TBP Balochi

گوستگیں سَے روچانی توک ءَ پاکستانی پوج ءَ سندھی راجدوستیں پاٹی ءَ سیادی داروکیں ھپت کس آوار جنگ ءَ پد بیگواہ کتگ اَنت-

وائس فار مسنگ پرسنز آد سندھ، سندھ سجاگی فورم ءُ سندھ سبھا ءَ وتی آفیشل پیجزاں جتا جتا شنگ کتگیں درشاناں گوشتگ پاکستانی پوج ءَ سندھ ءَ سندھی باسکانی زورانسری آوار جنیانی توک ءَ گیشی آورتگ – چریشی ءَ چہ گمان بیت اِنت سندھ ءُ بلوچستان ءَ بنگلادیش ءِ جاوراں ودینگ لوٹ ایت-

آئی ءَ گوشتگ کہ پاکستانی پوج ءُ آئی ءِ چیریں ادارھاں سندھ ءَ انسانی ھکانی ترندیں لگتمالی برجاہ داشتگ اَنت – گوستگیں سَے روچانی توک ءَ سندھ ءِ جتا جتائیں جاھاں ھپت ءَ گیش سندھی باسک چست کنگ ءُ بیگواہ کنگ بیتگ اَنت-

درشان ءَ گوشگ بیتگ کہ گوستگیں شپ ءَ کراچی ءَ سندھ سبھا ءِ آفیس ءَ پاکستانی چیریں ادارھاں اُرش کتگ ءُ پرشت ءُ پروش کتگ کہ ما ایشی ءَ ترندی ءَ گوں ایر جن ایں ءُ اود ءَ دو سندھء باسک سجاد پنھیاد ءُ راجا گبول چست کنگ ءُ زورانسری بیگواہ کنگ بیتگ اَنت –

ھمے وڑ کورنگی ءِ ھند بلال کالونی ءَ ورنائیں شاگرد اصغر بھنگوات ھم دومی رند ءَ چست کنگ ءُ بیگواہ کنگ بیتگ – ایشی ءَ پیش سیاسی باسک اصغر بھنگوار بیگواھی ءِ آماچ کنگ بیتگ –

آئی ءَ گوشتگ کہ ایشی ءَ ابید سندھ ءِ دگہ جاگھاں بفکت پیرزانی، لیاقت پیروزانی، اصغر شاہ ءُ احسب لاشاری ھم زورانسری آوار جنی ءِ آماچ بیتگ-

آئی ءَ گوشتگ کہ ریاستی زوراکیانی ھلاپ ءُ سرجمیں سندھ ءَ زھرشانی ءِ جار ءَ جنت ایں –

روکپتی بلوچستان ءِ دو جتا جتائیں ھنداں دگ ءِ وئیل ءُ تیرگواری ءِ وئیل ءَ سے مردم بیران بیتگ اَنت-

گیشیں اھوالانی رد ءَ روکپتی بلوچستان ءِ دمگ کسر کند ءَ ناشناسیں مردماں تیرگواری کنان ءَ یک ورنایے کُشتگ –

کُشگ بیتگیں مردم ءِ پجار اسد آشپزی جھمنند گونگان کسرکند ءِ نام ءَ زانگ بیتگ –

اھوالانی رد ءَ اسد وتی لوگانی دپ ءَ جاڑیگ بیتگ کہ اود ءَ آئی ءِ سر ءَ ناشناسیں مردماں تیرگواری کنان ءَ کُشتگ-

اھوالانی رد ءَ کوش ءِ سبب تنی وھدی زانگ نہ بیتگ، بلے کوشکاراں تیرگواری ءَ پد پشت مانداتگ ءُ شتگ اَنت-

ھمے وڑ ءَ زاھدان ءِ دو جتاجتائیں جاھاں دو تیل کشیں مردم دگ ءِ وئیل آماچ بیتگ ءُ بیران بیتگ اَنت-

بیتگیں مردمانی تہ ءَ یکے ءِ پجار ایوب شاہ بَخش جھمنند پھلوانی زاھدان ءُ دومی ءِ پجار مھر اللہ براھوئی ء امان اللہ جھمنند سرجنگل زاھدان ءِ نام ءَ زانگ بیتگ-

ایشانی توک ءَ ایوب شاہ بخش نصرت آباد ءَ کھورک ءِ ھند ءَ آئی ءِ گاڑی وئیل ءِ آماچ بیتگ ءُ چریشی ءَ چہ آ بیران بیتگ-

سر بیتگیں ھالانی رد ءَ جیرفت ءِ زندان ءَ زاھدان ءِ جھمنند پاھو دیگ بیتگ –

گیشیں اھوالانی رد ءَ زاھدان ءِ جھمنندیں سِی سالیگیں مھمد دارائی ء عبدالناصر ماں جیرفت ءِ زندان ءَ مروچی بامسار ءَ پاھو دیگ بیتگ-

اھوالانی رد ءَ مھمد دارائی ایرانی سال 1398 ءَ نشہ باپاری ءِ بھتام ءَ فاریاب ءِ شھر ءَ دزگیر کنگ بیتگ-

زانگ بہ بیت ھمے دو ماھانی توک ءَ ایرانی آمیدگس ءَ تنی وھدی سِی ءُ چار بلوچ پاھو داتگ اَنت کہ ایشانی توک ءَ دو زالبول ھم ھوار اَنت-

اھولانی رد ءَ دگہ بندیگیں پاھو دیگ ءِ ھال ھم ھست کہ آ جتا جتائیں کوٹیاں برگ بیتگ اَنت پہ پاھو ءَ –

سلطنت آف عماب ءِ بادشاہ ھیثیم بن طارق ھمے ھپتگ ءَ ایران ءِ تر ءُ تاب ءَ کنت، اے تر ءُ تاب سرکاری تکاں بوگ ءَ اِنت-

عرب نیوز ءَ چار شمبے ءِ روچ ءَ سرکاری ھال سرکنوک ءِ درور دیان ءَ گوشتگ کہ اے تر ءُ تاب یکشمبے ءَ ایران ءُ سعودی عرب ءِ میان ءَ مارچ ءِ ماہ ءَ چین ءِ کرد ءِ سبب ءَ مسام ءَ پد بندات بیتگ-

درشان ءَ گوشگ بیتگ کہ سلطنت آف عمان ءِ بادشاہ ھیثیم بن طارق ءِ دو روچی تر ءُ تاب سرکاری تکاں بوگ ءَ اِنت ءُ دو روچ ءَ ایران ءَ روت اِنت-

آئی ءَ ایراب ءِ سروک ابراھیم رائیسی ءَ را ھم عمان ءِ آیگ ءِ داوت داتگ ءُ ھردوکیں ڈیھانی میان ءَ تر ءُ تاب ءِ گپ ءُ سیادمندی ءِ توک ءَ گھتری ءِ ستک ءِ ودینگ ءِ یک گمانے پدر بوگ ءَ اِنت-

اے تر ءُ تاب ایران ءِ سروک ابراھیم رائیسی ءِ تر ءُ تاب ما مشکت ءَ یک سالے ءَ پد بوگ ءَ اِنت کہ آ وھد ءَ ھردوکیں ڈیھانی میان ءَ باپاری تکانی سر ءَ دزنویس کنگ بیتگ-

عمان ءَ ایران ءِ گون ءَ نزیکیں سیادی ھست اَنت ءُ آئی ءَ سال دوھزار ءُ پانزدہ تھران ءُ واشگٹن ءِ میان ءَ بیوکیں جوھری دزنویس ءَ مزنیں کردے پیلو کتگ-

ایران ءِ انسانی ھکانی ھاتر ءَ کار کنوکیں جھانی گل ایمنسٹی انٹرنیشنل ایران ءِ نیمگ ءَ شنگ بیتگیں درشان ءَ گوشگ بیتگ ایران ءَ زھرشانیانی وھد ءَ دزگیر کتگیں ھپت مردمانی پاھو دیگ ءِ گپ گوشدارینتگ –

آئی ءَ وتی نمدی ءِ توک ءَ گوشتگ کہ ایران ءِ آمیدگس ءَ کہ پاھو دیگاں پھریز بہ کنت ءُ دگہ بازیں بندیگانی درگت ءَ ھم آیاں ترس اِنت-

ایمنسٹی انٹر نیشنل ایران ءِ نیمگ ءَ شنگ بیتگیں ھپت مردمانی نام کہ آیاں پاھو دیگ ءِ ترس اِنت آیانی توک ءَ ابراھیم ناروئی، کامبیز خروت، منوچھر مھمان نواز، منصور دھمردہ، مھمد قبادلو، مجاھد کور کور ءُ شعیب میر بلوچزئی ءِ ناماں زانگ بیتگ اَںت-

ایشانی توک ءَ سَے کسانی سیادی روکپتی بلوچستان ءُ آ دگرانی سیادی ایران ءِ کردستان ءَ اِنت-

روکپتی بلوچستان ءَ ایرانی آمیدگس ءَ چیزے روچانی توک ءَ بے کساس ءَ بندیگیں مردم ماں نشہ باپاری ءِ بھتام ءَ پاھو داتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں مروچی سُھب ءِ یازدہ ءُ بیست ملٹ ءَ کیچ ءِ بُنجاھی شھر تربت ءِ دمگ ڈنُک ءَ پاکستانی پوج ءِ ملٹری انٹیلیجنس ( ایم آئی) ءِ کارندہ ثناءاللہ جھمنند کرک خیبرپختونخوا سر ءَ تیرگواری کتگ ءُ کُشتگ-

آئی ءَ گْوشتگ کہ ایم آئی ءِ کارندہ سرمچاراں ھما وھد ءَ نشانگ کتگ وھدے آ ڈی بلوچ ءِ پوجی بُنجل ءَ چہ درتکگ دیم پہ تربت شھر نیمگ ءَ روگ ءَ بیتگ-

جارکش ءَ گْوشتگ کہ ایم آئی ءِ کارندہ گوستگیں شش سالاں چہ تربت ءَ ساڑی بیتگ- گوستگیں یک سالے ءَ چہ اے ڈیوٹی ڈی بلوچ بُنجل ءِ ایم آئی ءِ برانچ ءَ بیتگ وھدے اشی ءَ ساری آ تربت شھر ءَ برجاھیں ایم آئی بُنجل ءُ ایف سی ءِ بُنجاھی بُنجل ءَ وتی پرز ءَ پیلو کنگ ءَ بیتگ-

آئی ءَ دیمتر ءَ گْوشتگ کہ مئے انٹیلیجنس ونگ ءَ بازیں مُدتے ءَ نگاہ گوں آئی ءَ بیتگ اَنت- آ تربت شھر ءِ ابید ھاسکار گوکدان ءُ ڈنُک ءَ پُرکار بیتگ- اشی ءَ چاریگری ءِ ھاتر ءَ دمگی مردم ءِ نیٹ ورک جوڑ کتگ کہ آیانی سرجمیں ھال گل ءِ کر ءَ ساڑی ءَ اَنت-

جارکش ءَ گْوشتگ کہ بی ایل ایف اے اُرش زمہ واری ءَ منّ اِیت- اے سرجمیں کارندہ مئے نشانگ ءِ تہ ءَ اِنت- شھریاں گوں دزبندی اِنت کہ اے وڑیں مردماں چہ گستا بہ بنت- اے اُرش بلوچستان ءِ وتواجھی ءَ تاں برجاہ بنت-

سر یتگیں ھالانی رد ءَ بیست ءُ چار روچاں وتی لوگ واجہ ءِ کوش ءِ بھتام ءَ دزگیر کنگ بیتگیں بلوچ زالبول گنبد کاووس ءِ زندان ءَ زمانت ءِ سر ءَ یل کنگ بیتگ-

اھوالانی رد ءَ گرگ بیتگیں راھیلہ ناروی بیست ءُ چار روچ ءَ پیش ایرانی پولیس ءِ دست ءَ دزگیر کنگ بیتگیں راھیلہ ناروی گوستگیں روچ ءَ ماں گنبد کاووس ءِ زندان ءَ یل کنگ بیتگ-

اھوالانی تہ ءَ گوشگ بیتگ راھیلہ ناروی ایرانی سَے میلیارد ءِ زمانت ءَ ماں یل کنگ بیتگ کہ دانکہ آ آمیدگس ءِ پیشی ءَ ھچ رنگ ءَ بندیگ کنگ نہ بیت اِنت-

راھیلہ ناروی ماں بیست ءُ چار روچ پیش ایرانی پولیس ءَ لوٹائینتگ کہ تئی بندیگیں لوگ واجہ نادراہ اِنت بلے اود ءِ سر بوگ ءَ آئی ءِ لوگ واجہ پیش ءَ دنیا ءَ چہ شتگ بیتگ گڑا چرے کیس ءِ بھتام ءَ راھیلہ ناروی دزگیر کنگ بیتگ کہ تو وتی لوگ واجہ ءِ کوشکارے –

لس ھالانی رد ءَ آئی ءِ لوگ واجہ ماں زندان ءَ لٹ ءُ کُٹانی چیر ءَ بیران بیتگ ءُ وئیل ءِ چیر دیگ ءِ ھاتر ءَ آئی ءِ لوگ بانک دزگیر کنگ بیتگ-

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ ماں پریس کلب ءِ دیم ءَ زھرشانی برجاہ، زھرشانی بنجل ءَ مروچی پنچ ھزار ءُ پنجاہ ءُ چار روچ سرجم بوتگ انت –

مروچی نیشنل پاٹی ءِ گوستگیں دمگی سرکماش حاجی نیاز محمد لانگو، میر غفار قمبرانی ءَ ھوار دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءِ تہ ءَ بے کساس انسانی ھکانی لگتمالی کنگ بوگ ءَ انت – زورانسری آوار جنیانی تہ ءَ گیشی اتکگ ءُ لشکر کشیانی درچ یکشل ءَ برجاہ انت –

آئی ءَگوشتگ کہ نوزدہ سد ءُ چِل ءُ ھشت بگر تاں بلوچستان ءِ الحاق ءُ پدا ھما وھد ءَ بگر تاں روچ مروچی بلوچ راج ءِ سر ءَ بے کساس زوراکی کنگ بوگ ءَ انت –

آئی ءِ گوشگ ات کہ استان ءَ وتی رکینگ ءُ پھازگ ءَ پہ مدامی اے سرڈگار کارمرز کتگ کہ آ راسکوہ ءِ کوھانی ایٹمی تباھکاری دروشم ءَ بہ بیت یاکہ مزنیں کچے ءَ پوجی بنجلانی دروشم ءَ بہ بیت –

ماما ءَ گوشتگ کہ مارا یکجاہ بوگ ءُ راج ءُ سرڈگار ءِ پھازگ ءَ پہ جھد کنگی انت – وھدی بلوچ راج بیمناکیں جاورھالے ءِ تہ ءَ گوزگ ءَ انت اے گرانیں ساھتاں یکجاھی المی انت –