کراچی ءُ ھب چوکی ءَ پاکستانی پوج ءَ چیریں ادارھانی کارندھاں زالبولے ءَ ھوار چار مردم آوار جتگ ءُ بیگواہ کتگ اَنت-
گیشیں ھالانی رِد ءَ کراچی ءِ دمگ چہ بلدیہ ٹاؤن ءَ یک زالبولے زورانسری بیگواھی ءِ وئیل دیم ءَ اتکگ، اود ءَ سانمندیں کھول ءِ گوشگ اِنت کہ سی ٹی ڈی، ایم آئی ءُ پولیس کارندھاں شپ ءَ لوگ سر ءَ بیڑبرتگ زالبولے وتی ھمراھی ءَ برتگ-
کھول ءِ رِد ءَ 25 مئی 2026 ءِ شپ کساس 12:40 ءَ کارندھاں گشین مزدور تھرڈ اسٹریٹ، بلدیہ ٹاؤن، نیول کالونی ءِ نزیک ءَ برجاہ لوگ ءَ پُترتگ اَنت پروشت ءُ پروش ءِ کتگ- کاروائی ءِ میان ءَ دو موباھل فون، یک گھڑی ءُ لوگ ءِ ڈائری ھم وتی ھمراھی ءَ برگ ءِ بھتام جتگ-
سانمندیں کھول ءِ چُک یاسر بلوچ ءَ گوشتگ کہ کارندھاں بید زالبولیں کارندھاں لوگ ءَ پُترتگ اَنت ءُ آئی ءِ مات ھبیبہ پیرجان زورانسری وتی ھمراھی ءَ برتگ- آئی ءِ رِد ءَ آ سلاہ ءِ زور ءَ گاڑی ءَ نندارینتگ، چمّ پُچے بستگ ءُ ناشناسیں جاھے ءَ برتگ اود ءَ آئی ءَ چہ جتاجتائیں جُست گپتگ- اشی ءَ پد سھب کساس چار نیم ءَ شیر شاہ ءَ یک بینکے ءِ دیم ءَ یل داتگ-
یاسر بلوچ ءَ گوشتگ کہ اے وئیل ءَ پد آئی ءِ مات ءِ درگت ءَ ھچ وڑیں ھال دز نہ کپتگ- آئی ءَ ٹاہ داتگ کہ اے ھبیبہ پیرجان دومی رند اِنت زورانسری آوار جنی ءِ نشانگ کنگ بیتگ- اشی ءَ ساری ھم آ 22 مئی 2022 ءَ زورانسری آوار جتگ ءُ سے روچ ءَ پد یل داتگ-
کھول ءَ ھبیبہ پیرجان ءِ زوت یل کنگ ءِ لوٹ کنان ءَ گْوشتگ کہ آئی ءَ کانود ءِ رد ءَ آمیدگس ءَ پیش بہ کن اَنت زوت یل بکن اَنت-
ھمے وڑ لسبیلہ ءِ دمگ وندر ءَ گوستگیں شپ ءَ پاکستانی پوج ءُ سی ٹی ڈی ءَ مزنیں کچے ءَ سرچ آپریشن لوگ لوگ ءَ پٹ ءُ پول دمگ مردمانی سر ءَ زوراکی، لُٹ ءُ پُل پروشت ءُ پروش ءِ وئیل دیم ءَ اَتکگ-
پاکستانی پوج ءَ اے میان ءَ بازیں مردمے آوار جتگ اَت کہ آیانی تہ ءَ سے ءِ پجّار نوید احمد ء عبدالقیوم زھری، شانزدہ سالی ئیں جاوید ء عبدالقیوم زھری ءُ پانزدہ سالی ئیں شھزار ء مھمد شریف زھری نام ءَ چہ بیتگ اَنت-
زانگ بہ بیت کہ اشی ءَ ساری ھمے کھول ءَ چہ رشیدہ بی بی ءُ رھیم زھری چہ شال ءَ زورانسری بیگواہ کتگ اِت اَنت ءُ پد ءَ یل کنگ بیتگ اَنت وھدے کہ تابش وسیم ءَ زھور احمد پاکستانی پوج ءَ بیگواہ کنگ ءَ پد دروگیں میڑے ءَ کشتگ اِت اَنت-
کھول ءُ دمگ مردمانی رِد ءَ گوستگیں شپ ءَ پاکستانی پوج ءَ چہ وندر ءَ بازیں مردمے آوار جتگ ءُ بیگواہ کتگ اَنت آ دگہ مردمانی پجّار انگت نہ بیتگ اَنت-