بلوچستان ءِ شھر پنجگور ءَ دوشمبے ءِ روچ ءَ موٹر سائیکل ءَ پِٹیں بمب تراک ءَ چہ یک مردمے بیران ءُ بازیں مردمے ٹپیگ بوتگ اَنت۔
اے وئیل اللہ اکبر چوک ءِ نزیک ءَ بوتگ۔
ٹپیگ زوت دمگی نادراھجاہ ءَ سر کنگ بوتگ اَنت کہ اود ءَ ڈاکٹراں گْوشتگ کہ ٹپیگاں چہ سئے مردمانی جاور ھال سک نگیگ اَنت۔
بلوچستان ءِ بُنجاھی شھر شال ءِ دمگ کلی سوراب خان قمبرانی چار جنوری ءِ شپ ءَ کساس شپ ءِ یک ءَ۔یک لوگے ءِ سر ءَ کاؤنٹر ٹیررازم ڈیپارنمنٹ ( سی ٹی ڈی) ءُ فرنٹیئر کور ( ایف سی) ءِ کارندھاں بیڑبرتگ، چریشی ءِ میان ءَ چار مردم آوار جتگ ءُ ناشناسیں جاھے ءَ برتگ اَنت- ھمے وڑ کیچ ءِ دمگ چہ مند ءَ ھم دو براتانی بیگواھی ءِ ھال دیم اتکگ –
دمگی اِھوالکار ءُ کھول ءِ رِد ءَ آوار جنگ بیتگیں مردمانی تہ ءَ داؤد بلوچ ء حاجی شاہ بخش، عمر بلوچ ء حاجی شاہ بخش، نصیب اللہ ء شھداد خان نام ءَ چہ بیتگ اَنت-
کھول ءِ گوشگ اِنت وئیل ءَ پد اے مردمانی ھچ وڑیِں ھال نیست چریشی ءَ کھول سک سسّائی زور ءِ آماچ اِنت-
بیگواھیں مردمانی سیاداں گوشتگ کہ شپ ءِ وھد ءَ پوج ءِ کارندہ لوگ ءَ اتکگ اَنت، پٹ ءُ پول ءِ کتگ اے مردم وتی ھمراھی ءَ برتگ اَنت – آیانی گوشگ اِنت کہ ناں دزگیری سوب گوشتگ اِت ءُ نانکہ پدر کتگ کہ آ کجا برتگ اَنت-
ھمے وڑ چہ کیچ ءَ ھال اِنت پاکستانی پوج ءَ مند ءِ دمگ گوبرد ءَ گوستگیں شپ ءَ پاکستانی پوج ءَ لوگ لوگ ءَ پٹ ءُ پول کتگ اے میان ءَ بشیر ء گل محمد لوگ ءَ بیڑبرتگ آئی ءِ دو چُک سرور ءُ ھازر آوار جتگ ءُ ناشناسیں جاھے ءَ برتگ اَنت-
بلوچ یکجھتی کمیٹی ءِ بنجاھی رھشون سمی دین ءَ گشتگ کہ ریاست بلوچ راج ءَ یک راجے ءِ دروشم ءَ نہ چار ایت بلکیں یک دژمنے ءِ رنگ ءَ چار ایت، ءُ ھمے پکر بلوچستان ءَ برجاھیں سنگینیں انسانی ھکانی لگتمالیانی بنیاد انت۔ آئی ءِ رد ءَ ریاست ءِ جیڑہ نا تھنا بلوچ انسرجنسی انت، نا انسداد ناشرکاری انت، ناکہ وتگڑیں نارازءں بلوچ انت، بلکیں اسل جیڑہ بلوچ ءِ پجار ءُ ھستی انت۔
آئی ءَ گْوشتگ ھمے سوچ ءِ درچ ءَ بلوچ مردین، جنین، ورنا، پیر ءُ تاں کسانیں چُک ھم زورانسری بیگواہ کنگ یا کُشگ بیگ ءَ اَنت۔ اے بلوچ کُشگ ءِ پالیسی وت اے گپ ءَ پدر کنت کہ ریاست ءَ جیڑہ گوں بلوچ گھگیری ءَ نہ اِنت بلکیں آئی ءِ پجار ءَ گوں اِنت۔
سمی دین ءِ رد ءَ ناشرکاری ءُ انسداد ناشرکاری ءِ بیانیہ بس یک پردہ یے کہ ایشی ءِ پُشت ءَ ریاست وتی بلوچ دژمنیں پالیسیانی توجیل ءَ کنت ءُ دنیا ءِ دیم ءَ آئی ءِ توجیل کنگ ءِ کوشست ءَ کنت۔ اگاں اے کار راستی ءَ انسداد ناشرکاری ءِ تَک ءَ کپ اَنت گڑا بے گناھیں جنین آدم، لاپریں جنین آدم ءُ سیزدہ سالی زھگانی زورانسری بیگواہ کنگ کجام کانود ءُ کجام تک ءِ رد ءَ جائز بوت کنت؟
آئی ءَ گْوشتگ وھدیکہ بلوچ نسل کشی ءِ گپ بیت گُڑا ایشی ءَ دروگیں بیانیہ گْوش اَنت، اگاں چہ یک راجے ءِ واستا چہ ایشی ءَ مستریں نسل کشی چے بوت کنت کہ آئی ءِ ھلاس کنگ ءِ واستا سرجمیں سیمسراں چہ سرگوز بہ بیت ءُ مردین، جنین، پیر ءُ زھگ ءِ نیام ءَ پرک ءُ تپاوت نیست۔
سمی دین ءَ گوشت کہ دگنیا ءِ تہ ءَ سیویلائز راج دژمنی ءُ جنگ ءِ ساھت ءَ ھم زالبول ءُ چُک ءَ جتا ءُ ایمن سرپد بنت بلے بلوچ راج ءِ بد بھتی ھمیش اِنت کہ ھما ریاست ءَ آئی ءَ را دژمن لیک اِتگ آئی ءِ تہ ءَ نہ دود پشت کپتگ ءُ نہ کہ انسانیت۔ راجی ءُ میان استمانی آئین ءُ کانود نوں ایوک ءَ کاگدی ٹاپار جوڑ بوتگ انت کہ املی رد ءَ آھانی ھچ وڑیں وجود نیست۔
گڈسرا آئی ءَ چہ میان استمانی انسانی ھکانی ادارگ ءُ دودمانیں دگنیا ءَ لوٹ کرتگ کہ آ بلوچستان ءَ بلوچ راج ءِ ھلاپ ءَ برجاھیں زورانسری بیگواھی، درکانودی کشتار ءُ پالیسیانی سر ءَ زوت ءُ سنگینیں رنگے ءَ دلگوش بہ کن اَنت۔
بلوچستان ءِ دمگ موسیٰ خیل ءَ ژوب سیمسر ءِ نزیک ءَ چہ ڈب ءَ چار ناشناسیں مردمانی لاش دزکپتگ اَنت-
گیشیں ھالانی رِد ءَ گوستگیں روچ بلوچستان ءِ دمگ چہ ھرنائی ءَ دزکپتگیں چار لاشانی پجّار بیتگ اَنت، پجّار کنگ بیتگیں مردمانی تہ ءَ نور محمد جھمنند بابر کچ کوٹ منڈئی، جمعہ خان مری جھمنند کوریاک، محمد رسول ءُ علی اکبر ء علی نواز سمالانی جھمنند گھوسٹ ھرنائی ھوار اَنت-
چہ ھرنائی ءَ چہ دزکپتگیں لاشانی تہ ءَ علی اکبر ء علی نواز سمالانی ھپت ماہ ءَ ساری پاکستانی پوج ءَ آوار جتگ ءُ بیگواہ کتگ، وھدے کہ جمعہ خان مری ءِ کھول ءَ ھم راست کتگ کہ جمعہ خان یک سالے ءَ ساری پاکستانی پوج ءَ چہ ھرنائی بازار ءَ آوار جتگ ءُ وتی ھمراھی ءَ برتگ-
گوستگیں روچ ءَ چہ ھرنائی ءَ دزکپتگیں دگہ دو لاشانی زورانسری آوار جنی ءِ ھال دز نہ کپتگ، بلے بلوچستان ءَ زورانسری آوار جنی ءِ ھلاپ ءَ کارکنوکیں گل تُرس پدر کنگ ءَ اِنت کہ آ دگہ دو لاش ھم پیسر ءَ چہ بیگواھیں مردم بیت کن اَنت-
زانگ بہ بیت کہ بلوچستان ءَ اشی ءَ ساری ھم بازیں لاش دزکپتگ اَنت یا سی ٹی ڈی ءِ نیمگ ءَ چہ دروگیں میڑاں کشگ ءَ پد لاشانی پجّار انچیں مردماں بیتگ اَنت کہ آ جتاجتائیں وھداں چہ بلوچستان ءَ زورانسری بیگواہ کتگ اَنت-
وائس فار بلوچ مسنگ پرسنز ءِ رِد ءَ بلوچستان ءَ بیست ھزار ءَ چہ گیش مردم پاکستانی پوج ءُ چیریں ادارھانی کارندھانی دست ءَ زورانسری آوار جنی ءِ نشانگ کنگ بیتگ اَنت- گل ءِ گوشگ اِنت کہ زورانسری آوار جنی ءِ وئیل ھمکروچی ھساب ءَ گیش بیگ ءَ اَنت مردماں پاکستانی پوج ءِ نیمگ ءَ درکانودی کاورائیانی دیمپانی اِنت-
ھمے وڑ مروچی بلوچستان ءِ دمگ چہ موسیٰ خیل ءَ دمگی پولیس ءَ دگہ گیش لاش دزکپتگ، آ کُشگ ءَ پد دور داتگ اُنت-
پولیس ءِ رِد ءَ لاش ءِ پجّار واستا بنداتی پٹ ءُ پول بندات کتگ وھدے وئیل ءِ سوب ءُ زمہ واراں پٹ ءُ پول کنگ ءِ ھاتر ءَ کاروائی برجاہ ءَ اِنت-
بلوچستان ءَ زورانسری بیگواھیانی درچ ترندی ءَ گوں برجاہ انت کہ اود ءَ بلوچ ورنا ھمک روچ پاکستانی پوج ءُ چیریں ادارگانی پنجگاں رَکگ ءَ نہ انت-
بلوچستان ءِ بنجاھی شھر شال ءُ گوادر ءَ سیزدہ سالی ئیں ورنایے ءَ ھوار چار کس زورانسری بیگواھی ءِ آماچ کنگ بیتگ انت-
چہ شال ءَ سر بیتگیں ھالانی رد ءَ گوستگیں شپ ءَ کمبرانی دگ ےَ سیزدہ سالی ئیں گوھرام ء پیز مھمد ایف سی ءُ سی ٹی ڈی ءَ چہ لوگ ءَ آوار کتگ ءُ برتگ-
ھمے وڑ ءَ بلوچستان ءِ تیابدپی شھر گوادر ءَ پوج ءَ سَے مردم آوار جتگ ءُ برتگ انت-
گیشیں ھالانی رد ءَ پاکستانی لشکر ءَ بلوچستان ءِ گوادر ءِ ھند جیونی پانوان ءِ دمگ ءَ سئے مردم دزگیر کتگ ءُ ناشناسیں جاھے ءَ برتگ انت۔ بیگواھیں مردمانی تہ ءَ رضوان عبدالرشید، صمد ءُ صابر امام ھوار اَنت۔
سیاد ءُ وارساں وتی نزیکیں مردمانی جان سلامتی ءِ لوٹ کتگ ءُ واکداراں گوں دزبندی کتگ کہ آ زوت یلو کنگ بہ بہ دے انت۔
دمگ ءِ نندوکاں گْوشتگ ا کہ ما چہ سرجمیں انسانی ھکانی گل، سول سوسائٹی ءُ رسانکدراں لوٹ کن ایں کہ اے وئیل ءَ ترندیں نوٹس بہ زور اَنت، سئیں بیگواھیں مردماں یل بہ کنائین انت ءُ بلوچستان ءَ زوراکیں بیگواھی ءِ اے سلسلگ ءَ بند کنگ بہ بیت۔
بلوچی زبان ءَ ڈیجٹلائز کنگ ءُ دیمروئی ءَ تاھیر پروڈکشن ءِ باسکانی نوک جوڑ کتگیں گوانکوی ایپس ”گال امبار“ پہ کارمرزی ءَ ساڑی انت-
ھمے گوشگ بوگ ءَ انت کہ اے ھژدہ ماہ ءِ پروجیکٹ ءِ تہ ءَ ” اولی لارج اسکیل کورپس، این ایل پی ٹولز، او سی آر، اپسیچ ماڈل ءُ یک سرجمیں اے آئی پارورڈ لینگویج پلیٹ فارمے ءَ ابید دگہ کمپیوٹیشنل کار ھوار اَنت۔
گال امبار ءِ وتی جند ءِ آفیشل ءَ ھمے گوشگ بوتگ کہ دو شھد ءُ شِرکنیں زُبان کہ بلوچ ئِے کارمرز کن اَنت، آ بلوچی ءُ براھوئی اَنت۔ بلوچ دِگہ ھم بازیں زُباناں کہ گپّ کن اَنت بلے بلوچی ءُ براھوئی ءَ چہ درستاں گیش۔ زُبان گالانی امبار اِنت۔ ھرچیز کہ گُشگ بیت آ گالے۔ مئے نام، جاگہ، سیادی، مہر ءُ دوستی، رنج ءُ درد، مئے کوہ ، دریا، آزمان، دراہ گال اَنت۔ ما ھرچ جیڑگے کہ کنیں، ھرچی کہ نبشتہ کنیں، ھرچی کہ گُشیں، دراہ گال اَنت۔ ھمے گال پَلگارگی اَنت ءُ گال امبار بلوچ ءِ گالانی امبار اِنت۔
آئی ءَ نبشتگ کہ وھد وتی ھمراھی ءَ بازیں نوکیں گال سازیت ءُ بازیں گالے گار کنت۔ گال اَمبار ھما جاگہ اِنت کہ آ بلوچ ءِ گالاں پلگار اِیت، پہریز اِیت ءُ پہ دائمی وتی گور ءَ ایر کنت۔ بلوچی ءُ براھوئی ءِ لبز بَلد، انسائیکلوپیڈیا ءُ دگہ بازیں کار چہ ھمے گال امبار ءَ سرجم بنت۔ بزاں چریشی ءَ ھرچ ھما کار بوت کن اَنت کہ ما گوں زُبان ءَ کنان اِش۔ ایدگہ راجاں اے کار سک باز پیسر بندات کُتگ ءُ آھاں وتی زبان ھما جاہ ءَ آرتگ ءُ رسینتگ کہ مرچی مشین آھانی زُبان شرّ سرپد بیت ءُ چہ آے آئی ءَ دُنیا ءُ جھان ءِ کار گِرگا اَنت۔ اِے نہ اِنت کہ بلوچاں پہ بلوچی ءُ براھوئی ءَ ھچ نہ کُتگ، راج ھست اِنت کہ زُبان ھست اِنت، ءُ زُبان ھست اِنت کہ راج ھست اِنت۔ مرچی کہ ما چار گپّ جَت کنگا ایں یا نبشتہ کُت کنگا ایں، اے ھما کارانی دِرچ اِنت کہ پہ زُبان ءَ کنگ بوتگ اَنت۔ گال امبار یک ھنچیں جُہدے ءُ ایشی ءِ سوبمندی شُمئے ھرکسی دستا اِنت ءُ چہ شُما ھما گالاں لوٹیت کہ شُما نبشتہ اِش کن اِت یا گُش اِت اِش۔
آئی ءَ نبشتگ کہ انّوگیں وھداں، باز جاگہاں، باز مردُم وتی ھساب ءَ بلوچی ءُ براھوئی ءِ سرا کارا اَنت۔ گوگل ءُ اے دگہ مزنیں ادارہ ھرچ زُبان ءِ سرا کار کنگ ءِ آسراتی دَینت کہ پہ انگریزی ءُ ایدگہ زُباناں ھست اَنت یا بوتگ اَنت۔ بلے ھمے ڈیٹا کہ جَم کنگ بیت آ گوگل ءِ میراس اِنت، مئے نہ اِنت۔ مارا گوگل پدا ھمے ڈیٹاھانی واستہ زرّ دیگی اِنت یا کجام ھم وھد ءَ، کجام ھم سَوَبے ءَ اِے ڈیٹا گار بوت کن اَنت کہ سرجمی ءَ مئے میراث نہ اَنت۔ گال امبار ھما جاگہ اِنت کہ اودا بلوچانی گال ، نبشتہی، گُشتانکی ءُ اکسی دروشم ءَ ایر بنت۔ اے نبشتہ ، گپّ بلوچی ءَ بوت کن اَنت، براھوئی ءَ بوت کن اَنت۔ اربی ءُ لاتینی ھردو سیاھگاں ، ھرچی کہ نبیسگ بہ بیت، آ گال امبار ءِ براہ بیت ءُ گال امبار اِے دراھیں گالاں پہریز اِیت۔ اے تواراں پلگار اِیت۔
گال امبار چے چے کنت؟ چشکہ دور ءُ زمانگ مئے شُمئے دیما اِنت ءُ اے دور ڈیجیٹل اِنت۔ کمپیوٹر ءِ آھگ ءُ ماں انسانی زندمان جاگہے ءِ گِرگ وت بلاھیں کِسّہے کہ مئے دیما اِنت ءُ انّوگیں دور ءَ پدا اے آئی ءِ ھمراھی ءَ کمپیوٹر ھمینچو دیما شُتگ ءُ ھمینچو ارزشدار بوتگ کہ مئے گیشتر کاراں گوں ما گون اِنت۔ ھمے مزنیں کاراں چہ یکے ایش اِنت کہ اِے زبریں مشین نوں انسان ءِ زُباناں دربارت ءُ ھیل کُت کنت۔ مشین کہ زُبان ءَ ھیل بکنت زُبان ءِ بازیں جنجالانی توجیل در کئیت۔ چشکہ ‘یک اسٹینڈرڈ نبشتہ راھبندے’ ءَ نبشتہ کنئگ، مشین کہ تئی زبان ءِ گرامر ءَ بزانت ، پدا ھنچیں سوفٹ وئیر جوڑ بنت کہ ترا راست نبشتہ کنگ سوج دَینت۔ چشکہ گرامرلی ءُ دگہ سوفٹ وئیر اَنت بازیں زبانے زان اَنت ءُ گالانی راست نبیسی (اسپیلنگ) ءُ راھبند ( گرامر ) ءَ زان اَنت۔
گال امبار ءِ نیمگ ءَ نبسگ بیتگ کہ مشین کہ زبُاناں دربارت، آ بس نبشتہی دروشم ءَ نا، بلکیں توارانی بزاں گُشگ ءِ ھساب ءَ ھم در بارت ئِے، ھیل ئِے کنت۔ گال امبار ھما جاگہ اِنت کہ اودا ما ءُ شُما نبشتہ کن ایں ءُ نبشتگیں چیزاں وان ایں، چریشی ءَ گال امبار ءِ مشین دربَران کنت۔ ھمینچو گیشتر ءُ جتا جتائیں نبشتہ ءُ گپ بنت، مشین ھمینچو شئوکتر ھیل کنت۔ گال امبار ءَ ھمے نبشتہ کہ دیما کاینت، ایشاناں ھمینچو گیشتر ءُ جتائیں مردم وان اِیت ءُ ریکارڈ کنت، گال امبار دو ھمینچو شرتر بیت۔ گال امبار ءَ جنینی، مردینی، جَنِکی، بچِکی، گونڈوئی دراھیں توار در کار اَنت۔ ھرکس کہ نبشتگیں چیزے ونت کنت، یا نبشتہ کُت کنت، آ گال امبار ءَ وتی بہرشت ءَ دات کنت۔
دیمتر ءَ نبشتگ کہ ھمے گپّاں کہ ما ھمُک روچ وتی زندمان ءَ کارمرز کن ایں، ھمے نبشتانکاں کہ ما نبشتہ کن ایں سوشل میڈیا ءَ دئیں یا کتاباں چاپ شِنگ کنیں، اِے درستیں چیزاں اگاں گال امبار ءَ دیان بہ کن ایں، گال امبار ایشاں وت پلگاران کنت ءُ پلگاریں ڈیٹا سیٹ جوڑ کنت۔
گال امبار ءَ جم بوتگیں دراھیں گال ءُ توار شُمئے وتی مڈّی اَنت ءُ شُما پہ وتی کاراں ایشاں ھر وھد ءَ کارمرز کُرت کن اِت۔
شما چوں کار کُت کن اِت؟
درستاں پیش گال امبار ءَ چہ وتی App Store ءَ ایر بگیج اِت بزاں ڈاؤنلوڈ بکن اِت ءُ ID یے جوڈ بکن اِت ءُ Log In بہ بئت۔ (پہ گیشیں سرپدیءَاَکساں بچار اِت)
Login بوھگ ءِ وھد ءَ سَلاھے ھست کہ تو Validatorبُوھگ لوٹ ئے یا نا؟ اگاں تئی بلوچی نبشتہ شرّ اِنت ءُ رھبند ءَ سرپدئے، رَد نبشتگیں چیزے ءَ راست کُت کن ئے گُڑا ھمے آپشن ءَ بہ جن گوں اگاں نا گُڑا ایشی ءَ یلہ دئے۔
کنٹریبیوٹر: (Contributor) ھر ھما کَس کہ بلوچی یا براھوی ونت ءُ نبشتہ کُت کنت، آ کنٹریبیوٹر بوت کنت۔ کنٹریبیوٹر نوکیں نبشتگیں چیزاں گال امبار ءَ دات کنت ءُ پیسرا چہ نبشتگیں ءُ چہ ایڈمناں پکّا کُتگیں نبشتگیں چیزاں ونت کُت کنت۔ کنٹریبیوٹر ھمینچو گیشتر بنت، پہ گال امبار ءِ شرتر اِنت۔ یک نبشتگیں چیزے ءَ ھمینچو گیشتر مردم وانیت ءُ جتائیں تواراں وانگ بیت (مردینی ، جنینی، جنکی، بچکی ءُ گونڈوئی)، شوکتریں ڈیٹاسیٹ جوڑ بوت کنت۔ ما گوں ھر ھما مردم (جنین ءُ مردین، جنک ءُ بچک) ءَ دزبندی کن ایں کہ گال امبار ءَ ڈاؤنلوڈ بکن اَنت کہ بلوچی وانگ ءُ نبشتہ کنگ زان اَنت۔
کنٹریبیوٹر چے چے کُت کنت یا بہ کنت؟
Write: اے بہر ءَ کنٹریبیوٹر نبشتہ بکنت یا نبشتگیں چیزاں کاپی بکنت ءُ ھمدا پیسٹ بکنت۔ Language, Script, Dialect o Genreءَ گچین بکن کہ تئی داتگیں ٹیکسٹ کجام زبان ءَ اِنت، سیاھگ(اسکرپٹ) ئِے کجام اِنت ءُ اگاں ھاسیں گالوارے ءَ اِنت گُڑا آئی ءَ گچین بکن۔ اگاں تئی داتگیں ٹیکسٹ شائری یے یا گِدار ءُ آزمانکے، یا ھنچا لَس گپے داں Genreءِ تہا تو ایشی ءَ گچین کُت کن ئے۔ ایشانی گچین کنگ الّم اِنت داں کہ گال امبار شوکتر کار کُت بہ کنت۔
Speak: اے بہر ءَ کنٹریبیوٹر دگرانی نبشتگیں ٹیکسٹاں ونت کنت۔ ھما اسکرپٹ ءَ کہ تو گچین کن ئے تئی دیما ھما سیاھگ ءَ نبشتگیں ٹیکسٹ کئیت، ھماھاں ریکارڈ بکن ءُ وانان بکن۔ چریشی ءَ گال امبار بلوچی ءُ براھوی ءَ توارانی ھساب ءَ پلگاران کنت ءُ ما توارانی ڈیٹاسیٹ جوڑ کُت کن ایں۔
Listen: اے بہر ءَ کنٹریبیوٹر دگرانی ریکارڈ کُتگیں چیزاں گوں نبشتگیں چیزاں دیم پہ دیمی ءَ گوشداشت کنت، اگاں شرّ ریکارڈ کنگ بوتگ، نبشتگیں چیز راست گُشگ بوتگ، آ Approve کُت ئِے کنت، یا Reject کُت ئِے کنت۔ اگاں سرپدئِے نہ بئے، یلہ دات ئِے کن ئے۔ Skip بہ کن ئِے۔
اگاں کنٹریبیوٹرے Login کنگ ءِ وھداں Validator بُوھگ ءِ واستہ بگُش اِیت داں آئی کار ویلیڈیٹر ءِ بیت۔
ویلیڈیٹر (Validator): اِے ھما یوزر بنت کہ نبشتگیں ءُ ریکارڈ کُتگیں چیزاں وان اَنت ءُ گوش دار اَنت ءُ آھاں پکّا (Approve ) کن اَنت یا رَد (Reject) کن اَنت۔ ویلیڈیٹر بُوھگ ھماھانی واستہ اِنت کہ آھانی نبشتہ راھبند ءِ زانت شر اِنت ءُ بلوچی یا براھوئی ءَ (اربی یا سیاھگ ) راھبند ءِ ھساب ءَ زان اَنت۔ ویلیڈیٹر اے چیزاں ھم چار اِیت کہ نبشتگیں چیزے شرّ وانگ ءُ ریکارڈ کنگ بوتگ یا نا۔۔۔ آ ھمیشی ءَ یا وَ پکّا کنت یا رَد کنت۔
گڈسر ءَ ھمے گوشگ بوتگ کہ ما گوں بلوچی ءُ براھوئی ءِ کُل اُستاداں کہ بلوچی ءُ براھوئی وانین اَنت، یا شائر ءُ نبشتہ کاراں کہ نبشتہ کن اَنت، آ ویلیڈیٹر ءِ واستہ Loginکنگ ءِ ساھتاں بُگُش اَنت، پدا نبشتگیں چیزاں زُورگ یا رَد کنگ ءِ واستہ گُشت کن اَنت۔
بلوچستان ءِ دمگ پنجگور ءَ پاکستانی پوج ءَ یک کاروائی ءِ میان ءَ یکیں کھول ءِ پنچ برات ءُ یک ناکوے ءِ آوار جنگ ءَ پد ناشناسیں جاھے برتگ، چریشی ءَ پد آیانی درگت ءَ ھچ وڑیں ھال نیست-
اے وئیل گوستگیں شپ ءَ پنجگور ءِ دمگ بونستان چونگی سر ءَ بیتگ، اود ءَ پاکستانی پوج ءَ یک لوگے ءِ سر ءَ بیڑبرتگ-
اِھوالکار ءِ گوشگ اِنت کہ اے میان ءَ علی نامیں مردمے ءِ شش چُک امید علی، عالم، عادل، انس ءُ اویس وھدے کہ آئی ءِ ناکو اشرپ ء دین محمد آوار جتگ-
کھول ءِ رِد ءَ آوار جنگ ءَ پد اے مردم ناشناسیں جاھے ءَ برتگ اَنت ءُ تنی وھدے آیانی درگت ءَ ھچ وڑیں ھال نیست-
بلوچستان ءَ اے وڑیں وئیل ھمکروچ ھساب ءَ نکش بیگ ءَ اَنت، اود ءَ انسانی ھکانی گل زورانسری آوار جنی ءَ دلپدردی درشان کنگ ءُ آیگ ءَ اَنت- اے گلانی رِد ءَ بلوچستان ءَ بازیں سالاں چہ اے مردمانی یک مزنیں کچے بیگواہ ءَ اِنت کھول انساپ ءِ ودار ءَ اَنت-
کیچ، تجابان ءَ زالبولاں ھوار زورانسری بیگواھیں مردمانی ھاتر ءَ سی پیک دگ بند، زھرشانی سیمی روچ ءَ سر بیتگ-
تربت ءِ دمگ تاجابان ءَ چار زورانسری ءَ بیگواہ بوتگیں مردمانی ھانداناں یک رندے پد ءَ انتزامیہ ءِ نیمگ ءَ مسام ءِ ھلاپ لگتمالی ءِ ھلاپ ءَ سی پیک ءِ شاھدگ بند کتگ۔ اے زھرشانی سیمی روچ ءَ برجاہ اِنت کہ اود ءَ سکیں سارتی ءَ ابید ھم جنین ءُ چُک شپ ءِ تھاری ءَ دگ ءِ سر ءَ نشتگ اَنت۔
زھرشانی کنوکانی گْوشگ اِنت کہ گوستگیں ھپتگ ءَ گوں دمگی انتزامیہ ءَ بوتگیں گپ ءُ تران ءَ بیگواھیں مردمانی ھاسیں رنگ ءَ جنین آدمانی یل دیگ دلجمی دیگ بوتگ کہ ایشی ءَ پد دھرنا ھلاس کنگ بوتگ بلے زبان ءِ پیلو نہ کنگ ءِ سبب ءَ زھرشانی پد ءَ بندات کنگ بوتگ۔
زھرشانی کنوکیں مردمانی گْوشگ اِنت کہ ھمے ھاندان ءِ چار مردم انگت بیگواہ اَنت کہ آھانی تہ ءَ دو جنین ھم ھوار اَنت ءُ یکے چہ آھاں 9 ماہ ءِ زھگ اِنت۔ زھرشانی کنوکیں مردمانی گْوشگ اِنت کہ ھاندان ءِ مردمانی یل نہ دیگ مزنیں جیڑھے ودی کتگ۔
دومی نیمگ ءَ زھرشانی کنوکاں گْوشتگ کہ پورسز ءَ چہ ھب چوکی ءَ چار مردم دزگیر کتگ ءُ ناشناسیں جاھے ءَ برتگ اَنت۔ زھرشانی کنوکیں مردمانی گْوشگ ءِ رد ءَ اے مردمانی سر ءَ وت کُشی اُرش ءِ منسوبگ بندی ءِ بھتام سوشل میڈیا ءَ شنگ ءُ تالان اَنت کہ آھانی کھول ءُ زھرشانی کنوک رد کن اَنت۔
زھرشانی کنوکانی گْوشگ اِنت کہ یک نیمگے دگنیا گوں نوکیں سال ءِ مراگشاں گُلائیش اِنت ءُ دومی نیمگ ءَ بلوچستان ءَ زالبول ءُ چُک پہ وتی دوستیں مردمانی جان سلامتی ءِ واستا سکیں سارتی ءِ تہ ءَ دگّانی سر ءَ زھرشانی کنگ ءَ لاچار اَنت۔
اے جیڑہ ءِ سر ءَ دمگی انتزامیہ ءُ سیکورٹی ادارگانی نیمگ ءَ تاں انوگ ءَ سرکاری لیکہ دیم ءَ نیتکگ انت۔
بلوچستان ءَ زورانسری ءَ بیگواہ کنگ ءِ جیڑہ بازیں وھدے ءَ مزنیں جیڑہے بوتگ ءُ انسانی ھکانی گلاں باز رند ءَ اے جیڑہ ءِ سر ءَ پدردی درشان کتگ۔
سی پیک ءِ شھدگ ءِ بند کنگ ءِ سبب ءَ نہ ایوک ءَ دمگی آبادی بلکیں ڈنی مساپر ھم سک باز سانمند بوگ ءَ انت وھدے کہ زھرشانی کنوک گشگ ءَ انت کہ داں آھانی لوٹ منگ نہ بنت زھرشانی برجاہ بیت-
ایران ءِ چیردستیں روکپتی بلوچستان ءِ شھر زاھدان ءَ اہل ءِ سنت ءَ سیادی داروکیں مولانا عبدالحمید اسماعیلزئی ءَ مروچی آدینگ ءِ روچ ءَ وتی واز ءِ تہ ءَ ملک ءِ تہ ءَ برجاھیں زھرشانیانی سر ءَ گپ جنان ءَ گوشتگ کہ ایرانی مھلوک ءِ زند ءُ مالی جاور سک باز نگیگ انت ۔
آئی ءَ گوشتگ کہ ”مھلوک ءَ ایمنیں زھرشانی کنگ ءِ ھک ھست انت ، سرکار درنگاز کنوکانی گوم ءَ لٹ شاپی ءِ رویشت مہ دار ایت ۔
آئی ءَ گوشتگ کہ ما دراہ ایرانی ایں ۔ مروچی مردم گژن ءِ آماچ انت ءُ بازیں زرکار ءِ ھم نگیگیں جاوراں گوں دچار انت ۔ واکداراں لوٹ ایت کہ مھلوک ءِ توار ءَ گوش بہ دار ایت ، آیانی لوٹانی سر ءَ چار ءُ بچار بہ کنت ۔
مولانا عبدالحمید ءَ ملک ءِ کوپن سسٹم ءِ سر ءَ نگد کتگ ءُ گوشتگ کہ اے وڑیں سکیم یا کارشون دردیگ نہ انت ۔ واکداراں چارگ لوٹ ایت کہ مھلوک چی لوٹ ایت ۔ مھلوک ءِ راہ ءُ واھشت چارگی انت ۔ کس ءَ وتی گپ مھلوک ءِ سر ءَ لڈگی نہ انت ۔
ایران ءِ کوپن سسٹم دیرگیں نزامے کہ وھد وھد ءِ سر ءَ مالی ءُ بندشانی میان ءَ دوبر جنگ بیت انت ۔ اے نزام ءِ رد ءَ کم آمدنی شھراں اژدری سامان چوش کہ وردنی ( روگن ، شکر ، گوشت ، دان ) ءُ تیل سبسڈی ءِ ھمراھی دیگ بیت ۔
زانگ بہ بیت ایران ءِ زر سک باز کمی ءُ گرانھادی ءِ گیش بوگ ءِ سوب ءَ مھلوک ءَ کساس پنچ روچ انت زھرشانی کنگ ءَ انت کہ انگت برجاہ انت ۔ درانگاز کنوک ءُ ایران ءِ پھازگی لشکر ءِ میان ءَ گوستگیں پنچ روچاں بوتگیں میڑاں تنی وھدی شش درنگاز کنوک ءُ یک پولیسے ءِ مرگ ءِ ھال انت ۔
کراچی، سبی ءُ کیچ ءَ پاکستانی پوج ءِ دست ءَ یک مردمے آوار جنگ ءُ دو یل کنگ بیتگ اَنت-
بلوچستان ءِ دمگ چہ کیچ ءَ پاکستانی پوج ءَ یک مردمے آوار جتگ ءُ بیگواہ کتگ- کھول ءِ رِد ءَ اے وئیل پشمبے ءُ جمعہ ءِ میانی شپ ءَ کیچ ءِ دمگ گومازی ءَ بیتگ-
دمگی اِھوالکار ءُ کھول ءِ گوشگ اِنت کہ پاکستانی پوج ءَ شپ ءِ وھد ءَ گومازی ءَ یک لوگے ءِ سر ءَ بیڑبرتگ ءُ فضل ء مولابخش نامیں مردمے آوار جتگ ءُ وتی ھمراھی ءَ برتگ، چریشی ءَ پد آ بیگواہ ءَ اِنت-
کھول ءِ رِد ءَ فضل ء مولابخش دزگیری ءِ بے سبب ءِ گوشگ ءَ برتگ ءُ تنی وھدے آئی ءِ دزگیری ءُ ھند ءِ ھچ وڑیں سرپدی دیگ نہ بیتگ-
زانگ بہ بیت کہ بلوچستان ءَ زورانسری آوار جنی ءِ جیڑہ یک دراجیں مدتے ءَ چہ انسانی ھکانی ادارہ ءَ ھوار جتاجتائیں میان استمانی ادارھانی نیمگ ءَ چست کنگ بیتگ-
چہ سبی ءَ پاکستانی پوج ءِ دست ءَ زور بیگواھیں نودربر اسد اللہ مینگل یل کنگ بیتگ۔
ھالانی رد ءَ یل بیتگیں نودربر اسد اللہ مینگل ء محمد سلیمان پاکستانی پوج ءَ 4 ستمبر 2024 ءَ چہ ایس پی کارگس ءِ دیم ءَ آوار جتگ ءُ بیگواہ کرتگ اَت۔ مرچی یل بیتگ ءُ وتی لوگ ءَ سر بیتگ۔
آئی ءِ یل بیگ ءِ گپ وی بی ایم پی ءَ راست کرتگ۔
کراچی ءِ نامی ئیں کتاب بازار ، اردو بازار ءَ برجاہ شنگکاریں ادارہ زانت ءُ ادب ءِ بُنجاھی کارگس ءِ باسک چنگیز بلوچ 165 روچ ءَ زورانسری بیگواھی ءَ پد زی یل بیتگ-
زانگ بہ بیت چنگیز گوستگیں سال 21 جولائی ءَ پاکستانی پوج ءُ چیریں ادارھانی کارندھاں آئی ءِ کتاب دکان ءَ ھما وھد ءَ آوار جتگ وھدے آ اود ءَ کتابانی بھا کنگ ءَ دلگوش بیتگ-
زانگ بہ بیت اِلم ءُ ادب کراچی ءِ یک نامی ئیں شنگکاریں ادارھے، کہ اردو، بلوچی دگہ دمگی زُباناں کتاب شنگ کنت- اے ادارہ ءَ شریں کتاب گوں شریں نھادے ءِ دزکپ اَنت-
