بلوچ وومن پورم ءَ وتی یک بیانے ءَ گْوشتگ کہ گوادر ءَ آھانی گل ءِ نیمگ ءَ برجم داشتگیں کانپرنس ریاستی زورانسر، دزگیر کنگ، ءُ زوراکی ءَ چہ لوگ ءَ در کنگ ءِ سوب ءَ ھلاس کنگ بوتگ۔
گل ءِ گشگ اِنت کہ اے وئیل تھنا بلوچ زالبولانی سیاسی آجوئی ءِ سر ءَ اُرش نہ اِنت بلکیں بلوچستان ءَ ریاستی ادارھانی نیمگ ءَ زورانسری کنگ ءِ دگہ سنگینیں درورے۔
بیان ءِ رد ءَ گوادر ءَ بلوچ وومن پورم ءِ نیمگ ءَ یک ھاسیں دیوانے ءِ برجم دارگ بوگی بیتگ کہ ایشی ءِ سرھال ’’ بلوچ سیاسی ادارگانی سر ءَ کریک ڈاؤن ءُ بلوچستان ءِ انوگیں سیاسی ندارگ‘‘ ات۔ اے دیوان ءِ تیاری بازیں ھپتگاں چہ بوتگ ات کہ ایشی ءِ تہ ءَ دمگی زالبول، نودربر، چاگردی کارندہ ءُ سیاسی ماھریناں بھر زورگ ءِ داوت دیگ بوتگ ات۔
بلے چہ کانپرنس ءَ بس لھتیں روچ پیسر سرکاری ادارھاں گل ءِ کارانی سر ءَ نزیکیں نگرانی بندات کت، بُنجاھی رھشون آزار ءُ اذیت کنگ بوت انت ءُ گڈسر ءَ گوادر ءَ بازیں زالبولیں جھدکار دزگیر کنگ ءُ تربت ءَ دیم دیگ بوت انت۔
بیان ءِ تہ ءَ گْوشگ بیتگ کہ اے درستیں کارروائی بیدے ھچ وڑیں کانونی ھال ءُ اھوال ءُ وارنٹ ءَ کنگ بوتگ اَنت۔
اے گل ءِ رد ءَ اے جنین آدمانی بندیگ کنگ ءِ وھد ءَ سکیں زھرناکیں جست ءُ پرس کنگ بوتگ ءُ آیانی سیاسی ھیال ءُ لیکہ ءُ تنظیمی سیادی ءِ بابت ءَ جُست ءُ پُرس کنگ بوتگ ءُ ھاموش بوگ ءِ دھمکی دیگ بوتگ۔ زالبولانی بندیگ کنگ ءِ وھد ءَ اے زالبولاں وتی ھاندان ءَ گوں کانونی شور ءُ سلاہ ءُ اھوال ءِ موکل نہ بوتگ ءُ گوں آھاں در انسانی سلوک کنگ بوتگ۔
بلوچ وومن پورم ءَ گْوشتگ کہ اے وئیل اے گپ ءَ سابت کنت کہ بلوچستان ءَ زالبولاں نہ ایوک ءَ لبز ءِ آجوئی نیست بلکیں آھاں چہ سیاسی ءُ چاگردی کارانی تہ ءَ بھر زورگ ءَ ھم پہ زور مکن کنگ بیگ ءَ اِنت۔
بیان ءِ تہ ءَ گیش گْوشگ بیتگ کہ یک اکیڈمک ءُ پرامن کانپرنسے ءِ زوراکی ءَ رد کنگ ءُ زالبولاناں چہ گوادر ءَ آزار دیگ ءُ درکنگ نہ ایوک ءَ انسانی ھکانی بے دروریں لگتمالی اِنت بلکیں ریاستی اقتدار ءِ در جمھوری کارمرد کنگ ءِ پدّریں درشان اِنت۔
اے گل ءَ چہ سرکار ءُ انسانی ھکانی ادارھاں لوٹ کتگ کہ آ اے وئیل ءِ نوٹس ءَ بہ زور اَنت ءُ زالبولانی دزگیر کنگ ءُ درکنگ ءِ بابت ءَ پلگاریں پٹ ءُ پولے بہ کن اَنت ءُ بلوچستان ءَ امن ءُ ایمنی ءِ سیاسی کارانی ھاتر ءَ گامگیج بہ زور اَنت۔