نبشتانک : شعیب جان ءِ یات
نبشتہ کار : شبیر بلوچ
دی بلوچستان پوسٹ
وھدے کہ دل ءِ توک ءَ آس روک بیت گڑا لبز وتارا وت درشان کن اَنت من اے جیڑ اِتگ کہ مرچی دو لبز نبشتہ کن آں گوں ارسیگیں چّماں بلے چے بہ کن آں ملکموت چو ترندیں جمبر ءِ وڑ ءَ کیت گُڑا ھر مات ءِ جیگ چہ ارس ءَ تر بیت –
وھدے کہ سھب سر ءَ پاد آتکاں پہ وانگ ءَ روگ ءِ ارادہ کت انچش اچانگ ءَ گوانکو دیم ءَ کلُوھے آتک من چار اِت کہ من ءَ ھچ باور نہ بوت پد ءَ من جیڑ اِت بوت کنت کسے ءَ پہ دژمنی اے اکس شنگ کتگ ھچ نہ بوتگ من دل ءَ را تسلہ دات کہ اے دروگے زمانگ اِنت ملکموت چو جلدی کجا آتک کت کنت اے وڑیں پُلّے چہ باگ ءَ چون جلدی دُور کت کنت ۔ ساھتے ءَ پد گڑا سنگتے ءَ من ءَ پون کت ھمےگْوشت ئِے تو سھیگ ئے چُشیں ھالے شنگ بوھگ ءَ اِنت من پسّو دات چون بوت کنت من جزبات کت گڑا منی چمّانی ارس شل بوت اَنت دل دو جاگہ ءَ بوت کمو دیر ءَ داں من انگت بے توار بوت آں دل ءَ من ءَ گْوشت اے وڑ نہ اِنت چے ءَ وت ءَ ملور کن ئے-
دست ءَ ھچ نہ بوت تھنا شت آں کتابجاہ ءَ نشتاں پد ءَ گْوانکو پچ کت ءُ چار اِت ھر سنگت ھمے کلوہ ءَ شنگ کنگ ءَ اِنت کہ شعیب جان ءَ دنیا یل کتگ پد ءَ من ھال کت گوں وتی سنگت ءَ من ءَ گْوشت ئِے یار شعیب جان ءَ مارا پہ راست یل کتگ گڑا من بے تاھیر بوت آں ھدا ءَ گوں اُرز ءُ پریاد کت منی کر ءَ ھچ نیست اَت من چو شعیب وڑ ءَ دور ءُ در ءَ بوتگ اِت آں پہ وانگ ءِ واستا من وتارا گْوشت باز دیر اِنت من چے بہ کن آں من وتارا پہ شعیب جان ءِ آکری دیدار ءِ واستا سر بہ کن آں گڑا من جیڑ اِت ھمیش اِنت زندگانی ھچ وپا ئِے نیست-
من نہ زاناں کجام دورگ ءِ ودار ءَ ما نشتگ ایں شعیب جان ءِ وڑیں پُل چہ باگ ءَ سندگ بنت من زانت زندگی بس یک سبکے ناں یات بیت ناں یات کنگ ءِ وڑ ءُ پیمے ھست-
شعیب یک ورنایے نودربرے نہ بوتگ بلکیں یک روژنائی یے بوتگ من شر دیستگ من شر زانتگ۔ انچش گْوش اَنت کہ مردم مر اِیت پد ءَ باز لبز اوں پہ اپسوز یات ءَ کیت بلے اے لبز منی کر ءَ ھما وھد ءَ بوتگ اَنت وھدے شعیب جان منی کر ءَ بوتگ مئے گپ ءُ توسیپ ھمے بوتگ اَنت من گوں شعیب جان ءَ دوچار بوت آں یک دوریں میتگے ءَ گڑا مئے ھمے وانگ ءُ زانگ ءِ گپ بوت ۔
آئی ءَ من ءَ گْوشت تو نو وتی وانگ برابر کتگ بیا پہ وتی باندات ءَ جھدے کن ایں من پسّو دات چے گْوشگ ءَ ئے ارزانیں کارے نہ اِنت گْوشت ئِے زان آں ارزان نہ اِنت بلے مئے اوں شمئے میتگ ءِ کسان کسانیں گْونڈو وت انچش گندگ بوھگ ءَ اَنت مارا اے جھد الم کنگی اِنت ھمے گپ ءِ توک ءَ من جست کت چے بہ کن آں ؟ گْوشت ئِے یک وانگجاھے پچ کن ایں تاں کہ مئے اے کسانیں گْونڈو وتی راہ ءَ راھی بہ بنت ھمے وڑ ءَ باز گپ ءُ دیوان بوت-
من ءَ یات اِنت ھر وھد ءَ ما گوں شعیب جان ءَ دوچار کپت ایں بس مئے گپ ءُ تران وانگ ءُ زانگ ءِ بابت ءَ اِت اَنت دگہ بے پائدگیں گپ نہ اِت اَنت ھچ دگہ مزاک ءُ کندگ نہ اِت اَنت بس گپ اَت وتی باندات ءِ ءُ وتی راج ءِ بابت ءَ گپ ءُ دیوان اَت-
مرچی من ءَ انچش لگ اِیت یک چراگے کمی اِنت من زاناں آ چراگ ھما شیعب جان بوتگ مرچی دُراھیں گریشگ ئِےتھار کت ءُ شت ھرچی نبشتہ بہ کن آں بلے دل ءِ توک ءَ درد ءُ گپ ھلاس نہ بنت شیعب جان تو مارا یل کت تئی جند دور شت بلے تئی اکس گوں یاتاں مئے گوما ایر اَنت شعیب جان تو ویران کت ایوک ءَ گریشگ ءَ را ناں بلکیں تیوگیں بلوج راج ترا زانت ءُ تئی کمی ءَ مار اِیت دوا اِنت گوں اللہ پاک ءَ جاگہ بھشت ءَ بات آسودگ بات ئے
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-