انتزامیہ ءِ دلجمی، بیگواھیں دلجان کھول نندانک دو ماہ واستا مھتل

دلجان بلوچ ءِ کھول واکدار دلجمی دیگ ءَ پد زھرشانی مھتل کنگ جار جتگ، دو ماہ یل نہ بیگ ءَ دوبر زھرشانی کن ایں- کھول

چہ آواران ءَ زورانسری بیگواہ دلجان بلوچ ءِ یل کنائینگ ھاتر ءَ برجاھیں زھرشانی ءُ آئی ءِ گْھار شدکُشیں ھڑتال انتزامیہ ءَ گوں سوبمندیں گپ دیوان ءَ پد مھتل کتگ، کھول ءَ انتزامیہ ءَ دو ماہ ءِ دگہ وھد داتگ ءُ واکدار ءَ چہ اُمیت زاھر کتگ کہ آ جیڑہ زوت گیشین اِیت-

دلجان بلوچ دوازدہ جون دوھزار بیست چار ءَ آواران ءَ آئی ءِ لوگ ءَ چہ پاکستانی پوج ءَ آوار جتگ ءُ تاں ھما روچ ءَ بیگواہ ءَ اِنت- ھژدہ نومبر ءَ چہ بندات بیتگیں زھرشانیاں کھول ءُ دمگی مردماں آواران ءِ بُنجاھی دگ بند کتگ اَنت، کہ واکدار ءَ دلجمی دیگ ءَ لجمی دیگ ءَ پد پچ کتگ- بلے ڈپٹی کمشنر کارگس دیم ءَ نندانک برجاہ بیتگ-

اے درگت ءَ بیگواھیں دلجان ءِ گْھار ءَ پریس کانفرنس کنان ءَ گوشتگ کہ واکدار دروگیں کول ءَ چہ دلسیاہ بیتگیں – اے شُدکشیں ھڑتال مئے گُڈی اُمیت بیتگ زھرشانی کنوکاں دلجان ءَ زوت یل کنائینگ ءُ زھرشانی کنوکانی سر ءَ ایف آئی آر ھلاس کنگ لوٹ کتگ-

کھول ءَ مروچی نندانک ھند ءَ پریس کانفرنس کنان ءَ گوشتگ کہ آئی ءَ دمگ ءِ نمائندگ ءُ واکدار ءِ دلجمی دیگ ءَ نندانک دو ماہ واستا مھتل داشتگ، بلے اگاں دلجان بلوچ ءِ یل کنائینگ دو ماہ ءَ نہ بیت، گُڑا آ پد ءَ زھرشانی کن اَنت-

کھول ءَ اے درگت گپ دیوانی کمیٹی دیم ءَ وتی لھتے لوٹ ایر کتگ کہ اود ءَ لوٹ کتگ کہ جے آئی ٹی جوڑ بہ کن اَنت، چریشی ءَ کھول ءُ دمگی واجکاراں ھوار اَنت، نندانک ءَ نشتگیں مردمانی سر ءَ ایف آئی آر ھلاس کنگ بہ بنت کھول ءِ ٹرانسفر واتر کنگ بہ بنت ءُ زھرشانی ءَ گیش تُرسینگ مہ بنت-

آیاں گْوشتگ کہ اگاں دو ماہ ءِ تہ ءَ دلجان بلوچ یل کنگ نہ بیت، گُڑا آ پُرایمنی زھرشانی ھک مُھر دار ایں ءُ دوبر زھرشانی کن ایں-