کلات: بی ایل اے ءِ دست ءَ دزگیریں پولیس کارمند ءِ مات ءَ چک ءِ یل کنگ ءِ لوٹ کتگ

بلوچ لبریشن آرمی ءَ گوستگیں روچاں بنجاھی شھدگ ءِ سر ءَ ناکہ بندی ءِ وھد ءَ لسبیلہ پولیس ءِ پنچ کارندہ دزگیر کتگ انت کہ آھانی تہ ءَ محمد ناصر بلوچ ءِ مات ءَ گل ءَ را وتی زھگ ءِ یل دیگ ءِ لوٹ کتگ-

وتی ویڈیو کلوہ ءِ تہ ءَ پولیس سپاھی مھمد ناصر ءِ مات ءَ گشتگ منی چک ءَ گوں کس ءَ دژمنی نہ بوتگ ءُ آ وتی چکانی لاپ ءِ واستا پولیس ءِ تہ ءَ کار کنگ ءَ بیتگ-

زانگ بہ بیت کہ بلوچ آجوئی ءِ لشکر ءِ ھاسیں لشکر فتح اسکواڈ ءَ آدینگ ءِ روچ ءَ قلات ءِ شھر منگچر ءَ بازیں کلاکاں وتی دستیگی برجاہ داشتگ ءُ نادر ءِ کارگس، جوڈیشل کمپلیکس ءُ بینک ءَ ھوار دگہ سرکاری ماڑیانی سر ءَ دستیگی کتگ ءُ سوتکگ انت ءُ لشکر ھم نشانگ کنگ بیتگ ات-

واکداراں پولیس ءِ کارندھانی آوار جنگ ءِ ھال راست کتگ ءُ گشتگ کہ آ ھب پولیس ءِ سب انسپکٹر انور بلوچ، اے ایس آئی غلام سرور، سپاھی شبیر احمد، فراز احمد ھوالدار، محمد اقبال شیخ سپاھی ءُ محمد ناصر سپاھی ءِ نگرانی ءَ روان دیگ بوتگ انت۔

واکدار ءِ گشگ ءِ رد ءَ آدینگ ءِ شپ ءَ ھما وھد ءَ کہ زندانیان ءِ وین کہ پرائیویٹ ہائیلکس وینے بیتگ کلات منگچر ءِ دمگ ءَ سر بوتگ ناشناسیں سلاہ بندیں مردماں گاڑی داشتگ ءُ گوں وت ءَ ناشناسیں جاھے ءَ برتگ۔

بی ایل اے ءِ جارچین جیئند بلوچ ءَ وتی یک بیانے ءِ تہ ءَ گْوشتگ کہ پولیس ءِ کارندہ بلوچ راجی آمیدگس ءَ کارروائی کنگ ءَ اَنت کہ آھانی یلہ کنگ یا سزا دیگ ءِ پیسلہ آمیدگس ءَ کنت۔

ایشی ءَ ابید سپاھی محمد ناصر ءِ مات ءَ چہ گل ءُ دگہ مردماں لوٹ کتگ کہ آ آئی ءِ زھگ ءِ جان سلامتی ءِ ھاتر ءَ کرد پیلو بہ کن انت۔