بلوچستان ءُ کراچی ءَ چار بیگواھیں مردم یل بیتگ انت

بلوچستان ءِ دمگ کیچ ءِ ھند بلیدہ ءَ ورنائیں فتح بلوچ ء ماکو میار آ 15 جون 2023 ءَ پاکستانی پوج ءَ دزگیر کنگ ءَ پد بیگواہ کنگ بیتگ ءُ اے دراجیں مُدتے ءَ پد یل بیتگ-

فتح بلوچ ءِ پت ناکو میار ءَ وتی چُک ءِ یل کنگ ءِ واستا دو سال ءَ یکشل ءَ جھد کتگ۔ آئی ءَ اسلام آباد ءِ لانگ مارچ ءَ بھر زرتگ ءُ تربت ءَ ھم بازیں روچاں زھرشانی ءَ نشتگ۔ آئی ءِ زھرشانی ءَ راجی ءُ میان استمانی پڑ ءَ فتح بلوچ ءِ بیگواھی ءِ جیڑل دیم ءَ آرگ بوتگ۔

ھمے وڑ ءَ بلوچ اسٹوڈنٹس فرنٹ ءِ بیگواھیں بنجاھی سروک جاوید بلوچ ھم یل کنگ بیتگ-

جاوید بلوچ بیست ءُ سَے اپریل دوھزار ءُ بیست ءُ پنچ ءَ کراچی ءِ ماں گلستان جوھر ءَ بیگواہ کنگ بیتگ ءُ چار ءُ بیست ءُ ھپت ءِ روچ ءِ بیگواھی ءَ پد ھزدہ ستمبر دوھزار ءُ بیست ءُ پنچ ءَ یل کنگ بیتگ ءُ وتی لوگ ءَ سر بیتگ-

ھمے وڑ ءَ بیست ءُ سَے مئی دوھزار ءُ بیست ءُ پنچ ءَ بیگواہ بیتگیں شیراز بلوچ یل کنگ بیتگ-

ھمے وڑ بیست ءُ چار مئی ءَ بیگواہ بیتگیں رمیز بلوچ ھم گوستگیں روچ ءَ یل بیتگ ءُ وتی لوگ ءَ سر بیتگ-

ایشانی یل بیگ ءِ ھال بی وائی سی ءَ راست کتگ ءُ گوشتگ دراجیں مدتے ءَ پد اے مردم یل بیتگ ءُ وتی لوگاں سر بیتگ انت-

بلوچستان ءَ زورانسری بیگواھی ءِ جیڑہ سک ءَ دراج کش انت ءُ چریشی ءَ انسانی ھکانی گل یکشل ءَ اے جیڑہ ءِ سر ءَ زھر ءِ درشان ءَ کنگ ءَ انت۔ انسانی ھکانی گلاں باز رند ءَ لوٹ کتگ کہ بیگواھیں مردمانی دیم ءَ آرگ بہ بیت ءُ اے امل دارگ بہ بیت۔