بلوچستان ءِ دمگ کلات ءَ پاکستانی پوج ءِ بمب ڈسپوزل اسکواڈ ءِ کارمند نشانگ کتگ اَنت وھدے کہ دومی نیمگ ءَ پنجگور ءِ دمگ چیدگی ءَ پوجی ھیلی کاپٹرانی سر ءَ سلاہ بندیں مردمانی اُرشانی ھال اِنت-
دمگی اِھوالکار ءِ رِد ءَ کلات ءِ دمگ منچگر ءَ یک تراکے ھما وھد ءَ بیتگ وھدے پاکستانی پوج بمب ڈسپوزل اسکواڈ ءِ کارمند پیادگ گشت ءَ دلگوش بیتگ اَنت- اِھوالکار ءِ گْوشگ اِنت کہ تراک دگ ءِ کش ءَ کل کتگیں شورواں چہ کنگ بیتگ-
اے وئیل انچیں وھدے ءَ بیتگ وھدے منگچر ءُ کش گور ءِ دمگاں پاکستانی پوج ءِ کاروائی برجاہ ءَ اَنت- دمگی مردمانی رِد ءَ گوستگیں روچ ءَ بازیں ھندانی سر ءَ گن شپ ھیلی کاپٹر بُرز ءَ چہ کاروائی کنان ءَ تُرندیں تیرگواری ءِ کتگ-
ھمے وڑ پنجگور ءِ دمگ چہ چیدگی ءَ ھال اِنت- اِھوالکار ءِ رِد ءَ سلاہ بندیں مردماں دمگ ءَ آپریشن ءَ دلگوش پوجی ھیلی کاپٹرانی سر ءَ مزنیں سلاھاں چہ نشانگ کتگ اَنت-
دمگی اِھوالکار ءِ گوشتگ اِنت کہ چیدگی ءُ آئی ءِ کش گور ءِ دمگاں اے روچانی میان ءَ پاکستانی پوج ءُ سلاہ بندیں مردمانی پُرکاریانی تہ ءَ گیشی گندگ اتکگ-