“اسلم بلوچ ” ”یک بلوچ جرنلے ءِ کِسہ “ دی بلوچستان پوسٹ گچینی

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

“اسلم بلوچ “

”یک بلوچ جرنلے ءِ کِسہ “

دی بلوچستان پوسٹ گچینی

نبشتہ کار:بھزاد دیدگ بلوچ

گوستگیں ھپتاد ءُ یک سالانی تہ ءَ بلوچستان ءَ برجاھیں آجوئی ءِ جنز پُرشت ءُ پروش، رُدوم ءُ چِست ءُ برزی سوبمندی ءِ گاماں جتائیں جیڑھانی آماچ اِنت بلے اشاں چَہ ابید ھم وتی گاماں جنان ءُ روان اِنت یک جھلانکیں ھونریچی یے آجوئی ءِ جنز ءَ بازیں کردکارانی سر گِندگ ءَ کاینت چریشاں چَہ یک سرے ھنچیں آئی ءَ بلوچ چاگرد ءَ وت ءَ نامینتگ.

اے سر کجام ھم جوانیں تاکانی سر ءَ نبشتگ کرتگیں چیریں کِسھے ءِ رنگ ءَ اناگاہ ءَ شوک ءُ سُلوئیں تاکانی سر ءَ ڈولڈاریں رنگے ءَ گِندگ بیت ءُ آئی ءِ زندمانی ءِ کِسہ ھمک زبان ءَ درچوک بیت ءُ ھمک لوگانی تہ ءَ آئی ءِ نام پیسری نامانی وڑ ءَ رچوک بیان بیت اِنت، وتی کَچ ءُ کساس ءَ آ اسپارٹیکس ءِ پیم ءَ پِتے ءِ جاگہ ءَ گرانک بیت ءُ دژمنانی واستا یک بیمناکیں رنگے ءَ چم سھریں بامرداں چَہ یکے بیت ءُ وتی زورمندیں باسکانی تہ ءَ ھمگرنچ بیت ءُ ھرکسی ھیالانی تہ ءَ رژنا پگرے جوڑ بیت، اے کردگار ھزرت ابراھیم ءِ رنگ ءَ وتی چُک ءِ دیمھونی ءَ وت گچین کنت ءُ دیمھون جاہ ءَ وت ءَ رسین اِیت ءُ دیمھونی کنت، آ باز رند ءَ وتی دژمن ءِ انگیز ءَ کیت، تیر ءُ ٹوپگواریں آس آئی ءِ سر ءَ ترمپانی پیم ءَ رچوک بنت، آئی ءِ مرگ ءِ ھال ءَ راست کنت ءُ آئی ءِ دشمن ایمنی ءِ واب ءَ وتی سر ءَ ساھیل کنت، بلے آ کجام ھم دگہ جاھے ءَ گیش زورامند بیت ءُ رژنائیں چراگے ءَ رژنا بیان بیت، سُھر تیر آئی ءِ بالاد ءَ پیوست کنان بنت بلے مرگ آئی ءَ دزجَت نہ کنت، آ ھنچیں کردگارے وتی رند پداں یل کنت کہ آئی ءِ چماں کس چار اِت کُت نہ کنت، آ یک ھنچیں وھدے ءَ یک مزن نامیں اگدھے کردگارے ءِ واھند ، گوشوک ءُ سرپد کنوک، استاد ءُ دانکانی سر ءَ نبیسوکے ءِ کردمان ءَ پیلو کنت، آ اے درستاں بس چِل ءُ چار سال ءِ اُمر ءَ سرجمی ءِ گاماں بیت،اے کردگار ناں کہ ٹکے ءِ نام اِنت ناں کہ تاکانی تہ ءَ نبشتگیں دانکانی نام اَنت بلکیں بلوچستان ءِ آجوئی ءِ جنز ءِ راستیں کردار اسلم بلوچ اِنت کہ کماش، ورنا، جنگول راجدار شرپے ءِ رنگ ءَ آئی ءَ را اُستاد ءِ “پنام ” ءَ دینت ءُ توار ئِے جَن اَنت ءُ شھیدی ءَ پد آئی ءَ را بلوچستان ءِ برجائیں آجوئی ءِ جنز ءِ تہ ءَ مزن نامیں کردے ءِ بستار ءَ “جنرل ” لشکر ءِ سرجمیں کمان ءِ شرپ ءِ داد گیج کن اَنت.

بیست ءُ پنچ تاکشان(دسمبر) دوھزار ءُ ھژدہ ءَ اسلم بلوچ گوں وتی پنچ ھمراھاں کماندار رھیم مری سگار، تاج مھمد مری، اھتر شاھوانی، پرید بلوچ ءُ سادک بلوچ ءِ ھمراھی ءَ یک وتکُش تراکے ءِ آماچ بنت ءُ وتی ھمراھانی ھمراہ ءَ زندمانی ءَ چَہ گِسر کپ اَنت، بلے آئی ءِ جند ءِ بارہ ءَ سَھرائیں کرد ءِ پُرشان مروچی ھم جھلانکیں رنگے ءِ ھمراھے ءِ پیم ءَ بلوچ چاگرد ءَ کہ گیشتریں وڑ ءُ پیمے بلوچستان ءِ آجوئی ءِ جنز ءِ تہ ءَ سما کپ اِیت، اشی ءِ سبب چی اِنت؟ ایشی ءِ زانگ ءِ واستا دی بلوچستان پوسٹ ءَ اسلم بلوچ ءِ نزیکیں سنگتانی گون ءَ جُست ءُ پرسی ھال کرتگ.

سال نوزدہ سد ءُ ھپتاد ءُ پنچ ءَ شال ءِ دمگ ٹین ٹاؤن ءَ ھاجی گیبی دگ ءَ رھیم داد دھوار ءِ لوگ ءَ چم پچ کنوکیں اسلم بلوچ ءِ بنداتی وانگ ،،اسپیشل مزن دربرجاہ،، شال ءَ بیتگ ،آ سرجمی ءَ بلوچستان ءِ آجوئی ءِ جنز ءَ سال نوزدہ سد ءُ نَود ءُ چار ءَ ھمگرنچ بیتگ ،وھدیکہ نمیرانیں سردار ھیر بکش مری ءَ درانڈیھی ءَ ھلاس کنت ءُ واتر بلوچستان ءِ شھر شال ءَ جھمنندی بیت گڑا اود ءَ ،،ھک توار ءِ نام ءَ،، زانتی دیونے(اسٹڈی سرکلے) ” ءِ بندات کنت، اے زانتی دیوان( اسٹڈی سرکل) ءَ گیشتر چاگرد ءُ راجداری ءِ بارو ءَ گپ ءُ تران بیت، ورنایانی گیشتر دلگوش گوں جوان ءُ سوھیں سوجاں بیت، اسلم بلوچ ھم ھما ورنایاں چَہ یکے بیت کہ اے پیر مردیں “مارکسٹ ” سوھیں بلوچ سردار ءِ گوشدارگ ءَ کیت چِد ءَ چَہ آئی ءَ جیڑ اِتگ کہ من ءَ چے کنگی اِنت ءُ زانتی دیوانانی بھر زورگ ءَ پد اسلم بلوچ سرجم ءَ نوزدہ سد ءُ نود ءُ چار ءَ لھتیں سنگتانی ھمراھی ءَ بلوچ لبریشن آرمی ءِ بنھِشت ءِ ایر کنت ءُ آئی ءَ را سرجمیں بلوچستان ءِ میتگ میتگ ءَ شنگ ءُ تالان کنگ ءِ ڈُبہ وتی کوپگاں زور اِیت ، پنچ سال ءَ چیر جنگی ءَ زمین پوش بیگ ءَ پد بلوچ لبریشن آرمی ءِ بُن روتگانی جنگ ءَ پد سال دو ھزار ءَ بلوچ، بی ایِل اے ءِ نام ءَ سرجم ءَ سلاہ بندیں جد ءُ جھد ءَ بندات کنت کہ روچ ء مروچی ءَ روان اِنت، اسلم بلوچ بنداتی ءَ بلوچ لبریشن آرمی ءِ مستریں اوتاک ءِ نام ءَ زانکویں بنجل بولان ءِ بنجل ءِ کماندار جوڑ بیت ، چریشی ءَ پد آ بی اِیل اے ءِ جنگی راہ ءُ ریپکاں زانوگری ءِ نام ءَ زانگ بیت، راست ءُ اشکرتگیں گپانی تہ ءَ بیست ءُ پنچ تاکشان دوھزار ءُ ھژدہ ءَ یک وتکُش تراکے ءَ پنچ ھمراھانی ھمراھی ءَ بیران بیگ ءَ یک سالے ءُ شش ماہ ءَ پیسر سال دوھزار ءُ ھبدہ ءَ بلوچ لبریشن آرمی ءِ سرکماش، یا کماندار جوڑ بیت اِنت.

ھما وھد ءَ بلوچ لبریشن آرمی ءَ سرجمیں بلوچستان ءَ سلاہ بندیں جنگ بندات کرتگ اَت آ وھد ءَ بلوچستان لبریشن پرنٹ ءِ انیگیں سروک ڈاکٹر اللہ نزر بلوچ یک نودربر رھشونے اَت ھَنچُش کہ آئی ءَ بلوچ آجوئی ءِ دوستیں نودربر گل بلوچ اسٹوڈنٹس آرگنائزیشن آزاد ءِ بُنھِشت ایر کرتگ اَت چریشی ءِ سبب ءَ آئی ءَ لشکریاں آوار جت ءُ بازیں ماھاں بندیگ جاہ ءَ لَٹ شاپی کُرت ءُ نیم زندی ءَ دیم ءَ آؤرت،بندیگ جاہ ءَ مانزمانی ءَ پد اللہ نزر بلوچ ءَ سلاہ بندی ءِ راہ پہ وت ءَ گچین کُرت.

ڈاکٹر اللہ نزر بلوچ اسلم بلوچ ءَ را اُستاد ءِ نام ءَ توار پِرجنت ءُ گوش اِیت“جنرل اسلم راستی ءَ منی استاد بیتگ، من آئی ءِ نودربر بیتگ آں آئی ءَ من ءَ جنگی ریپک ھیل داتگ اَنت.

اللہ نزر بلوچ ھما مردمانی تہ ءَ یکے کہ اسلم بلوچ ءَ نزیک ءَ زانت ءُ بازیں وھداں آئی ءِ نزیکیں ھمراھانی تہ ءَ یکے بیتگ، اسلم بلوچ ءِ اولی سالروچ ءِ درگت ءَ دی بلوچستان پوسٹ ءَ ڈاکٹر اللہ نزر بلوچ ءَ چَہ اسلم بلوچ ءِ بارو ءَ گپ ءُ تران کرتگ ءُ آئی ءِ کرد ءِ سر ءَ جتائیں جست ءُ پرس کرتگ اَنت، آئی ءَ گْوشت کہ من جنرل اسلم بلوچ ءَ باز نزیک ءَ زاناں جنگی ریپکاں آ باز سوھو ءُ زانت ءُ سرپدیں مردمے بیتگ، جنگ ءِ پِڑ ءَ دژمن ءِ بگیری ءَ ھما وڑ ءَ کہ وتی ھمراہ کہ جنگی سازمان ءَ ھیلے دیائنتگ اَنت کہ آئی ءِ ریپک مارا ھِچ جاہ ءَ دز نہ کپ اِیت، آ یک رژنا پگر ءُ جتائیں سسایے ءِ واھند بیتگ، بلوچانی ٹکی چاگرد بہ بیت یا شھری زندمان یا دگہ جتائیں لیکہ بہ بنت باز زوت وت ءَ ھمے جیڑوانی گیشنگ ءَ وت ءَ ھواری کرتگ اَت، جنرل اسلم ءِ وڑیں ھمراہ ءُ رھشونی ءِ گِسر بیگ راستی ءِ یک راجدپتری تاوانے ءَ چَہ کم نہ اِنت، مارا گیش آئی ءِ درکار بیتگ بلے آشوب وتی زھگاں وت وارت ءُ وت گلائیت.

راستگیں گپے کہ انوگیں وھد ءَ بلوچ راجی جنز ءَ آئی ءِ شھیدی ءَ تاوانی نہ بیت پرچاکہ آئی ءِ شھیدی ءَ بلوچ راج، گیشتر سلاہ بندیں جھدکار ءُ راجداریں باسکاں نوکیں بامے ءِ راہ گیش ءُ گیوار بیت ءُ آیاں گیش جھد ءِ ھمبستگی ءَ مھکم کنت، جنرل ءِ زانت ءُ زانشت باز گیچینیں زانشت مندی ءِ جھلانک ءَ بیتگ ءُ اے زانشمندی ھمک ھما بلوچ ءِ دل ءُ لاپان اِنت ھما کہ بلوچستان ءِ آجوئی ءَ وتی زندمان سرپد بیت اِنت ءُ جنرل اسلم ءِ شھیدی ءَ ھما پُسگاں الم دردمان ءِ رنج یلہ داتگ اَنت”
اسلم بلوچ ءَ بلوچستان ءِ آجوئی ءِ جنز ءَ ھمے واستا یک شوکیں نامے ھست کہ آ دگہ بلوچ رھشونانی رھشونی ءَ ناکہ ٹکی جاورے ءَ کپتگ ءُ ناکہ راجداری، بلے آئی ءِ جھد ءِ سسا ءَ مھروانی ءِ دیم ءَ یک سپاھی ءَ داں جنرلے ” ءِ سپر گوازینتگ بیت کنت بی اِیل اے ءِ تَھ ءِ دْرچاں یک نامی ئیں کماندار بیگ ءَ ابید آئی ءَ یک نوکیں باوست ءُ جنز ءِ بندات کرتگ کہ آئی ءِ جوانیں گپ ھمے بیتگ کہ گل ءَ سرجمی ءَ ادارھی واک ءُ ھرکسی منانکی ءَ ھوارگیجگ بہ بنت ءُ واک ءُ سروکی ءِ ڈُبہ داری ٹکی دروشم ءَ ابید زانشتی ءَ بہ بنت ھماکہ بی اِیل اے ءِ تَھ ءُ توکاں بیتگ اَنت چُشکہ گُڈی ءَ گل ءِ یک گامے ءَ چِست بیگ جتائی ءِ رھبند گوست ءُ دیم ءِ آیوکیں بنکاری ءُ اسلم بلوچ ءِ سرکماشی ءَ بیتگ اَنت

اسلم بلوچ ءَ پدریچ ءَ یک لشکرے یلہ نہ داتگ بلکیں آئی ءَ یک سالے ءُ شش ماہ ءَ کمے وھد ءَ ھما رھبند سرجم کرتگ کہ ھما آئی ءِ وابانی ھیال بیتگ اَنت، ھمے واستا رھبندانی چاری ءَ آئی ءِ روگ ءَ پد بی اِیل اے ءِ سروکی نا آئی ءِ کَھول ءِ مردماں گوں ھمگرنچی بیتگ نانکہ آئی ءِ ٹک ءَ گوں بندوک کنگ بیتگ بلکیں اولی رند اِنت کہ وت منّانکی ءِ درچ ءَ زانشتکاریں ورنا تک ءَ کنگ بیتگ ءُ نودربرانی گوستگیں رھشون بشیر زیب بلوچ ءِ بی اِیل اے ءِ سروک بیتگ.

بلوچستان یونیورسٹی ءِ گوستگیں نودربر ءُ بلوچ نودربر گل بی ایس او آزاد ءِ دو وھد ءَ بیتگیں سرکماش بشیر زیب بلوچ گْوش اِیت” استاد اسلم بلوچ تھنا منی استاد نہ بیتگ بلکیں آ درستیں بلوچ جھد کارانی استاد بیتگ، آئی ءِ مستریں سبب اِش اِنت کہ بلوچ جنگ ءِ آجوئی ءَ نوکیں جھان ءِ رنگ ءَ دیم ءَ آرگ ءَ آئی ءِ کرد اِنت”.

دی بلوچستان پوسٹ ءَ بی اِیل اے ءِ انوگیں سرکماش بشیر زیب بلوچ ءَ چَہ اسلم بلوچ ءِ بارو ءَ ھال پُرسی ءَ وھد کَش اِتگ ءُ آئی ءَ جُست کرتگ، اے چِے سبب اِنت کہ مروچی ءَ داں اسلم بلوچ ءِ گپ بلوچ زرمبشت ءَ بیگ ءَ اِنت آئی ءَ پسھی ءَ گْوشتگ اَت کہ جنرل استاد اسلم بلوچ ھما چراگ ءِ واھند بیتگ کہ آئی ءِ مزنیں سھرائیں کرد بیتگ، آئی ءَ اے سپر ءِ تہ ءَ بے کساسیں جنجٹانی دیمپانی کرتگ، من سرپد باں کہ انیگ ءَ داں سَجوئیں مردمانی تہ ءَ ھم چوشیں زورامندی نیست اِنت بیت کنت کہ آیوکیں وھد ءِ راجدپتر ءَ چوشیں راجدپتران اتک بہ کنت ءُ چوشیں جاھانی تہ ءَ کم ءُ کساسیں کاراں کُرت بہ کنت بلے استاد اسلم وتی وھد ءَ وتی کاراں درستاں چَہ دیم ءَ بیتگ “جنرل گیاپ، ھوچی منہ، چی گویرا ءُ دگہ بازیں چاگرد سازمان ودی بیتگ اَنت ءُ وھدیکہ آشوب ءِ بھر جوڑ بیتگ اَنت اود ءُ گڑا چاگرد آشوب ءِ بھر بیگ ءَ جاڑیگ بیتگ اَنت، بلے جنرل اسلم بیت کنت کہ وھد ءَ پیسر وھدی بیتگ، آ بس ھشت ھمراھانی ھمراہ بیتگ ءُ چاگرد یک زرمبشتے ءِ واستا جاڑیگ نہ بیتگ من برے برے جیڑاں کہ اگاں آیانی رنگ ءَ استاد اسلم ھم آشوب ءِ واستا پیسر ءَ ھوار بیوکیں چاگردے ءَ ودی بیت اِنت گڑا آ اے نامناکیں مردماں چَہ باز گیش دیم ءَ جنز اِتگ اَت، آ بلوچ چاگرد ءَ یک بامردے ءِ نام جوڑ بیتگ، آ نوکیں اشوب ءِ چیر جنگی ءِ وارپیئر ءِ بُنکی اِنت، ھمے وڑ ءَ زرمبشت ءِ گام دیم ءَ جنزان کن اَنت گڑا سرجمیں پدریچ ءَ مانشان اِیت، مروچی ھما سَٹ ءُ مٹی اسلم ءَ آؤرتگ اَنت، ھما شَے کہ آیاں پجار کرتگ اَنت، آ چون راجدپتر ءِ تاکاں بیگواہ بنت ءُ پد ءَ جنرل اسلم ءِ کرد ءِ رنگ ءَ تاک تاک ءَ لیٹان بنت ءُ مُزی ءِ بستار ءَ در ءَ بنت.
گڑا بلوچ لبریشن آرمی ءَ آئی ءِ روگ ءَ تاوانبار بیتگ؟ اے جست ءِ پسو ءَ بی اِیل اے ءِ سرکماش ءَ گْوشت کہ “اگاں منی جند ءِ نیمگ ءَ چَہ بہ گْوش آں گڑا آئی ءِ شھیدی ءَ من ءَ دردناکیں درداں چَہ درستاں گیشتریں درد ھمے بیتگ، آئی ءِ روگ ءَ چَہ یک سنگتے ءَ، یک استادے ءَ، یک ساھیگے ءِ یاتگیری الم بنت بلے گَل ءُ راج ءَ ھچبر تاوان نہ بیتگ پرچاکہ ما جنگ ءِ زندمان ءَ گوں ھمدپ اِنت، آئی ءَ مئے زانت ءُ گلی ھمگرنچی ءِ بنریشگ مئے تہ ءَ ھنچُش اڑینتگ کہ مردم تُری کجام رنگ ءَ دیم ءَ بہ بیت چو ھدا ءِ کردمان ءَ بلے آئی ءِ روگ ءَ گل ءَ نیزوری مہ بیت ءُ گل زوت ھمے نیزوری ءَ پُر بہ کنت ءُ گاماں جنان بہ کنت ءُ من سرپد باں کہ اے ھم آئی ءِ کرداں چَہ یکے بیتگ اے کساسیں کردانی واھند بیگ ءَ پد ھم آئی ءَ وت ءَ گل ءِ بنزہ ءِ نیزوری نہ منّ اِتگ کہ آئی ءِ زانت بے کساس ءَ گیش بہ بیت بلے گل ءَ ھچ تاوانی مہ بیت آ بے کساس ءَ دور چاریں مردمے بیتگ،استاد اسلم ءِ زندمان ورنایانی واستا یک چراگے ءِ دروشم ءَ چمکان اِنت ءُ ھرکسی ءِ دیم ءَ تھاریں شپ ءَ رژنا کنان اِنت آئی ءِ شھیدی درستاں واستا یک نوکیں رھشونی ءُ ایرمُرتگیں رگانی جزبگ ءِ باھندی جوڑ بیتگ.
بلوچ راجی آجوئی سنگر بلوچ ھمسنتی اِنت ایشی ءِ سرجمی دَہ نومبر دوھزار ءُ ھژدہ ءَ بیتگ چریشی ءَ چار بلوچ سلاہ بندیں گل بلوچ لبریشن آرمی، بلوچستان لبریشن پرنٹ، بلوچ ریپبلکن آرمی ءُ بلوچ ریپبلکن گارڈ ھمسنت بیتگ اَنت اے ھمسنتی ءَ بلوچ زرمبشت ءَ یک مھکم ءُ گرانیں سنگے ءِ نام گون اِنت اسلم بلوچ ءَ اللہ نزر بلوچ ءِ ھمراھی ءَ اے ھمسنتی ءِ برجم کنگ ءِ بنجاھی مردم گوشگ بنت.

گلزار امام بی آر اے ءِ سروک اِنت کہ اے ھمسنتی ءَ ھمگرنچ اِنت گوں دی بلوچستان پوسٹ ءَ بلوچ ریپبلکن آرمی ءِ سروک ءَ چَہ اسلم بلوچ ءِ بارو ءَ جُست کت آئی ءَ گْوشت کہ “جنرل اسلم بلوچ ءَ دیم پہ دیمی ءَ منی گند ءُ نند بیتگ، آ یک جوان ءُ جھلانک زانتی ءِ ھمراھی ءَ یک جوان ءُ سوھیں جنگی کمانڈر ءُ دور چاریں مردمے بیتگ، من ءَ استاد ءِ کِرد ءَ بے کساس وتی نیمگ ءَ کَش اِتگ، آئی ءَ ھروھد ءَ درست وتی ھمکوپگی ءَ ھمگرنچ کرتگ ءُ روانی ءِ ھیال درشان کرتگ اَنت، اے تچکی ءِ انسانانی زندمان ءُ نمیرانی ھست اَنت ھَنچش کہ استاد اسلم بلوچ مروچی گپانی میان ءَ مئے کَش ءَ نہ اِنت بلے آئی ءَ مول ءُ مرادانی راہ گیجی ءِ دیمروی ءِ واستا مارا یک کِشکے ءَ پرینتگ، “براس ” ءِ رنگ ءُ دروشم ءَ استاد ءِ کِشکے نشان مئے دست ءَ اِنت، اگاں ما براس ءِ وڑیں ھمگرنچی نِزور کُرت اَنت گڑا پد ءَ گْوشت کن ئے کہ استاد ءِ شھیدی بلوچ راجی جنز ءَ تاوان بیتگ، اگاں ما استاد ءِ راہ ءُ رھبند ءُ پیش داشتگیں کِشک ءَ سوبمندی ءَ روان کن ایں گڑا استاد ءِ رژنائیں پکر تاں آجوئی ءِ شَھموکیں چراگانی ھمراھی ءَ برجاہ مان اِیت”.

اے راستی ءِ کہ اسلم بلوچ یک آجوئی دوستیں راجدوستے بیتگ ءُ یک سلاہ بندی ءِ بنریشگ بیتگ بلے آ جنگ ءُ چوپ ءَ ترندی ءِ بگیر بیتگ آ نیکراھی نام ءَ ناشرکارانی بگیر بیتگ ھمے واستا تچک ءَ تچک آئی ءَ “شئیہ ” نیکراھیانی کُشت ءُ کوش ءِ بگیری ءَ وتی ھیال درشان کرتگ اَنت آ جنگی راہ ءُ رھبندانی سکیں رھبند چاروکیں مردمے بیتگ کہ آئی ءَ ھروھد ءَ جنگی رھبند دلگوش کرتگ اَنت، زالبول، چُک، نادراہ ھر وھد ءَ آئی ءَ جنگی جاوراں تاوان ءَ رکینتگ ءُ الکاپ ءَ دلگوشی ءَ چار اِتگ اَنت ھمے واستا دمگ ءَ ھمسنتیں ڈیھاں بندوکیں زیردستیں مردمانی دل ءُ لاپاں شوک ءُ ڈولڈاریں مھروانی ءَ جاگہ کرتگ اَت.

سندھو دیش ریوولیوشنری آرمی سندھ ءُ سندھی راجی آجوئی ءِ واستا دراجیں مُدتے ءَ سلاہ بندی جنگ ءَ اَنت، سوپی شاہ انایت ایس آر اے ءِ کماندار اِنت ءُ اسلم بلوچ ءِ نزیکیں مردماں چَہ یکے بیتگ، اسلم بلوچ ءِ بارو ءَ آئی ءِ گْوشگ اِنت “شھید واجہ استاد اسلم بلوچ منی گون ءَ دوھزار ءُ دو ءَ بہ گر داں آئی ءِ شھیدی ءَ دور چاریں زانشی، زانشمندی ءُ سلاہ بندی ءِ بارہ ءَ یک مھکمیں نزیکی یے بیتگ، اے سرجمیں بارہ ءَ اگاں من بہ گْوش آں گڑا استاد جندی نیمگ ءَ یک مھروانے بیتگ، یک ڈک، راستین، ایماندار، مھروان ءُ درد ءُ رنجانی ھمراھدار، ھمگرنچ بیوک،، زانشی ءُ زانشتمندی ءِ بارو ءَ یک ڈکیں ڈیھے ءِ بستار زانگ ءُ بندات ءُ گڈی ءَ ھوار سرجمی ءَ ڈیھی ءِ بارو ءَ سرپد بیوکیں سلاہ بندی ءَ “پروپیشنل “ساپ دلیں کماندارے ءِ داروکے ءِ ھمگرنچی ءَ یک پاک ءُ پلگاریں مردمے بیتگ، ھمے درست اَنت کہ گڈی وھد ءَ ھم دوستناکیں ڈیھ “بلوچستان ” جوڑ بیتگ ءُ سرجمیں بلوچستان ءِ واستا یک پاک ءُ پلگاریں شھیدی ءِ واستا یک نوکیں راہ، “لائین آف ایکشن “یک رِد اوشتگ، دیمھونی، دلبڈی، بامردی ءُ بدیں رھبندانی بند کنگ ءُ نہ پروشوکیں وھدے ءِ بستار یلہ کرتگ، ھما راہ ءُ رند پداں کہ “ڈائریکشنز ” رد بند روانی بیت گڑا بلوچستان یک روچے ءَ الم آجو بیت اِنت”.

ایس آر اے ءِ کماندار سوپی شاہ انایت ءَ دی بلوچستان پوسٹ ءِ گون ءَ بلوچ زرمبشت ءِ سر ءَ اسلم بلوچ ءَ پد کپتگیں زورانی سر ءَ گپ جنان ءَ گْوشت ئِے کہ “دیمھونی ءُ شھیدی راج ءُ زرمبشتانی واستا دربشوکیں استال جوڑ بنت، گیشتر لیڈرشپ “رھشون “ ءِ شھید بیگ ءَ وھد ءُ دماناں بھمیانگ ءُ مازاھانی تہ ءَ الم زور کپ اِیت، بلے ھما جنز ءُ گل ءِ گور ءَ کہ زمین ءُ راجی گام ھوار اَنت، گَلی زانش ءُ رھبند، راست ءُ زگریں کارکنوک ءُ سرجمیں گلی رھبند جاڑیگ بہ بنت گڑا آ اے ودی بیتگیں بَھبکڑی ءُ نیزوریاں زوت گپت کنت ءُ ھالیگیں جاہ ءَ پُر کرت کنت، جھد ءِ آجوئی ءِ تہ ءَ جنگی رھبنداں ترندی چِک اِیت ءُ راج ءُ زرمبشت ءَ دیم ءَ بران کنت، استاد واجہ اسلم بلوچ ءِ شھیدی ءَ پد بی اِیل اے ءِ سرپیس کنوکیں پِکر، ھژداری ءُ گل ءُ سلاہ بندی ءِ بارو ءَ انوگیں وھد ءَ زرمبشت ءَ دیم ءَ بران اِنت ایشی ءِ بارہ ءَ سرجمیں سنگتانی کار ستاہ کرز اِنت”.

اسلم بلوچ یک رھبندگیریں جنگی کماندارے بیتگ آئی ءِ ھُنر ایوک ءَ توپک ءِ تہ ءَ نہ بیتگ بلکیں ادبی ءُ راجداری ءِ تکاں یک نبشتگ کنوکے بیتگ، آ ھمک وھد ءَ گوست ءُ آھوک، راجداری ءُ چاگردی جیڑاھانی سر ءَ ندکاری ءَ بیتگ آئی ءَ وتی ھیال ءُ لیکہ جتائیں رنگ، روتاک ءُ ٹی وی چینلانی سر ءَ گُلگِداری ءِ رنگ ءَ شنگ ءُ تالان کرتگ اَنت.

بلوچستان ءِ انوگیں جاور ھال ءُ برجاھیں آجوئی ءِ جنز ءَ نگاہ ایر کنوکیں اھوالکار سلام سابر گوستگیں دیھکے ءِ وھد ءَ بازیں براں جتائیں بنگپانی سر ءَ گلگِدارانی گِرگ ءَ چَہ اسلم بلوچ ءَ جتا جتائیں چیریں جاھاں گِند ءُ نند بیتگ، اے وھداں پہ اھوالکاری ءَ سلام سابر ءَ اسلم بلوچ ءِ گون ءَ نزیکی بیتگ، دی بلوچستان پوسٹ ءَ سلام سابر ءَ را جست ءُ پُرس کرتگ کہ تو اسلم بلوچ ءِ زانشی ءُ راجداری ءِ زانشت ءَ چتور گندے ءُ چی دربرتگ آئی ءَ گْوشت کہ” تو کجام بلوچ چیر جنگیں کماندار ءِ بنریشگی ھک ءَ وتی مجگ ءَ داریت اسلم بلوچ تچک ءَ یک ڈک بیتگ، جتائیں بنگپانی سر ءَ بازیں براں چیریں جاھاں منی ءُ اسلم بلوچ ءِ گند ءُ نند بیتگ ءُ ھروھد ءَ توپک ءِ ھمراھی ءَ وانگیانی یک لَڑے ھم من آئی ءِ ھمراھی ءَ دیستگ، آئی ءَ پَٹ ءُ پول کنگ ءِ بے کساس ھُب بیتگ ءُ آئی ءِ پَٹ ءُ پول بے کساس جھلانکیں رنگے ءَ بیتگ، زانشت، راجدپتر ءُ تبزانشتی ءَ آئی ءَ بے کساس زانوگری بیتگ، آئی ءَ جستانی پَسو تچک بکے جھلانکیں رنگے ءَ پالگاریتگیں دروشمے ءَ دیوک بیتگ درستاں چَہ گیش جوانتر آئی ءِ ندکاری بیتگ اگاں تو آئی ءِ ندکاری ءَ بہ وان ئے گڑا تر ءَ بیسہ نہ بیت کہ اے ندکاری اے وڑیں مردمے ءِ بیت کن اَنت کہ بس دَہ تبک ءِ وانگندگی، بلکیں آئی ءِ ندکاری ءِ بنِشیں گال گچین کرتگیں ھیالانی جُھلی ءُ مھکمیں منانکانی تہ ءَ تر ءَ اے راستی ءَ پدرا کن اَنت اے کجام مزن زانشت کرتگیں ادارھے ءَ چَہ تچک ءَ آؤرتگیں مردمے ءِ ندکاری اِنت،

اسلم بلوچ یک جنگولیں مردمے بیتگ بلے آئی ءِ جنگ سرجمی ءَ راجداری ءِ زانشت ءِ سر ءَ بیتگ چُشکہ آ وتی زانشت ءِ سر ءَ ترندی ءِ نگاھاں گوں چاروک بیتگ ءُ اڑیتگ گوں، بلے آئی ءَ دیم ءِ مردمے گپ جوانیں دلگوش کرزیں وڑے ءَ گوش داشتگ اَنت ءُ اگاں آئی ءَ را مزنیں چکاسگی منّانک ءِ دیگ بیتگ گڑا آئی ءَ دیم ء مردمے گپ بے منّانک ءَ واتر نہ کرتگ اَنت،

اسلم بلوچ ءَ یک بازیں وھدے ءَ چَہ بلوچستان ءِ آجوئی ءِ زرمبشت ءَ یک سھرانکیں چھرگے ءِ مستری ءِ پلگارگ گون بیتگ بلے مجید بریگیڈ ءِ بنھِشت ءِ ایر کنگ ءُ آئی ءِ برجاہ دارگ ءَ آئی ءِ یک ھنچیں کردمانے بیتگ کہ آئی ءِ دژمنانی چماں بیمناکین ءُ سنگتانی چماں یک ڈکی ءِ دروشماں جوڑ کنان بیتگ.

مجید بریگیڈ ءِ پدراھی ءِ ڈاہ ھما وھد ءَ بیت اِنت کہ دوھزار ءُ دَہ ءَ مجید لانگو سؤم لشکر ءِ گون ءَ دیم پہ دیمی جنگ ءَ شھید بیت اِنت آ ویل ءَ پد دومی سال ءَ سِی تاکشان( دسمبر) دوھزار ءُ یازدہ ءَ مجید بریگیڈ وتی اولی کار ءَ کنت، کہ درویش بلوچ کہ گوستگیں بنجائی وزیر نسیر مینگل ءِ زھگ شپیک مینگل ءِ لوگ ءَ وتکُش تراک کنت بلوچ لبریشن آرمی ءِ شنگ بیتگیں داھی جارانکی ءِ رِد ءَ مجید بریگیڈ ءِ جوڑ کنوک ءُ آئی ءِ بنکاری اسلم بلوچ بیت اِنت،بلے دوھزار ءُ یازدہ ءَ پد مجید بریگیڈ ءِ کارانی تہ ءَ دارانکی بیت، بلے وھدیکہ دوھزار ءُ ھبدہ ءَ اسلم بلوچ بلوچ لبریشن آرمی ءِ سرکمان جوڑ بیت ءُ دومی سال ءَ یازدہ ساچان( اگست) دوھزار ءُ ھژدہ ءَ مجید بریگیڈ دالبندین ءَ چینی انجنیئرانی یک کاروانے ءِ سر ءَ وتکُش تراک کنت، اے وتکُش کنوک دگہ کَس نہ اِنت اسلم بلوچ ءِ ورنائیں بچ ریھان بلوچ بیت اِنت پد ءَ لھتے ماھانی گوزگ ءَ پد بیست ءُ سَے گْوبشان (نومبر) دوھزار ءُ ھژدہ ءَ مجید بریگیڈ ءِ سَے “کربان کنوک “کراچی ءَ چینی قونسل ھانہ ءَ نشانگ کن اَنت اے سلسلگ پد ماں پد ءَ اسلم بلوچ ءَ پد ھم اُوشتوک نہ بیت اِنت آئی ءَ چَہ پد یازدہ سوچکان( مئی) دوھزار ءُ نوزدہ ءَ چار کربان کنوکاں گوادر ءَ پی سی ھوٹل ءَ بیست ءُ چار ادار ءَ گپتگ.

اسلم بلوچ یک راستگ ءُ تچک دابیں مردمے بیتگ ھمے واستا کہ آئی ءِ ھمراھانی دزرس اِنت ھمود ءَ بگیرکار ھم ھست اَنت بلے کس آئی ءِ کردمان ءِ جھلی ءَ نہ منّ اِیت آ ھما مردمانی تہ ءَ گون ھوار بیتگ کہ وھد ءَ چَہ پیسر مِر اَنت بلے ترند سوبمندی ءِ گاماں جنان باں وھد ءَ چَہ پیسر سوبمند بنت.

نوکتریں

آواران ءَ پاکستانی پوج ءِ سر ءَ اُرش، اُرشے زمّہ واری بی ایل ایف ءَ منّ اِتگ –

دی بلوچستان پوسٹ چمبور ءَ پاکستانی پوج ءِ یک کارمندے دور جنگیں توپک ءِ گون ءَ نشانگ...

گل ءِ جوانیں سنگت یاسر ابراھیم پنام گُل محمد نادراھی ءِ سوب ءَ مکران ءَ گل ءِ اوتاک ءَ بیران بوتگ – بی آر...

یاسر گوستگیں یک سالے ءَ بی آر اے ءِ پتر ءَ راجی آجوئی ءِ ھاتر ءَ سلاہ بندیں جنگ ءَ گوں...

کیچ: نشہ باپاری ءُ گوستگیں روچ ءَ الندور ءَ وانگ ءِ جاہ ءِ سوچگ ءِ بگیری ءَ پریس کانفرنس

دی بلوچستان پوسٹ سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ...

زاکر جنا من ءَ پَھِل کن – کندیل بلوچ

آزمانک: زاکر جان من ءَ پَھِل کن آزمانکار: کندیل بلوچ دی...