بلوچ نودربر گل بی ایس او آزاد ءَ آسروک ءِ روچ ءِ درگت ءَ یک پٹ ءُ پولی گُلگدارے ءِ سر ءَ کار کتگ، کہ آیاں جتا جتائیں پِڑاں گوں سیادی داروکیں مردمانی گوم ءَ ھال اھوال کتگ ءُ آیانی پسو وتی آفیشل چینل ءَ شنگ کتگ انت
اے درگت ءَ بی ایس او آزاد ءَ وتی آفیشل چینل ءَ شنگ کرتگیں درشانے ءِ تہ ءَ گوشتگ کہ 28مئی 1998 ءَ بلوچستان ءِ ھلک چاگے ءِ کوھی دمگ راسکوہ گوں ایٹمی شورھاں آس دیگ بیت، پاکستان ءَ شاتکامی بیت کہ نوں آ ایٹمی تاکتے جوڈ بوتگ ءُ پدا ایشی ءَ یومِ تکبیر ءِ نام ءِ سر ءَ داں روچ ء مرچی یات کنت۔ بلے اے ایٹمی تراک پہ بلوچ راج ءُ زمین ءَ یکشلیں تباھی یے بیت کہ چہ ایشی ءَ راسکوہ بن گِپت، ھزارانی کچ ءَ ساھدار مِر اَنت، موسم ءِ آپ ءُ ھوا مٹ بیت، بلوچستان ءِ ساپیں گوات شورھاں پُر بیت، مُرگ ءُ مال، انسان ءُ جناور، زمین ءُ کوہ، گوات ءُ آپ درست ھمے تراک ءِ زد ءَ کاینت ءُ داں مرچی ءَ آزردگ اَنت۔ اے ھمے ایٹمی تراک ءِ ریڈیشینانی سوب اِنت کہ مئے ڈیھ ءَ آسروک بیت ءُ داں روچ ء مرچی آئی ءِ سان گِندگ بنت۔ پمیشکا اے روچ پہ مارا روچ ء آسروک ( یومِ آسروخ) یا سیاہ روچ اِنت۔
آئی ءَ گوشتگ کہ 1970ءِ دھک ءَ ساؤتھ ایشیاء ءَ انڈیا اولی ایٹمی تاکت جوڈ بیت ءُ پاکستان ھم ایٹمی تاکتے جوڈ بوگ ءِ چِن ءُ لانچ ءَ لانک بندیت، ذولفقار علی بھٹو گُشیت “ما کاہ ور ایں بلے ایٹم جوڑ کنیں” بلے وھدے کہ ایٹم بَمب جوڑ بیت، پاکستان ءَ تاجے سر ءَ بیت ءُ پہ بلوچ ءَ کھرے کئیت ءُ کپ ایت۔ پہ ایٹمی تراک ءِ چکاسگ ءَ بلوچستان ءِ دورہ کنگ بیت ءُ چاگی ءِ راسکوہ گچین کنگ بیت، آ وھد ءَ پاکستان ھمے منانک ءَ دنت کہ اے دمگ ریگزارے ءُ اے کوھانی تہ ءَ ایٹمی شورہ زوت ھلاس بنت۔ بلے وھدے عبدالرزاق وتی ماسٹر ءِ تھیسس ءَ نبشتہ کنت درستاں پیش ھمے منانک ءَ رد کنت ءُ گُش ایت کہ اے ریگزارے نہ بوتگ، اِد ءَ بلوچانی میتگے بوتگ ءُ اے چکاس جاہ ءِ میتگ ءِ مردم زورانسری چہ وتی پت ءُ پِیرُکی ھلک ءَ بے سر ءُ سامان ءَ کشگ بوتگ اَنت۔ ھمے جاہ ءَ کمو گستا دگہ ھم آباتی بوتگ کہ آ ھمے تراک ءِ سانانی زد ءَ اتکگ ءُ سانمند بوتگ اَنت۔ پاکستان ایشی ءِ روا کنگ ءَ پہ ھر ڈولیں منانک بہ دنت بلے مرچی چاگے ءَ ھمے ایٹمی تراک ءِ باپُشت ءَ ودی بوتگیں جاور، مردمانی زند ءُ آیانی اندر ءَ زھنی ءُ جسمانی بیماری وت شاھدی دئینت کہ اے تراک چونیں رنگے ءَ کنگ بوتگ، ءُ ایشی ءِ ھاتر ءَ اے ھند ءِ مردمانی زند ءُ باندات ءِ بابت ءَ ھچ ھیال گور کنگ نہ بوتگ۔ پہ درور چاگے ءِ نیم آبادی ھیپاٹائٹس ءِ آماچ اِنت، پُپ، جگر ءُ کینسر ءِ نادراھی لس جیڑھے، چُشیں لوگے نیست کہ اُود ءَ چہ اے نادراھیاں یک نہ یک مردمے سانمند نہ اِنت۔
آئی ءَ گوشتگ کہ عبدالرزاق ءِ رد ءَ ھمک سیمی چُک کینسر آماچ اِنت۔
ھمے پیم ءَ ایٹم بمب ءِ جوڑکنگ ءِ وھد ءَ یورنییم کشگ ءِ پلانٹ ڈیرہ غازی خان ءَ جنگ بنت کہ چہ ایشی ءِ سوب ءَ سرجمیں ھند کینسر ءُ پُپ ءُ دگہ مردم کُشیں نادراھیانی آماچ اِنت۔
آئی ءَ گوشتگ کہ بلوچ راج ءَ چہ ھما روچ ءَ اے امل ءِ ھلاپ ءَ گھگیری کتگ چوشکہ کیچ ءَ سئے بلوچ ورنا شہسوار، شبیر ءُ سابر بلوچ ایشی ءِ ھلاپ ءَ گھگیری کنان ءَ پاکستانی بالی گُرابے ہائیجیک کن اَنت ءُ چہ پاکستان ءَ لوٹ کن اَنت کہ آ بلوچ ڈیھ ءَ وتی زوراکیاں بند بہ کنت بلے اد ءَ پدا زورگیر وتی ھکیگیں دیم ءَ پیش دار ایت ءُ بلوچ ورنایاں رد دنت۔ آ گوں دروگیں پندل ءَ دزگیر کنگ بنت ءُ آہانی تہ ءَ شہسوار ءُ سابر 2015 ءَ ھیدرآباد ءِ جیل ءَ شہید کنگ بنت ءُ شبیر ءَ کراچی ءَ جیل ءَ پاھو دیگ بیت۔
اے سرجمیں جاوراں چارگ ءَ پد اے منانک وتی اندر ءَ سرجم ءَ بے بُن اِنت کہ چاگے تھنا وتی جاہ ءِ سوب ءَ گچین کنگ بوتگ یا کہ ڈیرہ غازی خان یورنییم ءِ پلانٹ تھنا ھمے ھاتر ءَ جنگ بوتگ اَنت کہ چہ اُود ءَ یورنییم دراتکگ بلکیں ایشی ءِ پُژدری راستی تچک ءَ گوں بلوچ چُک چینی ءَ بندوک اَنت۔ ہمے پیم دومی مستریں سوب اِد ءَ ایشانی بگیری ءَ توار ءِ نہ بوگ اِنت، پمیشکا سرجمیں واک استان ءِ جند ءِ گور ءَ بیت ءُ آ اے کار ءَ ابید ء بلوچ ءِ رزا ءُ آئی ءَ بابت ءَ جیڑگ ءَ گوں دل ءِ مئیل ءَ کنت۔ پہ درور بلوچستان ءَ ڈن دگہ کجام ھم ھندے پہ ایٹمی تراک ءِ چکاسگ ءَ گچین کنگ بوتیں داں اود ءِ صوبائی ھکومت ءُ آ دگہ سیاسی تاکت ایشی ءِ دیم ءَ میلانک بوتگ اِت اَنت بلے بلوچستان ءِ ھکومت ءِ تہ ءَ اینچو جوھر ءُ ھاٹیگ مان نہ بیت کہ آ ایشی ءِ ھلاپ ءَ اوشتات بہ کنت، اوشتگ دوریں ھبرے ایشی ءَ چہ دزکشی ءِ جار ھم کس جت نہ کنت ءُ بلوچستان ءِ وتگڈیں سر وزیر وت پہ بلوچستان ءِ بُن دیگ ءَ پاکستان ءَ گوں دست ماں دست بیت۔ بلوچستان ءِ ڈیھ ءِ بُن دیگ ءَ پارلیمانی مردمانی مزنیں دستے مان کہ بیھ شموشگ نہ بیت۔
بلوچ نودربر گل آزادءِ باسک شولان بلوچ ءَ اولسر چہ چاگے ءِ جاھمنندیں بلوچ نودربر توکل بلوچ ءَ 28 مئی ءِ ویل ءِ درگت ءَ جست کتگ ۔
شولان بلوچ: اے ایٹمی تراک ءَ پد مردمانی سر ءَ نفسیاتی سان چون اَنت؟
توکل بلوچ: بنی آدم ءِ دودمان ءِ دیمروی ءِ گوستانک چہ زوراکی، جنگ ءُ جدل ءُ بُنکی انسانی ھکانی لگت مالی ءَ زبہر نہ اِنت۔ بنی آدم کہ مرچیگیں اے تیزگام ءُ دیمروی کتگیں اھد ءَ اتکگ ءُ سَر بوتگ اِشی ءَ زیردستیں راجانی سر ءَ بوتگیں زلم ءُ زوراکیانی ٹپ پِر اَنت۔ بنی آدم ءِ بندپتر ءِ دو سیاھیں اھد نوآبادیات ءُ نوک نوآبادیات اَنت کہ ھمے اَھد ءَ روکپت ءِ مزنیں تاکتاں وتی سیاسی، روزیگی ءُ لشکری تاکتانی گیش توانا ءُ مھکم کنگ ءِ ھاتر ءَ جھان ءِ نزور ءُ کسانیں راج زیردست کنگ بندات کُت اَنت ءُ مرچیگیں اَھد ءِ روکپتی تاکتانی مھکمی ءُ دیمروی ءِ تہ ءَ ایردستانی ھید ءُ ھون ھوار اَنت۔ بیستمی کرن ءِ دومی جھانی جنگ ءِ تہ ءَ امریکہ ءِ جاپان ءِ سر ءَ ایٹمی بمبانی کارمرزگ ءَ جھانی جہت ءَ استانانی تاکت ءِ روایتی کچ مَٹ کُت ءُ جاپان ءِ سر ءَ ایٹمی تراک ءَ جھانی جہت ءَ ایٹمی تاکت جوڑ بوگ ءِ نوکیں ریس یے بِنا کُت ءُ ھمے استانانی ایٹمی تاکت جوڑ بوگ ءِ سان تچک ءَ نوآبادیات آنی سر ءَ کپت اَنت ءُ ھمے اَھد ءَ روکپت ءِ استاناں ایٹمی تاکت جوڑ بوگ ءِ ھاتر ءَ زورآنسری نزور ءُ ایردستیں راجانی مادن ءُ زمینانی کارمرزگ بنا کُت۔ استانانی ھمے عمل پوسٹ کالونیل ٹیکسٹ ءُ ھستیں اکیڈمیا ءِ تہ ءَ نیوکلیئر کالونیلزم ءِ نام ءَ پجارگ بیت۔ فرانس ءِ الجیریا ءِ تہ ءَ ۱۹۶۰ ءِ دہک ءِ ایٹمی تراک ءُ برطانیہ ءِ ۱۹۶۰ ءِ دہک ءَ آسٹریلیا ءِ زمین ءَ ایٹمی بمب ءِ تراک نیوکلیئر کالونیلزم ءِ مستریں درور اَنت۔۱۹۷۴ ءَ وھدے انڈیا راجستان ءِ تہ ءَ وتی ایٹمی تراک ءَ کنت گڑا پاکستان اِشی ءَ پہ وتی ھستانک ءَ شریں پالے سرپد نہ بیت کہ زرباری ایشیا ءِ تہ ءَ پاکستان ءُ انڈیا یکے دومی ءِ ھستانک ءَ مَنّگ ءَ تیار نہ انت۔ ھمے درگت ءَ پاکستان ءِ سر وزیر انڈیا ءِ ایٹمی تاکت ءِ جوڑ بوگ ءِ ترس ءَ ایٹمی بمب ءِ جوڑ کنگ ءِ چن ءُ لانچ ءَ بندات کنت ءُ 28 مئی 1998 ءَ چاگے ءِ دلبند راسکوہ ءِ سرمگیں کوھانی دل ءَ پنچ تراک کنت کہ چریشی ءِ سبب ءَ چاگے ءِ زیردستیں ھزاراں سال پیسر آبادیں بلوچ چہ وتی جند ءِ پِت ءُ پیرُکی ھلک ءُ میتگاں در آیگ ءَ لاچار کنگ بنت ءُ ایٹمی تراک ءِ نفسیاتی ساناں ھوار تابکاریانی سبب ءَ چاگے ءَ ھوار کَش ءُ گور ءِ زیردستیں بلوچ آبادی جُتائیں نادُراھیانی آماچ بنت کہ داں روچء مرچی ھم کینسر ءُ ھون ءِ نادُراھی(تھیلسیمیا) ءِ دروشم ءَ زیردستیں بلوچ راج ءِ چکچینی گیش بوگ ءَ انت۔
چاگے ءِ مہلوک ءِ سر ءَ ایٹمی تراک ءِ نفسیاتی سان:
تبزانتی ءِ تہ ءَ ھمُک ھما عمل کہ آ انسانی روشتانی تہ ءَ بدلی ءِ مانزمان بنت آھانی الّم سان انسان ءِ نفسیات ءِ سر ءَ کپ انت ءُ ٹراما دیدانک ءِ رِد ءَ ھمُک ھما ویل کہ انسانی تب ءِ ھلاپ بہ بیت آئی ءِ سان انسانی نفسیات ءِ سر ءَ کپ انت کہ چریشی ءِ سبب ءَ انسان چہ نارملیں کنڈیشن ءَ در کیت ءُ نفسیاتی نادُراھیانی آماچ بیت۔ ۱۹۴۵ ءَ وھدے جاپان ءِ سر ءَ ایٹمی تراک کنگ بنت گڑا ھمے تراکانی سبب ءَ کساس سئے لک مردم مرگ ءِ آماچ بیت۔ ھمے تراک ءِ وھد ءَ رکیتگیں مردم کہ جاپان ءِ تہ ءَ آھاں ہباکوشا گُش انت، ھمے رکیتگیں یا کہ ایٹمی تراک ءَ چمء وت دیستگیں مردم دائمی بزان کہ داں مرگ ھمے ٹراما ءِ تہ بوتگ انت ءُ مدام انزائٹی ءِ آماچ بوتگ انت۔ چاگے ءِ دلبند ءَ ناروائیں پاکستان ءِ ایٹمی تراک کہ وتی ابرم ءِ تہ ءَ سرجم ءَ انسانی تب ءِ ھلاپیں عملے بوتگ ءُ اِشی ءَ ابید زیردستیں بلوچ راج ءِ زمین ءِ سر ءَ زورانسری ایٹمی تراک چاگے ءِ مہلوک ءُ بلوچ راج ءِ سر ءَ دائمی نفسیاتی سان دور دیگ ءِ سبب جوڑ بوتگ۔
ایٹمی تراک ءِ سان تہنا تابکاری ءُ جتائیں جسدی نادُراھیانی دروشم ءَ نہ بنت بلکیں تراک ءِ جند وتی تہ ءَ سک بیمناک ءُ ھترناکیں ندارگے بیت ءُ ھمے بیمناکیں ندارگ ءِ سان تراک ءَ چمء وت دیستگیں یا کہ تراک ءِ وھد ءَ ساڑی ئیں مہلوک ءِ سر ءَ دائمی ترس ءُ بیم ءِ وسیلہ جوڑ بیت۔ چاگے ءِ مہلوک ءُ ھاس چھتر(راسکوہ ءِ کش ءِ میتگ)ءُ رائیو(راسکوہ ءَ چہ کساس 5 کلومیٹر دوریں میتگے) ءِ جاہمنند کہ اِشاں ایٹمی تراک ءِ سبب ءَ درجہ حرارت ءِ تہ گیشی ءَ ھوار راسکوہ ءَ چہ دنز چست بوگ ءَ دیستگ، ھمے مہلوک ءِ مجگ ءَ نکش بوتگ ءُ اِشانی ھاتر ءَ راسکوہ مدامی ترس یے جوڑ بوتگ۔ زیردستی بُن اسل ءَ وتی تہ ءَ سرجم ءَ ھندی مہلوک ءُ زیردست ءِ سر ءَ نفسیاتی اُرش یے بلے اے دابیں عمل ءُ زوراکی کہ چاگے ءِ مہلوک ءَ چمء وت دیستگ کہ چوں پاکستان ءِ پوجی لشکر چھتر ءُ رائیو ءِ جاہمننداں چہ آھانی میتگاں در آیگ ءَ لاچار کنت ءُ پدا ھمے مہلوک وتی ھزاراں سالی پِت ءُ پیرُکی میتگاں چہ تابکاریاں رکگ ءِ ھاتر ءَ دوبر شُت نہ کنت اے دابیں زوراکی ءُ ایٹمی تراک ءِ ندارگ چاگے ءِ مہلوک ءِ واستہ دائمی بیم یے جوڑ بوتگ۔
تابکاریانی چاگے ءِ مہلوک ءِ سر ءَ نفسیاتی سان:
مرچیگیں اھد ءِ درستیں سلاھاں چہ بیمناک ءُ ھترناکتریں سلاہ ایٹم بمب اِنت کہ اے سلاہ نہ تہنا ھاسیں جاہے ءَ ھاسیں مدتے ءِ واستہ تباھی کنت بلکیں ایٹمی تراک ءِ سان داں کرناں ھما مہلوک ءِ سر ءَ کپ انت ءُ ھمے ایٹمی تراک ءِ تابکاریانی سان نسل در نسل ھما ھندی مہلوک ءِ جُتائیں جسدی ءُ نفسیاتی نادُراھیانی سبب جوڑ بنت۔ جسدی نادُراھیانی تہ ءَ کینسر ءُ تھلیسیمیا ھما گچینی نادُراھی انت کہ ھمے تراک جاہ ءُ کش ءُ گور ءِ میتگانی مہلوک ءِ تہ ءَ گندگ ءَ اتکگ انت۔ اِشی ءَ ابید نفسیاتی سان کہ سرجم ءَ ھندی مہلوک ءَ ابنورملٹی ءِ نیمگ ءَ برگ ءِ سبب جوڑ بنت، ھمے نفسیاتی سانانی تہ ءَ یکے تابکاریانی سبب ءَ مرگ ءِ تُرس اِنت کہ مدامی تراک جاہ ءُ کش ءُ گور ءِ میتگانی مردماں گون بیت ھمے پیم ءَ چاگے ءِ مہلوک ءِ تہ ءَ ھم ھمے تابکاریانی سبب ءَ جُتائیں نادُراھی ءُ مرگ ءِ بیم داں روچء مرچی ھست اِنت کہ تبزانتی ءِ تہ ءَ اِشی ءَ ٹرانس جنریشنل ٹراما ءِ نام دیگ بوتگ۔ ٹرانس جنریشنل ٹراما ھما ٹراما ءَ گُش انت کہ نسل در نسل بزان کہ یک پدریچے ءَ چہ دومی پدریچ ءَ سر بیت ءُ ترس ءُ بیم ءِ سبب جوڑ بیت۔
ٹرانس جنریشنل ٹراما ءَ ابید چاگے ءِ مہلوک ءِ تہ ءَ ایٹمی تراک ءِ تابکاریانی سبب ءَ لڈ ءُ بار، جنگل ءُ درچکانی ھشک بوگ، آپ ءِ یکیں وسیلہ بزان کہ چمگ ءُ چاتانی لُرد ءُ تہل بوگ ءَ ھوار دلوتانی مِرگ ءِ ھم نفسیاتی سان مہلوک ءِ سر ءَ کپتگ اَنت کہ اِشی ءِ تہ ءَ اسٹریس ءُ ڈپریشن ھوار انت۔ اے ھما نفسیاتی نادُراھی انت کہ نوآبادیات ءِ تہ ءَ زیردست ءَ چہ زوراک ءِ زوراکی ءُ کرتنانی سبب ءَ چہ اولی روچ ءَ گون بنت بلے ایٹمی تراک ءَ پدا تابکاریانی سبب ءَ پیسر ءَ چاگے ءِ بزگیں مہلوک ءِ بزگی گیشتر بوتگ کہ اِشی ءِ سان تچک ءَ مہلوک ءِ نفسیات ءِ سر ءَ کپتگ۔
چاگے ءِ دلبند ءَ ایٹمی تراک ءُ پاکستان ءِ نفسیاتی اپروچ:
زورگیر ءِ ابرم ءُ تب ءِ تہ ھندی مہلوک ءِ ھاتر ءَ زہر ءُ کینگ مان ءُ زورگیر ءِ ھمے سپریمیسی ءِ ھیال آئی ءَ زیردست ءِ سر ءَ تشدد پرمائیت دانکہ آ چہ تشدد ءِ وسیلہ ءَ ھندی مہلوک ءِ تہ ءَ وتی تُرس ءَ جاہ بدنت ءُ گہگیری ءِ راہ ءُ دراں بند بہ کنت۔زروگیر ءِ ھمے تشدد ءِ کالب ءَ اگاں ناروائیں پاکستان ءِ بلوچستان ءِ دمگ چاگے ءَ ایٹمی تراک ءَ بیاریں ءُ جاہ بدیں داں ھمے سما بیت کہ پاکستان ءَ پہ وتی ایٹمی تراک ءِ ھاتر ءَ بلوچ ءِ زمین ءِ گچین کنگ ءِ مستریں سبباں چہ یکے بلوچ راج ءِ تہ ءَ دائمی نادُراھی پیداک کنگ اِنت کہ مرچی چاگے ءِ مہلوک جُتایں جسدی ءُ مجگی نادُراھیانی آماچ اِنت۔ اِشی ءَ ھوار بلوچ زمین ءِ سر ءَ ایٹمی تراک ءِ پاکستان ءِ نفسیاتی اپروچ وتی سپرریمیسی ءُ تاکت ءِ پیش دارگ اِنت۔ اِشی ءِ درور ءَ ما اے پیم ءَ زرت کنیں کہ بلوچ راج ءِ لہتیں ٹولیانی میان ءَ اے باوست سک ءَ ارزشت دیگ بیت ءُ ھر جاہ اِشی ءِ تبلیغ کنگ بیت کہ ناروائیں پاکستان ایٹمی تاکتے ءُ گوں ایٹمی تاکتاں جنگ کنگ نہ بیت۔ اے ناروائیں پاکستان ءِ ھما گیشتگیں اپروچ بوتگ کہ بلوچ مہلوک ءِ تہ ءَ جاہ بہ کنت ءُ بلوچ راج چہ گہگیری ءِ راہ ءَ تُرس آماچ بہ بیت، فرائرے زیردست ءِ ھمے اپروچ ءَ فیئر آف فریڈم ءِ نام ءَ دنت ءُ گُشیت کہ چہ زورگیر ءِ تشدد ءِ تُرس ءُ آئی ءِ جوڑ کتگیں ھیالاں زیردست چہ آجوئی ءَ تُرسیت بزان کہ چہ گہگیری ءَ ترس آماچ بیت۔
شولان بلوچ: ھستیں وھد ءَ ھمے جاہ چون اِنت؟ اود ءَ رؤگ ءِ اجازت ھست؟
توکل بلوچ: راسکوہ ءُ ھاس ھما جاہ کہ ناروائیں پاکستان ءَ وتی ایٹمی تراک کُتگ اَنت، آ جاہ ءَ تراک ءِ روچ ءَ داں روچء مرچی لس مہلوک ءَ رؤگ ءِ رزا نیست۔ اگاں دری مردمے راسکوہ ءَ رؤگ لوٹیت گڑا الّم اِنت کہ چاگے ءِ جاہمنندے آئی ءِ ھمراہ بہ بیت بلے دیمتر ءَ ناروائیں پاکستان ءِ پوجی لشکر رؤگ ءَ رزا نہ دنت ءُ ھستیں وھد ءَ ھمے تراک ءِ جاہ ءِ کش ءُ گور ءَ پاکستان ءَ وتی ناروائیں پوجی داشتگ انت، اِشی ءِ مستریں سبب ڈَنی میڈیا پرسن ءُ پولکارانی ترس اِن
ت کہ اگاں ڈَنی پولکار یا کہ دگہ اھوالکارے تراک ءِ جاہ ءَ ڈاکومینٹ بہ کنت ءُ جھان ءِ دیم ءَ بیاریت، پاکستان ءِ بلوچ چکچینی ءِ پالیسی دگنیا ءِ دیمءَ پدؔر بنت۔ ھمے سبب اَنت کہ ھندی مہلوک ءَ ھوار ڈَنی مردماں راسکوہ ءِ تراک ءِ جاہ ءَ ھچ وڑ ءَ رؤگ ءِ رزا نیست۔