بیگواھیں بلوچانی ھاتر ءَ کراچی ءَ زھرشانی برجاہ

سندھ ءِ مزن شھر کراچی ءَ پریس کلب ءِ دیم ءَ وائس فار بلوچ مسنگ پرسنز ءِ بنجل ءَ چار ھزار ءُ پنچ سد ءُ پنجاہ ءُ پنچ روچ سرجم بیتگ – ھمردری ءِ درشانگ ءَ بلوچ یکجھتی کمیٹی کراچی ءِ کنوینر آمنہ بلوچ، ماہ گنج بلوچ، سابرہ بلوچ ءُ دگہ ھوار بیتگ اَنت-

وی بی ایم پی ءِ وائس چیئرمیم ماما قدیر بلوچ ءَ اتکگیں مردمانی میان ءَ تران کنان ءَ گوشتگ سال دوھزار ءَ بہ گر داں انیگ ءُ جد ءُ جھد برجاہ اِنت چریشی ءَ زالبولانی مزنیں دیمھونی ھوار اَنت اے کربانیانی درچ مروچی ھم برجاہ اَنت اے وھد ءَ پُر ایمنیں جد ءُ جھد ءَ یک ھنچیں جاھے گپتگ بگیر داروکیں تکانی سُر ءُ مانسر پروشت ءُ پروشی ءِ جھد ءِ ھواری ءُ دشمن ءِ نیمگ ءَ بازیں پندل سازگ بیگ ءَ اَنت – گیشتر نیکراھی ءُ ٹکی مھلوک ءَ پر ایمنیں جھد ءُ جھد ءِ ھلاپ ءَ کارمرز کنگ ءَ اَنت اشانی ھواری ءَ پاکستان جنگی رھبندانی پادمال کنان ءَ مروچی لس دمگانی سر ءَ بمباری ءُ زھگ ءُ زالبولانی شھید کنگ ءِ ھواری ےَ آیاں بیگواہ کنگ ءَ اَنت کہ آیانی بارو ءَ کسے ءَ سرپدی ھم نیست اِنت کجا اَنت کجام ھال ءِ تہ ءَ اَنت ما یک نابودیں دشمنے ءِ دیمپان اِنت آئی ءَ دراھیں انسانی ھک لگتمال کتگ اَنت –

آئی ءَ گُشتگ ھمک روچ بلوچ پُسگانی آوار جنگ ھمک روچی ءِ کار جوڑ بیتگ ھما رنگ ءَ الجزائر ءَ سامراج فرانس ءُ بنگلہ دیش ءَ ھمے پاکستان ءِ زُلمانی داستان نامان اَنت دشمن ءَ جاھلیں نزام ءِ پیداوار گوشگ ءُ مئے سر ءَ زُلم ءِ ھاکمی ءِ برجاہ کنگ ءِ جھد ءَ اِنت ھاکم سرپد بنت ایوک ءَ زُلم سگگ بیت اِنت بلے مروچی بلوچ راج ءَ اے منّینتگ آ پُر ایمنیں جد ءُ جھد ءِ ھواری ءَ زانت ءُ زانش ھم داشت کنت پُر ایمنیں جد ءُ جھد ءَ زالبولانی ھم مزنیں کردے ھست اِنت ھمے رنگ ءَ بلوچ زالبول پُر ایمنیں جد ءُ جھد ءَ بازیں کچے ءَ بھر مندی ءِ راجدپتری تاکاں نبشتگ کنگ بیگ ءَ اَنت اے اَملانی سر ءَ پاکستان ءَ زالبولانی آوار جنگ ءِ درچ بندات کرتگ دانکہ مردین پُر ایمنیں جد ءُ جھد ءَ گستا بہ بنت –