روانک ءِ تہ ءَ مزنیں کساسے ءَ ورناہ ءُ کماشاں بھر زرتگ ءُ منشیات ءِ بھا کنوکانی ھلاپ ءَ اوگام جتگ۔
دی بلوچستان پوسٹ
سربیتگیں ھالانی بلوچستان ءِ دمگ بلیدہ ءِ ھنکین الندور ءَ ھندی مردمانی نیمگ ءَ چہ منشیات ءِ ھلاپ ءَ مرچی بزاں جمئہ ءِ روچ ءَ چہ الندور ھائی اسکول ءَ چہ یک روانک ءِ کَشگ بیتگ ایشی ءِ تہ ءَ ورناہ، کماش ءُ زھگاں بھر زرتگ۔
روانک ءِ تہ ءَ منشیات ءِ بھا کنوکانی ھلاپ ءَ ترندیں اوگام جنگ بیتگ ءُ گوشگ بیتگ کہ “ آؤکیں پدریچ رکینگی اِنت، منشیات ءِ ھلاس کنگی اِنت۔” ھمے وڑ ءَ اوگام جنوکاں اوگام جتگ کہ “بلوچ نسل کشی بند بہ بیت۔”
روانک ءَ بازیں دگانی سر ءَ اوگام جنان ءَ گُڈ سر ءَ یک زھرشانی ءِ دروشم زرتگ ءُ زھرشانی ءَ روانک ءِ سروکی کنوکاں تران کنان ءَ گُوشتگ کہ “اگاں ماں لوٹ ایں اے جیڑہ ھلاس بہ بیت گُڑا ما بائد اِنت زھرشانی بہ کن ایں، روانک بہ کش ایں، مارا توپگ گون نیست بمب گون نیست بلے ما زھرشانی کُت کن آں ءُ بائد اِنت دانکہ مئے جیڑہ ھلاس نہ بیتگ اَنت ما مدام زھر شانی بہ کن ایں۔”
بلوچستان ءِ جھمنندیں مردمانی ردءَ تھنا بلیدہ ناں بلکیں بلوچستان ءِ بازیں ھند ءُ دمگاں منشیات ءِ کاروبار ءَ پاکستانی پوج ءُ ایندگہ چیریں گل کمک کن اَنت ءُ ایشی ءِ بدل ءَ پاکستانی پوج سیاسی جھد کارانی ھلاپ ءَ ھمے منشیات پروشانی ٹولیاں ڈیتھ اسکواڈ ءِ وڑءَ کار بند اِیت۔