پاکستان: بجلی بند، بازیں شھر چہ بجلی ءَ زبھر

پاکستان ءَ بجلی ءِ مزنیں بریک ڈاؤنے ءِ سبب ءَ کراچی، لاھور ءُ اسلام آباد ءَ ھوار پاکستان ءِ جتا جتائیں جاھاں بجلی ءِ پجگ مھتل بیتگ-

وزیر توانائی خرم دستیگر ءِ گوشگ اِنت دوازدہ ادارانی توک ءَ بجلی ءِ کار سرجم کنگ بیت اِنت-

وزارت توانائی ءَ دوشمبے ءَ یک ٹویٹے ءَ گشتگ دوشمبے ءِ سھب ءِ ساھت ھپت ءُ سی ءُ چار دمانانی توک ءَ نیشنل گرڈ ءِ سسٹم فریکوئنسی ءِ کمی ءِ دیمپان بیتگ ءُ چریشی ءَ بجلی ءِ نزام ءِ توک ءَ بازیں کساسے ءَ بریک ڈاؤن بیتگ سسٹم ءِ شر کنگ ءَ کار برجاہ اَنت-

بجلی ءِ بندش ءِ سبب ءَ لاھور ءِ اورنج لائن ٹرین سروس ھم بند بیتگ ءُ ھمے وڑ ءَ بنجاھی شھر اسلام آباد، راولپنڈی، کراچی، شال ءُ دگہ دگہ ھنداں بجلی سرجمی ءَ بریک ڈاؤن بیتگ اَنت-

ھمے وڑ ءَ اسلام آباد الیکٹرک سپلائی کمپنی ( آئیسکو) ءِ نیمگ ءَ ٹویٹ ءَ گوشگ بیتگ گرڈ 117 سٹینشز ءَ بجلی بند اِنت –

آئی ءِ رد ءَ ریجن کنٹرول سینٹر ءِ نیمگ ءَ داں انگت ءَ ھچ گپ دیم ءَ نیتکگ اَنت ءُ آئیسکو ءِ انتزامیہ ءَ یکشل ءَ رھوتی کنگ ءِ جھد ءَ اِنت-