بلوچستان ءِ جتاجتائیں دمگاں بیتگیں اُرشانی زمہ واری بی ایل ایف ءُ یو بی اے ءَ منّ اِتگ اَنت

بلوچستان ءِ جتاجتائیں دمگاں پاکستانی پوج ءِ سر ءَ اُرش، راھانی بندگ، پُھل ءِ تراکینگ ءُ مڈی بروکیں گاڑیانی سر ءَ بیتگیں اُرشانی زمہ واری بی ایل ایف ءُ یو بی اے ءَ منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ 25 مئی 2026 ءَ دشت ءِ دمگ سبدان پھل ءَ زورگریں پاکستانی پوج ءِ چار گاڑیانی ھمگرنچیں کاروان ءِ سر ءَ مزنیں سلاھاں چہ اُرش کتگ – اے کاروائی ءِ میان ءَ دُژمن ءِ کاروان ءَ ھوار یک گاڑی یے سرجمی ءَ اُرش ءِ نشانگ ءَ اتکگ، چریشی ءِ آسر ءَ آئی ءَ سوار ڈرائیور ءَ ھوار سے کارمند جاہ پہ جاھی مرتگ اَنت ءُ بازین ئِے ٹپی بیتگ اَنت-

جارکش ءَ گوشتگ مئے سرمچاراں 24 مئی 2026 ءَ تمپ ءِ دمگ کسانو ءَ برجاہ پاکستانی پوج ءِ چیک پوسٹ ءِ سر ءَ مزنیں سلاہ ءُ وتکاریں سلاھاں چہ نشانگ کتگ اَنت- اے کاروائی ءِ میان ءَ سرمچاراں تیرگواری کتگ چیک پوسٹ سر ءَ پٹ کتگیں چاروگی کیمرہ ھم تباہ کتگ – اے اُرش ءَ پوج ءَ جانی ءُ مالی تاوان دیمپانی کنگ کپتگ-

جارکش ءَ گوشتگ دگہ یک کاروائی ءِ سرمچاراں 24 مئی 2026 ءَ نوشکی ءِ دمگ سر ملّ ءَ زورگریں پاکستانی پوج ءِ کاروان ءَ ھوار یک گاڑی یے ریموٹ کنٹرول بمب ءَ چہ نشانگ کتگ- تراک ءِ آسر ءَ گاڑی سرجمی ءَ تباہ بیتگ، وھدے کہ آئی ءَ سوار چار کارمند مرتگ ءُ بازین ئِے ٹپی بیتگ اَنت-

جارکش ءَ گوشتگ سرمچاراں 23 مئی 2026 ءِ شھدگ این -70 سر ءَ بارکھان ءِ دمگ چنگ کور چھپر، رکھنی ءِ ھند سر ءَ ناکہ بندی – ناکہ بندی ءِ میان ءَ سرمچاراں شھدگ ءِ دستیگ کتگ گاڑی پٹ ءُ پول کتگ – اے کاروائی ءِ بُنکی مول ءُ مراد دمگ ءَ وتی پوجی توانمندی پیشدارگ ءُ دُژمنیں پوج ءِ سُر ءُ پُراں ھوار آیانی دمگی کمکارانی پُرکاریانی سر ءَ نگاہ دارگ بیتگ-اے میان ءَ سرمچاراں بلوچستان ءِ مڈیانی لُٹ ءُ پُل ءَ دلگوش، اشکر ءَ چہ سرریچ یک ٹرکے گپتگ ءُ مانداشتگ- ھمے وڑ سرمچارانی سُر ءُ پُراں نگاہ دارگ ءِ ھاتر ءَ شھدگ سر ءَ پٹیں پوجی چاروگی کیمرہ ھم تیرگواری کتگ ءَ ناکاراہ کتگ اَنت- ناکہ بندی ءِ میان ءَ یک شکی ئیں گاڑی یے دارگ گوشتگ بلے آ تچگ ءِ جھد کتگ چریشی ءَ سرمچاراں تیرگواری کتگ آ دیم روگ ءَ داشتگ- اے میان ءَ شھدگ ءِ دوئیں نیمگاں برجاہ فرنٹیر کور ءِ پوسٹاں چہ کارمنداں پیشگامی ءِ جھد کتگ، بلے اود ءَ پیسر ءَ چہ سنگر گپتگیں سرمچاراں پھازوکی ٹولیانی سر ءَ تیرگواری کتگ ءُ آ پشتکنزی کتگ اَنت-

جارکش ءَ گوشتگ مئے سرمچاراں 22 مئی 2026 ءَ ھب ءِ دمگ بھوانی ءَ فرنٹیئر کور ءِ نوکیں چوکی ءُ آئی ءَ چہ ھمگرنچیں دگ ءِ بند ساچی شرکت ءَ دلگوشیں کارمند اُرش ءِ نشانگ کتگ ، چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ دگہ یک کاروائی ءَ سرمچاراں 22 مئی 2026 ءَ مند ءِ دمگ سورو ءَ برجاہ پاکستانی پوج ءِ بُنجل ءِ سر ءَ جتاجتائیں نیمگاں چہ مزنیں ءُ وتکاریں سلاھاں چہ اُرش کتگ ءُ نشانگ کتگ- اے کاروائی ءِ آسر ءَ پوج ءِ جانی ءُ مالی تاوان ءِ دیمپانی کنگ کپتگ-

جارکش ءَ گوشتگ کہ سرمچاراں 20 مئی 2026 ھب ءِ دمگ دُریچی ءَ گرانبھائیں سنگانی ٹرانسپورٹیشن ءَ ھمگرنچیں مردمانی ھلاپ ءَ کاروائی کنان ءَ، سنگاں چہ سر ریچ دو گاڑیانی سر ءَ تیرگوسری کتگ آیانی ٹائر تراکینتگ اَنت- اے اُرش بلوچستان ءِ مڈی لُٹ ءُ پُلاں ھمگرنچ ءِ مردم ءُ آیانی کمکارانی ھلاپ ءَ بی ایل ایپ ءِ برجاہ مھم ءِ بھر اِنت-

جارکش ءَ گوشتگ دگہ یک کاروائی ءَ سرمچاراں 20 مئی 2026 ءَ تمپ ءِ دمگ رودبن ءَ برجاہ پاکستانی پوج چوکی سر ءَ مزنیں سلاھاں چہ اُرش کتگ – اے کاروائی ءِ آسر ءَ پوج ءَ جانی ءُ مالی تاوان چست کنگ کپتگ- اُرش ءِ میان ءَ سرمچاراں چوکی ءَ پٹّیں چاروگی کیمرہ ھم تیرگواری کتگ ءُ تباہ کتگ-

جارکش ءَ گوشتگ کہ مئے سرمچاراں 20 مئی 2026 ءَ چاگی ءِ دمگ کردوک ءَ ناکہ بندی گاڑیانی پٹ ءُ پول یکشل ءَ سے کلاکاں تاں برجاہ داشتگ، چریشی ءَ بُنکی مول ءُ مراد ءِ دمگ سر ءَ پوجی زور مھکم کنگ ءُ دُژمن ءِ شکی ئیں سُر ءُ پُر نگاہ دارگ بیتگ- سے کلاکاں تاں برجاہ دارگ ءُ اے آپریشن ءِ میان سرمچاراں سرجمیں دمگ ءِ پوجی دستیگ کنگ ءُ اود ءَ چہ گزوکیں گاڑیانی پٹ ءُ پول- اے میان ءَ پوج ءِ گمانی پژدر ءَ دارگ ءِ ھاتر ءَ سرمچاراں پھازوکی راھانی شیواری ءُ ناکہ بندی ءِ کار سوبمندی کنگ ءَ پد سرجمیں سرمچاراں وتی مُھر اوتاکاں تاں سر بیگ ءَ سوبمند بیتگ اَنت-

ھمے وڑ یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ یو بی اے ءِ سرمچاراں گوستگیں بیگاہ 7:30 ءِ نزیک کچھی ءِ دمگ سنی رودی کھور ءِ ھند سر ءَ برجاہ بُنجاھی پُھل تراکناکیں شورواں چہ تراکینتگ چریشی ءَ پُھل سرجمی ءَ ناکاراہ بیتگ-

جارکش ءَ گْوشتگ کہ اے کاروائی ءَ چہ دُژمن ءِ راشن سرکنگ ءُ سُر ءُ پُراں سکا تاوان رس اِتگ، اے پُھل زورگریں پاکستانی پوج ءِ نیمگ ءَ چہ ھمکروچی ھساب ءَ پوجی راشن ءُ سُر ءُ پُرانی مول ءُ مرادانی ھاتر ءَ کارمرز کنگ بیتگ، کہ نو سرجمی ءَ بند بیتگ کہ آئی ءِ زمہ واری مئے گل منّ اِیت-

درشانانی گُڈی ءَ دوئیں گلاں بیتگیں اُرشانی زمہ واری منّ اِتگ اَنت-