دفعہ 144
ٹی بی پی شونگال
اڑوکی اُستانی سرکار ءَ سرجمیں بلوچستان ءَ دفعہ 144 برجم کتگ دانکہ زورانسری بیگواھی ءُ دزگیری جاھاں کوشانی ھلاپ ءَ برجاھیں زھرشانی ءُ نندانکاں ھلاس بہ کن ایں – زبیر بلوچ ءِ زورانسری بیگواھی ءِ ھلاپ ءَ مھلوک ءِ برجمیں زھرشانی ءِ سبب ءَ آ یل کنگ بیتگ ات بلے ظریف بلوچ ءُ نوید بلوچ ءِ کھول ءَ جگرانی ٹکرانی دزگیری جاہ ءَ کوش ءِ ھلاپ ءَ کیچ ءِ بنجاھی شھر تربت ءَ شھید فدا چوک ءَ نندانک داتگ-
ظریف بلوچ تمپ ءِ دمگ دازن ءَ چہ جند ءِ لوگ ءَ کھول ءِ دیم ءَ فرنٹیر کور ءِ سپاھیاں لٹ ءُ کٹ کنان ءَ زورانسری بیگواہ کتگ ءُ پد ءَ یک روچے ءَ پد لٹ ءُ کٹ کتگیں لاش دازن ءَ دزکپتگ – ظریف بلوچ ءِ کھول زھرشانی ءَ دارگ بیتگ ءُ آ بیھار ءُ لاچار کنگ ءَ ظریف بلوچ کل ءُ کسارات کنائینتگ-
کیچ ءَ ظریف بلوچ ءِ دزگیری جاہ ءَ کوش ءِ ھلاپ ءَ زھرشانی اولی نہ انت بلکیں شھید فدا چوک ءَ بالاچ بلوچ ءِ دزگیری جاہ ءَ کوش ءَ یک زرمبشتے بندات بیتگ ات کہ چریشی ءَ ریاستی زوراکیانی ھلاپ ءَ سرجمیں بلوچستان ءَ مھلوک ءِ مھکمیں زھرشانی ءِ بیتگ ءُ اسلام آباد ءَ راجدپتری نندانکے داتگ بلے ریاستی واکداریں ادارہ داں انگت ءَ سرپد بوگ ءَ بے دلگوش انت آیانی درکانودی گامگیجاں بلوچ راجی توار پروش دیگ نا سرجمی انت-
سرجمیں دنیا ءَ نوکیں سال ءِ بندات ءَ شاتکامی کنگ بیت اِنت بلے بلوچستان ءَ نوکیں سال ءِ بندات ءَ دفعہ 144 ءِ ساھگ ءُ دزگیری جاھاں کوشانی ھلاپ ءَ زھرشانیاں بوگ ءَ اِنت- زبیر بلوچ ءِ زورانسری بیگواھی ءِ پژدر ءَ مھلوک ءِ مھکمیں زھرشانی ءَ تچک بیت اِنت کہ دفعہ 144 ءَ راجی زھرشانی دارگ نہ بنت اِنت ءُ ریاستی زوراکی ءِ سر ءَ بے تواری ءِ پروشگ ءَ بلوچ راج زھرشانی ءِ راہ ءَ جنزگ ءَ اِنت-