بلوچستان ءَ چہ دو دھکاں بگاوت ءِ دزگیری ءَ اِنت ءُ بلوچ راجی جُنز ءِ کاؤنٹر کنگ ءِ ھاتر ءَ پاکستان ءِ اڈ داتگیں کارشونانی پد ءَ یکشلی ءَ گوں گراندلیں وئیل دیم ءَ پیداک اَنت۔ زھری کھول ءُ ماھل بلوچ ءِ ھاتر ءَ زھرشانیانی درچ انگت نہ اوشتاتگ اَت کہ بارکھان ءِ دلگیریں وئیل دیم ءَ اتک۔
بیست فروری ءِ شپ ءَ بارکھان ءَ یک چاتے ءَ چہ ھبدہ سالی ئیں جِنک ءُ دو ورنائیں بچکانی جون دزکپتگ ات اَنت، کہ اِیشانی تہ ءَ یکے جونے خان محمد مری ءِ چُک ئیگ اِنت، کہ آ عبدالرحمن کیتھران ءِ جند ءِ زندان ءَ بندیگ بیتگ ءُ دگہ دو جونانی پجار داں انگت نہ بیتگ۔ چُکانی کوش ءَ پد جونانی پجیگ ءَ مری ٹک ءَ شال ءَ نندانگ داتگ اَت، ءُ بلوچستان ءَ اے وئیل ءِ بگیری ءَ ترندیں پَدگَرد ءِ گندگ ءَ اتکگ، کہ چریشںاں پد پولیس ءَ عبدالرحمن کیتھران دزگیر کُتگ ات۔ چریشی ءَ پیسر دو ھزار ءُ چاردہ ءَ عبدالرحمن کیتھران وتی جند ءِ زندان ءِ تہ ءَ مردمانی بندیگ کنگ ءُ گیر کانودی سلاہ ایر کنگ ءِ جرم ءَ دزگیر کنگ بیتگ اَت ءُ منانک نہ بیگ ءِ سوب ءَ چہ آمید گِس ءَ یل کنگ بیتگ اَت۔
آجوئی لوٹوکیں تکانی گُشگ اِنت کہ عبدالرحمن کیتھران ءَ پاکستانی پوج ءِ مستری گون اِنت ءُ آئی ءَ بارکھان ءِ تہ ءَ آجوئی ءِ جُنز ءِ راہ ءِ دارگ ءِ ڈبہ دیگ بیتگ۔ اے بھتام جنگ بیت اِنت کہ عبدالرحمن کیتھران ءَ پاکستانی پوج ءِ مستری ءَ مردمانی بیگواہ کنگ وتی جند ءِ زنداناں بندیگ کنگ ءُ کُشگ ءِ آجوئی اِنت۔ خان محمد مری ءِ چُکانی کوش ءِ وئیل اولی نہ اِنت بلکیں عبدالرحمن کیتھران ءَ دو سال پیسر ءَ اھوالکار انور کیتھران ءِ کوش ءَ ھوار بازیں وئیلانی تہ ءَ ھوار اِنت۔
بلوچستان ءِ گیشتریں سرداراں سرکاری اگاں گمانی پئیم ءَ پاکستانی پوج ءِ مستری گون اِنت ءُ سرداراں وتی ھند ءُ دمگانی تہ ءَ مھلوک ءِ سر ءَ زلم ءُ زوراکی کنگ ءِ سرجم ءَ آجوئی دیگ بیتگ۔ بارکھان ءَ پیسر زھری، جھل مگسی ءُ نصیرآباد ءَ انچیں دل سوزیں وئیل دیم ءَ اتکگ اَنت۔ بلوچستان ءَ گیشتریں سردارانی جند ءِ زندان ھست اَنت بلے سرکار اے وئیلانی دارگ ءَ ابید جرمکارانی رکینگ ءِ جھد ءَ اِنت کہ اِیشی ءِ سوب ءَ بلوچستان ءِ لس مھلوک ءِ باور چہ سرکار ءَ پاد اتکگ ءُ تھنا زھرشانی ءُ سیاسی گھگیری ءَ اگبالانی گرگ ءِ وسیلہ سرپد بنت۔