بلوچستان ءِ دمگ مستونگ ءَ دشت روڈ ءَ بلوچستان کانسٹیبلری ءِ بس ءِ سر ءَ آئی ای ڈی ءِ بمب تراکے ءَ سَے کارندہ بیران ءُ 19 ٹپیگ بوتگ انت۔
تراک دشت روڈ ءِ سر ءَ کُنڈ مسوری ءِ نزیک ءَ بوتگ ۔ اے تراک موٹر سائیکل ءِ تہ ءَ ایر کنگ بوتگیں ریموٹ کنٹرول ءِ دھماکہ ءِ زور ءَ کنگ بوتگ۔
پولیس ءِ رد ءَ بلوچستان کانسٹیبلری ءِ کارندہ چہ ڈیوٹی ءَ واتر بوھگ ءَ ات انت۔ بیران ءُ ٹپیگیں کارندہ نادراھجاہ ءَ سر کنگ بوتگ اَنت۔
ڈی ایس پی مستونگ یونس مگسی ءِ رد ءَ مستونگ ءِ دمگ کنڈ مسوری لیویز ءِ ھد ءَ کیت بلے دھرنہ ءِ سبب ءَ مئے کارندہ پولیس ءِ کارندہ لیویز ءِ ھمراھی ءَ ڈیوٹی کنگ ءِ پرمان داتگ ءُ مئے جوان روچے وتی ڈیوٹی ءِ سرجم کنگ ءَ پد مستونگ پولیس لائنز ءَ واتر بوتگ انت۔
آئی ءَ گوشت کہ مرچی چل ءَ چہ گیش افسر وتی ڈیوٹی ءَ سرجم کنگ ءَ پد پولیس ءِ بس ءَ واتر بوھگ ءَ ات انت کہ موٹر سائیکل ءِ سر ءَ ایر کتگیں ریموٹ کنٹرول بمب ءَ آ نشانگ جوڑ کنگ بوت انت۔ تراک ءِ تہ ءَ سَے کارندی بیران ءُ 19 ٹپیگ بوتگ اَنت۔
بلوچستان سرکار ءِ جارچین ءِ رد ءَ درست ٹپیگ نادراھجاہ ءَ سر کنگ بیتگ اَنت ءُ گرانیں ٹپیگ کوئٹہ ءَ دیم دیگ بیگ ءَ اَنت کہ چہ ایشاں دو کارندہ ءِ جاور نگیگ اَنت۔
وئیل ءِ پد ءَ بولان میڈیکل کالج اسپتال ءُ سول اسپتال کوئٹہ ءَ ایمرجنسی ءِ جار جنگ بوتگ ۔