مستونگ ءَ لکپاس ءِ ھَند ءَ چہ ھکومت بلوچستان نیمگ ءَ چہ گوستگیں 19 روچاں کراچی، شال ءِ بُنجاھی دگانی بند بوگ ءِ سبب ءَ چہ تاجر برداری ، مزدور دگہ باز لس مھلوک پریشانی ءَ چہ تنگ آتکگ انت۔ ھمے روچانی تہ ءَ کاروباری مردمانی مال، وردن ءُ وراک ءِ سامان، بزاں سبزی، نیبگ درست ھراب بوتگ اَنت۔
مستونگ لکپاس ٹنل ءِ بند بوگ ءِ سبب ءَ ھم رخشان ڈویژن، مکران ڈویژن، قلات ڈویژن ءُ چی کراچی ءُ دگہ بازیں دمگ روگ ءُ آیگ سبب ءَ سان گپتگ اَنت۔
شال ءِ یک کاروباری مردمے ءَ دی بلوچستان پوسٹ ءَ را گْوشتگ کہ ھکومت ءِ چہ ھمے عمل بلوچستان ءُ ھاسکر شال ءِ تاجر برادری ءِ کُلُڑانی زر تاوان ءَ شُتگ اَنت ۔
نیبگ ، سبزی ، شیرینی ، نمکو، ھشکیں نیبگ ءُ دگہ باز انچیں وردن ءُ وراکی سامان چہ بے بَھائی ءِ سبب ءَ آیانی کاروبار جام بوتگ ءُ تاوان ءِ آماچ جوڑ بوتگ اَنت۔
تاجرانی لوٹ اِنت کہ راہ ھکومت ءَ بند کتگ انت ، ریاست ءِ ذمہ واری بیت انت کہ آ وتی لس مھلوک ءُ بُنکی آسراتیاں بدنت، جان ءُ مال ءِ پَھریزگ، ءُ آسانی دیگ ءَ چست ءُ ایر بکنت۔
ھیال گور بہ بیت کہ ضلع مستونگ ءِ ھَند لک پاس ءَ چہ 28 مارچ بلوچستان نیشنل پارٹی ءِ چیردستی ءَ ڈاکٹر ماہ رنگ بلوچ ءُ بلوچ یکجھتی کمیٹی ءِ دگہ رھشونیں زالبول ءُ باسکانی یل کنگ ءِ ھاتر ءَ نندانک برجا اِنت۔
نندانک ءِ پگری سنگت، کھول ڈاکٹر ماہ رنگ بلوچ ءُ بلوچ یکجھتی کمیٹی ءِ دگہ رھشونیں زالبول ءُ باسکانی یل کنائینگ ءِ ھاتر ءَ داں شال ءَ لانگ مارچ کنگ لوٹ اِتگ اَت ءُ بلے چہ سرکاری ادارھانی نیمگ ءَ دگ ءُ روڈ بند کنگ ءِ سبب ءَ لانگ مارچ ءَ کھول ءُ پگری سیاسی سنگت شال ءَ شُت کُت نہ کُت۔ ءُ پد ءَ لک پاس ءَ نندانک داتگ وھدے کہ انگت ءَ برجا اِنت۔
تاجر برداریانی گْوشگ انت کہ ھکومت بلوچستان ءِ زد ءُ کینگ چہ مالی بدھال بلوچستان گیش مالی بدھال ءِ نیمگ ءَ روان انت ءُ ھکومت ءَ درست شر انت کہ آیانی رِٹ ءَ جنگ ءَ انت-