بلوچ اسٹوڈنٹ آرگنائزیشن پُجار ءِ بنجاھی جارکش ءَ گْوشتگ کہ گل باگ زون ءِ آرگنائزر ڈاکٹر اسرار بلوچ ءِ زورانسری بیگواھی ءَ تُرندی ءَ ایر جنت ءُ ایشی ءَ را سیاسی ءُ جمھوری جھدکارانی بُنکی ھکانی سر ءَ دگہ سنگینیں اُرشے گْوش اِیت۔
بنجاھی جارکش ءَ وتی بیان ءِ تہ ءَ گشتگ ڈاکٹر اسرار بلوچ یک سیاسی جھدکارے ءِ ھمراھی ءَ یک زمہ واریں شھری ءُ ورنایانی توار انت ۔ آئی ءِ زورانسری ءَ آوار جنگ نہ ایوک ءَ آئی ءِ ھاندان ءِ ھاترا زھر ءُ رنج ءِ سوب اِنت بلکیں سرجمیں بلوچستان ءِ سیاسی، چاگردی ءُ نودربریں تک ءُ پھناتاں ھم مزنیں جیڑیے ودی کتگ۔
آئی ءَ گوشتگ کہ ریاست ءُ ھکومت ءِ بنجاھی زمہ واری وتی شھریاں ایمنی ءِ پجارینگ اِنت بلے بدبھتی ءَ ھکومت ءُ ھکومت ءِ ادارگ سکا ناکام بوتگ اَنت۔ بلوچستان ءِ ھونیگیں شاھدگانی سر ءَ ھمک روچ مردم آوار جنگ ءُ زورانسری بیگواھی ءِ آماچ اَنت۔ سیاسی پرکار، نودربر، ڈاکٹر، استاد ءُ دگہ تک ءُ پھناتانی مھلوک سکا تکانسر انت۔
بنجاھی جارکش ءَ گشتگ ھستیں سرکار ڈاکٹر اسرار بلوچ ءِ زوت ءُ جان سلامتی ءَ دل یکیمی بہ کنت۔ بی ایس او پجار سرکار ءُ سیادی داروکیں ادارھاں اے گپ ءَ پدر کنت کہ ڈاکٹر اسرار بلوچ ءِ جان سلامتی ءِ جیڑہ ھچ وڑیں دیری اوپار کنگ نہ بیت۔ اگاں آ زوت یل نہ بیت گڑا بی ایس او پجار وتی آئینی، جمھوری ءُ پرامن زھرشانی ءِ ھک ءَ کارمرز کنت ءُ ھرچ وڑیں جمھوری ءُ پرامن زھرشانی ءِ رھبنداں زورگ ءَ لاچار بیت۔
بنجاھی جارکش ءَ گشتگ بی ایس او پجار وتی باسکانی گون ءَ اوشتاتگ ءُ سیاسی کارکناں ایوک ءَ یل نہ کنت۔ داں ڈاکٹر اسرار بلوچ پہ سلامتی یل نہ بیت ھر جمھوری دیوان ءَ آہانی توار چست کنگ بیت۔ بی ایس او پجار یک رندے پد ءَ ھستیں سرکار ءَ چہ لوٹ کنت کہ ڈاکٹر اسرار بلوچ ءَ زوت یل کنگ بہ بیت، زورانسری بیگواھی ءِ سلسلگ بند کنگ بہ بیت ءُ سرجمیں شھر ءِ بنیاتی، آئینی ءُ انسانی ھکانی رکینگ ءَ دلجم کنگ بہ بیت۔