چہ ڈیرہ بگٹی پھیلاوغ ءَ خان محمد بگٹی ء میر جان سر بازار چہ دکان ءَ چیریں ادارھانی آوار جنگ بژن ءُ کابل ایرجنگ کارے – بی وائی سی ڈیرہ بگٹی زون

بی وائی سی ڈیرہ بگٹی ءِ جارکش ءَ وتی ھنگیں درشان ءِ تہ ءَ گْوشتگ کہ دمگی وسیلگ رِد ءَ سے شمبے پنچ نومبر دوھزار بیست چار ءَ سلاہ بندیں مردماں ڈیرہ بگٹی ءِ تھسیل پھیلاوغ ءِ ھند چہ خرچہ ءَ جان محمد بگٹی ء میر جان مسوری بگٹی نامیں ورنا ھما وھد ءَ زورانسری آوار جنی ءِ نشانگ کنگ بیتگ وھدے کہ آ چہ لوگ ءَ کش وتی دکان ءَ ساڑی بیتگ اَنت – چمگدانی رِد ءَ سلاہ بندیں مردم سادھیں پوشاکاں پولیس ءِ دو گاڑیاں سوار بیتگ اَنت کہ ورنا گپتگ ءُ زورانسری گاڑی تہ ءَ مان کتگ ءُ وتی ھمراھی ءَ برتگ چریشی ءَ پد آئی ءِ درگت ءَ ھچ وڑیں ھال نیست-

جارکش ءَ دیمتر ءَ گْوشتگ کہ اشی ءَ کساس یک ماھے ءَ ساری ھم سوئی ءِ دمگ ءَ سد ءَ چہ گیش مردم زورانسری بیگواہ کتگ اَنت آیانی تہ ءَ گیش ھم بیگواہ اَنت، انچش بلوچستان ءَ ھاسکار ڈیرہ بگٹی ءَ گوستگیں لھتے ماہ ءَ چہ زورانسری آوار جنی ءِ کیسانی تہ ءَ گیشی اتکگ، ھمے وڑ مردمانی تہ ءَ تُرس روچ پہ روچ گیش بوان اَنت- ھمکروچ مردماں آیانی لوگ ءُ کارباراں بے سبب ءُ درکانودی زورانسری آوار جنی بیگ ءَ اَنت چریشی ءَ چہ ڈیرہ بگٹی یک وت جوڑ کتگیں بندیگجاھے ءِ ندارگ ءَ پیشدارگ ءَ اَنت-

جارکش ءَ درشان ءِ گُڈی ءَ گوشتگ کہ بی وائی سی پرچاکہ سرجمیں ریاستی زوراکی ءُ زُلم ءِ ھلاپ ءَ بلوچ راج ءِ کانودی توار اِنت، اے وڑیں زورانسری آوار جنی ءَ تُرندی ءَ گوں ایر جن ایں، ءُ ریاستی ادارھاں لوٹ کن ایں کہ خان محمد مسوری بگٹی ءَ زوت ءَ چہ زوت یل بہ کن اِت، ءُ زورانسری آوار جنی درچ بند کنگ بہ بیت ءُ ما انسانی ھکانی سرجمیں ادارھاں چہ دزبندی کن ایں کہ انسانی ھکانی ھلاپ ورزیانی سر ءَ گامگیج بزور اَنت ءُ سرجمیں پڑ مردم اشی ءِ ھلاپ ءَ توار چست بہ کن اَنت-