TBP Balochi

ھندوستان ءِ ماہ ءِ سر ءَ روکیں چندریان 3 ءَ ماہ ءِ سر ءَ روگ ءَ دو نیم کساس سپر سرجم کتگ ءُ چریشی ءَ چہ ا مروچی بیگاہ ءِ وھد ءَ ماہ ءِ نزیک ءَ سر بیت اِنت-

ھندوستان ءِ روتاک ھندوستان ٹائمز ءِ رد ءَ انڈین اسپیس ریسرچ آرگنائزیشن اسرو ءَ اے گپ راست کتگ کہ چندریان 3 ءَ ماہ ءِ نزیک ءَ روگ ءَ کساس دو کساس بھرانی سپر ھلاس کتگ ءُ شمبے ءِ بیگاہ ءَ ماہ ءِ نزیک ءَ سر یت اِنت-

چندریان 3 برز بالیں جھاز دومی گیچینی تکاں ماہ ءِ نزیک ءَ سر بیت اِنت ءُ بیست ءُ سَے اگست پہ ھندوستان ءَ یک گچینی روچے بیت اِنت کہ چندریان 3 ماہ ءِ سر ءَ نند ایت اِنت-

اسرو ءِ گوشگ اِنت داں انگت ءَ اے مشن الکاپ ءَ برجاہ اِنت ءُ ایشی ءَ ھچ جیڑھانی دیمپانی نیست اِنت –

اگاں چندریان 3 ءِ مشن سوبمند بوت گڑا بزانکہ ھندوستان دنیا ءِ توک ءَ ماہ ءَ روکیں چارُمی ڈیھ بیت اِنت-

زانگ بہ بیت اے اسرو ءِ سال دوھزار نوزدہ ءِ بے سوب بیتگین مشن چندریان 2 ءَ رند اِنت-

ستمبر دوھزار ءُ نوزدہ ءَ اسرو ءِ مشن چندریان 2 ماہ ءِ نزیک ءَ سر بوگ ءَ 2.1 کلو میٹر ءِ دوری ءَ گراؤنڈ اسٹیشن ءِ نزیک ءَ رھوت گار بیتگ-

چندریان ءِ مانا سنسکرت زبان ءَ (چاند گاڑی) اِنت اے برز بالیں مشن ءِ وھد ءَ دو میٹر دراجیں روور چُشکہ گاڑی ءَ ماہ ءِ زرباری لمب ءِ نزیک ءَ رسینگ بیت اِنت ءُ دو ھپتگاں جتا جتائیں پٹ ءُ پولکاری کنت اِنت-

زانتکارانی گوشگ اِنت ماہ ءِ سر ءَ روور ءِ لانچ کنگ ءَ یک دگہ مول ءُ مرادے ایش بیت اِنت کہ ھندوستان دنیا ءَ کلوہ ءَ دیگ لوٹ ایر کہ آ برز بالی ءَ ڈنی کمپنیانی گون ءَ باپار ءَ تیار اِنت –

زانگ بہ بیت چندریان 3 ھندوستان ءِ ماہ ءِ سر ءَ روکیں سیمی مشن اِنت کہ ایشی ءِ سر ءَ ھپت کروڑ ءُ پنجاہ لک ڈالر ھرچ کنگ بیتگ اَنت –

سر بیتگیں اھوالانی رد ءَ ایران ءِ اُستان کرمان ءَ ناشناسیں مردماں لوگے ءِ سر ءَ تیرگواری کتگ ءُ اود ءَ زھگ کُشتگ ءُ مات ٹپیگ کتگ-

گیشیں اھوالانی رد ءَ کرمان ءِ دمگ رودبار ءِ ھند اسلام آباد ءَ جھمنندیں بلوچے ءِ لوگ ءِ سر ءَ ناشناسیں مردماں اُرش کتگ یک ورنایے کشتگ ءُ آئی ءِ مات زدگ کتگ-

کُشگ بیتگیں ورنا ءِ پجار بیست سالی ئیں مھمد جواد فرامرزی ء ملک مھمد کُشتگ ءُ آئی ءِ مات ماہ بی بی ء شھدادی زدگ کتگ-

دمگی اھوالانی رد ءَ دُزاں آیانی لوگ ءِ سر ءَ اُرش کتگ ءُ اود ءَ زر ءُ مالانی پولگ ءَ بلے اود ءَ ھچ دز نہ کپتگ ءُ چریشی ءَ آیاں تیرگواری کتگ ءُ زھگ کُشتگ ءُ مات ٹپیگ کتگ-

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشان ءِ تہ ءَ نوشکی ءُ کولواہ ءَ چاریگی کیمرہ ءُ پوج ءِ سر ءَ بوتگیں اُرشانی زمہ واری منّ اِتگ گوشتگ کہ اے اُرشاں چاریگی کیمرہ تباہ ءُ دو دژمن کارمند زدگ بوتگ انت –

جارکش جیئند بلوچ ءِ رِد ءَ بی ایل اے ءِ سرمچاراں گوستگیں شپ ءَ نوشکی ءَ زرین جنگل ھند ءَ برجاھیں پوجی پانگسے سر ءَ اُرش کتگ، اے اُرش ءَ سرمچاراں پانگسے سر ءَ بازیں گرنیڈ لانچر گولہ آس داتگ ءُ چریشی ءَ کم چہ کم دو دژمن کارمند زدگ بوتگ انت –

جارکش ءِ رِد ءَ سرمچاراں سَے اگست دوھزار ءُ بیست ءُ سَے ءِ شپ ءَ کیچ ءِ دمگ کولواہ، رودکان ءَ گٹ ءِ کور ءَ برجاھیں پوجی پانگس ءِ نزیک ءَ کل کنگ بوتگیں چاریگی کیمرہ ءُ آئی ءِ بیٹری ءُ سولر تباہ کتگ انت –

جارکش ءَ گوشتگ کہ بی ایل اے ھردو ارشانی زمہ واری ءَ منیت سرڈگار ءِ آجوئی ءَ تاں مئے جھد برجاہ مانیت –

سربوتگیں ھالانی رِد ءَ بلوچستان ءِ دمگ نوشکی ءَ پاکستانی پوج ءِ پانگسے ءِ سر ءَ اُرش کنگ بوتگ –

اُرش گوستگیں شپ ءَ زرین جنگل ءَ برجاھیں پوجی پانگسے سر ءَ کنگ بوتگ –

دمگی مردمانی رِد ءَ اُرش ءَ وھد ءَ سک باز تیرگواری ءُ تراکانی توار بوتگ بلے تنی وھدی واکدارانی نیمگ ءَ اے درگت ءَ ھچ وڈیں ھال شنگ کنگ نہ بوتگ –

گوستگیں روچ ءَ ناشناسیں سلاہ بندیں مردماں نوشکی ءَ بابو حمید ماندائی ءِ سر ءَ تیرگواری کُتگ آ کُشتگ ات- بابو ءِ کوش ءِ زمہ واری بی ایل اے ءَ منّ اِتگ ات –

جارکش ءِ رِد ءَ بابو حمید ءَ سال دوھزار نوزدہ ءَ بلوچ آجوئی لوٹوکیں سنگت دوکا داتگ ءُ دزگیر کنائیں اِتگ انت پدا پوج ءِ دیم ءَ سلاہ دور داتگ انت –

گوستگیں روچ ءَ کولواہ رودکان ءَ گٹ ءِ کور ءَ ناشناسیں مردماں پاکستانی پوج ءِ نیمگ ءَ کل کنگ بوتگیں چاریگی کیمرہ تباہ کتگ انت –

نوشکی ءُ کولواہ ءِ ھردو اُرشانی زمہ واری تنی وھدی ھچ گل ءَ نہ منّ اِتگ انت –

بلوچستان ءِ باپاری شھر ھب چوکی ءِ دمگ سرجانی ٹاؤن عبداللہ غازی گوٹھ ءَ گاریں ورنایے جون دست کپتگ –

پولیس ءِ رِد ءَ اے مرد آوار جنگ ءَ پد ناشناسیں جاھے ءَ برگ بوتگ ءُ لٹ کُٹ کنگ بیتگ، پدا تیر جتگ ءُ کُشتگ چگل داتگ-

مرد ءِ گور ءَ آئی ءِ پجار کارڈ دست کپتگ کہ آئی ءِ نام بیست ءُ پنچ سالی محمد نسیم ء درمحمد انت، اے مرد ھب چوکی ءَ یک کلومیٹر دور اشوک پٹرول پمپ ءِ نزیک ءَ جھمنند بوتگ –

کُشگ بوتگیں مرد ءِ وارس الطاف حسین ءِ گوشگ انت کہ محمد نسیم نیزگار ءُ دو زھگانی پت بوتگ ءُ کساس دو ماہ ساری اشی ءَ گوں بلوچستان ءِ دمگ جعفرآباد ءِ جھمنندیں جنکے ءَ گوں مھر بوتگ ءُ آھاں مھری آروس کتگ –

آئی ءَ گوشتگ کہ محمد نسیم یک اگست ءَ چہ بیگواہ انت بیگاھے ادار چار ءَ آ ھوٹلے ءَ گندگ بوتگ کہ پدا رند ءَ چار پنچ مردم گاڑی ءَ سوار بوتگ انت آوار ءِ جتگ- یک اگست ءِ شپ ءِ ادار دھ ءَ محمد نسیم ءِ پت درمحمد گوں آئی ءَ ھال اھوال ءَ بوتگ پدا رند ءَ آئی ءِ گوانکو ھم بند بوتگ-

آئی ءَ گوشتگ کہ وھدیکہ من محمد نسیم ءِ گِس ءَ شُتگاں گڈا سرپد بوتگاں کہ درمحمد، محمد نسیم ءِ دویں لوگبانک گوں ھمراھے چُکاں آوار جنگ بوتگ انت –

آئی ءَ گوشتگ کہ نسیم جون ءِ ھال مارا نسیم دومی لوگبانک ءِ پت ءَ داتگ کہ جون درچکانی تہ ءَ کپتگ چست بہ کن ات کہ ما شُتگ ءُ نسیم جون ءِ پجار کتگ-

آئی ءَ گوشتگ کہ نسیم ءَ ھما دومی جنکے گوم ءَ کہ سانگ کتگ آئی ءِ پت، برات ءُ ناکو ءَ پون کتگ ءُ کُشگے بیھار داتگ –

آئی ءَ چہ برزی تبکءِ واکداراں گوں لوٹ کتگ ءُ گوشتگ کہ نسیم ءِ دوئیں جنوزام، دوئیں چُک ءُ آئی ءِ پت ءَ یل بہ کنائیناں چوش مہ بیت کہ آ اشاں ھم بُکش انت –

دمگی پولیس پٹ پول کنگ ءَ انت کہ اے مرد کُجا کُشگ بوتگ تانکہ ھما ھند ءَ آئی ءِ ارزی نبشتہ کنگ بہ بیت گیشتر گمان کنگ بیت کہ کوش ءِ ارزی ھب پولیس کارگس ءَ نبشتہ کنگ بیت –

ھندوستان ءِ اُستان منی پور ءِ بنجاھی شھر امپھال ءَ ھواریں زھرشانی کنوکاں پولیس ءِ دو چیک پوسٹانی سر ءَ اُرش کتگ ءُ پرشت ءُ پولیس ءِ یک آپیسرے بیران بیتگ-

ھندوستان ءِ ٹی وی چینل این ڈی ٹی وی ءِ رد ءَ منی پور ءِ پولیس ءِ گوشگ اِنت کہ بشنوپور ءَ یک ھواریں زھرشانی کنوکاں پولیس ءِ کیرنفبی چوکی ءُ تھنگلاوائی چوکی پروشتگ اَنت ءُ سلاہ پچ گپتگ اَنت-

ھواریں مردماں ھینگانگ ءُ سنگجمی پولیس اسٹیشناں ھم سلاہ ءُ گولھانی پچگرگ ءِ جھد کتگ بلے پھزداراں اے بے سوب کتگ اَنت-

سرکاری درشان ءَ گوشگ بیتگ سلاہ بندیں اُرشکار ءُ پھزدارانی میان ءَ کوتروک، ھراوتھل ءُ سنجام چرانگ ءِ دمگ ءَ تیرگواری بیتگ ءُ تیرگواری ءِ میان ءَ یک پھزدارے ءَ جوار دو مردم زدگ بیتگ اَنت-

امپھال ویسٹ ءِ سنجام چرانگ ءَ منی پور ءِ پولیس ءِ یک کارندھے ءَ تیرگواری ءَ یک کارندھے ءَ تیر لگگ ءَ بیران بیتگ- نزیکیں کوھی دمگاں ھواریں ناشرکاراں کوتروک ءُ سنجام چرانگ ءَ تیرگواری ءَ میتگ ءِ چاگردی باسک زدگ بیتگ-

بشنوپور ءُ چوراچندپور ءِ دمگ ءَ سیمسر ءِ ھند ءَ فوگالچاؤ اکھائی ءَ کساس پنچ سد یا شش سد مردم مُچ بیتگ اَنت ءُ پھزداراں مردمانی شنگ ءُ شانگینگ ءَ آنسوگیس کارمرد کتگ ءُ چریشی ءَ کساس بیست ءُ پنچ مردم زدگ بیتگ اَنت –

پولیس ءِ نیمگ ءَ شنگ بیتگیں درشان ءَ گوشگ بیتگ کہ گوستگیں بیست ءُ چار ادارانی توک ءَ ریاست ءَ تیرگواری ءُ جتا جتائیں ھند بے لگامیں مُچیانی مُچ بوگ ءِ سبب ءَ جاور ناگیگ اَنت-

سربوتگیں ھالانی رِد ءَ پاکستانی پوج ءَ چہ کیچ ءِ بنجاھی شھر تربت ءَ یک ورنایے زورانسری آوار جتگ ءُ بیگواہ کتگ –

ھبدہ سالی ورنایے پجار نوشاد ء میاداد بجیر ءِ نام ءَ بوتگ کہ تربت ءِ دمگ آپسر ءِ نندوک انت –

کھول ءِ مردماں آئی ءِ زورانسری آوار جنی ءِ ھبر راست کُتگ ءُ گوشتگ کہ نوشاد گوستگیں ماھے سِی ءُ یک جولائی ءَ بیگاھے ادار شش ءَ ھما وھد ءَ پاکستانی پوج ءَ زورانسری آوار جتگ ءُ بیگواہ کتگ وھدیکہ آ چہ تربت ءِ بازار ءَ دیم پہ گس ءَ آیگ ءَ بوتگ کہ آپسر ءِ پوجی بنجل ءِ نزیک ءَ چیریں ادارھانی کارمنداں آئی ءِ پرپٹ داشتگ ءُ آ گوں وت برتگ –

آئی ءِ کھول ءَ انسان دوست ءُ ھر تک ءُ پھناتاں سیادی داروکیں مردماں گوں لوٹ کتگ ءُ گوشتگ کہ نوشاد ءِ یل کنائینگے ھاتر ءَ وتی توار ءَ چست بہ کن انت گوم ءَ ھمتوار بہ بنت –

زانگ بہ بیت بلوچستان ءَ پاکستانی پوج ءِ زورانسری آوار جنیانی درچ یکشل ءَ برجاھیں انت ءُ لھتے وھد بیت کہ آئی ءِ تہ ءَ گیشی آرگ بوتگ – اے درگت ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ گوشگ انت کہ وھدی سرجمیں بلوچستان ءَ کساس پنجاہ ھزار ءَ گیش مردم زورانسری آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ سیاسی باسک ءُ بلوچ نودربرانی انت –

شال ءَ یک دگہ مردمے کانگو وائروس آماچ بوتگ چریشی ءَ پد ھمے سال ءَ کانگو وائروس ءِسرجمی ءَ بیست ءُ شش کیس رپورٹ بوتگ انت –

شال ءِ فاطمہ جناح نادراھجاہ ءِ واکدارانی رِد ءَ اے نادراھ گوستگیں شپ ءَ آرگ بوتگ –

کانگو وائروس ءِ آماچیں نادراہ نادراھجاہ ءِ آئیسولیشن وارڈ ءَ انت ءُ آئی ءِ الاج برجاہ انت، ھمے گوشگ بوگ ءَ انت کہ نوں آ کمے وشتر انت –

نادراھے پجار پانزدہ سالی احسان انت کہ قلعہ سیف اللہ ءِ دمگ نسئی ءِ نندوک انت –

اے سال ءَ کانگو وائروس ءِ سرجمی ءَ بیست ءُ شش مردم اماچ بوتگ انت کہ آھانی تہ ءَ ھبدہ وش بوتگ انت ءُ نُھ مردم بیران بوتگ انت –