بلوچی زبان ءِ نامداریں تامر ساچ زھور پزل ءِ نوکتریں تامر ”سیمسر“ چہ زیردان یوٹیوب چینل ءَ گوستگیں روچ ءَ بزاں یک ستمبر ءَ شنگ بوتگ۔ تامرے کسہ کار سئود بلوچ انت ءُ اے تامر بلوچستان ءِ نامداریں اکس کش نمیرانیں کمانچر بلوچ ءِ نام ءَ کنگ بوتگ ۔
تامر سیمسر یک چاگردی کسھے کہ بلوچ ءِ جیڑہ ءُ جنجالاں سر ءَ جوڑ کنگ بوتگ ، ھمے درگت ءَ زھور پزل ءَ گوں مئے ھندی اھوالکار ءِ گوم ءَ تران کنان ءَ گوشتگ کہ سیمسر ! منی چوناھا ھر تامر متلب ایش انت سپر انت کہ بلوچستان ءِ ھر دمگانی جاورھالاں من چوں پیش بہ داراں۔
بلوچستان ءَ تامرانی جوڑ کنگ ءَ آسراتی گندگ نہ بیت، شمارا کسے ءَ آسراتی داتگ یا وتی ھرچ ءُ درچاں کنگ ءَ ئے؟ اشی ءِ پسو ءَ زھور پزل ءَ گوشتگ کہ :“ بلوچ ءِ گور ءَ ناں ادارہ ھست ءُ ناکہ سرھیلیں مردم کہ اے نیمگ ءَ سر بہ جنت ، ھالانکہ اگاں زر بہ جنت آ وتی زراں کش ایت کنت ۔ پرچاکہ بلوچ ءِ تامرانی بجٹ کساس شش ھپت لک ءَ گیش نہ بیت بلے پد ءَ اگاں اشی ءِ اسکرینگ ءَ بہ کنت یا نیٹ ءَ گڑا بازیں تک ءُ پھناتے ءَ وتی زراں کش ایت کنت ۔بلے مئے کرا چشیں مردم ھوں نیست کہ زر بہ جنت ءُ ناکہ مئے گور ءَ ادارہ ھست ۔ ھرکس کہ کنگ ءَ انت آ وتی ھرچ ءُ درچ ءَ کنگ ءَ انت ۔ مئے گور ءَ سیٹ ءِ زرورت نہ انت توکہ ھمے دمگاں روے اودے بلوچ انت آ تئی کمک ءَ کن انت کسے تر ءَ سبارگے دنت شامے دنت ، گاڑی ءُ سیکلے، اگاں تو کوھی دمگے ءَ بہ روئے بہ دار ئے گڑا ھر وڑیں ھرچے ءِ بیت ایشاں سنگت وت کن انت ۔”
تامر ءِ ھرچ ءُ درچانی کمک رسگ ءُ نہ رسگ ءِ درگت ءَ آئی ءَ گوشتگ کہ “اناں آ وڑ ءَ کہ رسگی انت نہ رس ایت البتہ ایش انت کہ اَنو مئے کِر ءَ چیزے وھد انت کہ دکان والائے گش ایت کہ مئے ایڈا مان کن ، یا دگہ کمپنی ءِ وتی چیزاں پروموٹ کنگ لوٹ ایت آ مارا بیست یا سی ھزار کلدار دنت ما ھمیشاں یکجاہ کن ایں آیانی ایڈاں جوڑ کناں پد ءَ پلم کہ کئیت آیانی منت ءَ گریں ۔ تامر کہ در کئیت ھرچی کہ ھرچ بوتگ آ وَ شتگ انت ھمے کہ درکایاں اے ھمے سنگتانی سپر ءِ گاڑیانی ھرچ انت کہ رواں اسکرینگ کن انت یا دگہ کسانیں اژدری سامانے کہ مئے گور ءَ نیست زور انت ۔ بلے ھما کسانیں سامان بکایا مئے گور ءَ گیشتر پچ گرگ ءِ سر ءَ انت ھر مزنیں چیزے ءِ زرورت بیت گڑا یکے دومی ءِ گور ءَ پچ اش گریں ۔ ”
مکران ءِ تامر ساچ وتی تامرانی تہ ءَ مکران ءَ در ءِ زیداں پیش ندارگ ءِ جست ءِ سر ءَ زھور پزل ءَ گوشتگ کہ “ما مکران ءَ گیشتر ھمے واستا بندوک ایں کہ مئے واک ایں ، ما ستر زور بہ جناں مکران ءِ بازیں دمگاں شت نہ کناں ، پرچاکہ ما ٹیم ورکی کار ءَ انت ٹیم ءِکساس پانزدہ بیست مردم انت ، تو کساس کن ما چہ تربت ءَ دربایاں گوادر ءَ بہ رواں چنچئو ھرچہ کئیت ۔ نوں اگاں ما دگہ جاھے ءَ بہ رواں گڑا سک باز ھرچہ کئیت پمیشکا لاچاری ءَ ما وتی دائرہ در کپت نہ کنیں البتہ منی کسہ ءُ چیزانی لوٹ ھم ھست انت بلے ما شت نہ کنیں ، اگاں مزنیں بجٹے زرے بہ بیتیں گڑا ما الم مکران ءَ در اتک ءُ سلیمان ءُ چابھار ءَ شتگ اتیں ۔ باز چکر ءَ کسھانی لوٹ ھم بیتگ بلے کارانی تب مٹ کنگ کپ ایت ۔ ”
تامر ءِ تہ ءَ کجام دمگانی جاور دیم ءَ آرگ بوتگ انت اے جست پسو ءَ آئی ءَ گوشتگ کہ “سیمسر ءِ تہ ءَکیچ ءُ بلیدہ ، بالگتر شاپک ، پنجگور ءَ گیشتریں شوٹنگ ھمے دمگاں بوتگ انت ، اے واستا کہ کسھے لوٹ بوتگ ءُ اے دراہ بلوچ ءِ جاور انت ۔ اے واستا بلوچ ءِ جاور انت کہ اے چکر ءَ ما ھما چیز دست جتگ انت کہ بلوچ ءِ گوم ءَ بوگ ءَ انت چوشکہ مئے گور ءَ بازیں گونڈو آپ ءَ کپ انت ءُ مر انت ، نشہ ءِ آماچ انت ءُ آ کسانیں جیڑھے ءَ ھسپتالے ءَ کائنت ءُ آیانی جیڑہ سرجم نہ بیت ، پہ تپ ءَ مر ایت ، پد ءَ مئے گور ءَ اڑاند چینچوک انت اے ھم پیش داشتگ کہ کجام کجام وڑیں اڑاند بلوچ ءِ دیم ءَ ھست انت ۔ ما یکجاہ کتگ ءُ کسھے ءِ دروشم ءَ آورتگ انت ۔”
“تامر ءِ مول ءُ مراد ءِ درگت ءَ تامر ساچ ءَ گوشتگ کہ ما وتی مارشتاں یا کہ چاگردی اڑ ءُ جنجالاں ، یا راجے ءِ وتی دود ءُ ربیدگاں در کومے ءَ سر کنوں یا وتی آدگہ ھند ءُ دمگاں ، متلب ما مکران ءِ جیڑھاں زوراں کوہ ءِ سلیمان ءَ پیش داراں بوت کنت آ اے جیڑھاں دیم پہ دیم نہ یاں یا چابھارے مردم ایشاں مار انت یا کہ درکومے ھمساھگے ، سرپد کن ایں ، پد ءَ مرچی رسانک ءِ دور انت کہ دری راجے ءِ چم کپ انت تئی تامرے چنڈے ءَ کہ گند انت بلوچ ءِ جاورھال چش انت ، پد ءَ ایشاں اگاں تو کسھی مارشتی رنگ ءَ بہ کن ئے آیاں گیشتر ٹچ کنت پرچاکہ کسہ ءُ زیمر اے لھتے ھنچیں تک ءُ پھناتاں کہ مارگ بنت شرتر پھمگ بنت ، تو ھر راج ءِ زیمر ءُ تامراں چارے اگاں زبان ءَ سرپد مہ بہ ئے بلے کسہ ءُ ندارگ ھنچوش پیشدارگ انت تو زان ئے چی بوگ ءَ انت ۔ ما ھم وتی تامراں ھمے نیت ءَ زوریں کہ وتی اڑ ءُ جنجالان وتی زمین ءِ وتی زبان ءِ ھمے رنگ ءَ درنگاز بہ کن ایں کہ آ بہ گنداں بلوچ ءِ جاورھال اے پیم ءَ گوزگ ءَ انت ۔ ”
تامر ساچ زھور پزل ءَ بلوچ راج ءُ تامر ساچاں ھمے کلوہ دیان ءَ گوشتگ کہ مئے بازیں تامرکار ھست انت کہ آ مئے بلوچی تامر ءَ بر انت ءُ ھندی ءُ انگلش یا پارسی تامرانی کساس ءَ چار انت ما ھمے جیڑاں کہ بلوچ ءِ وتی جیڑھاں بلوچ ءِ وتی زبان ، بلوچ ءِ وتی زمین ، البتہ تیکنیکی ھوالہ تو گپ جت کن ئے کہ تامرے رھبند انت ھمدپ بوت کنت ۔ بلے کسہ یاکہ جیڑہ یاکہ بلوچ ءِ مارشت گوں دگہ کوماں ھچبر یک بوت نہ کنت ۔ بلوچی تامر بلوچی وڑ ءَ بنت آیانی کساس ءَ بِھ نیا انت تو ھرچی کہ توانا بہ بہ ئے بلے ایش انت کہ جیڑہ تئی انت ، گریبے ءِ جیڑہ گریب ئیگ انت آیانی جیڑھاں پرک انت ۔ نوں ناکہ یک زبانے ، ناکہ زمین ئے ءُ ناکہ دودمانے جیڑھاں تو گوں آیاں ھمدپ کت نہ کن ئے ۔ دری راجانی تامراں بہ چار ایت ، چہ آیاں در بہ بر ایت بلے تامر وتی زبان ءِ ، وتی جیڑیانی سر ءَ جوڑ بہ کن انت-