پاکستان ٹیلی کمیونیکیشن اتھارٹی ءِ جار ءِ سر ءَ سرجمیں بلوچستان ءَ موبائل انٹرنیٹ سروس بند کنگ بوتگ چریشی بلوچستان ءَ لکانی ھساب ءَ کارمرز کنوک سانمند ۔ واکدارانی رد ءَ اے گامگیج پہ سیکورٹی ءِ سبب ءَ چست کنگ بوتگ۔
اھوالانی تہ ءَ گوشگ بیتگ انٹرنیٹ ءِ بند کنگ ءِ پیسلہ گمانی رنگ ءَ ترس ءِ رد ءَ کنگ بوتگ بلے اے درگت ءَ گیشیں ھال ءُ اھوال دیگ نہ بوتگ انت۔ سرجمیں بلوچستان ءَ انٹرنیٹ ءِ بندش ءَ چہ لس مھلوک ھاسیں رنگے ءَ نودربر ءُ آن لائن بزنس ءَ گوں سیادی داروکیں مردماں سک باز تکانسری انت۔
انگت ءَ واکداراں سروس ءِ پچ کنگ ءِ ھاتر ءَ ھچ وڑیں گڈی وھد ءُ روچ ءِ ھال دیگ نہ بوتگ۔ انٹرنیٹ ءِ بند کنگ ءَ چہ ھمک روچی زند ءِ تہ ءَ ناگیگی اتکگ ءُ سوشل میڈیا ءُ ڈیجیٹل کمیونیکیشن ءِ دگہ آسراتی ھم بند کنگ بوتگ اَنت۔