بلوچ یکجھتی کمیٹی ھُزدار زون ءَ اسرمندیں کھول نندانکجاہ ءَ چہ پریس کانفرنس کنان ءَ گْوشتگ کہ مروچی چہ دو روچ ءَ ساری، شش فروری ءِ سُھب دو ءَ، ریاستی سروکی ءَ برجاھیں ڈیتھ اسکواڈ کارمنداں مئے لوگانی سر ءَ بیڑبرتگ ، ننگ ءَ ناموس لگتمال کتگ ءُ مئے کھول لَٹ ءُ کٹانی نشانگ کتگ اَنت- ریاستی ڈیتھ اسکواڈ ءِ مردماں تُپنگ زور ءَ تُرسینتگ ءُ مئے گْھار عاصمہ بلوچ زورانسری آوار جتگ ءُ بیگواہ کتگ-
آئی ءَ گْوشتگ کہ اولی وئیل نہ اِنت، بلکیں اشی ءَ ساری ھم بازیں بلوچ زالبول ءُ مردین ھمے وڑ زورانسری آوار جنی ءِ نشانگ کنگ بیتگ اَنت، ءُ مروچی تاں اشاں چہ گیشتر یل کنگ نہ بیتگ اَنت- اے زُلم ءِ ھلاپ ءَ توار چست کنوکاں بیھار دے اَنت یا کہ آیاں بے توار کن اَنت-
آئی ءَ گْوشتگ کہ بلوچ یکجھتی کمیٹی ھُزدار زون ءُ اسرمندیں کھول ءَ ھما روچ ءَ بیگاہ دو ءَ سنی سبزی منڈی ءِ ھند سر ءَ بُنجاھی آر سی ڈی دگ بند کتگ ءُ جار جتگ کہ دانکہ عاصمہ بی بی یل کنگ نہ بیت، زھرشانی ءُ دگ بندی برجاہ بیت-شش فروری ءِ سُھب ءَ بگر تاں انو ھُزدار ءَ مئے نندانک یکشل ءَ برجاہ ءَ اِنت، ھپت فروری ءَ اے وئیل ھلاپ ءَ شھید رازق چوک ءَ چہ آزادی چوک ءَ تاں یک مزنیں روانکے کش اِتگ، چریشی ءَ ھزرانی مردماں بھر زرتگ – راج ءَ وتی توار چست کتگ تچکیں کلوہ داتگ کپ ما وتی دوستناکانی زورانسری آوار جنی ءَ گیش بے توار بیت نہ کن ایں- مروچی سرجمیں جھالاوان ریجن ءَ تھتگ بندیں ھڑتال ءُ پرگ بندیں ھڑتال برجاہ بیتگ، آیانی تہ ءَ تاجر، نودربر ءُ لَس شھریاں جوانیں وڑے ءَ کمک کتگ- بلوچ یکجھتی کمیٹی ءَ باندا سرجمیں بلوچستان ءَ زھرشانی جار جتگ-
دیمتر ءَ گْوشتگ بیتگ کہ دومی نیمگ ءَ، زی ریاستی ڈیتھ اسکواڈ ءَ تُپنگ زور ءَ عاصمہ بی بی ءِ یک زورانسری نکش کتگیں درشان رسانکدر ءَ شنگ، کہ آئی ءِ سرجمی ءَ ما رد کن ایں- ما تچک کنگ لوٹ ایں کہ پہ زوراک راستی چیر دیگ نہ بیت، ءُ ما ھچ وڑ اے وڑیں زورانسری گرگ بیتگیں درشاناں نہ منّ ایں- مرچی رسانکدر ءَ چہ مارا ھال سر بیتگ کہ دمگی انتزامیہ ھُزدار ءَ عاصمہ بی بی یل کنائینتگ ، کہ یک وشیں گپے ءُ مئے کھول ءِ واستا یک سکونے- بلے ما اے تچک کنگ لوٹ ایں کہ دانکہ آوار جنوکاں تُرندیں سزا دیگ نہ بنت، ءُ دانکہ ما اے گہ زمانت دیگ نہ بیت کہ دیمتر ءَ چُشیں وئیل نہ بیت، داں ھما وھد ءَ زھرشانی ءُ دگانی بندی برجاہ بنت-
آیاں لوٹ کتگ عاصمہ بلوچ پہ سلامتی نندانکجاہ سر کنگ بہ بیت، سرجمیں میارباراں دزگیر بہ کن اِت ءُ آیانی ھلاپ ءَ سزا ءَ دلجمی بدے اَنت- وھدے کہ اسرمندیں کھول ءِ ھرچ مردم ءَ میاربارانی پنّجگاں چہ پھاز بدے اِت – گیش اسرمندیں کاردارانی ھلاپ ءَ ھچ وڑیں کاروائی مہ کن اِت-
گُڈی ءَ گْوشتگ بیت کہ ما تچک کنگ لوٹ ایں اگاں مئے لوٹانی سر ءَ دلگوشگوری کنگ نہ بیت گُڑا زھرشانی ءَ گیش تُرند کنگ بیت ءُ سرجمیں ڈیھ ءَ زھرشانیانی درچ ءَ بندات کن ایں-