بلوچستان ءِ دمگ دکی ءَ بارودوی سرنگ ءِ تراک ءَ دو سیکورٹی کارندہ ٹپیگ بوتگ انت ءُ پسنی ءَ دو سیکورٹی کارندہ ءِ بیرانی ءِ ھال دیم ءَ اتکگ انت۔
پولیس ءِ رد ءَ دکی ءِ دمگ لونی تلاؤ کچ ءَ بوتگیں وئیل ءِ تہ ءَ ٹپیگیں مردمانی پجار عبدالرحمان ءُ نواب ءِ نام ءَ بوتگ۔
واکدارانی گشگ انت کہ اے دوئیں کارندہ چہ چمالنگ ءِ دمگ ءَ آیوکیں کوئلہ ءِ ٹرک ءِ کاروان ءِ پھزداری ءِ ھاتر ءَ اوشتوک بیتگ انت۔
بنداتی ھالانی رد ءَ اے کارندہ موٹر سائیکل ءِ سر ءَ گشت کنگ ءَ بیتگ انے کہ سڑک ءِ کش ءَ کلیں بمبے ترک اتگ کہ ایشی ءِ آسر ءَ دوئیں سک ٹپی بوتگ انت۔
دومی نیمگ ءَ بلوچستان ءِ دمگ پسنی ءَ بوتگیں اُرش ءَ واکداراں دو کارندھانی بیرانی ءِ پدرائی کتگ۔
زانگ بہ بیت کہ گوستگیں روچ ءَ پنجگور ءِ دمگ چیدگی ءَ بمب تراک ءَ پاکستانی لشکر ھم نشانگ جوڑ کنگ بوتگ ات کہ ایشی ءِ تہ ءَ یک گاڑی یے سرجم ءَ تباہ بوتگ وھدے کہ کارندھانی بیرانی ءِ ھال دیم ءَ اتکگ اَنت۔