TBP Balochi

بلوچستان ءِ بنجاھی شھر شال ءَ پشین اسٹاپ ءَ گاڑی ءِ سر ءَ تیرگواری کنگ بوتگ چریشی ءَ دو لیویز کارمند بیران بوتگ انت –

ھالانی رِد ءَ شال ءَ پشین اسٹاپ ءَ سلاہ بندیں مردماں ویگو گاڑی ءِ سر ءَ تیرگواری کتگ – تیرگواری ءَ دو لیویز کارمند بیران بوتگ انت –

تیرگواری ءَ بیران بوتگیں لیویز کارمنندانی پجار سپاھی محمد یوسف ءُ لیویز کارمند ضیاءالدین ناماں چہ بوتگ انت وھدیکہ یک رھگوزیں زھگے ھم تیرانی آماچ بوتگ ءُ زدگ بوتگ کہ آ ھما دمان ءَ نزیکیں نادراھجاہ ءَ برگ بوتگ –

وئیل ءِ درگت ءَ تنی وھدی ھچ وڈیں ھال ءُ ھبر بوگ ءَ نہ انت کہ کجام سوب ءَ اے کارمند کُشگ بوتگ انت پولیس ءُ کانود جوڈ کنوک گیشیں پٹ پول کنگ ءَ انت –

گُلزمین ءِ لاڑکیں سَمو

نبشتہ کار: زھیر بلوچ

دی بلوچستان پوسٹ

“پہ مڑایے ایر کتگ زندگی دست ءِ دل ءَ “
“گُلزمین اوبادگاں چو نپت ءُ بیر ءَ گْرند اتگ”

چوناھی ءَ ھمُک بنی آدم ءَ وتی زند ءَ گوں مھر اِنت ھرکس ءَ زند ءِ لزت ءُ وشی دوست بنت، ھرکس وتی زندمان ءَ وشھالی ءَ گوازینگ لوٹ ایت۔

بلے جُست اِیش اِنت کہ زندگی کجام وھد ءَ وشھال بیت؟ اے جُست ءِ پسو الم ھمے بیت کہ تئی چپ ءُ چاگرد ءَ وشھالی ءُ ایمنی بہ بیت۔ تئی کھول ءِ مردم ، سنگت ءُ ھمبل تئی ھمبراہ بہ بنت۔ تئی میتگ ءُ چاگرد امن ءُ ایمن بہ بنت تو ھرجاہ بُہ لوٹ ئے شُت بہ کن ئے، ترا ھچ چیز ءِ تُرس مہ بیت گُڑا تو زند ءَ پہ ایمنی گوازینت کن ئے ءُ اے وشھالی ءُ ایمنی ھما وھد ءَ بنت کہ تو وتی گلزمین ءِ وتواجہ بہ بہ ئے ءُ آجوئیں زندمان ءِ واجہ بہ بہ ئے۔

بلے مرچی بلوچ گُلزمین ءِ سر ءَ ناں وشھالی ھست ءُ ناں ایمنی ھست، چی ءَ کہ بلوچ ڈیھ مرچی باروٹی لشکر ءِ ایردست انت، اے ایردستی ءَ چہ بلوچ راج ءَ ھرچیز پُل اِتگ۔ مرچی بلوچ وتی جند ءِ لوگ ءِ تہ ءَ ایمن نہ انت ءُ تُرس ءِ آماچ انت، مرچی بلوچ ءِ ننگ ءُ ناموس نہ رّک اِتگ۔ گُڑا چُشیں جاورانی تہ ءَ وتی جندی زند ءَ گوں مھر کنگ وتی راج ءِ گوما ناھکی انت۔ چی ءَ کہ مرچی تئی راجی مُچانکی زند زوال ءُ لگتمال اِنت گُڑا جندی زند ءِ وشیاں چون کن ئے۔

پمشکا مرچی ھزارانی کساس ءَ بلوچ ورنا وتی راجی مُچانکی زند ءِ رکینگ ءِ ھاتر ءَ زورگریں لشکر ءِ دیم ءَ اوشتاتگ انت ءُ گھگیری کنگ ءَ انت، ھزارانی کساس ءَ بلوچ راج ءِ تنگوئیں بچاں وتی ساہ ءُ سرانی دیمونی داتگ انت ءُ اے کاروان انگت برجاہ اِنت۔

ھمے وڑ ءَ مرچی وتی راجی زندمان ءِ رکینگ ءِ پِڑ ءَ بلوچ زالبول ھم ایر کپتگ انت ءُ وتی جندی زندمان ءِ وشی اِش ببا داتگ انت ءُ وت ءَ ندر کنگ ءَ انت۔

چوناھی ءَ چد ءُ پیش ھم بلوچ زالبول وتی گلزمین ءُ راج ءِ ھاتر ءَ ھمُک پِڑ ءَ جُھد ءَ ھوار بوتگ انت۔ بلے نو بلوچ راج ءِ شیرزالیں جنک پہ وتی گُلزمین ءِ آجوئی ءِ ھاتر ءَ وت ءَ پِدائی کنگ ءَ انت۔ منی دل ءَ اے بلوچ راجی جُنز ءِ مزنیں سوبمندی انت کہ مرچی شیرزالیں بلوچ گُھاراں سلاہ چِست کتگ ءُ براتانی ھمکوپگ انت۔

شھید پِدائی شاری بلوچ ءَ پَد شھید پدائی سُمیہ بلوچ ءِ پہ وتی ماتیں گُلزمین ءِ آجوئی ءِ ھاتر ءَ وت ءَ پدائی کنگ ءَ زورگریں اِستان ءَ را اے باور کنائینتگ کہ بلوچ راج تئی زوراکیانی دیم ءَ وتی سر ءَ ھچ وڑ ءَ جھل نہ کنت۔ بلکیں وتی راجی پجار ءِ رکینگ ءِ ھاتر ءَ ھرچ وڑیں دیمونی دیگ ءَ چَک ءُ پَد نہ بیت۔

شھید پدائی سُمیہ بلوچ ءَ زورگریں لشکر ءِ زوراکی وتی چماں گوں دیستگ انت۔ کھول ءِ زورآنسری آوارجنی ءَ ھوار وتی میتگ ءِ سُتکگیں گسانی پُر دیستگ انت۔ وتی زند ءِ ھمبراہ شھید ریھان جان ءِ سِنچ ءُ لیکہ ءُ کُربانی ءِ شاھزانتی دیستگ۔ شھید پدائی سُمیہ بلوچ یک مھکمیں لیکھے ءِ واھُند بوتگ۔ شھید ءَ وتی گُلزمین ءَ گوں ستک ءُ دل مھر بوتگ۔ پمشکا شھید پدائی سُمیہ بلوچ ءَ وتی جندی زندمان ءِ بدل ءَ وتی راجی زندمان ءِ وشھالی ءِ راہ گچین کتگ۔ چُشیں مزنیں شاھزانتیں لیکہھے ءِ واھُند ھجبر پہ مرگ گار نہ بنت ءُ راجدپتر ءِ تہ ءَ آیوکیں پدریچ ءِ واستا راجدوستی ءُ جھد ءِ سکین جوڑ بنت ءُ پہ مُدامی ابدمان بنت۔شھید پدائی سُمیہ بلوچ ءِ داتگیں دیمونی پہ بلوچ زالبول ءُ بلوچ ورنایاں مادنیں کِشکے پشت گیج ایت ءُ اے کشک ءَ داں گُلزمین ءِ آجوئی ءَ شھیدانی کاروان جُنزان بیت۔

گُڈسر ءَ شھید پدائی سُمیہ بلوچ ءِ داتگیں دیمونی ءَ ستاشانی ءُ دروت ندر کن آں۔ شھید ءِ دیمونی ءِ مُز آجو بلوچستان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ بلوچ نودربرانی زورانسری آوار جنی ءِ تہ گیشی ءُ سالم بلوچ ءُ ایندگہ بیگواھیں مردمانی ھاتر ءَ بلوچ یکجھتی کمیٹی ءِ چیردستی ءَ زھرشانی کنگ بوتگ زھرشانی بلوچ نودربراں ھوار ھر تک ءُ پھناتاں سیادی داروکیں مردماں مزنیں کچے ءَ بھر زرتگ –

درنگاز کنوکانی دست ءَ بیگواھیں مردمانی اکس بوتگ انت ءُ آھاں بلوچستان ءَ زورانسری آوار جنیانی ھلاس کنگ ءُ بیگواھیں مردمانی یل کنگ ءِ لوٹ کتگ –

ھمے وھد ءَ درنگاز کنوکانی گوشگ ات کہ ریاست ءِ پھازگی ادارھانی زمہ داری انت کہ نودربرانی پھریز ءَ بہ کن انت بلے بلوچستان ءَ جاور چپ انت ادا نودربرانی پھریزگ وتی جاہ ءَ ادا لٹ پُل ءُ زورانسری آوارجنی ءِ دابیں انسانانی ھکانی لگتمالی ءَ پھازگی ادارھانی دست مان انت –

آھانی گوشگ ات کہ سرکار، آمیدگس، ءُ رسانکدراں ھوار درسیں ادارہ نودربرانی ھکانی پھازگ ءَ بے سوب بوتگ انت ءُ ناکہ اے درگت گامگیج زورگ انت –

بلوچ یکجھتی کمیٹی ءِ رھشونانی گوشگ ات کہ چہ کیچ ءَ چار جون ءَ سالم ء عبدالستار ءُ دگہ یک ورنایے چہ گس ءَ آوار جنگ ءُ بیگواہ کنگ بوتگ انت سَے روچاں بازیں ازیت دیگ ءَ پد اکرم یل کنگ بوتگ سالم تنی وھدی بیگواہ انت ءُ ریاستی ادارھانی زنداناں بندیگ انت ھما پھازگی ادارھاں کہ سالم ءِ پھازگ ءِ زمہ داری گون انت ھما وت آئی ءِ جان ءِ دشمن انت – سالم ھمے واست ءَ بندیگ کنگ بوتگ کہ آئی ءَ وتی وارسے ءِ یل کنائینگ ءِ جھد ءَ توار چست کتگ بوتگ –

آھانی گوشگ ات کہ ھمے وڈ ڈی جی خان، کراچی ءَ ھوار دگہ بازیں دمگاں ورنا آوار جنگ بوتگ انت کہ آھانی بنکی ءُ انسانی ھکانی لگتمالی ئے – سالم ءَ ھوار معراج اسلم ءُ ایندگہ درسیں بیگواھیں نودربراں وتی وانگ ءِ ھاتر ءَ گس یل داتگ انت بلے آھاں آسراتی دیگ ءِ بدل ءَ زورانسری آوار جنگ بوگ ءَ انت کہ اے یک زوراکی ءَ کمتر نہ انت – زورانسری آوار جنی ءِ جیڑھے گیش گیواری ءِ بدل ءَ بلوچستان ءَ چدوگیشتر مردم آوار جنگ ءُ بیگواہ کنگ بوگ ءَ انت ھمے وڈیں کارانی کنگ ءَ ریاست ءِ بگیری ءَ نپرت گیش بنت –

آھاں دیمتر ءَ گوشتگ کہ نودربر بلوچ چاگردے باندات انت آھاں اے وڈ زورانسری آوار جنگ ءُ بیگواہ کنگ بلاھیں جرمے – تربت ءَ آوار جنگ بوتگیں سالم بلوچ ءَ ھوار درسیں بیگواھیں مردم یل کنگ بہ بنت ءُ بلوچستان ءَ زورانسری آوار جنی ءِ درچ ھلاس کنگ بہ بیت –

بلوچستان ءِ دمگ کلات منگچر ءَ بیگواھیں نوید لانگو، شاہان بلوچ، قذافی نیچاری، کفایت نچاری ءُ محمد حسن ءِ کھولاں وتی دوستگیں مردمانی زورانسری آوار جنی ءِ بگیری ءَ زھرشانی کنان ءَ کراچی تاں شال ءَ رؤکیں شھدگ ءِ سر ءَ نندانک جتگ ءُ شھدگ سرجمی ءَ بند کتگ –

کھول ءِ نیمگ ءَ دگ سھب ءِ ادار ھپت ءِ نزیک ءَ بند کنگ بوتگ، زھرشانی میان ءَ بیگواھیں نوید ءِ گھار ءَ گوں اھوالکاراں تران کنان ءَ گوشتگ کہ نوید احمد لانگو سال دوھزار پانزدہ ءِ پانزدہ اپریل ءَ چہ منگچر ءِ بازار ءَ پوجی کارمنداں آوار جتگ ءُ گوں وت برتگ کہ ھما انت آئی ءِ ھچ ھال اھوال نیست –

آئی ءَ گوشتگ کہ درسیں بیگواھیں مردم یل کنگ بہ بنت یا آمیدگس ءَ آرگ بہ بنت تانکہ ما اے درد ءُ ازیت ءَ رکیت بہ کن ایں –

آئی ءِ گوشگ ات کہ اگاں مئے دوستگیں مردم آمیدگس ءَ آرگ نہ بنت گڈا کم چہ کم مارا آھانی درگت ءَ سرپدی دیگ بہ بیت ءُ مارا مئے دوستگیں مردمانی گوم ءَ ھال ءُ اھوال کنائینگ بہ بیت تانکہ مئے دل ءَ تسلہ ءِ بہ رسیت –

زھرشانی ءِ میان ءَ بیگواھیں شاہان بلوچ ءِ زھگ ءَ تران کنان ءَ گوشتگ کہ منی پت گوستگیں سال دوھزار بیست ءُ دو ءِ پوجی کارمنداں آوار جتگ ءُ بیگواہ کتگ –

آئی ءِ گوشگ ات کہ منی وتی پت ءِ یل.کنائینگے ھاتر ءَ باز براں زھرشانی کتگ در پہ در بوتگ انت بلے ھچ نہ رستگ –

آئی ءَ گوشتگ کہ منی پت ءَ ھوار درسیں بیگواھیں مردم یل کنگ ءُ آمیدگس ءَ آرگ بہ بنت یا مئے دوستگیں مردمانی گوم ءَ ھال اھوال کنائینگ بہ بیت تانکہ مارا تسلی بہ رسیت –

زانگ بہ بیت دو ماہ ساری بیست ءُ یک مئی دوھزار ءُ بیست ءُ سَے ءَ ھم نوید لانگو، شاہان بلوچ، قذافی نیچاری، کفایت نچاری ءُ محمد حسن ءَ ھوار ایندگہ بیگواھیں مردمانی ھاتر ءَ آھانی کھولانی نیمگ ءَ زھرشانی کنگ بوتگ ات کہ سرکاری مردماں آ باور کنائینگ بوتگ انت بلے آئی ءِ سر ءَ روچ مروچی گامگیج زورگ نہ بوتگ –

بلوچستان ءِ دو جتا جتائیں دمگ ڈیرہ بگٹی ءُ آواران ءَ دو زالبولاں وتکشی کتگ-

وتکشی کنوکانی پجار عبدلولی شاھی خراسانی ءِ زال ھانزادی ءُ ندا ءِ ناماں زانگ بیتگ اَنت-

کوھلو ءَ وتکشی ءِ وئیل ھپت جولائی ءَ پیش اتکگ کہ اود ءَ دمگی مردماں وئیل ءِ راست کنان ءَ گوشتگ کہ کوھلو ءِ تھسیل گرسنی ءِ ھند ءَ گربی گرسنی ءَ ھانزادی نامیں یک زالبولے ءَ گریبی ءُ شد ءِ سبب ءَ وتکشی کتگ-

زانگ بہ بیت گربی گرسنی ءِ جھمنند اے وھد ءَ ھم گریبی ءِ گڈی سیمسر ءَ زندگی گوازینگ ءَ اَنت-

دمگی مردمانی رد ءَ وتکشی کنوکیں زالبول ءِ ھشت جنک اَنت ءُ درستاں مستریں جنک یازدہ سالیگ اِنت، ءُ زھگانی پت پیر ءُ کماش اِنت ھچ کار کت نہ کنت ءُ گنوک اِنت-

ھمے وڑ ءَ چہ آواران ءَ ھم اھوال اَنت کہ گیشکور ءَ گوستگیں روچاں ندا نامیں جنکے ءَ وتکشی کتگ بلے تنی وھدی وتکشی کنگ ءِ سبب زانگ نہ بیتگ –

ھندوستان ءِ گوریچانی اُستاں ترندیں ھور ءُ توپان ءُ آپانی لوھڑانی سبب ءَ کم چہ کم بیست ءُ دو مردم بیران بیتگ اَنت-

ھال سرکنوکیں ادارہ روئٹرز ءِ رد ءَ بشی ھورانی سبب ءَ بنجاھی شھر دھلی ءَ وانگجاہ بند کنگ بیتگ اَنت ءُ ھمے داب ءَ کوہ ھمالیہ ءِ دامن ءَ ھستیں ریاست ھماچل پردیش ءُ اتراکھنڈ ءَ مھلوک لوگانی توک ءَ نندگ ءِکڈنی کنگ بیتگ اَنت-

ھندوستان ءِ روتاک ٹائمز آف انڈیا ءِ رد ءَ ھماچل پردیش، اتراکھنڈ، جموں و کشمر ءُ پنجاب ءَ توپان ءُ ھارانی سبب ءَ کم چہ کم بیست ءُ دو مردم بیران بیتگ اَنت-

گوستگیں روچ ءَ گوریچانی ریاست ھماچل پردیش ءَ توپانی ھارانی آیگ ءَ یک پھلے پرشتگ ءُ بازیں میتگ آپ ءَ وتی ارجان جتگ اَنت-

توپان ءَ گٹیں مردم ھیلی کاپٹر ءِ گون ءَ ڈن ءَ آرگ بیتگ اَنت-

ریاست ءِ پنجاب ءَ ھوار گوریچانی اُستان ءُ دھلی ءِ دگ ءُ دمک توپان ءَ گپتگ اَنت لھتے جاھاں پھزداراں ربڑی کشتی جوڑ کرتگ ءُ لوگاں گٹیں مردم کش اتگ ءُ مھکمیں جاھاں برتگ اَنت-

ھماچل پردیش ءِ سروزیر سکھوندر سنگھ ءَ چاگردی رسانکجاھاں شھریاناں لوگانی توک ءَ نندگ ءِ دزبندی کتگ –

مھکمہ ءِ موسمیات ءِ رد ءَ ھماچل پردیش ءِ جتا جتائیں ھنداں یک ماھے ءِ ھور ءَ یکیں روچ ءَ گورتگ –

واکدارانی رد ءَ یک جون ءَ بندات بیتگیں بشی ھور ءَ پد دھلی ءَ یک سد ءُ دوازدہ درسد، پنجاب ءَ سد درسد، ءُ ھماچل پردیش ءَ کساسی ھپتاد درسد ھور بیتگ اَنت-

روکپتی بلوچستان ءِ بنجاھی شھر زاھدان ءَ یک بندیگیں مردمے پاھو دیگ بیتگ-

گیشیں اھوالانی رد ءَ زاھدان ءِ مزنیں زندان ءَ مروچی یک بندیگیں مردمے نشہ باپاری ءِ بھتام ءَ پاھو دیگ بیتگ-

پاھو دیگ بیتگیں مردم ءِ پجار سی ءُ ھشت سالی ئیں ابراھیم عالیزئی جھمنند کریمپور زاھدان ءِ نام ءَ زانگ بیتگ-

اھوالانی رد ءَ ابراھیم ایرانی سال سیزدہ سد ءُ نود ءُ ھشت ءَ گرگ بیتگ ءُ چریشی ءَ پد آئی ءِ سر ءَ ایرانی آمیدگس ءَ نشہ باپاری ءِ بھتام جتگ ءُ آئی ءَ را مروچی پاھو داتگ –

زانگ بہ بیت گوستگیں روچ ءَ ھم زاھدان ءِ جھمنندین مردمے ماں کرمان ءِ زندان ءَ پاھو دیگ بیتگ ات-

اھوالانی رد ءَ ھمے سال ءِ بندات ءَ داں انیگ ءَ پنجاہ ءُ ھشت یک سد ءُ پنجاہ ءُ نُھ مردم پاھو دیگ بیتگ انت کہ آیانی چار زالبول ھوار اَنت کہ اے جتا جتائیں زنداناں پاھو دیگ بیتگ اَنت-

بلوچ تھریک ءُ زالبولانی کِرد

نبشتہ کار: ماہ گل بلوچ

دی بلوچستان پوسٹ

پہ یک ھاسیں مکسدے ءَ لھتیں مردم یکجاہ بنت ءُ جھد کن انت گڑا ھمیشی ءَ تھریک گوش اَنت، تھریک پہ وڑ وڑیں مکسداں برجاہ بنت، دنیا تہ ءَ باز تھریک بوتگ اَنت کہ آیانی مکسد چہ یکے دومی ءَ گستا بوتگ انت-

ھمے ھساب ءَ بلوچ ءِ تھریک پہ یک ھاسیں مکسدے ءَ دیم ءَ جنزگ ءَ اِنت، بلوچ ءِ آجوئی جُنز مروچی بندات نہ بوتگ بلکیں اے جنگ چہ ھزاراں سال پیش بندات بوتگ ءُ دیم ءَ جُنزگ ءَ اِنت- اے جنگ ءِ یک مسالے ھمیش اِنت وھدے انگریز بلوچستان ءِ سر ءَ کبزہ کن اَنت، گڑا آگاابداکریم، میر مھراب ھان ءُ دگہ بازیں بلوچ انگریزانی ھلاپ ءَ جنگ کن انت وتی ساہ ءَ پہ ڈیھ ءِ رکینگ ءَ ندر کن اَنت، انگریزاں پد پاکستان وڑیں ملکے بلوچستان ءِ سر ءَ کبزہ کنت بلوچ تھریک ھمے ھساب برجاہ انت ءُ زوراکانی ھلاپ ءَ جنزگ ءَ اِنت-

اے جنگ ءِ تہ ءَ بلوچ ورنا پیر ءُ آجزاں ھوار بلوچ زالبولانی بلاھیں کِردے ھست۔ دُنیا کجام تھریک ءَ بچارئے گڑا زالبولانی یک بلاھیں کردے گندگ بیت ھمے ڈول ءَ بلوچ تھریک ءِ تہ ءَ زالبولانی بلاھیں کردے ھست۔ آ چاگردی ءُ سیاسی کار بہ بیت یا بلوچ ڈیھ ءِ آجوئی ءِ جنز ھمک جاہ ءَ زالبول گوں وتی پت ءُ براتاں ھمگام اَنت ءُ اوشتاتگ اَنت۔

بلوچ تھریک ءِ تہ ءَ پہ جھد ءَ زالبولانی ھر وڑیں جھد گندگ بیت، گوستگیں وھد ءَ بانڑی ءُ دگہ بازیں شیزالیں کرد بوتگ اَنت، کسے لُمہ کریمہ ءِ وڑ ءَ جھد کنگ ءَ اِنت، کسے ڈاکٹر مھرنگ ءُ داکٹر سبیہ ءُ سمی یا کہ آدگہ شیرزالیں زالبولانی وڑ ءَ کہ آ پہ بیگواھیں مردمانی آجوئی ءَ ھر وڑیں درد ءُ اندوھاں برداش کنگ ءَ اَنت۔

مرچی بلوچ زالبولانی جھد ءَ دگہ رنگے آورتگ بانک شاری ءُ بانک سمُیہ ءِ وڑ ءَ چہ وتی ساہ ءَ سرگوستگ اَنت پدائی کنگ ءَ اَنت۔ اگاں دنیا ءِ تھریکانی تہ ءَ زالبولانی کرد گندگ بنت ھمے وڑ ءَ بلوچ تھریک ءِ تہ ءَ بلوچ زالبوالانی بلاھیں کردے ھست۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چمشانک: The Metamorphosisکتاب فرانز کافکا

نبشتہ کار: لقمان آسکانی

دی بلوچستان پوسٹ

پرانز کاپکا ءِ نبشتگیں “میٹامورفوسس ” یک جُھلگ ءُ دُور ھیالیں گِدارے کہ آ وت ءَ پجّا آرگ ، بیگانگی ءُ زندگی (وجودیت) ءِ بُنگپ ءِ سر ءَ گُمان دیگ ءَ اِنت ۔ 1915 ءِ اے چاپ بوتگیں لبزانکی مَڈّی کاپکا ءِ مشور تریں کاراں چے یکّے بوت ، ءُ اے گِدار ءِ جوانی ءُ راست ناکی ءَ وانوک وتی اندر ءَ گار ءُ بیگواہ کُت اَنت ۔ اے کِسّہ گریگور سامسا ءِ کنارگاں گردیت کہ آ باپاری ءِ کار ءُ بارانی تہ ءَ مُدامی سَپر کنت ، آ یک سُھبے پاد کئیت ءُ پُولگ ءَ لَگّ اِیت ، آ یک مزنیں لُولُّکے ءِ دْروشم ءَ مَٹّ بیت اِنت ۔ اے ناگتیں مَٹّ بوھگ گریگور ءِ پھم ءَ چے ڈَنّ بیت ءُ وتی زندگی ءِ اندر ءَ تھنائی ءُ بے کدری ءَ گوں نندیت ءُ ھیال ءِ چھرانکی دْروشم ءَ کار کنگ ءَ لَگّ اِیت ۔ وھدیکہ آ وتی نوکیں جاوراں گوں دُوچار بیت ، گِدار گریگور ءُ آئی ءِ کُٹم ءُ تمن ءِ نیام ءَ کِرد ءِ شوھازگ ءَ لَگّ اِیت ، بزاں تْرس ءُ بیم ، کست ءُ کینگ ءُ بے دردی ءَ ھوار آئی ءِ مَٹّ بوھگ ءِ پسّو بند ءَ دنت ۔

کاپکا ءِ اے نبشتگیں گِدار ءِ انداز زیات وتشناسی بزاں وتی پجّا آرگ ءِ سر ءَ اِنت کہ وانوک ءَ گریگور ءِ تھی جیڑہ ءُ زندگی ءِ اندر ءَ دؤر دنت ءُ نبشتہ کار ءِ نیمگ ءَ ساز اِتگیں ندارگ ءِ اکس کاری یکشل ءَ بیان کنگ ءُ اسلی چاگرد ءِ کارمرزی ءَ پدّر کنگ ءَ اِنت ۔ اے کِسّہ ءِ تہ ءَ تکانسُری ءُ کندارینگی ھردوکیں ھیالات پھم ءِ تہ ءَ ودی بیت اِنت ۔ کاپکا ءَ اِزمکاری ءَ ابید مِر مِرانکیں بچکند ءِ ساھت ءَ گوں نہ اُمیتی ءِ بُنکی ءُ اندری مارشتاناں گوں ھمدپ کنگ ءَ اِنت ۔ آئی ءَ چہ اے گِدار ءِ تہ ءَ ڈکھ ءُ مونجائی ءِ جتائیں دابے گندگ ءَ کیت اِنت ۔

میٹامورفوسس ءِ جوانتریں بھر ایش اِنت کہ وانوک ءِ ارواہ ءِ اندر ءَ چیھانٹانی جوانی ءَ در کنت ، کاپکا ءَ بزاں پجّا آرگ ، بیگانگی ، زندگی ءِ پیمیں بُنگپانی شوھازگ ءِ ھَد ءُ سمسراں گوں بندوک اِنت ۔ اے گِدار انسان ءِ زندگی ءِ وڑ ءُ پیم چاگرد ءِ رھبند ءُ وتی جند ءِ واھشتانی باروا مزنیں جُستے چِست کنت اِنت ۔ در انسانی اسرات ءُ بُن ءُ بیھ ئیگی نگدانک ءِ دْروشم ءَ کار کنت اِنت۔

ایشاں چے پد میٹامورفوسس کارست ءِ ھساب ءَ تونگّر نہ اِنت ، چُشکہ گریگور ءِ مَٹّ بوھگ ءُ آئی ءِ کُٹم ءِ رد ءِ اَمل آئی ءِ کُٹم ءِ ھر مردم نپسیاتی اسرات نزیک نزیکی ءَ زاھر کُت اَنت ۔ مردم سیاد ءُ وارسانی چیریں سُر ءُ پُر ھمگرنچی ءُ نازرکی ءَ گوں درا کُت اَنت ۔

پد ءَ ھم لھتیں وانوکاں بیانیہ زُور چیر دیانت ئےِ کاپکا ءِ نبشتگ کنگ ءِ انداز زیات پسّو ءِ شوھازگ اِنت ، جُست ءَ نہ سرجمیں پلاٹ ءِ رِداں اِنچو ارزشت نہ دنت ۔ ھر وانوکے کہ زندگی ءِ بُن بیھ ءُ بے اوستی ءِ جاورالاں کندارینگی بازیاں کَڈّن کنت ایشی ءَ چے پد گِدار ءِ تہ ءَ ابہام ءُ پُراسراریں منزلے آئی ءِ تہ ءَ گیشی کنت اِنت ۔

البتہ میٹامورفوسس یک مزنیں رنجناکیں لبزانکی کارے کہ وتی زندگی ءِ بُنگپ انسان ءِ جاورال ءِ ھوری ءَ وانوک ءَ وتی اندر ءَ بیگواہ کنت ۔ کاپکا ءِ اے نبشتگیں رم آئی ءِ ھیالات ءُ کِسّہ ءِ گوماں ھوار ، ءُ اے گِدار ءَ آ مردمانی واست ءَ الم بوان کہ انسانی زانت ءِ جُھلانکی ءُ چاگرد ءِ چیر ءُ سریں جیڑھانی زانگ ءِ واست ءَ باز ارزشت دار اِیت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔