زاھدان: ایرانی آمیدگس ءَ شش بندیگانی پاھو دیگ ءِ ھکم ءَ جتائیں کوٹیاں برگ بیتگ انت

روکپتی بلوچستان ءِ بنجاھی شھر زاھدان “دزاپ” ءَ ایرانی آمیدگس ءِ ھکم ءَ پاھو ءِ نامگ ءَ شش زندانی جتائیں کوٹی بزانکہ قرنطینہ ءَ برگ بیتگ اَنت-

پاھو دیگ ءِ ھکم ءَ شش زندانی توک ءَ سَے زندانیانی پجار بیتگ اَنت ءُ دگہ سَے کسانی پجار تنی وھدی زانگ نہ بیتگ اَنت-

پاھو ءِ ھکم ءَ جتائیں کوٹیاں برگ بیتگیں مردمانی توک ءَ سَے کسانی پجار سِی سالی ئیں سعید ھسن زئی ء تاج مھمد جھمنند زاھدان، بیست سالی ئیں فرزاد سنچولی ء گلام بنکی جھمنند زابل ءُ انی زاھدان ءَ نندوک انت ، نور مھمد نورزئی ء سید مھمد جھمنند نیمروز اوگانستان ءُ دگہ یک رودینی ٹک ءَ سیادی دار ایت بلے ایشی ءِ نام زانگ نہ بیتگ-

اھوالانی رد ءَ اے سَے مردم جتا جتائیں وھداں جتا جتائیں وئیلانی بھتاماں گرگ بیتگ اَنت-

سعید ایرانی سال سیزدہ ءُ نود ءُ نُھ ءَ ایرانی لشکر ءَ شھید مزاری زاھدان ءَ نشہ واپاری ءِ بھتام ءَ دزگیر کتگ ءُ برتگ-

فرزاد چار سال ءَ پیش ھم نشہ واپاری ءِ بھتام ءَ زابل ءَ گرگ بیتگ ءُ پد ءَ آ دو سال ءَ پیش زاھدان ءَ آرگ بیتگ –

اھوالانی رد ءَ اے مردمانی سیاد ءُ وارساں گڈی گندوگ یکشمبے ءِ روچ ءَ کنگ بیتگ ءُ چریشی ءَ پد اے مردم جتائیں کوٹیاں کنگ بیتگ اَنت-

نور مھمد چاردہ سد ءُ یک ءَ سیمسراں نشہ واپاری ءِ بھتام ءَ زابل ءِ دادگاہ ءَ گپتگ ءُ پد یک سالے ءَ رند آ زاھدان ءَ دیم دیگ بیتگ-

اھوالانی رد ءَ آ سَئیں زندانی ھم بلوچ گوشگ بوگ ءَ اَنت بلے تنی وھدی آیانی پجار زانگ نہ بیتگ اَنت-

زانگ بہ بیت اے سال ءِ شش ماھانی توک ءَ روکپتی بلوچستان ءَ بندوکیں 34 مردم پاھو ءِ دار ءَ ایرانی آمیدگس ءَ درتکگ اَنت-

ایشانی توک ءَ بیست ءُ ھشت نشہ واپاری ءُ ھپت دگہ کوشانی بھتام ءَ پاھو دیگ بیتگ اَنت-