ڈیرہ بگٹی : یک مردمے بیگواہ، چہ تربت ءَ دو مردم یل کنگ بیتگ اَنت

بلوچستان ءِ دمگ چہ ڈیرہ بگٹی ءَ یک مردمے زورانسری بیگواہ وھدے کہ چہ تربت ءَ دو بیگواھیں مردم آجو بیتگ اَنت-

گیشیں ھالانی رِد ءَ سوئی ءِ دمگ چہ بگٹی کالونی ءَ پاکستانی پوج ءِ کارمنداں شمس بگٹی آئی پت جعفر بگٹی ءَ ھوار زورانسری بیگواہ کتگ-

چمّگندانی رِد ءَ پوج ءِ یک ویگو ڈالہ اے مرد سک لَٹ کُٹانی نشانگ کنگ ءَ پد چست کتگ-

جعفر بگٹی یل داتگ بلے شمس بگٹی انگت بیگواہ ءَ اِنت-

زانگ بہ بیت کہ شمس بگٹی سوئی ءِ دمگ اوچ ءَ او جی ڈی سی ایل ءَ کاردارے-

ھمے وڑ تربت بھمن ءُ چہ شاھی تمپ ءَ سیزدہ اکتوبر دوھزار بیست چار ءَ پاکستانی پوج ءِ دست ءَ بیگواہ کنگ بیتگیں یاسر حمید ءُ عطا نور بخش چار ماہ ءَ بیگواھی ءَ پد جمعہ شپ ءَ آجو بیتگ لوگ ءَ سر بیتگ-

دوئینانی یل بیگ گپ کھول ءَ کتگ-

زانگ بہ بیت کہ بیگواہ کنگ ءَ پد یاسر حمید ءُ عطا نور بخش ءِ یل کنگ ھاتر ءَ آئی ءِ کھول ءَ زھرشانی ءِ جتاجتائیں دروشم کارمرز کتگ واکدار ءَ چہ گند ءُ نند کتگ کمک لوٹ کتگ-