جنگی ھُنر
نبشتہ کار: سُن زو
رجانک :کوھسار کندیل
اولّی بھر:
دی بلوچستان پوسٹ
جنگی چِن ءُ لانچ
سُن زو وتی کتاب ءِ اوّلی بھر ءِ توک ءَ جنگ ءِ ھاتر ءَ یک جوانیں چِن ءُ لانچے ءِ سر ءَ باز زُور داتگ ءُ نبشتہ کنت جنگی رِپک ءُ ھنر ءَ سرپد بُوگ ھاتر ءَ پنچ شئے سک لازم اِنت وپاداری، موسم، زمین، جنگی کمان،بجنگ کنگ ءِ وڑ ءُ ڈول ءُ راھبند۔
سُن زو ءِ جنگی رِپکانی توک ءَ اوّلی چیز وپاداری آئی ءَ بازیں زانتکارے ءَ وتی وڑ ءَ رنگ داتگ چوناھا اشی ءِ متلب گوں وتی آھد ءِ ھکومت یا ھما گَل ءَ گوں وپاداری کنگ ءُ آئی ءِ کانودانی پاسدار بوگ اِنت۔
سُن زو وتی ھبرانی توک ءَ باز زور داتگ کہ یک سپاھی یے ءِ کدی ھم وتی کاراں سوبین بوت نہ کنت وھدے کہ آ اے پنچی چیزانی پاسدار مہ بیت۔ جنگ ءِ بابت ءَ پیسلہ زورگ ءَ پیش لھتیں گپ ھست کہ آ ھُورتی ءَ چارگ بہ باں۔
۱:دوئیں لشکر ءَ چی کَے اے سپاھی گیش وپادار اَنت۔ ۲:کُجام لشکر ءِ سپاھی گیش لائک ءُ زانتکار اَنت۔ ۳:موسم ءُ زمین کجام لشکر اے گیش ھک ءَ اَنت۔ ۴:کُجام لشکر ءِ کار گیش مھکم اَنت۔ ۵:کُجامی ءَ وتئ واست ءَ جوان ءُ مھکمین راھبند اڑ داتگ۔ اے پنچی گپاں ابید ھم سُن زو دو گپ ءِ سر ءَ باز زور داتگ۔ پوجی وڑ ءُ ڈول ءُ آیانی لائیکی ءِ سر ءَ آیانی اِزت ءُ شرپ بکشگ ءُ رازیانی سر ءَ آھاں ءَ سز دایگ ءِ راھبند۔ سُن زو گوش اِیت کُجام ھم جنگی لشکر ءِ اے ھپتیں لولانی پاسدار بہ بیت گڑا سوبمندی آئی ءِ کسمت بیت ءُ باج ھمائی ءِ بھر ءَ کپ اِیت۔ جنگی کمان اے کہ وتی سپاھی ءَ گوں ءِ راھبنداں پابند کنت گڑا سوب مندی ءَ گوں ھر باج ءَ بارت۔ کُجام ھم جنگی کمان ءِ چہ اے کاراں پُشت کِنزی کنت گڑا الّم جنگاں باجو بیت۔ گَل سرمستر ءِ پرز اِنت کَے اے وڑیں چہ جنگی کمان ءَ پارگ بہ کنت ءُ گَل ءِ واست ءَ جوان تر ءِ کارے بیت۔ یک جنگی کمان ءِ گوں ءِ رھبندانی پابند بوگ ءَ سوبین بیت بلے آئی ءِ ھاتر ءَ الّم اِنت کَے ءَ گوں وھد ءُ ھالات ءَ وت ءَ ھم مٹ کُت بہ کنت ءُ گوں وھد ءِ گاماں شُت بیکنت ۔ ھالات ءَ گوں جنگ کنگ ءَ ھر وھد ساڑی بہ بیت۔
سُن زو اوّلی بھر ءِ توک ءَ دیمتر ءَ گوش اِیت وتی جنگی کاراں گوں رازداری ءَ کنگ ءُ دشمن ءَ را رَد دیگ یک جوانیں ھنرے۔ متلب وھدی تو جنگی ترتیب ءِ اڑ دیگ ءَ بہ بَہ ئے گڑا دشمن ءَ اَنچو سما بہ بیت کہ تو امن کتگ ءُ دشمن ءَ را اَنچیں وھدے ءَ دک دایگ کہ آئی ءِ گمان ءَ ھم مہ بیت۔ دشمن ءِ توک ءَ یک اَنچیں بدگمانی ءِ دور دے بے ھوسلہ بہ بنت ءُ تو آئی ءَ چہ نپ چِست کت بہ کن ئے۔
وھدے کہ دشمن زورآور بیت گڑا ھچ بر دیم پہ دیمی جنگ مکن۔ دشمن ءِ نزور تر کنگ ءِ واست ءُ آئی ءِ توک ءَ گم ءُ بے آرامی دور دے۔ وھدی آ گوں ھمے جنجالاں سر پہ ٹال بیت گڑا دشمن سر جوانی اُرش بہ کن۔
اوّلی بھر ءِ گڈی ءَ سُن زو گُش اِیت یک جنگی کمان ءِ کہ وشی ءِ وھد ءَ جنگ ءِ تیاری نہ کنت ءُ وتی سپاھی ءَ جوانیں وڑے ءَ چار ءُ ٹپاس نہ کنت گڑا جنگ ءِ وھد ءَ الّم بے سوب بیت۔
یک جوانیں جنگے ءِ کنگ ءَ چہ پیسر جوانیں تیاری یے المّی اِنت وتی سپاھیانی سر ءُ سوج کنگ ءُ آھاناں جنگی رِپک ءُ ھنر ءَ سرپد کنگ سک المّی اِنت۔ وتی سپاھیانی توک ءَ وپادارانی شوھاز کنگ جوانیں موسم ءُ جوانی ءَ جاگھانی پٹ ءُ پول کنگ ھم الّمی اِنت۔ جنگی کمان ءِ گپانی پابند بُوگ وتی گَل ءِ رھبند ءُ ترتیب ءَ جوانیں وڈے ءَ دارگ ءُ گوں وھدے ءِ گاماں وت ءَ مٹ کنگ کُل پہ جوانیں جنگے المّی اَنت۔
گڈّی ءَ سَن زو گوش اِیت یک مُلکے ءِ پوچ وھدے منی گُشتگیں راھبندانی پاسدار بیت۔ وتی سپاھی ءَ جوانیں سر ءُ سوج دنت ءُ آھاناں تربیت دنت آھانی لائیکی سَواب ءَ آھاناں اِزت ءُ شرپ بکش اِیت ،ردیانی سر ءَ آھاناں سزا ءُ جزا ءِ رھبندانی پاسدار بیت گڑا سُوب مندی الّم آئی ءِ بھر ءَ کپ اِیت۔ جنگ ءِ ھالت ءَ دشمن ءَ را رَد دیگ یک جوانیں کار ءُ کٹّگ ءِ ھاتر ءَ یک جوانیں گام گیجے۔
پھریز کن!
دراجیں جنگاں چہ وت ءَ بہ پھریز اِت پرچا کہ جنگ سک گران ءُ ھترناک اِنت.
سُن زو
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-