی گوں تراکناکیں شورواں کوچ تراکینتگ ءُ آ دوئیناں آ دگہ بس نشانگ کتگ ءُ گُڈی تیر پہ وت گچین کتگ اَنت-

آئی ءَ گوشتگ اے اُرش ءَ پاکستانی پوج ءِ 32 کارندہ کشتگ-

ھمے وڑ ھمے یکیں جاہ ءَ چارشمبے ءِ روچ ءِ پاکستانی پوج ءِ کاروان ءِ سر ءَ اُرش کنگ بیتگ اَت ءُ آئی ءِ زمہ واری بلوچ لبریشن فرنٹ ءَ زرتگ اَت ءُ ھمے میان ءَ بی ایل ایف ءِ دو سرمچاراں جنگ بیتگ اَت-