پاکستان ءِ بنجاھی شھر اسلام آباد ءَ بلوچ زھرشانی کنوکانی زھرشانی ءَ مروچی بیست ءُ دومی روچ سرجم بیتگ کہ اود ءُ بلوچ مات ءُ گوھار پہ وتی مردمانی ھاتر ءَ زھرشانی کنگ ءَ انت-
زھرشانی نندانک ءَ بیست ءُ دو روچ گوزگ ءَ پد ھم آیانی گون ءَ ھاسیں رنگے ءَ نشتگیں بلوچ مات ءُ گوھارانی گپانی گوشدارگ یا آیانی لوٹانی منگ ءَ سرکاری واکدار گندگ نہ بیتگ انت-
اے زھرشانی بلوچ یکجھتی کمیٹی ءِ بنجاھی رھشون ءَ چہ بلوچستان ءَ گار ءُ بیگواھیں مردمانی ھاتر ءَ کنگ بوگ ءَ انت کہ آیانی لوٹ انت مئے مردم دیم ءَ آرگ ءُ آمیدگس ءَ پیش کنگ بہ بنت-
آیاں گوشتگ ترندیں گرم، ھَور ءُ یکشلیں آزار ءُ ازیتاں ابید ھم آ وتی پرامنیں زھرشانی بے دروریں مھکمیں رنگے ءَ برجاہ داشتگ۔
آیاں گوشتگ اے بیست ءُ دو روچانی تہ ءَ زالبول ءُ چُکانی ھواریں کھول زھرشانی ءِ واستا بنجل ءِ جوڑ کنگ ءِ اجازت نہ بیتگ انت۔ آیاں گوشتگ نیشنل پریس کلب ءِ نیمگ ءَ روگ ءِ راہ پرے ھاتر ءَ بند کنگ بیتگ انت سانمندیں مردمانی توار ایرموش کنگ بہ بیت انت-
آیاں گوشتگ واکدارانی نیمگ ءَ راہ ءِ بند بوگ ءِ سبب ءَ زھرشانی کنوکاں راہ ءِ کش ءَ نندگ ءَ لاچار انت ءُ واکدار یکشل ءَ آیانی چاروکاری کنگ ءَ اَنت، ترسینگ ءَ انت ءُ آ کڈنی ھمے واستا دیگ ءَ انت ما چِد ءَ پاد بیائیں واتر بہ روئیں-
آیاں گوشتگ پاکستان ءِ ریاست مارا انساپ دیگ ءِ ابید مئے زھرشانی ءَ ھواریں مردماں ٹِک ءُ نشان کنگ ءَ انت- ما انساپ ءِ ھاتر ءَ چِست کتگ انت بلے انساپ ءِ گوشدارگ نیست چرے ھاتر ءَ اے بیست ءُ دوئیں روچاں پد ھم ما مھکمیں رنگے ءَ پرایمنی ءَ نشتگ انت-