بلوچستان ھکومت پریس کانفرنس ءَ زورانسری بیگواھیں مردم بی ایل اے ءِ کماندارے پدر کتگ

بلوچستان ھکومت ءِ نمائندگاں یک پریس کانفرنسے ءِ میان ءَ پیسر ءَ چہ پوج ءِ دستیگ ءَ ساڑی ئیں طلعت عزیز ء عبدالعزیز ءَ را بلوچ لبریشن آرمی ( بی ایل اے) سلاہ چگل داتگیں کماندارے پدر کتگ-

آدینگ روچ ءَ شال پریس کلب ءَ بیوکیں اے پریس کانفرنس ءَ صوبائی وزیر عبدالرحمان کھیتران ، بلوچستان ھکومت ءِ جارکش شاھد رند ءُ آئی جی سی ٹی ڈی بلوچستان ءَ بھر زرتگ ءُ اِھوالکارانی پسّہ داتگ اَنت ئے-

رسانکدر ءَ نکش کنگ رِد ءَ شال ءِ جھمنند طلعت عزیز کہ شیخان کالج ءِ پروفیسر عبد العزیز شاھوانی ءِ چکیں، بیست پنچ اگست دوھزار بیست چار ءَ چہ سریاب دگ ، شال ءَ زورانسری بیگواہ کنگ بیتگ اَنت-

وسلیگ ءَ دزکپتگیں ھالانی رِد طلعت عزیز بیست ھشت اگست دوھزار بیست چار ءَ موسیٰ خیل ءِ دمگ کنگری ءِ نزیک ءَ کنگری لیویز کارمنداں ءُ پٹ پولی آفیسر عصمت اللہ ءِ دست ءَ داتگ ءُ بیست نُھ اگست آ شال تھانہ ءَ برتگ-

سے ماہ ءَ تاں شال تھانہ بندیگ بیگ ءَ پد مروچی واکدار ءَ آ بی ایل اے کماندارے ءِ دروشم ءَ پدر کتگ پریس کانفرنس پرمائینتگ-

زانگ بہ بیت کہ بلوچستان ءَ پیسر ءَ چہ زورانسری آوار جنگ بیتگیں مردماں جتاجتائیں گلانی باسکانی دروشم ءَ پدر کنگ اے اولی رند نہ اِنت- اشی ءَ ساری ھم باز رند ءَ اے وڑیں پندل سازینگ ءَ پد زورانسری بیگواھیں مردمانی سر ءَ بھتام جتگ-

بلوچستان ءِ ھکومت ءُ پوج ادارھانی نیمگ ءَ چہ اے وڑیں گامگیج بلوچ نودربریں گلاں ءُ دگہ پُرایمن زھرشانیاں ایرموش کنگ شوربندی ءَ گندگ بنت-

ھمے وڑ گوستگیں سالاں ھمے وڑ پریس کانفرنساں پد دروگیں میڑاں مردمانی کوش ھم دیم ءَ اَتکگ اَنت کہ اود ءَ سال دوھزار پانزدہ ءَ سر وزیر بلوچستان ءُ اے وھد تھکاری وزیر سرفراز بگٹی ءَ چہ ھُزدار ءَ سیادی داروکیں شفقت رودینی ءُ چہ قلات ءِ جھمنند ابراھیم نیچاری ءِ ھمراھی ءَ پریس کانفرنس کتگ، آ بی ایم اے ءِ باسک پدر کنگ بیتگ اَنت اشی ءَ پد دوئیں مردم پولیس ءِ کاروائی ءَ کُشگ بیتگ اَنت-

ھمے وڑ دگہ یک وئیلے گوستگیں سال ءَ بیتگ کہ وھدے کہ چہ شال ءَ ماھل بلوچ وتکش تراکارے ءِ دروشم ءَ پدر کتگ بلے پد ءَ آمیدگس ءَ آ بے میار کتگ ءُ یل داتگ-

اے وئیلاں میان استمانی انسانی ھکانی ادارھاں ھم تُرندیں ایرجنی نشانگ کتگ اَنت- ایمنسٹی انٹرنیشنل ءُ انسانی ھکانی کیمشن پاکستان ءَ اے وئیل تُرس درشان اِتگ ءُ آ بلوچستان انسانی ھکانی جاور درگت ءَ مزنیں ھترہ گوشگ بیتگ-