آواران : دو مردم پاکستانی پوج ءِ دست ءَ دروگیں میڑے ءَ کُشگ بیتگ اَنت

بلوچستان ءَ لاشانی دزکپگ ءِ دْرچ برجاہ ءَ اِنت، انسانی ھکانی ھلاپ ورزیاں تُرندی زرتگ- پانک

بلوچستان ءَ ٹپ ٹوریں لاش ءُ ناشناسیں لاشانی دزکپگ ءِ وئیل تہ ءَ گیشی گندگ آیگ بیگ ءَ اِنت- نوکیں وئیل ءَ آواران ءِ دمگ چہ بزداد بربرکی کور نزیک ءَ دو مردم ءِ لاش دزکپتگ اَنت کہ آ تیر جنگ ءُ کُشگ بیتگ اَنت-

لیویز واکدار ءَ لاش دمگی ھیڈکوارٹر نادُراھجاہ ءَ برتگ اَنت، بلے آئی ءِ پجّار انگت نہ بیتگ-

بلوچ نیشنل موومنٹ ءِ انسانی ھکانی ادارہ پانک رِد ءَ، چہ آواران ءَ مروچی دزکپتگیں لاش فقیر جان ءُ عیسیٰ ئیگ اَنت، آ دروگیں میڑ ءَ کُشگ بیگ ءِ گمان اِنت-

پانک رِد ءَ فقیر جان بیست شش ستمبر دوھزار بیست چار آئی ءِ لوگ سر ءَ بیڑ وھد ءَ آوار جتگ، وھدے کہ عیسٰی ھپدہ فروری دوھزار بیست سے ءَ چہ بیگواہ بیتگ – دوئیں مردم زورانسری آوار جنی ءُ درکانودی کوش ءِ وئیل انسانی ھکانی تُرندیں ھلاپ ورزیاں پیشدار اِیت-

پانک ءَ گوشتگ کہ اے وئیل بلوچستان ءَ زورانسری آوار جنی ءُ درکانودی کوش ءِ دْرچ کسّہ ءَ پدر کنت- گل ءَ اے وئیل ایر جتگ میانی استمانی مردماں چہ دزبندی کتگ کہ آ پاکستانی ھکومت سر ءَ زور بدے اَنت دانکہ اے زوراکی دارگ بہ بنت-

زانگ بہ بیت کہ گوستگیں ماہ نومبر ءَ بلوچستان ءِ جتاجتائیں دمگاں چہ بازیں لاشے دزکپتگ، آیانی تہ ءَ چہ تربت ءَ یک زالبولے ءِ ءُ چہ کلات ءَ سے براتانی لاش ھوار اَنت-

پانک ءَ ھوار دگہ انسانی ھکانی گل اے گیش بیتگیں وئیلانی سر ءَ دلپدردی درشان کتگ ءُ لوٹ کنگ ءَ اَنت کہ لاشانی پجّار ھاتر ءَ ڈی این اے ٹیسٹ کنگ بہ بیت ءُ زمہ واراں بیار اَنت جست بگر اَنت-

دومی نیمگ ءَ بلوچستان ءِ سیاسی ءُ چاگردی مردمانی گْوشگ اِنت کہ لاشانی دزکپگ اے دْرچ ناں تھنا راج تُرسینگ جُھد اِنت بلکیں بلوچ راج ءِ چاگردی ءُ سیاسی ھکاں ھم پادمال کنگ بیگ ءَ اَنت- آئی ءِ رِد ءَ گیشر دزکپتگیں لاش ھما مردمانی بنت کہ پاکستانی پوج ءِ دست ءَ بیگواہ کنگ بیتگ اَنت-

بلوچستان ءَ انسانی ھکانی ھلاپ ورزیانی سر ءَ میان استمانی نیمگ ءَ دلگوش دیگ ءَ اَبید اسرمندیں کھول انساپ ءِ راھچار اَنت- گلاں زور داتگ کہ اے انسانی ھکانی ھلاپ ورزی ءَ شریں وڑے ءَ گیش گیوار کنگ بہ بیت دانکہ دمگی آبادی مھر ءُ شرپ دلجم جوڑ کنگ بنت-