بیگواھیں عبدالباسط شاھوانی ءِ سرپدی وی بی ایم پی ءِ گور ءَ مُچ کتگ اَنت

وائس فار بلوچ مسنگ پرسنز ءِ چئیرمین نصراللہ بلوچ ءَ وتی درشان ءِ تہ ءَ گْوشتگ کہ زورانسری بیگواھیں عبدالباسط ءِ سرپدی آئی ءِ پت ءَ وی بی ایم پی ءِ گور ءَ مُچ کتگ اَنت-

غوث بخش ءَ گْوشتگ کہ آئی ءِ چُک عبدالباسط شاھوانی پوج ءِ مزنیں کچے ءَ ھمے سال دوازدہ جولائی ءَ آئی ءِ لوگ ءَ برجاھیں کلی مینگل آباد، جوھان کراس، منگچر ءَ شپ وھد ءَ درکانودی ھساب ءَ آوار جنگ ءَ پد ناشناسیں جاھے ءَ برتگ ءُ آئی ءَ چک درگت ءَ ھچ وڑیں ھال دیگ بیگ ءَ نہ اِنت چریشی ءِ سبب ءَ آئی ءِ کھول سک سسّائی درد ءُ رنجانی تہ ءَ اِنت-

نصراللہ بلوچ ءَ گْوشتگ کہ گلی ھساب ءَ غوث بخش دلجمی دیگ بیتگ کہ آئی ءِ چک کیس ھکومت، بیگواھیں مردمانی درگت ءَ چہ جوڑ کنگ بیتگیں کیمشن ءُ اکوام متھدہ ءِ تر ءُ گردیں ٹولی ءِ زورانسری آوار جنی ءَ داتگ اَنت ءُ عبدالباسط ءِ پہ سلامتی یل کنائینگ ھاتر ءَ ھرچ پڑ ءَ توار چست کنگ بیت-

نصراللہ بلوچ ءَ گْوشتگ کہ عبدالباسط ءِ درکانودی دزگیری کھول ءَ ھال ندیگ ڈیھی کانود ءَ دیگ بیتگیں شھریانی بُنکی ھکانی مزنیں ھلاپ ورزی یے کہ آئی ءَ گوں تُرندی ءَ ایر جن ایں ءُ لوٹ کن ایں کہ عبدالباسط شاھوانی سر ءَ اگاں بھتامے ھست گُڑا آئی ءَ دیم ءَ بیار اِنت آمیدگس ءَ پیش بہ کن اِت ءُ اگاں بے میاریں گُڑا زوت یل بہ کن اِت کھول ءِ سرجمیں زند ءِ درد ءُ رنجاں چہ بہ رکین اِت-