نامداریں اھوالکار مطیع اللہ جان بیگواہ

چہ اسلام آباد ءَ گوستگیں نامداریں اھوالکار آوار جنگ بیتگ۔

نامداریں اھوالکار، نیو نیوز ءُ یوٹیوب ءِ اینکر مطیع اللہ جان شپ ءِ یازدہ بج ءَ اسلام آباد ءِ پمز نادراھجاہ ءِ پارکنگ ءَ چہ ناشناسیں مردماں آوار جتگ۔
،
آئی ءِ ھمراھی ءَ دگہ اھوالکارے ثاقب بشیر ھم ھوار بوتگ کہ رند ءَ آوار جنوکاں آئی نائن سیکٹر ءَ یلہ داتگ، ثاقب بشیر ءِ رد ءَ ھردوکانی دیم بستگ گاڑی ءَ سوار کتگ انت-

اھوالکار ءِ نزیکیں مردماں گشتگ کہ گڈی رند ءَ چار شمبے ءِ شپ ءِ 11 ءَ آئی ءَ گوں رھوت کنگ بیتگ- چریشی ءَ پد رھوت بند بیتگ-

زانگ بہ بیت کہ مطیع اللہ جان جولائی 2020 ءِ بندات ءَ پیسر ءَ آوار جنگ بوتگ۔ آ ھما وھد ءَ اسلام آباد ءِ جی شش ءِ دمگ ءَ چہ روچ ءِ رژنائی ءَ آوار جنگ بوتگ ءُ 12 کلاک ءَ پد یل کنگ بوتگ۔ آئی ءِ آوار جنگ ءَ راجی ءُ میان اَستمانی تک ءَ سک ایر جنی کنگ بیتگ۔

پاکستان ءَ اھوالکارانی سر ءَ گیش بوھوکیں زور ءُ ترساں رسانکدر ءِ آجوئی ءِ بابت ءَ مزنیں جُست چست کنگ بوگ ءَ اَنت۔ پاکستان ءَ اھوالکارانی گل ءَ اے وئیل ءِ ایرجنی کتگ ءُ زوت یل کنگ ءِ لوٹ کتگ ۔

پاکستان ءِ تہ ءَ رسانکدر ءِ آجوئی ءِ جاور ھالاں چہ دلپروش کنوک اَنت، رپورٹرز ود آؤٹ بارڈرز ءِ جھان ءِ رسانکدر ءِ آجوئی ءِ انڈیکس 2024 ءِ تہ ءَ پاکستان 180 ملکانی تہ ءَ 150 ءِ نمبر ءَ اِنت۔

اھوالکارانی انگت ءَ آزار ءُ اذیت، آوار جنگ ءُ کوش ءِ وڑیں دھمکیانی آماچ اِنت ءُ ھساسیں سرھالانی سر ءَ ھاسیں رنگ ءَ بلوچستان یا فوجی کارروائیانی سر ءَ رپورٹنگ ءِ سر ءَ پابندی ءُ سنسر شپ ءِ ھال شنگ اِنت۔