امریکہ، برطانیہ ءُ فرانس ءَ بی ایل اے ءُ مجید بریگیڈ ءِ سر ءَ میان اُستمانی بندش رد کتگ،پاکستان ءُ چین ءِ سپارتی پشلی دیمپان

میان اُستمان ءِ سلامتی کونسل ءِ ۱۲۶۷ بندشی کمیٹی ءَ پاکستان ءُ چین ءِ ھواریں درھواست رد کتگ کہ چریشی ءَ بلوچ لبریشن آرمی ءُ آئی ءِ پدائی یونٹ مجید بریگیڈ ءَ میان اُستمانی ناشرکاری ءِ گل ءَ ھوارینگ ءِ جھد کتگ – امریکہ، برطانیہ ءُ فرانس ءَ اے لیکہ ءِ سر ءَ تکنیکی بنچکاں ایراد گپتگ ءُ گیشیں شاھدانی لوٹ کتگ،چریشی ءِ آسر ءَ دراھواست سرجم ءَ دارگ بیتگ-

پاکستان ءِ مندوبی کمیٹی ءَ ٹاہ داتگ کہ بی ایل اے ءُ مجید بریگیڈ اوگانستان ءَ گمانی رنگ ءَ ھیلکاری ءِ بنجل ءَ کاروائی کنگ ءَ انت ءُ پاکستان ءِ توک ءَ اُرشاں ھوار انت – اے دلیلانی بنیاد ءِ سر ءَ پاکستان ءُ چین لوٹ ایت کہ اے گلاں ۱۲۶۷ ءِ تک ءَ ھوار بہ کنت کہ چوشکہ القاعدہ، داعش یا آئی ءَ ھواریں ٹولیانی سر ءَ میان اُستمانی گلانی ترندیں بندش ھست انت- اے درچ ءَ ھوارینگ ءَ پد رسانکی ھلاس بنت، سپری ءِ سر ءَ بندش جنگ بیت ءُ سلاہ ءِ دیگ ھم بندش بیت انت-

بلے کمیٹی ءِ سَے ھواریں باسک امریکہ، برطانیہ ءُ فرانس ءَ گپ تچک کتگ کہ پاکستان ءُ چین ءَ داں انگت ءَ تچکیں راستی پیش نہ کتگ کہ بی ایل اے یا مجید بریگیڈ ءَ میان اُستمانی ناشرکاریں گلانی نیٹ ورکس ءَ ھوار بہ کنت- آسرھال اے لیکہ ءِ سر ءَ تکنیکہ ھولڈ جنگ بیتگ، چریشی ءِ متلب ایش انت کہ اے جیڑہ داں کم چہ کن آیوکیں شش ماھاں دوبر چِست کنگ نہ بیت انت-

اے پیش رپت پاکستان ءُ چین ءِ واستا یک نوکیں لرزانکی یے – ھردوکیں ڈیھاں سالاں چہ بلوچ گلاں میان اُستمانی ناشرکاری ءِ نامینگ ءِ واستا میان اُستمانی فورمز ءِ سر ءَ پرکار انت، بلے داں انگت ءَ آئی ءَ میان اُستمانی تک ءَ سوبمندی نہ رس اتگ – زانتکارانی گوشگ انت اے بے سوبی ھما راستی ءِ پدراھی ءَ کنت بلوچ زرمبشت میان اُستمانی تک ءَ ناشرکاری ءِ لین ءَ آرگ ءَ جھدانی گھگیری ءِ دیمپان انت ءُ دنیا ءَ ایشی ءُ یک سیاسی ءُ گوستانکی جیڑھے زانگ ءَ انت-

چین ءِ مزنیں سرمایہ کاری پاک چین اقتصادی رھداری ءُ گوادر ءَ ھستیں منسوبہ ءِ بنجل انت چریشی ءِ سر ءَ پیش ءَ اُرش بیتگ – چین ءِ واھشت انت کہ میان اُستمان ءِ منگ نامہ ءِ درچ ءَ اے گھگیری ءِ ھلاپ ءَ ترندیں گامگیجے ءِ واستا میان اُستمانی پلامرزی گون بہ بیت، بلے ایشی ءِ پژدر ءَ نوکیں پیلسہ ءِ کوشست داشتگ-

زانتکارانی گوشگ انت کہ اے پیسلہ میان اُستمانی تک ءَ اے گپ ءَ دیم ءَ بارت انت کہ بلوچ جیڑہ بس سیکیورٹی یا عسکری تک ءَ نہ انت بلکیں سیاسی ءُ گوستانکی لیکہ دار ایت – ایشی ءَ بس بندشاں یا چیر ترینگ ءَ ھلاس نہ بیت – میان اُستمانی ادارھاں اے مھتاجیں رویش ھما نیمگ ءَ اشارہ دنت کہ کجام ھم زرمبشت ءَ ناشرکاری ءِ تک ءَ ھوار کنگ ءَ تچکیں منانک ءُ کانونی تک سرجم کنگ لوٹ انت-

زانگ بہ بیت کہ امریکہ ءَ 8 اگست 2025 ءَ بی ایل اے ءُ مجید بریگیڈ ءَ را ملکی تک ءَ درملکی ناشرکاریں گل ءِ نام داتگ ات بلے میام اُستمانی تک ءَ اے کار ءِ کنگ ءِ ھاترا جتا جتائیں ءُ گیشتر ترندیں دیدانک لوٹ انت۔ اے پیسلہ ءَ چہ اے گپ پدر بیت کہ پاکستان ءُ چین ءَ انگت اے دوئیں گلاں گوں جھان ءِ ناشرکاریں نیٹ ورکاں ھمگرنچ کنگ ءِ ھاترا گیشتر دیدانک پیش کنگی اِنت۔

زانتکارانی رِد ءَ اے وئیل ءَ چہ اے گپ پدّر بیت کہ بلوچ جیڑہ میان اُستمانی پڑ ءَ یک نوکیں پڑے ءَ رھادگ اِنت کہ ایشی ءِ تہ ءَ تھنا بھتام یا سپارتی زور بس نہ اِنت بلکیں راجدپتری راستی ءُ کانودی بنیات گیشتر ھژدری اَنت۔ دومی نیمگ ءَ اے دیمروئی پہ بلوچ ءِ زرمبش ءَ ھم یک کلوھے ءَ بارت کہ دنیا اے جیڑھ ءَ یک نیمگی ایمنی ءِ چمّگ ءَ چارگ ءَ نہ اِنت بلکیں ایشی ءِ گستا تریں سیاسی ءُ انسانی تک ءُ پھناتاں سرپد بوھگ ءِ جُھد ءَ اِنت۔