نبشتانک: مئے میتگ ءِ دروازگ بَند اَنت
نبشتہ کار:دیدگ گُل
دی بلوچستان پوسٹ
درست واب اِت اَنت ءُ تنھا من کُوٹی ءِ دِپ ءَ نشتگ اِتاں ءُ دَامگ کارمرز کنگ ءَ اِتاں اناگہ ءَ یک بیم ناکیں گوانکے چست بُوت مئے ھمساھگ ءِ لوگ ءَ ، تیرانی ھم توار بوت ءُ کوکار ءُ زار ءِ توار بوت بلے مئے لوگ ءِ مردم کس پاد نیاِتک ءُ انچو گُش ئے کہ پہ مجتی واب اِت اَنت دراھیں دُنیا بہ کُٹتیں بلے اے پاد نیاتکگ اِت اَنت۔
من پاد اتک آں ءُ جیڑ اِت کہ بہ روان تاں دو گام جَت منی مات ءِ گوانک اتک کسانیں گوانکے اَت ءُ من دیم ترینت ءُ چارت منی مات اِنت من ءَ گوانک ءَ اِنت من جیڑ اِت کہ بلکیں من ءَ گوانک ءَ اِنت آپ لوٹ ایت تاں من کرّ ءَ ئِے شُتاں من ءَ گوشت ئِے کُجا روگ ءَ ئے لُنجیں شپّاں تو زاناں ھال ءَ سرپد ئے میتگ ءِ،تربت ءَ زالبولے گوں زھگ ءَ تیر گور بیتگ ءُ زالبول بیران بیتگ۔من ھمے جیڑگانی تہ ءَ گیگ ءُ گور نہ بُوت آں تاں مات ءَ من ءَ گُشت پّسوے بدے کُجا روگ ءَ ئے،ل؟من گشت کہ لوگ گرم اِت ءُ کمو لوگانی دِیم ءَ سَیل کناں بِلّے کوش کش ایت ءُ منی دیم ءَ جنت ءُ ھمے ندارگ گُش ئے پہ من جنّت بیت،من اے گپ ءَ را پمیشکا دراج کُت کہ مات سرپد مہ بیت من کجا روگ ءَ بیتگ آں۔
کمو دیر ءَ پد دگہ تیرانی توار بُوت ءُ زالے ءَ کوکار کت ءُ من ءَ برداشت نہ بُوت گڑا من ھم دیم پہ ھمے گُوانک ءِ دیم ءَ شُت آن ءُ چار آں سَے مردماں تپنگے گوں بلے من ءَ نہ دیست اِش ءُ من کسانکیں زھگاں چت ءُ نزار اِت ءُ دیم پہ لوگ ءَ روگ ءَ اِتاں کہ اے زھگاں گوں وت پھریز آں تاں منی دیم ءَ گاڑی یے اتک ءُ منی دیم ءَ اوشت ءُ من ءَ گاڑی یت ءِ تہ ءَ اِش کُت گڑا من نہ زانت چے بہ کناں ءُ منی چمّ ءُ دپ بند کنگ بوت اَنت ءُ دیم ءَ تھارِیں دُنیایے ءَ بُرت اش ءُ اُود ءَ منی چمّے پچ کت اَنت ءُ اود ءَ جنیں آدم ھم ھست اَت درستانی چمّ بند اِت اَنت تاں من ءَ بُرت اِش تھاریں کوٹی یے ءَ،اود ءَ آسن گرم کتگ اِت ءُ داگ دیگ ءَ اِت اَنت ءُ ھر یکے وت ءَ چہ شیزار ءُ توبہ توبہ کنگ ءَ اِت اَنت تاں منی باریگ اَتک ءُ من ءَ آسن ءِ جان ءَ داشت من زار ءُ پریات ءُ من گشت منی میار چی اِنت؟ ھچ اش نہ گشت تھاریں کوٹی ءَ من ءَ بند اِش کُت ءُ چمّ اِش بند کت اَنت ءُ من انچو جیڑ اِت کہ من وتی مات ءِ گپ پرچا نہ زُرت اَنت۔۔
من ءَ ماھے سرجم بوت آیانی مُدام کار اِت اَنت کہ مارا داگ اِش دات ءُ ماھے ءَ پد گُشت اِش کہ شُمارا نوں توبہ اِنت یہ اِناں ،،وتی ھک ءِ بابت ءَ گپ جن اِت؟ راج دوستی کن اِت ؟ گڑا شمُئے دُوا ھمیش بیت اِنت ءُ اے وھد ءَ من ھچ نہ زانت چے بہ گشُ آں من گشت من ءَ توبہ اِنت۔۔
من ءَ وِیل اش کتگ ءُ من دیم پہ لوگاں راھی بوت آں تاں چاراں شپ ءِ دو بج اِنت ءُ من چاراں سرجمیں میتگ کوراس اِنت بزانکہ لین نیست ءُ مُردم دراہ لوگانی تہ ءَ وپتگ اَنت ءُ گرم اش نہ کنت من ھمے جیڑاِت ۔۔
من وتی گِسّ ءَ واتر بوت آں تاں من چاراں گیٹ ءَ را بلائیں کُبلے جتگ ءُ بند اِنت من دیوال ءَ جُپ کت ءُ چاراں درست لوگ ءَ وپتگ اَنت ءُ لوگاں کُبلے جتگ ءُ من ٹک ٹک کت کسے ءَ پچ نہ کت تاں من گوانک دات کس ءَ پچ نہ کت آیاں جیڑ اِت ءَ کہ شپ ءَ دُزّ کاینت مرداں بر اَنت زالاں بر اَنت کُش اَنت ءُ زر ءُ مالاں پچ گر اَنت پمجشکا لوگ ءَ گرمیدان ءَ وپتگ اَنت۔کس ءَ پچ نہ کت گڑا من ڈالچار بوت آں کہ بہ رواں ناکو ءِ لوگ ءَ تاں چاراں درستانی لوگانی دپ کبل اش کتگ۔۔من دِل ءَ جیڑ اِت کہ دراھیں میتگ پرسیگ اِنت پہ ھمے دُزاں ھُدا اے دُزاں گار بہ کن تاں لوگ ءَ آواز اتک آمین من ھبلہ ءُ ھیران بوت آں گڑا دِل ءَ جیڑ اِت کہ میتگ لوٹ ایت کہ ھک ءَ بہ لوٹ آں بلے دست اِش نہ رس اِیت۔میتگ آگھی ءَ اِنت بلے مئے میتگ ءِ دروازگ بند اَنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔