سید ظھور شاہ ھاشمی
نبشتہ کار: بیبرگ بلوچ
دی بلوچستان پوسٹ
راجدپتر ءِ تاکدیم ھما مردماں ھچبر گار ءُ بیگواہ نہ کنت ھما کہ وتی راج ءِ درداں مار اَنت وتی راج ءِ پجار ءَ رکین اَنت وتی پجاراں بیگواہ نہ کن اَنت سید ظھور شاہ ھاشمی ھم چہ ھمے مردماں یکے بہ کول اے آر داد ئیگ ءَ مئے کر ءَ سید ھاشمی اولی مردم اِنت کہ آئی ءَ وتی ڈگار ءِ واستا وت آپ آؤرتگ ءُ وت زمین ءَ را ننگار کتگ۔
واجہ 21 اپریل 1926 ءَ ماں گنجیں گوادر ءَ ودی بوتگ آئی ءِ شرپداریں پت ءِ نام محمد شاہ اَت، سید ءَ وتی بنگیجی وانگ گوادر ءَ در بُرتگ۔ سید ءِ اربی ءِ استاد مولوی محمد حسن اَت، سید ءَ بازیں زبانانی سر ءَ دزرس ھم بوتگ ءُ آ یک زبانزانتے ھم بوتگ۔
گوادر ءَ پیداک بوؤکیں سید ھاشمی پہ راج ءَ مزنیں ھزانگ ءُ مڈی ءِ رنگ ءَ دیم ءَ اتک، سید یک مردمے نہ اَت آ یک مزنیں اکیڈمی یے اَت تو گش ئے کہ آ یکیں کسمانک ءِ بازیں کرد ءُ کارست اَت، یک نیمگے گوں راج ءِ اڑ ءُ جنجالاں گلائیش اَت ءُ یک نیمگے زبان ءِ گار ءُ بیگواھی ءِ درداں مارگ ءَ اَت ۔یک نیمگے بے ھیال بیتگیں مردماں تژن جنت ءُ راستیں ءُ زگریں راہ آیاں پیشدار اِیت۔
سید ءَ چاگرد ءِ ھر پڑ ءِ جیڑہ ءُ کارانی تہ ءَ کہ بھر زُرتگ گڑا مزنیں ھدے ءَ آ کار جاھے ناں جاھے ءَ سر کُتگ۔ آئی ءِ اِے جھد وتی ماتی زبان بلوچی ءِ واستا بیتگ سید ءَ را ناں روچ ءَ را روچ زانتگ ناں شپ ءَ را شپ ھر جاہ ءُ ھر وھد ءَ آئی ءَ بلوچی زبان ءِ ھزمت کتگ ءُ ما گشت کن ایں کہ سید ءَ وتی سرجمیں زندگی پہ بلوچی زبان ءُ لبزانک ءِ واستا ندر کتگ۔
اگاں ما سید ءِ ازم ءِ نیمگ ءَ بہ رو ایں ماہ ءُ سال گْوز اَنت بلے آئی ءِ ازم ھلاس نہ بیت پرچا کہ آئی ءِ سسّا مزن بوتگ پہ بلوچی زبان ءُ کوم ءِ واستا، اے گپ ءِ ھرکس منوگر اِنت کہ سید ءَ را آئی ءِ زند ءَ اینکس بستار نہ رس اِتگ کہ آئی ءَ کرز اِتگ ءُ سید اے گپ ءِ زانوگر بوتگ کہ انچیں روچے کیت کہ منی پد منتگیں راج منی گّشتگیں گپّاں گیر کار اِیت ھمے ھاتر ءَ آئی ءَ گُشتگ کہ:
“من جزماں کہ پد ءَ کیت اِنت یک وژدلیں باریگے”
“ھر رنگ “ءَ سید گوازین اے رنج ءُ گم ءِ سالاں
سید ءِ زند ءِ جاور نگیگ گیش ءُ وشدلی کم بیتگ اَنت بلے انگت ءَ آئی ءِ ھیال ءُ دل ءُ زھن ءَ آئی ءِ جزبگ کلات ءِ دروشم ءَ بُرز بوتگ اَنت ءُ ھمے سبب ءَ سید ءَ ھانل بزاں ماتی گلزمین ءِ درد وتی جند ءِ درد کتگ اَنت ءُ گلزمین ءَ گوں وتی ھانل ءِ نام ءَ شیرانی تہ ءَ توار جتگ ءُ آئی ءِ دستونکانی ٹوھیں بھرے ھم ھانل بوتگ۔
واجہ وتی دستونک ءَ ھانل ءِ درداں گِند اِیت ءُ گُش اِیت کہ:
”
سستگ اِش چہ من ھانل ،ھانُلیں ڈگار مسکیں”
“چو کپوت ءَ نالاں چوں دل ءَ بہ داراں من”
“ارس گُلگل ءَ کاینت مھر ءُ دوستی ءِ چمّاں”
“من گلاں کہ وار ئے تو ۔ تو گل ئے کہ واراں من”
سید ءِ زِند ءِ تہ ءَ ھر وڑیں جاور اتکگ اَنت بلے سید وتی کاراں چہ پُشت ءَ نہ کنز اِتگ سید ھمے ھاتر ءَ گُش اِیت کہ:
” گار باں توپان باں بیگواہ باں بلے سید”
“اے شگان ءَ جت مہ کنت کسّے کہ پُشت ءَ کنز اِتگ”
واجہ ءَ راست گُشتگ من گار ءُ بیگواہ باں بلے پُشت ءَ نہ کنزاں ءُ منی دُژمن من ءَ اِے شگان ءَ مہ جنت کہ سید پُشت ءَ کنز اِتگ واجہ یک بلاھیں پگرے ءِ واھُند بوتگ ۔
سید ءَ چو اکبال ءِ وڑ ءَ واب نہ دیستگ بلکیں آئی ءَ آگھی ءَ کار کُتگ، اے آر داد اے بابت ءَ گوش اِیت کہ سید ءِ جیڑہ ایش اِنت کہ اے مرد وتی زندگی ءَ نہ وپتگ بزاں وتی کاراں چہ پُشت ءَ نہ کِنز اِتگ، سید آگھیں مردمے سید ھر چیز ءَ را چارگ ءَ اِنت گندگ ءَ اِنت ءُ ایشاں درشان کُت کنت پمیشکا آئی ءِ بُت ءَ را کم شرپ کنگ بوتگ۔ اے بابت ءَ اے آر داد ءَ راست گوشتگ کہ مروچی کس نہ زانت کہ لینن ءِ بُت دور دیگ بوتگ یا گوئیٹے دور دیگ بوتگ یا بودلئیر ءِ دور دیگ بیتگ ما دُرستاں ایشانی بابت ءَ نبشتہ کُتگ ءُ بلوچ ءِ کر ءَ اے جیڑہ ھست ۔ بلے آئی ءِ لوگ ءِ دروازگ ءِ دپ ءَ سید ءِ بُت کم شرپ کنگ بوتگ اے بابت ءَ کسّے ءَ ھچ نہ گُشت ءُ ناں کہ کسے ءَ شریں توارے چست کت، سید وَ یک زبانے، مردم ءِ وتی زبان اگاں مُرتگ شاھیں سید بلے نام ئِے زندگ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-