ریاستی رٹ ءِ ھوشام
ٹی بی پی شونگال
2 مئی ءِ بیگاہ ءَ بلوچستان ءِ دمگ کلات اسٹریٹیجک ءِ گچینی یے شھر منگچر ءَ درزنانی کساس ءَ سلاہ بندیں مردماں مھکم ءُ بازیں کچے ءَ اُرش کتگ ءُ بازیں اداراں وتی زور برجاہ داشتگ – ھمے وھد ءَ نادرا آفس، جوڈیشل کمپلیکس، بینک ءُ بازیں سرکاری ماڑی ماندارگ بیتگ- پاکستانی پوج ءِ بنجاھی بنجل نشانگ کنگ بیتگ، پولیس ءِ بازیں کارندہ گوں سلاھاں دزگیر کنگ بیتگ انت- اے اُرش ءِ زمہ واری بلوچ لبریشن آرمی ( بی ایل اے) ءَ من اتگ ات-
منگچر ءِ شھر کراچی ءُ شال ءَ ھوار کنوکیں شھدگ (این- 25 ) ءِ سر ءَ انت، ءُ آئی ءِ سر ءَ بازیں اداراں داں اوشتگ ایوک ءَ یک اُرشے نہ انت بلکیں یک تچکیں کلوھے- ھمے سال ءَ بی ایل اے ءِ اے چارُمی مسترین ءُ ھترناک تریں اُرش انت، ایشی ءِ درچ بلوچ سلاہ بندیں زرمبشت ءِ گامگیجی ءَ گچینی رنگے ءَ دیم ءَ آیگ ءِ نشانی ءَ کنت اِنت- ایشی ءَ پیش ڈھاڈر ءِ ھند مشکاپ ءَ جعفر ایکسپریس گرگ بیتگ ات- نوشکی ءَ پوجی کاروان ءِ سر ءَ فدائی اُرش کنگ، ھمے وڑ تربت ءُ ھزدار ءِ ھنداں ھم اے دابیں کاروائی کنگ بیتگ انت کہ چریشاں پوج ءَ بازیں کچے ءَ جانی تاوان بیتگ انت-
منگچر ءِ دستیگ کنگ ءَ پیش جنوری 2024 ءَ بی ایل اے ءَ مَچ ءِ شھر ءَ اُرش کتگ ءُ سَے روچاں داں وتی زور برجاہ داشتگ، جنوری 2025 ھزدار ءِ دمگ زھری ءَ ھم سلاہ بندیں کاروائیاں پد سرکاری ماڑی سوچگ بیتگ انت ءُ پولیس ءِ سلاہ دستیگ کنگ ءُ شھر ءِ بازیں جاھاں گشت کنگ بیتگ ات-
بی ایل اے ءُ بلوچستان لبریشن فرنت ءِ نیمگ ءَ یکشل ءَ شھراں اُرش، مڈی بروکیں ٹرالرانی سر ءَ کاروائی، ءُ راجی شھدگانی سر ءَ اوشتگ سنیپ چیکنگ کنگ ءِ گامگیجاں بلوچستان ءَ پاکستانی ریاستی رٹ ھوشامی ءِ آماچ کتگ- اے اُرشانی رواج، منسوبہ بندی، ءُ ترندی اے گپ ءِ پدراھی ءَ کن انت کہ بلوچ سلاہ بندیں گل نی رواج گپتگیں گوریلا کاروائیاں درکپتگ انت ءُ دیم ءَ جنزگ ءُ شھرانی دستیگ کنگ ءُ ھاکمی ءِ چیدگ ءَ جنزینگ ءَ انت-
اے جاوراں اے جست ترندی ءَ چِست بیگ ءَ انت کہ چین – پاکستان گزرانکی رھداری (CPEC) ءِ وڑیں منسوبہ بلوچستان ءَ بلوچ راجی ادارھانی وشی ءُ بھرینگ ءَ ابید مھکم بیت کن انت؟ منگچر ءِ شھر ءِ وڑیں شھر ءَ چو گروک ءَ شھم جنوکیں دستیگی ءُ سلاہ بندیں ٹولیانی کاروائی اے گپ ءِ پدراھی ءَ کن انت کہ بلوچستان ءَ لٹ ءُ وروکی ءِ سرپد بیوکیں دیمروئی ءِ منسوبہ، دمگی سیاسی ءُ راجی راستیاں ڈالچار کنگ جوانیں کارے نہ بیت انت-