TBP Balochi

ندر پہ شھاب جان ءُ آئی ءِ ھمبلانی نام ءَ

نوید بلوچ

دی بلوچستان پوسٹ

مہ گْوش چو یار گار بوتاں
من نوں ھیران سر ءِ بازار بوتاں

نوں دل چون وشّیاں لوٹ ایت
ھمُک درد ءِ تہ ءَ من بار بوتاں

پروم نال اِیت چو تِپلیں زھگے پیم ءَ
گمیگ کُلّیں شُمئے کہ یار بوتاں

ھمُک مات ءَ بِہ چار ئے ارس گْوار اِیت
گْوھارانی کہ پاسبان گار بوتاں

چونیں رنجے چونیں درد ءِ اِد ءَ اتک
کہ میتگ، شھر ءُ دگّ آزار بوتاں
نزان آں پرچا رپت اَنت دائمی پہ
ءُ چہ من پرچا چو بیزار بوتاں

نوید تئی دوست ءُ ھمبل دُرس گار اَنت
ھما کہ گوں ترا زی ھوار بوتاں

بلوچستان ءِ جتاجتائیں دمگاں بیتگیں جتاجتائیں وئیلانی آسر ءَ شش مردم بیران ءُ دو ٹپی یک مردمے لاش دزکپتگ

گیشیں ھالانی رِد ءَ بلوچستان ءِ بُنجاھی شھر شال ءِ دمگ زرغون آباد نزیک ءَ سرہ خلہ ڈیم ءَ پت گوں چُکاں ءَ ھوار بُک اِتگ اَنت ءُ بیران بوتگ، وئیل ھال سر بیگ ءَ ریسکیو ٹولی وئیلجاہ ءَ سر بیتگ ءُ لاش چہ ڈیم ءَ در کتگ اَنت سول نادُاھجاہ شال ءَ برتگ-

ھالانی رِد ءَ پانزدہ سالی ئیں محمد عالم نامیں چکے ءَ ڈیم ءَ جانشودگ وھد ءَ بُک اِتگ ءُ آئی ءِ رکینگ ھاتر ءَ چاردہ سالی ئیں گھار رحیمہ بی بی ءُ آئی سی ھشت سالی ئیں پت محمد حسن ءَ ھم ڈیم ءَ دور کتگ، پولیس رِد ءَ چُک ءِ رکینگ ءَ گھار ءُ پت دوئیں ھم ڈیم آپ ءَ بُک اِتگ اَنت، ھمے وڑ سئیں بیران بیتگ اَنت-

ھمے وڑ کوھلو ءَ ھال اِنت کہ لاسی زئی ھند ءَ یک ناشناسیں مردمے ءِ لاش دزکپتگ کہ آئی ءِ پجّار ھاتر ءَ ڈی ایچ کیو نادُراھجاہ ءَ برتگ- اشی ءِ درگت ءَ انچش گوشگ بیگ ءَ اِنت اے مرد چہ کوہ ءَ کپتگ ءُ بیران بیتگ-

دومی نیمگ ءَ نصیر آباد ڈویژن ءَ جتاجتائیں وئیلانی آسر ءَ سے مردم کُشگ بیتگ-

بنداتی وئیل گوٹھ علی شیر جھرانی ءَ بیتگ کہ اود ءَ بدکاری ءِ بھتام ءَ میاربار غلام ربانی ءَ وتی لوگ بانُک ءُ کرم علی جکھرانی تیر جتگ ءُ کُشتگ اَنت، میاربار تچگ ءَ سوبمند بیتگ-

ھال ءِ رسگ ءَ تھانہ میر حسن پولیس ءَ لاش چار ٹپاس کنگ ءَ پد کھول دست ءَ داتگ ءُ میاربار ءِ پٹ پول کنگ بندات کتگ-

دومی وئیل سٹی تھانہ اوستہ محمد نزیک ءَ جمالی پیٹرول پمپ ءَ سلاہ بندیں پرپٹ سواراں تیرگواری کتگ ءُ ورنا آدم خان بروھی کُشگ ءَ پد تتکگ، وئیل کوھنیں دُژمنی گْوشگ بیگ ءَ اِنت، گیشیں پٹ پول پولیس کنگ ءَ اِنت-

ھمے وڑ کیچ ءِ بُنجاھی شھر تربت ءِ ھند آپسر ءَ ناشناسیں سلاہ بندیں مردمانی تیرگواری ءَ چہ دو مردم اصغر ء شیر محمد سلالہ بازار آبسر ءُ ماجد ء سنجر جھمنند آبسر ٹپی بیتگ اَنت-

تیرگواری ءِ وئیل انگت زانگ نہ بوتگ-

نبشتانک:زاھر اَت کہ مدام جھد ءَ اَت

نبشتہ کار: وسیم سخی

دی بلوچستان پوسٹ

چوناھا من زاھر چہ شال ءَ زانتگ اَت۔ بولان ھوٹل ءَ دیستگ اَت ءُ برئے برئے رشیدی ءَ بس سلام دوا اَت۔ دسمبر 2019 ءَ کہ منی اڈمیشن بھاولپور ءَ بوت من ایڈمیشن برانچ ءَ اوشتوک ات اَنت تاں چاراں گوں وتی برزیں بالاد ءَ پیداک انت من ءَ وتی کاگد دست ءَ ات اَنت ( ایڈمیشن ءِ ) ” تو اد ءَ ھالاں بہ دے” من گشت ھوو ایڈمیشن بوتگ۔ کند اتیں ءُ گشتے ” شوک انت گڑا تئی کار بوتگ انت”؟من گشت ھو ھکیم ءَ کتگ انت۔ اے وھد ءَ سنگتانی چکاس بوگ ءَ ات اَنت من ھمے شپ ءَ در کپتاں کراچی ءَ شتاں پد ءَ گوں زاھر ھال نہ بوت۔ من بس ءَ سوار بوتاں انسٹاگرام ءَ میسجے اتک” ھا بچہ شتگ ءِ ھال نہ داتگ” من گشت شمئے چکاس انت من پد ءَ کایے کلاس بندات بنت۔ لھتیں روچ گوست ما اتکیں بھاولپور ءَ مئے کلاس لگ ات اَنت۔ سھب ءَ کلاس ءُ بیگاہ ءَ پد ءَ دیم پہ وتی کوٹی ءَ ہمے وڑ زندگی روان اَت۔ یک روچے زاھر من ڈیپارٹمنٹ ءَ دیست ءُ گشتے” تو بزاں ھال نہ کن ئے مئے کرا نیایے” من گشت اناں اڑئے بس کلاس ءَ ھلاس کناں تی کوٹی ءَ چکرے جن آں وتی نمبر ءِ دات من ءَ میسجے داتے کہ زاھر کوٹی لمبر 109 عثمان ھال۔ من شتاں وتی کلاس ءَ انچو کہ کلاس ھلاس بوت من تچک ءَ شتاں زاھر ءِ کوٹی ءَ چاراں مجلس انت دیوان انت کوٹی ءَ نندگ ءَ جاہ نیست۔ زاھر من ءَ دیست گشتے بیا اڑئے بیا وتی کش ءَ جائے دات ئے۔ جوڑی تیاری بوت داں دیراں من نشتاں ءُ پد ءَ من شتاں وتی کوٹی ءَ۔ ھمئے وڑا زندگی روان اَت کہ کرونا اتک مئے سئے سیمسٹر اونلاھن شت گوں زاھر ھال نہ بوت۔ پد ءَ کہ ما اتکیں چارمی سیمسٹر ءَ سر بوتیں مارا عثمان ھال ءَ کوٹی یے رس ات کہ زاھر ھم ھمئے ھاسٹل ءَ ات۔ شپ ءَ من شتاں زاھر ءِ کوٹی ءَ من گشت من گڑا اتکگاں تئی ھمساھگاں کند اتیں” ترا الاٹمنٹ رس ات تو بئی سِٹ بوتے “من گشت ھو ھھھھ۔ ھاسٹل ءِ آھگ ءُ زاھر ءِ نزدیک بوھگ ءَ زندگی سک بدل کت مدام کہ زاھر ءِ کوٹی ءَ شتاں ڈسکیشن ات سیاست ات ءُ بلوچستان ءِ جاورانی بابت ءَ ھبر ءُ ھال ات۔ مارا پہ دربرگ ءَ سک باز رس ات ءُ پد ءَ زاھر ءِ دگہ ھادتے بوتگ ھشک ءَ نندگ ئے نیشتگ لازم جستے کتگ چے وانگ ءَ ئے۔ کجام کتاب ءَ وانگ ءَ ئے۔ اگاں تو گشتگ کہ ھچ گڑا موڑ ءِ ھراب بوتگ سگریٹے روکے کتگ لھم لھم ءَ ترا سوجے داتگ۔ کجام اوں ھند ءُ دمگ ءِ نودربرئے کہ یونیورسٹی ءَ اتکگ زاھر لازم شتگ آئی ءِ کرا ھال ءُ اھوالے کتگ۔ بلوچستان ءِ درائیں دمگانی مردماں زاھر پجہ آورتگ۔ ما بیگاہ ءِ ساھت ءَ ھوٹل ءَ شتگیں پہ چائے ءِ ورگ ءَ زاھر مئے ٹیبل ءَ نشتگ ما چاہ ءِ آرڈر داتگ زاھر انچو پاد اتکگ آ بچہ کجا چاہ ءِ آرڈر داتگ تی واستا “من ھمدا آں سنگتاں گنداں دانکہ چاہ بئیت انت من کایے۔” ھوٹل ءَ ھرکس گوں وتی سنگتاں نشتگاں تُربَتی ، نصیرآباد ، ڈٰی جی خان ، بارکھان ، کولو ، خاران، خضدار ، وتی وڑ ءَ نشتگاں زاھر شتگ درستانی کرا دیوان ءِ کتگ ءُ جستے گپتگ کتاب ءِ داتگ، دیوان ءِ داتگ ءُ مدام ڈسکیشن ءِ کتگ۔ رند ءَ یک سنگتے ءَ زاھر ءِ چاہ گون انت ءُ دیگ ءَ انت ئے زاھو تی چاہ انت۔ ” ھھھ من اڑئے چاہ ءَ چہ بے ھال آں”۔

شپ کہ بیت زاھر ءِ کوٹی ءَ چاہ جوڑ بیت درستیں سنگت آھان بنت ھمدا دیوان بیت کندگ، مسکرا، ڈسکیشن بیت دانکہ شپ ءِ 3\4 ءَ نوں سنگت رواں وتی کوٹیاں۔ ھمئے ساھت ءَ یونیورسٹی ءَ بلوچستان ءِ نودربرانی سیٹ بند کتاں ءُ ما زھرشانی ءِ بنا کت ءُ دگ ءِ سر ءَ وتی ٹینٹ جتاں ءُ ھمدا نندگ وپسگ بوت۔ ہمئے اولی روچ ءَ دھیں گڈی روچ ءَ زاھر اَت کہ ھمدا نشتگ اَت وپتگ اَت۔ وتی کوٹی ءَ ھم نہ شت۔ یکیں جوڑی ئیں پچ دہ روچ ءَ گیش گوارا اتیں یک روچے من گشت زاھوو برو جان بہ شود ءُ بیا گشتے ” اناں یار من شراں جان شوداں چئے کناں”۔ ائے ھمئے مرد اَت شپ ءُ روچ کار ءَ اَت۔ اے مرد من دم برگ ءَ نہ دیست۔ درستیں بلوچ ءِ یکجاہ کتگ ات انت ءُ دیوان ءِ پاگ واجہ اَت۔

لھتیں وھد ءَ پد زاھوو چہ یونیورسٹی ءَ پارک بوت بزاں کہ وتی ڈگری یے کت۔ مئے انگت یک سیمسٹرے پشت کپتگ اَت ہمئے وھد ءَ نوکیں نودربر اتکاں نوکیں مردم ات انت پد ءَ بلوچ ات اَنت جوڑی تیاری بوت دیوان ات کندگ مزاک بوت۔ من سنگت رخصت کتاں ءُ دیم پہ ہاسٹل ءَ شتاں۔ شپ بوت سنگتے ءَ میسج کت بیا منی کوٹی ءَ چاہ پر انت ءُ نوکیں سنگت ھم نشتگاں دیوانے کن ایں۔ من پسہ دات کہ کارے کنگ ءَ آں ھلاس ئے کناں ءُ کاھاں۔ ساھت ءَ پد من شتاں سلام دات کہ ڈکیشنے بندات انت من گپ نہ کت سنگت گوشداشتاں۔ چارمی، پنچمی ءُ اولی سیمسٹر ءِ سنگت ندوک ات انت ءُ پنچمی سیمسٹر ءِ سنگت گپ ءَ اَت ءُ ما گوشدارگ ءَ اتیں ڈسکیشن ءِ سر ھال اش اَت کہ “نودربر وتی وانگ ءِ سالاں سیاست کناں پہ قوم ءِ جھد کناں ءُ نودربراں لٹریچر دیاں بلے وھدے کہ ادا چہ پارک باں ءُ وتی زمہ داریاں بے ھال بنت” گپ بوھگ ءَ ات ما گوشدارگ ءَ اتیں۔ ھمے سنگت ءَ کہ گپ ھلاس کت ءُ دگہ سنگتے ءَ گپ بندات کت ءُ گشت منی ھیال ءَ ھر مردم ءِ وتی سر ءَ انت۔ لھتیں مردم دم بارت ءُ لھتیں کار کنت درستیں نودربر چوش نیاں تو زاھر ءَ بچار وتی ڈگری یے کتگ شتگ وتی زمین ءَ سیاست کنگ ءَ انت۔

پَنجگُور ءَ نوکیں زون ءِ پچے کتگ انو پروگرامے کتگے۔ کسانیں نودربر چارمی سیمسٹر ءَ رس اتگ انت ءُ زاھوو تی درور ءَ دنت بزاں کہ تو کسانیں مردمے نہ بوتگے۔

دی بلوچستان پوسٹ: الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ازگر سکی

دی بلوچستان پوسٹ

اُف یار ھرکس دل زدگ
لاچار ھرکس دل زدگ

چونیں نہ وشیں ساھتے
بازار ھرکس دل زدگ

باگیں پروم ءَ سرجم ءَ
تیمار ھرکس دل زدگ

زیبا ءُ شرنگ ھچ نیست
لیگار ھرکس دل زدگ

کسے وتی سُد ءَ نہ اِنت
بے سار ھرکس دل زدگ

روچ ءُ بلوکیں ماھکان
استار ھرکس دل زدگ

پنجگور کرنیگ اِنت پدا
آزار ھرکس دل زدگ

لیگار ءُ چِِلّیں سر گنوگ
ڈولدار ھرکس دل زدگ

موتکے بہ نالاں گِندُکی
دیدار ھرکس دل زدگ

ماتیں بلوچستان تئی
کوکار ھرکس دل زدگ

مھشر کُتہ امبروز گُش ئے
کردار ھرکس دل زدگ

ما وت وتی جند ءَ نزانت
پجّار ھرکس دل زدگ

ازگر کُجیں تئی شپ دوار
بامسار ھرکس دل زدگ

شال ءَ گیس ءِ لیک بوگ ءِ سبب ءَ زالبولے گوں دو زھگاں بیران بیتگ ءُ تربت بیری ءَ دگ ءِ وئیل ءَ مستونگ ءِ جھمنندے بیران بیتگ-

بلوچستان ءِ بُنجاھی شھر شال ءَ گیس لیک بوگ ءِ سبب ءَ زالبول دو چکاں ھوار بیران بیتگ –

شال ءَ بالی پٹ ءِ دگ ءِ سر ءَ لوگے ءَ گیس لیک بوتگ ءَ چریشی ءَ تراکے بوتگ چریشی ءِ آسر ءَ یک زالبول ءُ دو چک بیران بیتگ اَنت-

تراک ءِ آسر ءَ دو مردم ٹپی ھم بیتگ اَنت کہ آ نادُراھجاہ ءَ برگ بیتگ اَنت-

تراک ءِ سبب ءَ لوگ ءَ آس کپتگ ءُ چریشی ءَ پد آس کشوکیں گاڑی ءَ آس کُشتگ-

ھمے وڑ ءَ کیچ ءِ دمگ دشت بیری چات ءِ نزیک ءَ ھائی وے ءِ سر ءَ مزدا ٹرک یک پروبکس گاڑی ءِ ٹکر جتگ-

چریشی ءَ پروبکس ءَ سواریں عبدالحکیم ء سمیع اللہ جھمنند مستونگ بیران بیتگ –

لاش چست کنگ بیتگ ءُ تربت ھسپتال ءَ برگ بیتگ ءُ اژدری پٹ ءُ پول ءَ پد لاش کھول ءِ ھوالگ ءَ دیگ بیتگ ءُ ٹرک ءِ ڈرائیور تتکگ –

‏‎شھاب جان گوں بلوچ جھد ءَ بندوک ات

نبشتہ کار: شازبان بلوچ

دی بلوچستان پوسٹ

“‏ءُ زندگی چی اِنت ترا برے بے وپائی” “کن ئے، برے چو دلبر ءَ دل ءَ دار ئے!”

‏‎ زندگی چے بُلوٹاں چہ ترا ہما مردماں، ہما دوست ءُ دلبریں براتاں وتی ہما مھروانیں سنگتاں یا ہما گلزمین ءِ بچ ءَ کہ ھر وھد ءَ پہ زمین ءَ مھر اِش ھست اَت ہما میتگ ءِ گُلیں کاڈاں وتی، بلے نوں کس نئیت پہ من ءَ نوں کس نہ گریویت اُوں پہ ترا !! ‏‎شھابو شما بلوچ راج ءِ باندات ءِ چراگ اِت ئے شمارا باز کار کنگی اَت پہ بلوچ راج ءَ شما روچ ءُ شپ جھد کنگ ءَ اِت ئے پہ وتی ایردستیں راج ءِ واستا شھابو تو چیا چو اشتاپ کت گوں سنگتاں انگت داں ناصو ءُ سلُو ءِ درد ءُ گم ھست اِت انت بلے تئی مرگ ءِ ھال ءِ اشکُنگ ءَ گوں من اوں مرگ ءِ امبازاں کپتاں من ءَ وَ باور انگت نہ بیت ءُ ناکہ من اے گپ ءَ باور کناں کہ تو پہ من نوں نیایے منی ءُ تئی دیوان گپ ءُ تران کوچرائی مزاک کندگ نہ بیت بلے من ودار ءَ آں کہ تو پاد کایے ءُ گوں من پد ءَ دیوان ءُ مزاک ءُ کوچرائی کن ئے بس یکبرے پد ءَ چماں پچ کن ءُ بیا پہ من یار شھابو مردم مردم ءَ اینچو ہم ابیتک ءُ تھنا نہ کنت ءُ یل نہ دنت بلے باور انگت نہ بیگ ءَ اِنت کہ شما پہ مدامی گُلزمین ءِ امبازاں واب ءِ ءُ مسکیں ھاک ءِ بوہ ءَ گوں ھوار ات! ‏‎یاتیں ترا انوں کہ تو شال ءَ اتکگ ات ئے گڑا تو ھال کت کہ اڑے شوم کجائے من اتکگ آں شال ءَ ترا گنداں دیریں نہ دیستگ کمو دیوانے کناں گڑا من پسو دات کہ من بس ءَ سفر ءَ آں بلے جلدی ترا گنداں گڑا تو کند ات ءُ گُشت کہ تو مرچاں کجاہ مارا دیوان دے ئے سنگت گْوشاں کہ تو مرچاں سک وانگ ءَ ئے وھد نیست تئی کرا کہ تو سنگتاں بگندے !! گڑا من گُشت نا اڑے تئی وڑیں ھستیانی کدر ءَ من زاناں بس جلدی ترا گنداں پلُووو!! وھدے کہ من شال ءَ سر بیتاں گڑا من ترا ھال کت کہ کجائے بیا من اتکگاں گڑا تو اتکے ءُ گشت کہ مرچی من تو تاں سھب نندیں ڈڈیں دیوانے کنیں!! ‏‎گپ گپ ءِ تہ ءَ تو گُشت کہ راج پہ تن ءُ شد ھلاس نہ بنت راج پہ ڈُکال ءُ کھت ءَ ھلاس نہ بنت راج پہ مرگ ھلاس نہ بنت راج پہ بندیگ کنگ ءَ ھلاس نہ بنت راج ھما وھد ءَ ھلاس بنت کہ آھاں وتی راجی پرز ءُ وتی راجی آجوئی ءِ اھساس مہ بیت گڑا ھما وھد ءَ راج تباہ بنت!! ‏‎گوستانک گواہ اِنت کہ ھما راج نمیران اَنت کہ آہانی تہ ءَ یک زندگیں مردمے بہ بیت!! ‏‎ھو اشتاد پل تو راست گوش ئے اگاں گپ بلوچستان ءِ بیت اگاں گپ آجوئی ءِ بوگ ءَ اِنت اگاں گپ زوراک ءِ زلم ءِ سرا بیت گڑا مارا گوں زوراک ءَ ھچ گلگ نیست اِنت پرچا کہ بلوچ ءِ گوں زوراک ءَ یک آجوئی ءِ جنگے بوگ ءَ اِنت اے جنگ ءِ توک ءَ گڑا ترا کربانی دیگ لوٹ اِیت ءُ اے جنگ ءِ توکا تئی مات ءُ گوھار پیر ءُ کماش یا ورنائیں بچ کُشگ بنت لٹ ءُ کٹ کنگ بنت یا زنداناں بندیگ بنت!! ‏‎وھدے کہ من جیڑاں گڑا سما کناں کہ اے منی گلزمین ءِ مھر اَنت کہ گوھار شاری ءُ سمُو فدائی کن انت اے زمین ءِ مھر اَنت کہ نور بی بی ءِ یکیں گونڈلیں بچ سلُو کربان بیت ءُ دگہ چنچو بچ ءُ کماش کربان بوت ءَ ءُ بوگ ءَ اِنت دگہ چنچو سنگت گوں زمین ءِ وشبوئیں ھاکاں لیب کنگ ءَ تپُنگ ءُ تیراں گُژن ءُ تُن اَنت دراجیں پند اَنت مرگ اَنت کہ زندگی ءِ ھمُک مانترّ ءَ نشتگ ءُ پہ ما وداریگ اِنت بس جیڑاں وتی ءُ زمین ءِ اِشک ءَ ماراں ءُ سما کناں کہ مئے زند بے مکسد نہ انِت!! ‏‎شھابو تو گشت کہ یار مرچی پاکستان اے گپ ءَ نہ منیت کہ بلوچ یک زندگیں راجے بلے اے پاکستان ءِ ناسرپدی اِنت پرچا کہ زوراک ءَ بلوچ راج ءِ گوستانک زانگ لوٹ ایت بلوچ راج ءِ پیر ءُ کماش ورنا ءَ بگر تاً مات ءُ گوھار ءَ کربانی داتگ ءُ دیگ ءَ اَنت ھم ءُ بلوچے اے جنز ءَ دنیا ءِ تہ ءَ یک نامے پیدا کتگ اے جنز وت سرا نہ بیتگ بلوچ راج ءِ پیر کماش ءُ ورنا ءَ یا بلوچ راج ءِ مات ءُ گوھاراں ھر وھد ءَ اے زلم ءِ ھلاپ ءَ آواز چست کتگ اے ھما جنز انت کہ یوسف عزیز مگسی کتگ بابو نوروز ءَ کتگ بلوچستان ءِ ھما شھیداں کہ وتی جان ندر کتگ ءُ پیر ءُ کماشیں بزرگ نواب اکبر بگٹی گڈی وھد ءَ مارایت کہ اے راج ءِ بنکی لوٹ ھما روچ ءَ دیگ بنت کہ وت وتی پادانی سرا بوشت ایت ءُ گوں زوراک ءَ دیم پہ دیم بہ بیت !! ‏‎شھابو تو گشت کہ مئے راج وا گُش ایت مئے رہشون اختر ءُ مولا ھدایت آں ھمے مئے حق ءَ چہ پاکستان ءَ گراں دینت! نا ڑے اشتاد پل یک گپے ءَ بلوچ کلیر بہ بنت کہ پاکستان ھما پارٹی کہ ہست آں قوم پرستی ءِ نام ءَ زانگ بنت اے مردم پاکستان ءِ پارلیمنٹ ءَ نند اَنت ءُ اے تئی مردم ءَ شھید کناں ءُ تئی مردمانی دلاری ءَ کناں ءُ پاکستان ءِ سلامتی ءِ گپ ءَ کناں پاکستان ءِ پارلیمنٹ ءِ سلامتی گپ ءَ کناں گڈا بلوچ بزانت کہ اے بلوچ ءِ مستریں دژمن اَنت!! بلوچ ءَ اے گپ الم جیڑگ لوٹ ایت کہ ھمے اختر مینگل مولا ھدایت یا مالک قوم پرستی ءِ داوا گر اَنت ءُ پہ وتی یک سیٹے ءِ ھاتر ءَ سرجمیں شھراں بند کن اَنت ءُ زھرشانی کن اَنت ءُ ریاستی ادارہ بند کن اَنت بلے پہ وتی لجَ ءُ ننَگ یا وھدے گار ءُ بیگواہیں بلوچے ءِ لاش دست کپ ایت گڑا اشانی گوشاں مورے ھم نہ وارت انچو سما بیت کہ چہ بلوچ ءَ چے اشان ءَ وتی سیٹ دوست تر اَنت کجا انت ھمے اختر مینگل ءُ ملا کہ سرجمیں بلوچستان سرا زرتگے کہ من پارلیمنٹ ءِ سیٹ ءَ نہ لوٹ آں من گوں بلوچ قوم ءَ گون ءَ منی بیگواہ مردم ءَ یل کنے ءُ منی ھک ءَ بدے ئے ءُ لھتیں روچ ساری کہ پیر کماش مات ءُ گہار اسلام آباد ءَ لٹ ءُ کٹ کنگ بوتاں گوھارانی گشان دور دیگ بیتگ آں ءُ راج بے وس اَت بلے مرچی ھمے اختر ءُ ملا وتی سیٹ ءَ زور انت ءُ پارلیمنٹ ءَ ننداں ءُ تماشا چار اَنت! ‏‎شھاب جان گوں بلوچ جہد ءَ بندوک ایت مدام بلوچ جھد ءِ سرا گپ ءُ تران ءِ کت گوشت من لوٹ ءَ کہ پہ بلوچ جھد ءَ چیزے بکن آں !

‏‎اڑے استاد یار تئی دراہیں گپ ءُ کندگ یات اَنت تئی کجام گپاں نبشتہ بکناں پلی!!‏‎ بلے شھابو من بس ھمے گشاں تئ پش کپتگیں کار ءَ تئی ءُ ایدگہ سنگتانی سوچ ءُ پگر ءَ گوں مھکمی ءَ دیم ءَ برگ بنت!! ‏‎او زندگی چے بُگش آں ترا!‏‎ نّوں من شمشتگ ترا ءُ سِستگ آں چہ وتا بِل نوں من ءَ بُرو چہ اِدِا، اے ساہ ءِ گرانیں گرنچ نہ زورگ بیت نہ بوجگ بیت !! ‏‎او زندگی! بِل ءُ بُرو یلہ دئے منا بگندئے نوکیں جھانے رودیت پہ من ءَ!-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ موسیٰ خیل ءَ شوروانی ترکگ ءَ چہ دو مردم ایران بوتگ اَنت-

گیشیں ھالانی رِد ءَ موسیٰ خیل یک شرکتے ءِ او جی ڈی ایل ءَ شوروانی ترکگ ءَ چہ دو مردم بیران بوتگ اَنت-

آیانی تہ ءَ یکے ءِ سیادی موسیٰ خیل ءَ دومی شرکت ءِ کاردارے-

وئیل ءَ پد پوج ءَ دمگ انگر ءَ کتگ گیشیں پٹ پول بندات کتگ-

نبشتانک: زبان ءِ ھیلداری (Language Habit ) ءُ زورگیری ءِ کرد

نبشتہ کار : شیرجان مرزا

دی بلوچستان پوسٹ

انسان چہ ابرم ءَ گیگان گران ءُ دربران کنت ءُ ھبر ءِ در برگ ءِ بودشت انسان ءِ اندری زبانی بودے(innate language capacity)۔ بلے آ ہما چاگرد ءِ تہ ءَ بیت، ہما وڑیں لبز زور ایت ءُ گپ کنگ بندات کنت ءُ ہما لبزاں، ھیال ءُ زبان ءَ وتی ھیل ءُ آدت جوڑ کنت ءُ مدامی ہما وڑ جیڑ ایت، گپ کنت ءُ کردگار کنت۔ انسان ہما وڑیں زبانے ھیل کنت ءُ زوریت ہما وڑ جیڑ ایت ءُ سُر ایت۔ پرچہ کہ زبان ءِ ہمک لبز ءِ پشت ءَ یک تبے، یک کسہے، یک گوستانکے ھست۔ لبز انسان ءِ زہن ءِ رودوم دیگ ءُ برزتر ءُ کستر کنگ ءِ بدل ءَ کارمز کنگ ءِ مستریں وسیلہ انت۔ ہمے رنگ ءَ لبز چو توپگ ءِ تیر ءِ وڑ ءَ کارمرز کنگ بنت پہ انسان ءِ تب ءُ سوچ، گوستانک ءُ پجار ءِ گار کنگ ءُ دگہ یک سوچے یک نظریھے اے آئی ءِ تہ ءَ جاگاہ دئیگ ءَ۔ جست ایش انت کہ اے کار چوں بوت کنت؟ اے کار ہما وھد ءَ بوت کنت وھدے کہ تو انسان ءِ آ ھیال ءَ یا نظریہ ءَ لبزانی یا زبان ءِ تہ ءَ کار ایت ءُ آ لبز ءُ زبان انسان ءِ ھیل ءُ آدت جوڑ کن انت، پد ءَ آ انسان وت ہما ھیل کتگیں زبان ءِ وڑ ءَ جیڑ ایت ءُ امل کنت۔ اے کار ءَ گیشتر زوراور ءُ زورگیر کناں ۔زورگیر وتی ھیال ءُ لیکہ ءَ ایردست ءِ ھیل ءُ آدت زبان ءِ وسیلہ ءَ جوڑ کنت ایں۔

انچو ‎سارتر گش ایت یک ھاسیں بہرے زبان ءِ ایش انت کہ زبان ءِ ھیلداری انت۔ زبان ءِ ھیلداری (Language habit) لبزاں گوں یک چیزے ءَ بندوک کنگ ءُ مانا دیگ ءُ لبزاں انچیں مانا دیگ کہ آ دود ءُ ربیدگے ءَ گوں ہمگرنچ بہ بنت ءُ مردماں گوں ہمے لبزاں گپ جنائینگ ءُ ھیلدار کنائنگ(Sartre 1964, 23)۔ اولی سر ءَ زوراور وتی زبان ءُ لبزانک ءِ وسیلہ ءَ ہر چیز شرتر لیکگ ءُ گلام ءَ ہمے وڑ ءَ ھیلدار کنت ءُ گپ کنگ ءُ جیڑگ پرمائیت۔اے چیزاں آئی ءِ ھیل ءُ آدت جوڑ کنان کنت۔ بندات ءَ اے چیز ایردست ءَ یک زبانے یا لبز سما بنت بلے اے چیز آئی ءِ ھیل ءُ آدت ءِ بہرے بنت۔ آ وت ءَ ھمے وڑ ءَ سرپد ءُ پھمگ بندات کنت۔نوکیں نسل ہم چیزاں زور ایت۔ آ نہ زانت کہ اے تھنا لبز نہ انت، ایشانی پشت ءَ باز چیز کالونسٹ ءِ بکشاتگین انت پہ یک راجے ءِ گار کنگ ءَ۔ اگاں نوآبادیت ءِ زبان ءِ گپ ءَ بکناں، گڑا مارا بازیں ھرابی ،پرک ءُ تپاوت ( discrimination) گندگ ءَ کیت کہ اے چیز زبان ءِ ھیل (language habits) وڑ وڑیں رنگ ءَ جوڑ کنگ بوتگ انت۔ انچو کہ انگریزی زبان ءَ ما بچاریں، زات پرستی سک پیش دارگ بیت۔ انگریزی زبان اسپیت ءَ ٹوئیں ارزشتے دنت ءُ سیاہ پوست ءَ ایر جنت۔ انچو کہ ما ھوش کتگ اسپیت برپ ءِ وڑ ءَ انت۔ دگہ ہم بازیں چہر ءُ شُبین ھست ۔اسپیت رنگ ءَ گوں زیبناکی، جلواناکی، ثواب، امن، کودکی، دومی نیمگ ءَ سیاہیں رنگ ءَ گوں موت، ھرابی، بدرنگی، رستری، دز ءُ ڈاکو ءِ مانا داتگ ءُ (language habits) جوڑ کتگ انت۔ انچو لبز اسپیت رنگ (white color ) امن ،ھاموشی، سادگی ،سَپائی ءِ مانا داتگ ءُ ہمے ھساب ءَ ھیل کنائینتگ۔ دومی نیمگ ءَ سیائیں رنگ (Black color ) وھشی ، جنگلی، بدرنگ، دُز، ڈاکو ءِ مانا ءَ گوں لچینتگ ءُ مردماں ھیل کنائینتگ کہ ہمے وڑ بزوراں ایشانی مانا ءَ۔ بلے ما بچاریں مستریں دز ءُ ڈاکو، رستری اسپیت پوست (European white) انت کہ آیاں ملک ءُ راج زبردستی گلام کتگ انت ءُ انگت ہم بازیں رنگے ءَ کنگ ءَ انت۔ راستیں گپ ایش انت انگریز وت تاکت ءَ بوتگ انت انگت ہم تاکتور انت گڑا آہاں وتی ہر چیز زبان ءِ وسیلہ ءَ شرتر پیش کتگ ءُ اپریکہ ءُ اے دگہ راج ءُ ملک جہل جنگ ءُ گلام کنگ ءِ ءُ وتی زوراور ءُ حاکمیت ءَ مھکم دارگ ءِ ھاتر ءَ اے وڑ ایر جتگ انت۔ اے وڑیں چیز وتی زبان ءِ تہ ءَ آروتگ ءُ اپریکہ ءُ اے دگہ ملک ءُ راج ءِ تہ ءَ وتی زبان زبردستی مان کتگ ءُ زبان ءِ وسیلہ ءَ ھیلدار کتگ انت، دانکہ آ ھمے وڑ بہ جیڑاں ءُ وتی راستیں پجار ءَ گار بکن انت۔ چوکہ زیبناکی ءُ براہداری، شر ءُ ھراب ، دگہ بازیں چیز اے درست دود ءُ ربیدگی انت۔ اِشانی بزانت ہرچ دود ءُ ربیدگ ءِ تہ ءَ مَٹ بنت۔انچوکہ افریکی نبشتہ کار Chinua achebe نبشتہ کنت کہ یک وھدے افریکہ ءَ سیاہ رنگ گیشتر زیبا گشگ بوتگ ۔ھاسیں مردم گشگ بوتگ انت بلے اسپیت پوست ءَ افریکہ ءِ اے ھیال ایر جتگ ءُ کشیتگ(Chinua achebe,61,1985). بلوچ ءِ تہ ءَ کسے بلوچ رنگ بوتگ گیشتر زیبناک گشگ بوتگ ءُ بیت ۔دگہ ہم بازیں راج ءِ تہ ءَ اے وڑیں ھیال بوتگ بلے مرچی ایاں وتی زبان ءُ پجار ہمے وڑ ءً شموشتگاں ۔انچو فرانس فینن گش ایت اے چیز روچ پہ روچ گار ءُ بیگواہ کنان بوتگ ءُ بوان انت۔(Fenon,52,1963)۔انگریزاں وتی رنگ ،وتی زبان،وتی دود ءُ ربیدگ ءُ وتی ہر چیز زبان ءِ کمک ءَ وانگجاہانی وانگیانی کمک ءَ، گدار ,کسمانک، کسہءُ تامرانی کمک ءَ دیما آورتگ ءُ مان کتگ انت۔ درورے ،اشاں تامرانی، گدارانی، کسمانکانی شریں کرد اسپیتیں کارستاں داتگ انت۔ شریں ءُ اخلاقی زبان اسپیت پوستیں کارست ءِ دپ ءَ داتگ، دومی نیمگ ءَ سیاہ رنگیں کارست گوں ھرابیں کرداں کارست سازی کتگ۔ ھرابیں ءُ بدیں لبز دپ ءَ داتگ۔

ہمے رنگ ءَ رسانکدر( Media ) ءِ ہم زبان ءِ ھیل کنائینگ زبان ءِ ھیلداری (Language habit) ءِ یک ٹوئیں کردے، رسانکدر مردمانی زہن ءَ بازیں چیز ءُ گپتمانک ءُ ھبر ءُھال جاگاہ دنت۔انچو کہ جیک ڈیریڈا گُش ایت ،انگریزا ءُ فرانسی اسپیت پوست ءِ رسانکدراں زبان ءِ وسیلہ ءَ سیاہ رنگیں مردم ایر جنگ پرماتگ انت۔ اسپت رنگ ءِ دود ءُ ربیدگ ءُ ہر چیز شریں رنگے ءَ پیش داشتگ انت۔ ہمے رنگ ءَ ایردست ءِ ہر چیز دود ءُ ربیدگ ، نندگ ءُ پاداہگ، رنگ ءُ دروشم ءُ دگہ چیز زبان ءِ وسیلہ ءَ ایر جنگ ءُ ھراب گشگ بوتگ انت( 2015,Zhai, Jing )۔ پدا اے دود ءُ ربیدگی چیز اشاں انچو پیش داشتگ انت کہ مردم ابرمی natural لیکیت ءُ آہانی زبان ءِ ھیلدای (language habits) جوڈ بوتگ انت۔مردم جیڑانت مئے رنگ سیائی ءِ سوب ءَ ھرابتر انت ۔ انچو کہ فرانز فینن وتی کتاب ‘Black skin ,white masks ءِ توک ءَ ہمے ہم نبشتہ کنت کہ چتو یک سیاہیں مردمے وتا اسپیت کنگ ءُ اسپیت ءِ کد ءَ آرگ لوٹیت۔ آ وتی ھرچیز ءَ ندر کنت ءُ شموشگ ءِ جہد کنت، وتی دود ءُ ربیدگ ءُ وتی رنگ ءَ یل کنگ ءِ جہد کنت کہ من انگریز یا فرانس ءِ اسپیت پوست ءِ وڑ بہ باں۔ اے یک زہنی گلامی یے، زورآور زبان ءِ کمک ءَ کاریت (Fenon, 50,1957)۔

ہمے ھساب ءَ بلوچستان ءِ تہ ءَ انگریزی ءُ اردو ءُ عربی زبان ءِ کمک ءَ انگریز ءُ پنجاپی ءِ بازیں چیز بلوچانی تہ ءَ آرتگ ءُ زبانی ایلداری (Language habit) جوڈ کتگ انت۔ انچو کہ باز بلوچاں انگریزی ،عربی ءُ اردو زبان وانینگ بوتگ ءُ ھیل ءُ آدت جوڑ کنائینگ بوتگ۔ پد ءَ بازیں بلوچ ءَ ہما وڑ جیڑگ ءُ عمل بندات کتگ ءُ وتی بلوچی زبان ءُ دودمان شموشگ بوان اِنت۔ درورے، باز بلوچ ءَ اردو ءُ عربی نامانی، دگہ لبزانی زورگ ءِ ھیلدار انت، ہمے رنگ ءَ اردو ءُ عربی زبان ءَ بلوچ ءِ زبان ءِ، بلوچانی نامانی پِر کنگ ءِ وڑ، دود ءُ ربیدگ ءِ، ستک ءِ، مردمانی سرءَ ٹوھیں سانے( اسرے) دور داتگ۔ انچیں اسرے کہ کتابانی کتاب اے سرھال ءِ سر ءَ نبشتہ کنگ بیت۔ اردو ءُ عربی زبان ءَ بلوچ دود ءُ ربیدگ، زبان ءِ، مردمانی، بلوچ ءِ پجارءِ بدل کنگ ءَ مزنیں کمکے بوتگ ءُ انگت داں کمکے۔

بلوچ ءَ عرب ءِ بازیں دود ءُ ربیدگ زرتگ ءُ وتی دود گار کتگ انت۔ ہمے ڈول ءَ عربی ءُ اردو زبان ءَ بلوچی نامانی وڑ (naming system) باز تاوان داتگ، ما چہ جنگیان چاکر, گوہرام ,ماہ گنج، مہر گنج ءُ دگہ بازیں بلوچی نامانی زورگ ءِ بدل ءَ ما عربی ءُ اردو نام زرتگ ، وتءَ ہمے وڑ ءَ عرب پہمتگ۔ بلوچ ءِ دُکانانی نام، وانگجاہانی نام ،دگہ بازیں رنگے ءَ بلوچ ءَ عربی ءُ اردو نام زرتگ ءُ زورگ ءَ انت۔ وھدے کہ راج ءِ نامانی پر کنگ ءِ وڈ ( naming system)، ستک، تب، گار کنگ بہ بیت گڑا آ راج ءِ مردم نہ زانت کہ آ کئے انت؟ چہ کجا اتکگ ءُ چونیں پجارے ءِ واھُند انت؟ گڑا آ راج ارزانی ءَ گار کنگ بیت۔

ہمے وڑ ءَ بلوچستان ءِ وانگجاہانی تہ ءَ زورگیر ءِ زبان ءُ لیکہ زبان ءِ ھیل ءُ آدت جوڑ کنگ بوہگ ءَ انت ۔مئے زری وانگجاہانی تہ ءَ نودربراں بلوچی یا براہوئی ءَ گپ کنگ نیل انت، کسے گپ کنت آئی ءَ زر یا سزا گِر انت۔ من ءَ ھوش انت کہ من ڈیلٹا ءَ وانگ ءَ اتاں کسان اتاں۔ مارا مئے راہ دربر ءَ گُشت کہ شما انگریزیءَ بہ جیڑ ات، انگریزی ءَ گپ کنگ ءِ آدت جوڑ بکن ئے، انگریزی ءَ کہ جیڑئے ءُ گپ کن ات گڑا شما انگریزی ءَ شریں وڑے ءَ گپ کُت کن اِت۔ نوں من پھم اتگ کہ اے عمل ءِ مانا چی اِنت…. اے عمل انگریز ءِ زبانی ھیلداری ءِ درورے، وتی توک ءَ بلوچی ءَ کَشگ ءُ انگریزی ءُ اردو ءِ مان کنگ ءِ نام انت، وتی جند ءَ انگریز ءُ اردو گپ کنوک ءِ وڑ کنگ ءِ جُہد کنگ۔ وتی بلوچ تب ءُ سوچ ءِ بدل کنگ ءِ نام اِنت۔ وتی پجار ءِ گار کنگ انت۔ پرچہ کہ زبان ایوک ءَ لبزانی نام نہ اِنت۔ زبان ءِ تہ ءَ راج ءِ تب ، جیڑاہ ءُ دود ءُ ربیدگ مان انت۔ زبان ءِ ارچ لبز ءِ پشت ءَ یک داستانے یک گوستانکے ھست۔ پمیشکہ اے دری زبان مئے ھیل ءُ آدت جوڑ کنگ بوہگ ءَ انت۔

زبان ءِ ھیلداری ءِ مانا ءُ بزانت، یک زبانے ، یک مانا اے ،ھیالے، دودمانے، ربیدگے یک راجے ءِ تہ ءَ کشگ ءُ دگہ نظریہ ءُ لیکہ یے، دگہ ھیالے ،دگہ مانا یے دئیگ ۔ بازیں راج زوراوری ءِ وھد ءَ ہمے وڑ آیانی تہ ءَ دگہ چیز آرتگ، مرچی ہمے وڑ ءَ بلوچانی گوما بوہگ ءَ انت ، بلوچ ءَ اے ھبر ءُ ہال ءُ جیڑا پھمیگی انت۔

‏دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: مردم نشہ ءِ آماچ انت

نبشتہ کار: سنگت زگرین بلوچ

دی بلوچستان پوسٹ

نِشہ دُنیا ءِ تہ ءَ یک بلاھیں سلّیں شئے ئِے۔ پاکستان ءِ تہ ءَ سک باز آم اِنت۔ بازیں بے اِلم ءُ نا وانندہ نشہ ءَ یک شریں شئے ءِ پھم اَنت۔ بلوچستان ءِ تہ ءَ نشہ ءِ سوب ءَ روچے 16 مردم تریاک ءُ ھیروین ءِ سوب ءَ نشہ ءِ آماچ بوگ ءَ اِنت نشہ ءِ سبب ءَ بازیں چُک چُورہ ءُ جن جنوزام اَنت، ھلک ءُ میتگ ویران اَنت ءُ کبرستان جوڑ بیتگ اَنت۔ بلوچستان ءِ بازیں دمگ چُشکہ کیچ، ھُزدار، شال ءُ دگہ بازیں جاھاں نشہ مزنیں کچے ءَ سر بوتگ۔ دومی نیمگ ءَ بلوچستان ءِ تہ ءَ یک ھم چُشیں مزنیں نادراھجاھے نیست کہ اود ءَ نشاہ ءِ آماچیں مردمانی اِلاج بہ بیت اِنت۔

چو ھم بہ جیڑ اِت نشہ وت نہ اَتکگ چہ شپُک ءَ دری ملک ءَ آرگ بُوَگ ءَ انت ھکومت ھم گوں شپکاں ھوار انت نشہ ءَ آرگ ءَ اِنت بلوچستان ءِ تہ ءَ سر کنگ ءَ انت۔ بلوچ ھچ مہ وان اِیت ءُ ھچ مہ زانت ھکومت پہ نشہ ءِ ھلاس کنگ ءَ ھچ جُھد نہ کنت آئی ءِ جیڑہ ءُ واھشت ھمیش اِنت کہ بلوچ ھچ مہ وان اِیت ءُ آ پہ وتی زند ءَ گلامی ءَ بہ گْوازین اِیت۔

نشہ مئے براتاں تباہ ءُ برباد کن انت ، نشہ یک انچیں سلّیں چیزے مئے بلوچ راج اِش انچوش زرتگ۔ ھمے مردم نشہ کنان اَنت آھاں وتی مات ءُ پِت ءِ ھبر نیست پرچا کہ دْرائیں روچ ءَ بِچار اِش کاگد چنگ ءَ اَنت۔ ما انچو بچاریں نشہ مئے بلوچ کوم ءَ را برباد کنت ۔ نوکیں پدریچ ءِ واست ءَ بربادی ءِ راہ تچک کنگ بُوگ ءَ اِنت ، نشہ آماچیں مردم ءَ مرگ بُوَگی اِنت گڑا روچ ء مرچی لاش اِش درنیاتکگ اَنت ، نشہ مردم ءَ بے آبرو کنت ءُ کش اِیت، نشہ سکیں ھرابیں کارے ، بلوچ کَوم وت ءَ را چرے بے ھیریں چیز ءَ انگت شر تر دور بہ دار اِیت، چرس تریاک شراب ءُ ایدگہ نشھاں پہ بلوچ ءِ تباہ ءُ کشگ ءُ برباد کنگ ءَ بھا کن اَنت نشہ ءِ سبب ءَ بلوچ وتی ملک ءِ تہ ءَ درامد بُوَگ ءَ اِنت ءُ پاکستان نشہ ءَ بلوچستان ءِ تہ ءَ ھمے واستا آرگ ءُ سر کنگ ءَ اِنت بلوچ راج مہ وان اِیت ءُ منی گلام بہ بیت۔

بلوچ راج ءِ تباہ کنگ ءِ واستا نشہ ءَ بلوچستان ءِ تہ ءَ آرگ ءَ اِنت ، بلوچ نشہ بہ کنت وتی زند ءَ پہ لاچاری بہ گوازین اِیت بلوچ وتی زُبان ءَ گار بہ کنت۔ نشہ نوزدہ سد ءَ بلوچستان ءِ تہ ءَ نہ بوتگ نی بلوچستان تہ ءَ نشہ ءَ آرگ ءُ سر کنگ ءَ اِنت۔ اے دور ءِ تہ ءَ کسان کسانیں چک نشہ کنگ ءَ اَنت۔ پاکستان نشہ ءِ بند کنگ ءِ ھچ کوشش نہ کنت پاکستان وت نشہ ءَ آرگ ءَ اِنت۔

من چہ وتی کلیں راج ءِ نوجواناں گوں دزبندی کناں وت ءُ وتی دوست ءُ ھمبلاں نشہ کنگ ءَ بہ رکّین اِت نشہ مئے بلوچ راج ءَ تباہ کنت مئے ماتی زُبان ءَ گار ءُ بیگواہ کنت۔ مارا مئے جند ءِ سر ڈگار ءِ تہ ءَ درامد کنت۔

سلامت بات اِت۔
مُدام ھست بات اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔