کمفرٹ زون ءِ کَسابجاہ ءُ زْرمبشت – برزکوھی |الماس بلوچ

کمفرٹ زون ءِ کَسابجاہ ءُ زْرمبشت

نبشتہ کار: برزکوھی

رجانک:الماس بلوچ

دی بلوچستان پوسٹ

انسان وتی سسّا ءِ تہ ءَ زانت ءُ سرپدی، گُمان ءُ ساچِشت، سِنچ ءُ سما، زانِشت ءُ پھمگ، اگَل ءُ دانائی ءِ تاکت ءِ سَوب ءَ “سیاسی ءُ راجمانی جناور” ءِ بستار ءَ زانَگ بیت۔ لیکھانی بازی ءُ بودناکیانی ھمگونگی وھدے پہ امل ءَ یکجاہ بہ بنت تاں کُجام ھم رنگیں جیڑھے بہ بیت، پراھی ءَ دمان ءَ توجیلے سازگ بوت کنت۔ سِنچ ءُ سما ءِ آزمان ءَ دز جَنَگ ءُ ھیالانی گُڈّی سیمسر ءَ داں سر بوھگ ءِ لائکی ءِ سَوَب ءَ انسان سیاست ءُ جنگ ءِ پیچ ءُ تابیں جیڑہ ءُ راجمان ءِ سِنچ ءُ سما ءِ جوڑشت(ساخت) ءِ بابت ءَ زانت ءُ زانِشت ءِ واھُند بوت کنت ءُ نَپری ءُ مُچّانکی سسّا ءِ رُدوم ءِ مادِنیں کِشکاں تِچکّ ءُ پدّرا کُت کنت۔ بَلے اے کارانی سوبمندی ءِ سَوَب ھمے ھَبر ءَ گوں بندوک اِنت کہ ماں سسّا(ذہن) ءَ چوشیں کَسابجاھے مہ بیت اُود ءَ نوکیں لیکہ، ساچِشت، گُمان ءُ امل ءَ وھد ءِ لوٹانی بُنیات ءَ دیم ءَ بَرگ ءِ بُودناکی ءَ گوں پیوستیں ھیال یک انچیں تُرس ءُ زُورے ءِ سَوَب بے دردی کُشگ بہ بنت کہ کمفرٹ زون ءَ شہ ودی بنت۔ پرچا کہ ھمے کَسابجاہ، بِزاں کمفرٹ زون ءَ سُلتانی، بادشاھی، سیاست، راجمان ءُ جُتاھیں پِڑانی تہ ءَ عمل، ھیدرچی ءُ بَدلی ءِ گْردانک ءَ جَہہ جنوکیں لیکہان ءَ ھاموشی ءَ گوں ھمینکدر کُشتگ ءُ ھِلاس کُتگ کہ چراھی ءَ چے سوبمندی ءِ کِشک ءُ راہ، گَرک ءُ گار بوتگ اَنت۔ بَلے لھتیں وھد ءَ پد، تَب زانتی، شہہ زانتی، ءُ چاگردی زانش ءِ آ دگہ زانشتی پِڑانی تہ ءَ لھتیں انچیں نایابیں کارِست دیم ءَ کِنز اِتگ اَنت کہ آواں اے نادْراھی ءِ دْرگیجگ ءَ ھَوار ایشی اِلاج ءِ کار ھم بُنگیج کُتگ۔ ھمے کُشار جاہ رنگے نہ رَنگے ءَ مئے زْرمبشت ءِ تہ ءَ ھم ھَست اِنت کہ آئی تَب زانتی ءِ بُنیات ءَ نشاندھی کنگ ءِ ھمراھی ءَ ھَلاس کنگ ءِ ھاترا آئی بابت ءَ پوہ بوھگ ءُ چراھی تاوان ءَ شہ وتا رکّینگ باز الّمی اِنت۔

کمفرٹ زون ءِ تہ ءَ رُدوم زیرگ، ساچِشت ءُ زاِنشی بودناکی ءِ مَرگ ءُ زِندگی گْوازینگ ءِ راستیں دْروشم بِزاں تُرس ءِ دُامن ءَ شہ در آیگ ءِ امل ءِ چپّ ءَ رَوگ اِنت۔ اے(کمفرٹ زون) نہ تھنا نَپری سِنچ ءُ سما ءِ رُدوم ءِ راھاں بَند کنت، بلکیں مُچّانکی(اجتماعی) پِگر ءُ پھمگ ءِ بودناکی ءِ دیم ءَ ھم دیوالے جوڑ کنت۔ اے رنگیں زھنی جاور ءِ پنجگانی تہ ءَ کپتگیں مردُم نہ وت ءَ گُڈّی منزل ءِ نیمگ ءَ راھی کنگ ءِ ھاترا ساجو ءُ تیار کُت کن اَنت، نئیکہ وتی راج ءَ را جُتائیں پجّار ءُ مانِشت(بقا) ءِ زمانت ءَ چے ازگار کُت کن اَنت۔ چو کہ ما یک گُلامیں راجے بِستار ءَ وتی گُلزمین ءِ آزاتیں پجّار ءِ دوبر گِرگ ءِ ھاترا جنگ ءِ پیمیں گْرانیں گامگیجے ءِ تہ ءَ آزار بکشیں ءُ سنگینیں کاریچاں شہ گْوزگ ءَ ئیں، مئے ھاترا پہ وتی راج ءِ گُڈّی سوبمندی ءَ ھمے زھنی ءُ نپسیاتی نادْراھی ءَ را تَب زانتی ءِ بُنیات ءَ زانَگ ءُ ایشی اِلاج کنگ الّمی اِنت۔ اے سرھال ءِ پھمگ ءِ ھاترا کُلّاں چہ پیش ایشی ءِ گیشّواری ءُ بُنُکّی مانا ءُ بِزانت ءِ زانگ ءُ ایش ءَ را وتی جنگی جاورانی آدینک ءِ تہ ءَ چارگ المّی اِنت۔

جُتا جُتائیں تَبزانت ءُ چاگردی زاِنشت ءِ زانوگِر جتا جُتائیں نپسیاتی جیڑہ ءُ زھنی پیچ ءُ تابانی پھمگ، نَپری ءُ مُچّانکی کارپَد ءُ کارانی گھتر کنگ ءِ ھاترا پَٹّ ءُ پول ءِ راہ ءَ گِچین کن اَنت۔ آوانی رِد ءَ، کمفرٹ زون ءِ مانا ایش اِنت کہ “اے یک نپسیاتی ھالَتے کہ آئی ءِ تہ ءَ چیزّ یک مردمے ءِ سسّا ءَ گوں ھمدپ اَنت ءُ اُود ءَ ھیال ءُ لیکہ چاگِرد ءِ دست ءِ چیر ءَ بوھگ ءِ سَوَب ءَ ارزانی ءِ مارِشت ءَ بکش اَنت۔ اے ھالَت ءِ تہ ءَ بے تاھیری، پریشانی ءُ زُور سکّیں کسانیں کِساسے ءَ بنت۔” بِزاں اے (ماں سسّا ءَ) ھما پُرایمن ءُ پُرتاھیریں جاگہ اِنت کہ اُود ءَ زُور ءُ کَش ءُ چیلّ سسّا ءَ ساڑی ئیں راستی ءُ لیکھاں گوں ڈیکّ نہ وَر اَنت ءُ چیزّانی پوہ بوھگ ءِ ھاترا بازیں ھیدریچی نہ لوٹ ایت۔ پمیشکا مردُم چَرے نپسیاتی جاور ءَ شہ درآیگ ءِ امل ءَ را بے تاھیری، پریشانی ءُ زور ءِ تہ ءَ گیشی سرپد بنت ءُ چَرے جاور ءَ شہ درآھگ ءَ مُردم تُرس ءُ بیم ءِ آماچ بنت۔ بَلے تُرس وت یک انچیں ھترناکیں نپسیاتی نادْراھی یے کہ املی گامگیج ءِ راہ ءَ ھَترہ ءِ دیمپان بوھگ ءِ تاکت ءَ پْروش ایت۔ چریشی ءَ چے سِنچ ءُ سما ءِ رُدوم ءُ نَپری ءُ مُچّانکی کار ءُ کارپد اوشت آماچ بنت۔ پمیشکا جُتا جُتائیں تبزانت ءُ کار ءُ باری منیجمنٹ ءَ گوں بندوکیں کْواسّاں نَپری ءُ مُچّانکی کار ءُ کارپدانی دیم ءَ اوشتوکیں اے جیڑہ ءِ توجیل اے رنگ ءَ ساز اِتگ:

بے تاھیری ءُ کارپَد ءَ را ماں تبزانتی ءَ Behavioral approach ءِ رِد ءَ پھمگ ءِ ھاترا رابرٹ یرکز ءُ جان ڈاڈسن ءِ ھمے لیکہ یک مزنیں بِستارے داریت کہ آئی شوندات ءَ تبزانت کمفرٹ زون ءِ گیشواری ءِ بابت ءَ دَینت۔ یہ لیکہ 1907 ءَ یک عملی چار ءُ تپّاسے ءَ پد پیش کنگ بوتگ۔ بِزاں آواں لھتیں مُشکاناں ھمے کہ بجلی ءِ کَرنٹ جَت، تاں آ گیشتر چَٹَک(Active )بوت اَنت۔ بَلے وھدے بجلی ءِ کرنٹ ءِ کَچّ ھَدّ ءَ زْیات بوت، تاں آواں چَٹَک بوھگ ءِ بَدل ءَ چیر بوھگ ءِ کوشست کُت۔ ھمے چار ءُ تپّاس ءَ پد دوئیں تبزانتاں انسانی سسّا ءِ تہ ءَ ساڑی ئیں کمفرٹ زون ءَ را تپّاس اِت ءُ ھمے لیکہ دیم ءَ آؤرت کہ بے تاھیری، پریشانی ءُ زُور ءِ نْیام ءَ یک سیادی یے ھَست۔ بِزاں وھدے کمفرٹ زون ءَ تہ ءَ ھستیں پُرتاھیریں ھیال ءُ لیکہانی نپسیاتی جاور ءَ شہ درآھگ ءِ امل ءِ تہ ءَ بے تاھیری، پریشانی ءُ زُور ودّیت، تاں کار ءُ کردار ءِ تہ ءَ ھم گھتری ءِ گُنجائش گیش بنت۔ بَلے چوش ھما وھد ءَ بیت، وھدے املی گامگیج ءِ تہ ءَ دیم ءَ آؤکیں بے تاھیری، پریشانی ءُ زُور سسّا ءِ تہ ءَ نپسیاتی تاھیر ءِ کساس ءَ گوں یکّ کچّ بنت۔ بِزاں کمفرٹ زون ءُ پینک زون بروبر بہ بنت۔ ھمے نُکتہ ءَ را رابرٹ یرکز ءَ اوپٹیمل انزائٹی ءِ نام داتگ کہ آ کمفرٹ زون ءَ شہ ڈنّ اِنت۔ ھمے لیکہ ءِ تشریھ تبزانت ءُ پی ایچ ڈی ءِ کْواس ڈاکٹر Maike Neuhaus ءَ وتی پَٹّ ءُ پولی نبشتانک، How to Leave Your Comfort Zone and Enter Your Growth Zone ءِ تہ ءَ چو اے وڑ کُتگ کہ “انسانانی تہ ءَ ھم ھمے رَوِش ھست اِنت کہ وھدے آ وتی کمفرٹ زون ءَ شہ درکاینت، تاں بے تاھیری، پریشانی ءُ زُور آوانی سسّا ءِ ساڑی ئیں Stimuli ءَ ودّینیت۔ اے رنگ ءَ انسان وتی کمفرٹ ءَ شہ درآھگ ءَ پد یا وَ دیمپانیں جیڑہ ءِ ھِلاپ ءَ مِڑ اَنت، یا پدکِنز بوان ءَ زھنی بُنیات ءَ سارت بنت۔ بِزاں دوئیں رنگاں املی جھت ءَ کردے پیلو کنگ انسانی سسّا ءِ جند ءَ گوں بندوک اِنت۔”

کمفرٹ زون ءَ را گِھتریں رنگے ءَ پَھمگ ءِ ھاترا اسٹینڈ فارڈ یونیورسٹی ءِ امریکی پولکار، پروفیسر ءُ تبزانت، کیرل ڈویک ءِ کتاب Mindset:The New Psychology of Success تبزانتی ءِ زانِشت ءِ تہ ءَ یک مزنیں بَدلی یے ءِ بِستار ءَ دار ایت۔ اے پَٹّ ءُ پولی کِتاب ءِ تہ ءَ آئی ءَ دو چَٹّ جُتائیں سسّاھانی (Mindset) درنْیام ءَ پَرک ءَ را گیشّینتگ کہ چراھاں چے کمفرٹ شون ءِ پھمگ ارزان بیت۔ اے دوئیں زھنی میار نامینتگیں سسّا ءُ رُدوم زُرتگیں یا پُھتہ ئیں سسّا اَنت۔ نامینتگیں یا اوشت آماچیں سسّا ءِ واھُندیں مردُم ھمے جیڑ اَنت کہ آواں زھنی بنیات ءَ لائکی ءِ وراک گیشّینتگ کہ چینکس بہ بیت۔ آ چہ بے سوبی ءَ تُرس اَنت، پرچا بے سوبی آوانی کمّیاں پاشک کنت ءُ نَگد آوانی وتی سرا ھستیں بیسہ ءَ مزنیں دھکّے دنت۔ پمشکہ ھمے سسّا ءِ ساھِگ ءَ نِندان ءَ آ پہ وتا کمفرٹ زون ءِ تہ زند گْوازینگ ءَ جْوانتر سرپد بنت۔ بَلے دومی نیمگ ءَ پُھتہ ءُ دیمروی کُرتگیں سسّا لائکی ءِ کَچّ ءَ نہ گیشّین اَنت ءُ آ بے سوبیاں دربرگ ءِ مزنیں وسیلگ سرپد بنت۔ آ وتی بودناکیاں ھَدّ ءَ چے زْیات کنگ ءِ جُھد ءَ کن اَنت۔ ھمے ھیال ءَ را گیشّینگ ءِ ھاترا Maike Neuhaus نبشتہ کنت کہ “گوں ارادہ ءَ کمفرٹ زون ءِ یل کنگ دیمروی کُتگیں سسّا ءِ نیمگ ءَ رَوگ ءِ برابر اِنت۔ نامینتگیں یا اُوشت آماچیں سسّا مارا بے سوبی ءِ تُرس ءِ دام ءَ دُور دنت، بَلے رُدوم زُرتگیں یا دیمروی کُتگیں سسّا مارا دربَرگ، ھَترہ زیرگ ءُ امکان ءِ تہ ءَ شاھیگانی آرگ ءِ ھاترا زندگی ءِ سیمسراں جْوانیں آسرے ءَ چہ سیت مند بوھگ ءَ پہ جاڑیگ کنت۔”

نَپر ءُ ٹولی یے ءِ کارگُزاری ءِ نْیام ءَ ھَستیں نپسیاتی جیڑہ، ھاس مردُمانی کمفرٹ زون ءَ ساڑی ئیں سسّا ءِ پُرتاھیریں جاور ءَ را پھمگ ءِ ھاترا ایلسڈر وائٹ ءِ پٹّ ءُ پولی نبشتانک From Comfort Zone to Performance Management وانگ کرز ایت۔ اے نِبشتانک ءِ تہ ءَ آ گروہ یا ٹولی ءِ کارگُزاری پیش نہ کنگ یا املی جَھت ءَ چَٹَک نہ بوگ ءِ سَوَباں زانگ ءِ ھاترا Behavioral آپروچ ءَ دیم ءَ ایر کنان ءَ بُروس ٹک مین ءِ ھما کتاب Developmental Sequence of Small Groups ءِ شوندات ءَ دنت کہ 1965 ءَ نَویسگ بوتگ۔ بُروس ءَ کمفرٹ زون ءِ ھَست بوھگ ءِ مْیان ءَ یک ٹیمے ءِ باسکانی کارگُزاری پیش کنگ ءُ املی رنگ ءَ چُست ءُ چَٹَک(Active )بوھگ ءِ پُژدر ءَ پنچ کاریچ(مرحلہ) پیش کنت۔ اولی کاریچ Forming گُشگ بیت کہ آئی ءِ تہ ءَ زانِش ءُ بودناکی ءِ نہ بوھگ ءُ ٹیم یا ٹولی ءِ بَدل ءَ وتی سر ءَ گیش دلگوش دیگ(بزاں زاتی ارزشت) ءِ سَوَب ءَ کار کنگ ءِ ھاترا کس جاڑیگ نہ بیت۔ دومی کاریچ Storming اِنت کہ اُود ءَ کارے ءَ را کنگ ءِ واھِشت وَ بیت، بَلے بود ءُ لائکی ءِ نہ بوھگ ءِ سَوَب ءَ کار کنگ ممکن نہ بیت ءُ ھیالانی دیم ءَ جیڑہ میلانک بنت۔ سیمی کاریچ Norming گُشگ بیت کہ اُود ءَ نوکیں بودناکیانی ھاترا وتی سرا بیسہ نہ بوھگ ءِ سَوَب ءَ رازیگ ءُ جاڑیگ بوھگ ءِ امل یکبرے پد ءَ اوشتیت۔ ایشی ءِ تہ ءَ کار ءِ وزم(طریقہ کار)، رھبند ءُ کاریچانی سر ءَ دلگوش دیگ بیت۔ چارُمی کاریچ Performing اِنت کہ اُود ءَ کار کنگ ءِ لائکی ءُ واھِشت ھردُک ھست اَنت۔ ایشی ءِ تہ ءَ سانمندیں ٹیم ءِ املی گامگیج دیم ءَ کاینت ءُ مکسداناں املی رنگ ءُ گوناپے بکشگ بیت۔ پنچُمی کاریچ Adjourning گُشگ بیت کہ آئی ءِ تہ ءَ یک ٹیمے وتی کار ءَ سرجم کنت ءُ مُچّانکی کار ءِ پتّر ءَ پیچیت۔ بَلے ھمے گُڈّی کاریچ ءَ ھما وھد ءَ سر بوت کنیں وھدے ما کمفرٹ زون ءَ شہ درکائیں ءُ نوکیں جیڑہ ءُ جنجالانی دیم ءَ داریں۔

بُرز ءِ داتگیں بِزانت، لیکہ ءُ جُتا جُتائیں سسّا ءُ امل ءِ کاریچانی بُنیات ءَ اگاں ما بلوچ راجی جُنز ءِ سر ءَ زانشتی چمشانکے بہ دئیں تاں ما ھمے آسر ءَ سر بوت کنیں کہ ما نامینتگیں ءُ لُکّیں سسّا ءُ اوشت آماچیں کانود ءُ رھبنداں ھَوار کمفرٹ زون کُجام ھدّ ءَ زُرتگ ءُ وتی کُرتگ۔ مُچّانکی کارگُزاری، نَپری سِنچ ءُ سما ءُ زانِشت ءِ تہ ءَ ناتوانی ءِ بُنُکّی سَوَب ھمے نپسیاتی جاور ءَ ابید ھِچ نہ اَنت۔ اے جاور ءَ را ما نہ ایوک ءَ نوکیں راستیانی بَگیری ءَ زُرتگ ءُ وتی کُتگ، بلکیں دیمپانیں جیڑھانی تہ ءَ ھَترہ زیرگ ءَ شہ دربرگ ءِ دروازگ ءَ ھم بند کُتگ۔ وھدے ما جنگ ءَ را وتی نامینتگ ءُ لُکّیں سسّا ءِ بُنیات ءَ دیم ءَ بَرگ ءِ تَچ ءُ تاگ ءَ کنیں، تاں ما کُجام ھم نوکیں رھبندے ءَ را دیم ءَ آیگ ءَ داریں۔ وھدے یک کارے، یا مردُمے مئے زاتی مزاج، تَب، پِگر ءُ دیدانک ءُ نپسیاتی جاور ءَ گوں ھمدپ نہ بیت، تاں ما گْوامائی ایجڈسٹ نہ بئیں۔ بِلّے جُھد ءِ لوٹ ءُ گُزر چینکس کہ ھژدری بہ بنت، ما ھمے نپسیاتی نادْراھی ءِ ساھگ ءَ عملی گامگیج زیرگ ءَ چہ وتا داریں ءُ زْرمبشت یا جُنز ءَ را وتی دلدوستیں مردُم ءُ انچائیں ربیت ءَ گوں دیم ءَ بَران کنیں۔ ما جاھے سر بوھگ ءِ بَدل ءَ، وتی ھَستیں وھد ءِ ھما بِستار ءِ وش پھمی ءَ جْوان سرپد بئیں کہ اوشت آماچ ءُ لُکّیں سسّا ءِ عملی دْروشم اِنت۔ بَلے کیرل ڈویک گُشیت، “ھَستیں بِستار ءَ چہ گیش بوھگ گِھتر اِنت، بَلے نامینتگگیں سسّا مردماناں چیزّے بوھگ ءِ آسراتی ءَ چہ سیتّ زیرگ ءَ نئیلیت۔”

لھتیں وھد ءَ ما ھمے سرپد بئیں کہ زْرمبشت ءِ تہ ءَ املی رنگ ءَ ھَواریں جُھدکار ھمے نپسیاتی جاور ءِ آماچ نہ بنت۔ اے ھَبر ءِ گْوشگ وت ھمے جاور ءِ نِشون ءَ دنت۔ انسان تُری دُنیا ءِ کُجام ھم کُنڈ ءَ بہ بیت ءُ تُری کُجام ھم عملی گامگیجے ءَ گوں بندوک بہ بیت، آ ھمے نپسیاتی جاور ءِ شکار بوت کنت۔ چیا کہ یہ نادْراھی سسّا ءِ تہ ءَ ودی بیت۔ وھدے یک جُھدکارے کوھانی باھوٹ بیت، یا یک کماندار ءُ رھشونے وتی لشکر ءِ رھشونی ءُ رھدربری ءَ کنت، تنا وھدے کہ رُستگ ءُ پُھتہ ئیں سسّا یے ءِ واھُند نہ بیت، آ ھم چَرے جاور ءَ شہ ساپ ءُ پلگار بوت نہ کن اَنت۔ بِزاں وھدے یک پارٹی، گَل یا ٹولی یے یک ھاسیں لیکھے ءَ تاں اوشتیت ءُ املی گامگیج ءُ جْوانتریں کارگُزاری پیش کنگ ءِ ھاترا نوکیں جیڑہ ءُ جنجالانی دیم ءَ تُرس ءُ بیمّ ءِ آماچ بیت، تاں ایشی بِزانت ھمیش اِنت کہ آ کمفرٹ زون ءِ تہ ءَ پناہ زیرگ ءَ ایں۔ بِزاں وھدے یک جُھدکار، رھشون ءُ کماندارے املی دْروشم ءَ تِچک ءُ پدّر کنگ ءِ جاہ ءَ ھمے جیڑگ ءُ گْوشگ ءَ گوں دست ءَ سِر ءِ چیر ءَ کنت ءُ وپس ایت کہ ما دیمروئی، زانِشت، سوبمندی ءُ سِنچ ءُ سما ءِ پھتگی وتی نام ءَ کُرتگ، تاں بِزاں آ ھما اوشت آماچ ءُ لُکّیں سسّا ءِ املی دْروشم ءَ زاھر کنگ ءَ اِنت کہ شہ کمفرٹ زون ءِ جاور ءَ ودی بوتگ۔ آ نوکیں لوٹ ءُ گُزرانی وشّاتک کنگ، جُستانی پسّہ دئیگ، دیمپانیں جیڑھانی ھِلاپ ءَ ھَترہ زیرگ ءُ وتی اوشت آماچیں رھبنداں شہ در آھگ ءِ کْوشست ءَ ھمے ھاترا نہ کنت کہ چریشی ءَ چے اگاں بے سوبی بہ بیت، تاں کمّی ءُ نیستی ءِ راز پاشک بیت ءُ نَگد ءِ امل ءَ شہ کارچے ماں زِرد ءَ جِکّ جنت۔ اے ھمے اوشت آماچ ءُ نامینتگیں سسّا اِنت کہ کیرل ڈویک ءَ وتی کِتاب ءِ تہ ءَ گیشّینتگ۔

یکبرے کمفرٹ زون کہ جوڑ کنگ بوت، تاں نہ ایوک ءَ آئی ڈنّ ءِ دروازگ ءَ را کُبلے جَنَگ بیت، بلکیں اندر ءِ کِشک ءُ راھانی دیم ءَ ھم ھمے تُرس ءِ پُشت ءَ دیوالے مِک کنگ بیت کہ ھُدا مہ کنت اگاں کَسے بئیت، تاں ما تاھیر ءَ شہ زِبھر بئیں۔ پمشکا پد ءَ نہ کسّے ءِ کار ءَ کار داریں، نئیکہ دگہ کسّے ءَ کار دارگ ءَ یلو کنیں۔ زْرمبشت ءِ راہ ءِ توامیں کسان ءُ مزنیں جُھدکار کُلّ اے لِنگ ءُ مُنڈیں تاھیر ءِ جیگ ءَ چاک چاک کنگ ءُ ایشی ءِ اندر ءَ سر کشّگ ءَ شہ تُرس اَنت، کہ نی وَ پھمگ ءُ زانگ ءِ سر ءَ یک مزنیں سِنگے ایر اِنت، پمیشکا زلوری نہ اِنت۔ کمّے بہ جیڑ کہ باریں کمفرٹ زون ءِ ربیت ءُ سوبمندی ءِ واھداریں جُھدکار ھواری ءَ دیم ءَ جُنز اِت کن اَنت؟

سسّا ءِ دیمروی ءُ سِنچ ءُ سما ءِ رُدوم ءِ نہ بوھگ ءِ سَوَب ءَ کمفرٹ زون مُھکم بوھان ءَ نَپری ءُ مُچّانکی نبیات ءَ چُست ءُ چَٹَک بوھگ ءُ جْوانتریں کردے پیلو کنگ ءِ بودناکی ءَ را کُشیت ءُ گار کنت۔ اے نپسیاتی جاور انچیں ھدّ گیشّینیت کہ آئی تہ ءَ ھما لیکہ ءُ عملی گامگیج جاہ دئیگ بنت کہ چراھاں چے تاھیر ءُ اشکام بہ رسیت۔ اگاں اوشت آماچ ءُ نامینتگیں رھبند ءُ نوکیں لوٹ ءُ گُزرانی میان ءَ کَشّ ءُ چیلّے بہ ودّیت تاں زھنی پُرشت ءُ پروش ءِ سَوَب گیش بنت کہ چراھاں چے نپسیاتی نادْراھی چہ الاج ءِ کَٹّ ءُ کار ءَ در کاینت۔ ھمے امل پیسلہ کنوکیں آسر ءِ ھِلاپ ءَ یک مزنیں المیہ یے جوڑ بنت۔ پمیشکا لُکّیں سسّا ءِ دامُن ءَ نِندگ ءُ ھمے جیڑگ ءَ وش ءُ دلجم بوھگ بے مانا اِنت کہ ما دیمروی، سوبمندی، زانِشت ءِ واھُند اِنت، پرچا کہ بینجمن فرینکلن گُش ایت، “یکشلیں رُدوم ءُ دیمری ءَ ابید گِھتری ءُ سوبمندی ءِ وڑیں گالاں ھِچ مانا ءُ بِزانت نیست۔”