رشیدہ زھری ءُ رحیم زھری ءِ زورانسری آوار جنی ءِ بگیری ءَ زھرشانی برجاہ

ھمے ماہ ءِ رمس سَے ءَ بلوچستان ءِ بنجاھی شھر شال ءَ پاکستانی پوج ءِ دست ءَ زورانسری آوار جنگ بوتگیں رشیدہ زھری ءُ آئی ءِ لوگواجہ رحیم زھری ءِ زورانسری آوار جنی ءِ بگیری ءَ سرجمیں بلوچستان ءَ زھرشانیانی درچ برجاہ انت – وھدیکہ دومی نیمگ ءَ بلوچستان ءِ وزیر داخلہ ءَ ٹاہ داتگ ءُ گوشتگ کہ رشیدہ ءُ رحیم زھری سرکاری ادارھانی گور ءَ نہ انت –

مروچی کیچ ءِ بنجاھی شھر تربت ءَ تربت یونیورسٹی ءِ نودربرانی نیمگ ءَ زھرشانی روانک ءِ کشگ بوتگ کہ.مزنیں کچے ءَ نودربراں بھر زرتگ –

درنگاز کنوکانی دست ءَ پلے کارڈ بوتگ انت ءُ آھاں رحیم زھری ءُ آئی ءِ لوگبانک ءِ یل کنگ ءِ لوٹ کتگ ءُ نارہ جتگ –

دومی نیمگ ءَ وائس فار بلوچ مسنگ پرسنز ءِ سرکماش نصراللہ بلوچ ءَ وتی شنگ کرتگیں درشان ءِ تہ ءَ گوشتگ کہ چاردہ فروری ءَ بلوچ زالبول رشیدہ زھری ءُ آئی لوگواجہ رحیم زھری ءِ زورانسری آوار جنی ءِ بگیری ءَ گل ءِ چیردستی ءَ شال ءِ پریس کلب ءِ دیم ءَ بیگاھے ادار سَے ءَ زھرشانی ءِ کنگ بیت –

آئی ءَ چہ شال ءِ درسیں مردماں لوٹ کتگ کہ آ بھر بہ زور انت ءُ بلوچ زالبول ءُ آئی ءِ لوگواجہ ءِ یل کنائینگ ءَ وتی کرد ءَ پیلو بہ کن انت –

وی بی ایم پی ءَ بلوچستان نشنل پاٹی، نشنل پاٹی، عوامی نشنل پاٹی، پشتونخواہ ملی عوامی پاٹی، نشنل ڈیموکرٹیک موومنٹ، بی ایس او پجار، بی ایس او، بلوچ یکجہتی کمیٹی، بلوچ وومن فورم، ہیومن رائٹس کمشن آف پاکستان، بلوچستان ہائی کورٹ بار، کوئٹہ بار، بلوچستان بار کونسل اور سپریم کورٹ بار کونسل ءِ رھشوناں گند ءُ نند کتگ ءُ آ زھرشانی ءَ بھر زورگ ءِ داوت داتگ انت، سیاسی پاٹی، نودربر گل ، وکیل ءُ دگہ رھشوناں باور کنائینتگ کہ آ زھرشانی ءَ بھر زور انت –

دومی نیمگ ءَ بلوچستان ءِ وزیر داخلہ ءَ ٹاہ داتگ کہ رشیدہ زھری ءُ رحیم زھری سرکاری ادارھانی گور ءَ نہ انت –

بلوچستان اسمبلی ءَ دیوان برجاہ انت، اسمبلی باسک جتا جتائیں جیڑوانی سر ءَ گپ جنگ انت –

وزیر داخلہ ءَ رحیم زھری ءِ بدل ءَ گوشتگ کہ حفیظ زھری ءُ آئی ءِ لوگبانک سرکاری ادارھانی گور ءَ نہ انت – رحیم ءُ آئی ءِ لوگبانک ءِ آوار جنی ءِ وئیل ءِ وھد ءَ.من ادا نہ بوتگاں –

آئی ءَ ٹاہ داتگ ءُ گوشتگ کہ حفیظ زھری ءُ آئی ءِ لوگبانک ءِ آوار جنی ءَ کہ ھما ادارھانی نام گرگ بوگ ءَ انت آھانی گوم ءَ ھال اھوال کتگ آھانی گور ءَ نہ انت –

لانگو ءَ گوشتگ کہ بیگواھیں مردمانی جیڑہ یک مزنیں جیڑھے سردار اختر مینگل ءِ سروکی ءَ یک کمیٹی جوڈ کنگ بوتگ ھرجاہ بیگواھیں مردمانء جیڑہ سر ءَ کوشش برجاہ انت –

بی این پی ءِ باسک ملک نصیر شاہوانی ءَ گوشتگ کہ اشی ءَ ھرکس زانت کہ رحیم ءُ آئی ءِ لوگبانک اوار جنگ بوتگ انت وزیر داخلہ ءُ چیریں ادارہ اگاں سرپد نہ انت گڈا اے کجا شت انت –

آئی ءَ گوشتگ کہ کمیٹی ءِ ما ھم بھریں بلے مردمانی اے وڈ آوار جنی ءَ جیڑہ گیشگوار نہ بنت کم چہ کم دو روچ ءَ پد رپورٹ بیت کہ رحیم زھری ءُ آئی ءِ لوگبانک کئیا چست کتگ انت من ھما اولی روچ ءَ رپورٹ لوٹ اِتگ –

زانگ بہ بیت رحیم زھری ءُ آئی ءِ لوگبانک دو زھگ ءُ مات ھمے سال ءِ سَے فروری ءَ چہ شال ءِ دمگ گیشکوری ٹاؤن ناشناس کالونی ءَ پاکستانی پوج ءَ آوار جتگ ءُ بیگواہ کتگ انت کہ پدا رند ءَ مات گوں نماسگاں یل دیگ بوتگ بلے رحیم ءُ آئی ءِ لوگبانک ھنگت بیگواہ انت آھانی درگت ءَ ھچ وڈیں ھال اھوال نیست –

وئیلے بگیری ءَ سرجمیں بلوچستان ءَ زھرشانیانی درچ ءِ بندات کنگ بوتگ وھدیکہ چاگردی ترامجاھاں زالبول ءُ آئی ءِ لوگ واجہ ءِ یل کنگے لوٹ کنگ بوگ ءَ انت –