TBP Balochi

بلوچ یکجھتی کمیٹی ءِ جارکش ءَ گُشتگ کہ گل ءِ سروک ڈاکٹر ماہ رنگ ، بنجاھی راھشون شاھجی سبغت اللہ ، بیبگر بلوچ ، بیبو بلوچ ءُ گلزادی بلوچ زندان ءَ شُد ءِ ھڑتال ءَ چار روچ سرجم بوتگ ۔ اے شُد ءِ ھڑتال ءِ آسر ءَ آیانی جان سلامتی تیزی ءَ گوں ھراب بوگ ءَ اِنت۔

آئی ءَ گْوشتگ کہ بیبو بلوچ ءَ چہ ھدا جیل شال ءَ پشین زندان ءَ دیم دیگ ءُ ڈاکٹر مھرنگ، بیبو ءُ گلزادی بلوچ ءِ سر ءَ سی ٹی ڈی ءِ نیمگ ءَ کنگ بوتگیں زوراکی ءِ ھلاپ ءَ ڈاکٹر مھرنگ، بیبو بلوچ، گلزادی بلوچ، شاھجی ءُ بیبگر بلوچ شُد کُش ءِ ھڑتال ءَ نشتگ اَنت۔

جارکش ءَ گوشت کہ مرچی ھما وڑ ءَ کہ پاکستان ءِ ریاست مئے سروکانی گوم ءَ زندان ءَ زلم ءُ زوراکی ءِ بدتریں مثال پیش کنگ ءَ اِنت، ما یک راجے ءِ بستار ءَ اے زلم ءُ زوراکی ءِ کسہ ءَ وتی یات ءَ چاپ کنگ ءَ ایں ۔

ما ناں اے زلم ءَ یلہ کن ایں ءُ ناں پاکستان ءِ ریاست ءَ ماپ کن ایں ۔ مرچی ریاست چو مستیں اسپ ءِ وڑ ءَ بلوچ زالبول زندانانی تہ ءَ لگتمال کنگ ءَ انت ءُ تنگ کنگ ءَ انت بلے اے تاگت دائم نہ مان اِیت۔

اے وڑیں پاشسٹ ءُ زوراکیں ریاستانی درور دنیا ءِ راجدپتر ءَ گندگ بنت۔ ما مرچی اے ریاست ءَ اے گپ ءَ پدّر کن ایں کہ بلوچ راج گوں وتی یکجاھی تاگت ءُ راجی تاگت ءَ زندان ءَ بلوچ راجی رھشونانی گوں بد سلوکی ءُ زلم ءِ بدل ءَ بلوچ راج زور اِیت۔ بلوچ راج اے زُلم ءُ زوراکی ءَ ھچ وڑیں جاوراں اوپار نہ کنت۔

آئی ءَ گْوشت کہ ما چہ بلوچ راج ءِ ھمک سیاسی ءُ چاگردی گل ءُ گلاں دزبندی کن ایں کہ اے زلم ءُ زوراکی ءِ ھلاپ ءَ عملی رنگ ءَ بلوچ یکجھتی کمیٹی ءِ ھمراھی ءَ ھمگام بہ کن اَنت۔

سرھال: منی سنگت ءُ بلوچ ءِ زندمان

نبشتہ کار: شاھان بلوچ

دی بلوچستان پوسٹ

دسمبر ءِ ماہ اَت ، شال ءِ زمستانیں شپے اَت ، وھد یک ءُ نیم اَت ءُ من ءُ منی سنگت وتی تھنائیں کوٹی ءَ نشتگ اَت ایں۔ مئے کوٹی ءَ اُستاد میر ءِ سوت پِر اَت۔ منی سنگت ءَ را موبائل دیم ءَ اَت ءُ من ءَ “The wretched of the earth “ ءِ کتاب دیم ءَ ات ءُ من وانگ ءَ اَت آں۔ منی کش ءَ سْیاھیں چاھے ھم ایر اَت۔ ھمے کتاب ءِ وانگ ءِ ھَمراھی ءَ من ساھتے ءَ جیڑ اِت کہ بلوچ پرچا جنگ ءَ اَنت؟ بلوچ دَگانی سر ءَ پرچا ویل اَنت؟ پرچا بلوچ ءِ رھشون جَنگ ءُ کُشگ بنت ءُ تھاریں کوٹیانی مَیار کنگ بنت؟ بلوچ ءِ زندمان پرچا اے پَیم ءَ اِنت؟ ھمے ساھت جیڑگ ءِ ھمراھی ءَ من کتاب بند کُت، چاہ ءِ گُٹّے وارت ءُ پد ءَ من جیڑگ ءَ لگِت آں۔ جیڑگ جیڑگ ءَ گوں من واب کپت آں۔

(واب)

من واب گِنداں کہ یک پیریں زالے ءُ بلاھیں پٹّے، نا ھلکے نا بازارے ھچ کہ ھچ گواھی نہ دنت۔ ھمے پیریں زال وتی لٹّ ءَ گُت دیان اِنت ءُ زمین ءِ سْیاھیں ڈوکاں لگت دیان ءُ کوکار کنان اِنت کہ” اوو ساوڑ! تو کُجا ئے، بیا مارا بے تو وش نہ بیت ، مئے ھلک ءَ ابیتکی ءَ مان شانتگ۔ “اود ءَ داں دیر ءَ ھمے زال پِریات ءَ اَت۔ من ھیران اَت آں کہ اے پیر زال اِد ءَ چے کنگ ءَ اِنت؟ من وتی دِل ءَ را سِنگے پِر دات ءُ پیر زال ءِ کِرّ ءَ شُت آں ۔ منی گِندگ ءَ گوں پیریں زال ءَ گریوگ بندات کُت ءُ گُشت ئِے ”منی چُک ساوڑ تو کُجا بوتگ ئے؟ من ترا کُجا کُجا شوھاز اِتگ؟ تئی جُست من ھرچ ھلک ءُ میتگ کُتگ، گول اِتگ اَنت، من ھچ مُلّا ءُ میّا یلہ نہ داتگ۔ “

من اَجب ھیران اَت آں ءُ من ھمے پیریں زال ءَ را جُست کُت، ”اماں کُجام ساوڑ، چونیں ھلک ءُ میتَگ ءُ کُجام مُلاّ؟“ منی گَپّانی اِشکنگ ءَ پد پیریں زال ءَ زانت کہ اے ساوڑ نہ اِنت۔ زال ءَ پد ءَ وتی چَک تَرّینت ءُ گام جنگ ءَ لَگ اِت۔ من توار کُت اماں ”منی جُستانی پَسو؟ “زال ءَ من ءَ گُشت” منی چُک منی پَسّواں تو چے کن ئے، من زاناں کہ تو پہ من ھچ کُت نکن ئے“۔ پد ءَ ھمے زال ءَ گُشت کہ ”ساوڑ ءَ ھَشت سال بیت کہ بیگواہ اِنت، نہ ھالے نہ اھوالے، من پہ ھمائی ءِ شوھاز ءَ در اتکگ آں“۔ زال پد ءَ رھادگ بوت ءُ من ھما جاہ ءَ چو بُت ءَ اوشتاتَگ اَت آں داں پیریں زال چہ من اندیم بوت۔

اناگت ءَ منی سنگت ءَ من ءَ واب ءَ چہ پاد کُت ءُ گُشت ئِے”مردُمے دروازگ ءَ ٹُکّگ ءَ اِنت۔ اے شپ ءِ 4 بج اَت۔ من پاد اتک آں ءُ دروازگ پچ کُت، دروازگ ءِ پچ کنگ ءِ ھمراھی ءَ من دیست کہ لھتیں بے زانگیں مُردم اَنت، ایشانی دست ءَ وڑ وڑیں تُپنگ اَنت ءُ یک دِگہ مَردکے ھم گون اَت کہ آئی ءَ بلوچی پُچ گور ءَ اَت۔ ھمیشاں چہ یکے ءَ من ءَ جُست کُت ، ”یہ مادر چود دودا کون ہے؟ (دودا منی سنگت ءِ نام اَت) ۔ من گُڑا اے چیز ءَ سدّک بوت آں کہ بے زانگیں ناں بگندے زانگیں زورگیر ءِ مُردم انت ءُ اے ھم زانت اے پرچا اِ ءَ اتکگ انت۔ من پسّو دات ”سر جی یہاں دودا نام کا کوئی شخص نہیں ہے.“ منی ھمے گَپ ءَ گوں دودا اتک دروازگ ءِ دپ ءَ من ءَ گُشت ئِے ”ھاں جان چے بوتگ؟“ دودا ءِ آیگ ءَ پد ھمے بلوچی پوشاکیں مردک ءَ گُشت، ”یہی ہے کُس مادر دودا، کمرے میں چُپا ہوا تھا ۔ “ھمے ساھت ءَ دودا ایشاں کوٹی ءَ چہ کش اِت ءُ من ءَ یک ترندیں شھماتے جت ئِے ءُ گوں وتی ترندیں توار ءَ گُشت ئِے ، ”آئندہ کے لیے خیال رکھنا وگرنا تمارا بھی یہی حال بوگا“۔ دودا اے ناشراں بُرت ءُ بیگواہ کُت ءُ تھاریں کوٹی یے میار کُت۔

پد ءَ من ءَ ھما واب ءَ دیستگیں پیریں زال ءِ گپ یات اتک انت واکی من ھچ کُت نہ کُت۔ پہ دودا ءَ بس امینچو پشت کپت۔

#ReleaseDodaBaloch

نو دودا ءِ اکس وٹسپ ءُ انسٹاگرام ءَ مردُمانی اِسٹوری اَت اَنت۔ ٹویٹرا دودا ءِ نام ءِ ایشٹیگ جوڑ بوتگ اَت ءُ دودا بس اَکسے ءِ پیم ءَ کوم ءِ دیم ءَ ترَّگ ءَ اَت۔ من ءَ اولی رند ءَ سما بوت کہ پہ بلوچاں اے ایشٹیگ ءُ ٹویٹر نوکیں چیز نہ انت۔ اِد ءَ ھر کس ءَ ایشٹیگ جوڑ بوگی اِنت، ءُ! بس ایشٹیگے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بیست پنچ اپریل دوھزار بیست پنچ ءِ شپ سے ءِ نزیک ءَ بلوچستان ءِ دمگ تمپ بوستان ءَ پاکستانی لشکر ءَ بیڑبرتگ دو کسان سالی ئیں بچک آوار جتگ ءُ بیگواہ کتگ اَنت-

بیگواہ کنگ بیتگیں کسان سالی ئیں بچکانی پجّار شمیم ء غفار اُمر دہ سال ءُ عارف ء رسول بخش اُمر پانزدہ سال نام ءَ چہ بیتگ اَنت-

دمگی اِھوالکار رِد ءَ پاکستانی پوج ءِ کھول بیڑ وھد ءَ لَٹ ءُ کُٹانی نشانگ کتگ اَنت ءُ تُرندیں بیھار داتگ ءُ چک وتی ھمراھی ءَ برتگ اَنت گوں –

کھول گوشگ اِنت کہ آیاں بے توار بیگ ءُ کسے گوم ءَ ھال نہ کنگ گوشگ بیتگ ، اگاں ناں تاوان دیگ بیھار داتگ اَنت-

کھول ءَ لوٹ کتگ کہ بیگواھیں چکاں زوت یل بہ کن اِت-

زانگ بہ بیت کہ بلوچستان ءَ اے وڑیں وئیل یک نوکیں گپے نہ اِنت- اشی ءَ ساری ھم بازیں چک ءُ کماشے پاکستانی پوج دست ءَ بیگواہ کنگ بیتگ اَنت آ زورانسری آوار جنی ءِ ھلاپ بلوچ یک دھکے ءَ چہ گیش زھرشانی ءَ اَنت-

بلوچ چاگردی ءُ سیاسی پارٹی اے زورانسری آوار جنی ءِ ھلاپ ءَ ناں تھنا بلوچستان ءَ بلکیں اسلام آباد ءُ دگہ شھراں ھم یکشل ءَ زھرشانی کنگ ءَ اَنت-

بلوچستان ءِ جتا جتائیں جاھاں پاکستانی پوج ءُ پولیس ءَ سر ءَ دگ ب ناشناسیں سلاہ بندیں مردماں اُرش کتگ ءُ دگ بستگ انت-

اُرش بولان، کلات ءُ زامران ءَ بیتگ انت کہ اود ءَ سلاہ بندیں مردماں پوج ءِ چیک پوسٹ ءُ کارگس نشانگ کتگ انت-

پولیس ءِ رد ءَ بولان ءِ دمگ ڈھاڈر ءَ ناشناسیں مردماں یک شمبے ءُ شمبے ءِ میانی شپ ءَ پولیس ءِ کارگس ءِ تہ ءَ ھینڈ گرنیڈے چگل داتگ-

پولیس ءِ رد ءَ اُرش ءَ دگہ جانی تاوان نہ بیتگ انت بلے پولیس ءِ اوشتوکیں آپ بروکیں گاڑی ءَ تاوان رس اتگ-

ھمے وڑ کلات ءَ سلاہ بندیں مردماں دگ بستگ ءُ سیندک پروجیکٹ ءِ بروکیں گاڑیانی سر ءَ اُرش کتگ-

کلات خزنئی، منچگر ءَ بازیں کچے ءَ شھدگ بستگ ءُ گاڑیانی پٹ ءُ پول کتگ انت-

دمگی مردمانی رد ءَ اُرشکاراں سیندک منسوبہ ءِ بروکیں گاڑی راکٹ لانچر ءُ دگہ مزنیں سلاھانی گون ءَ نشانگ کتگ انت-

ھمے وڑ ءَ کیچ ءِ دمگ زامران جمکی تنک ءَ سلاہ بندیں مردماں پاکستانی پوج ءِ یک پوسٹے نشانگ کتگ-

ھمے وھد ءَ مھلوک ءَ تراک ءُ تیرگواریانی توار اشکتگ انت-

زانگ بہ بیت زامران واکائی ءَ گوستگیں روچاں پاکستانی پوج ءِ کاروان ءِ یک ٹرکے ریموٹ کنٹرول بمب ءِ نشانگ کنگ بیتگ ات-

اُرش ءِ آسر ءَ پوج ءِ چار کارندہ مرتگ ات انت ءُ کم چہ کم چار زدگ بوتگ ات انت کہ اے اُرش ءِ زمہ واری بلوچ لبریشن آرمی ءَ زرتگ ات-

مروچی بیتگیں اُرشانی زمہ واری انگت ءَ کس ءَ پہ وت ءَ نہ زرتگ انت-

بلوچستان ءَ چیزے روچانی میان ءَ پد ماں پد ءَ پوج نشانگ کنگ بوگ ءَ انت –

ھدہ جیل ءَ شُد ھڑتال

ٹی بی پی شونگال

مشکاف بولان ءَ بلوچ لبریشن آرمی ءِ نیمگ ءَ پاکستانی ریل ءِ جعفر ایکسپریس ءِ گِرگ ءُ پوجیانی سر ءَ ھترناکیں اُرشانی دارگ ءِ بے سوبی ءَ پد بلوچستان ءَ مان گش اتگیں سرکار ءِ وزیراں بلوچ یکجھتی کمیٹی ءِ رھشونانی سر ءَ بھتام جنان ءَ گوشتگ کہ آ بلوچ آجوئی لوٹوکانی سیاسی سرشون انت ءُ آ دزگیر کتگ ءُ بلوچستان ءَ امن برجم کن ایں- بلے بلوچستان ءِ راستیں راستیاں نابلدیں ریاستی واکدارانی ھما ردیں پالیسیانی سبب ءَ بلوچستان ءِ جاورانی شرتر بوگ ءَ ابید روچ پہ روچ گیش ھراب بوگ ءَ انت-

بلوچ یکجھتی کمیٹی ءِ رھشوناں 3MPO ءِ تَک ءَ دزگیر کنگ ءَ یک ماھے ءَ گیش گوستگ ءُ جیل ءَ مھکمہ انسداد ناشرکاری ءِ ءُ ریاستی ادارھانی ناروائیں رویش، ابید ءِ آمیدگس ءَ گامگیج ءُ بیبو بلوچ ءِ سر ءَ لٹ شاپی کنگ ءُ ابید ءِ کانونداری ءَ پشین جیل ءَ برگ ءِ ھلاپ ءُ بلوچ یکجھتی کمیٹی ءِ رھشون ھدہ جیل ءَ شدھڑتال کنگ ءَ انت-

پاکستان ءِ واکداریں ھَلکانی نزیک ءَ سرپد بیوکیں بلوچستان ءِ انیگیں اڑوکی سروزیر ءِ گامگیج ءَ بلوچستان ءِ جاور ھرابی ءِ سبب بوگ ءَ انت ءُ اڑوکی سرکار ءِ نمائندگ گھگیری سیاست ءَ بندوکیں رھشونانی ھلاپ ءَ راستی ءِ درشان ءِ لپاشگ ءَ دزبند اِنت- بلے ریاستی بندشاِ ابید ھزارانی کچ ءَ بلوچ راج وتی سیاسی رھشونانی یل دیگ ءِ ھاتر ءَ زھرشانی کنگ رژنائیں روچ ءِ ڈول ءَ پدر کنگ اِنت کہ بلوچ مھلوک ریاستی درشاندابی ءِ ھچ رنگ ءَ منوک نہ انت-

بلوچ یکجھتی کمیٹی ءِ مھلوک ءِ سیاستی زرمبشت ءِ دزگیر کنگ، زھرشانی کنوکانی کوش، لٹ شاپ ءُ جیلاں ناروائیں رویش ءِ ھلاس کنگ ءَ بے سوب بوتگ ءُ ریاستی جبر ءِ ھلاپ ءَ شد ھڑتال ءِ زور ءَ جیل ءَ ھم آیاں وتی گھگیری برجاہ داشتگ – بلوچستان ءَ سیاسی زرمبشتانی راجدپتری گوستانک ھست انت کہ آ ریاستی جبر ءَ گوں ھلاس نہ بیتگ انت- سیاسی گھگیری زُلم ءُ جبر ءَ وھدی دروشم ءَ نیزور بیت کن انت، بلے مھلوک ءِ سیاسی گھگیری تاکت ءِ زور ءَ نا پیش ءَ ھلاس کنگ بیتگ ءُ ناکہ انی ھلاس کنگ ءَ ممکن انت-

سورت ھان مری ءِ کتاب: “راجدوستی ءِ پُژدر” ءِ سر ءَ یک چمشانکے

نبشتہ کار: ساجد بلوچ

دی بلوچستان پوسٹ

اے کتاب ءِ نبشتہ کار سورت ھان مری اِنت ءُ اے کتاب 2022 ءَ چہ ”اِلم ءُ ادب پبلِشر اینڈ بک سیلز“ ءَ چاپ کتگ۔ کتاب ”راجدوستی ءِ ُپژدر” سیزدہ ارزشداریں سرھالانی سر ءَ باوست کنت بلے من اد ءَ لھتیں پُر ارزشداریں سرھالانی سر ءَ گپ کناں کہ آ بلوچستان ءِ جھد ءَ گیش مُھکم کنگ ءَ مارا سیاسی آگاھی دے اَنت۔ اگاں کسّے اے کتاب ءَ چِست بکنت ءُ پہ ھب ءُ واھگے بہ وان ایت ئِے گڑا آئی ءَ را باز چیز راجدوستی ءِ بابت ءَ پہ دربرگ ءَ رس ایت۔ آئی ءَ پہ دربرگ ءَ اے سرھالانی سر ءَ زانت ءُ سرپدی رس ایت: راجدوستی، انیگیں راجدوستی، زبان، یوروپین راجدوستی، ءُ گلوبلائیزیشن۔

اے کتاب راجدوستی ءِ بابت ءَ مارا اِلم ءُ زانت دنت ءُ من چہ اے کتاب ءَ ھمے دربُرتگ کہ راجدوستی یک سرجمیں پجّارے ءُ راجدوستی ءِ مارشت یک راجے ءِ تہ ءَ ھما وھد ءَ زندگ ءُ مُھر بیت وھدیکہ آ وتی زبان، دود ءُ ربیدگ، گْوستانک، ءُ لبزانک ءِ دیمروی ءِ ھاتر ءَ جھد بہ کنت۔ مارا بُرز ءِ نبشتہ کُتگیں گالرد ءِ سر ءَ ھما وھد ءَ بیسہ بیت وھدیکہ ما آیانی سر ءَ درور بہ دے ایں۔ درور اے پیم ءَ اِنت کہ 1945 ءَ پد یوروپین راجدوستی ءِ اُنڈال توانگر بوگ ءِ سبب اے بیت کہ آ وتی زبان، گوستانک، دود ءُ ربیدگ، ءُ لبزانک ءِ سر ءَ باز بزاں روچ ءُ شپ کار کن اَنت۔ یک نبشتہ کارے، آئی ءِ نام آبسان بیت، یک نا وانندگے ءَ را جست کنت کہ تئی ھیال ءَ راجدوستی چی یے؟ آئی ءِ پسہ ھمے بیت کہ من یک پرینچے آں۔ ھمے ندکار آئی ءَ را پد ءَ جست گیپت کہ تئی راجی کمنٹمنٹ چی اِنت؟ آ پد ءَ ھمے پسہ ءَ دنت کہ من یک پرینچے آں۔ ھمے جستانی پسہ مارا اے سَھرا کنت کہ یک راجے ءِ نام راجدوستی ءِ مستریں چیدگ اِنت۔ اگاں یکے گُش ایت من یک پرینچے آں ءُ من گش آں من یک بلوچے آں، گڑا اے یک سرجمیں پجّارے سَھرا کنگ ءَ اِنت۔ ایشی ءَ چہ ابید اے کتاب مارا باور کنائین ایت کہ راجدوستی ءِ برورد راجی اِستان national state اِنت۔ اگاں یک راجی اِستانے دیمروی کنگ لوٹ ایت گڑا آئی ءِ تہ ءَ کمیونزم ءُ جھمورت ءِ نزام شر بہ بنت ءُ راجی اِستان ھما وھد ءَ پُرشت ءُ پروش ءِ آماچ بیت وھدیکہ دوئینانی تہ ءَ یکے نزور بہ بیت۔

اے کتاب مارا سرپد کنگ ءِ جھد ءَ کنت کہ یک راجے ءِ تہ ءَ باز زبانانی موجود بوگ یک جیڑھے نہ اِنت ءُ نیکہ بازیں زبان ءِ بوگ یک راجے ءَ را پُرشت ءُ پُروش ءِ دیمپان کنت۔ اے کتاب اے درور ءَ دنت کہ چو وَ سوئزر لینڈ ءِ تہ ءَ ھم باز زبان بیتگ ءُ انگت تک ھست اَنت بلے آیاں زبان ءِ جتائی ءِ سبب ءَ یکے دومی ءَ وت ءَ جُتا نہ کُتگ۔ بلے بد بھتی ءَ بلوچستان ءِ لس مھلوک اے جیڑہ ءِ آماچ اَنت ءُ باز ھمے گش اَنت ما براھوی زبان ءَ ھبر کنیں ما شرتر ایں، باز گش اَنت ما بلوچی زبان ءَ ھبر کنیں ما چہ براھویاں شرتر ایں، لھتیں گش اَنت ما جدگال ایں مارا ھم ارزشتے ھست، ءُ لھتیں گوش اَنت ما سرائکی بلوچ ایں مئے ھم نام باید اِنت گرگ بہ بیت۔ بلے رینان گش ایت الم نہ اِنت کہ تھنا زبان راج دوستی ءِ مارشت ءَ توانگر بہ کنت۔ آ گوش ایت چوناھا راجدوستی گوں مردمانی ارواہ ءُ جزبات ءَ بندوک اِنت۔ رینان ءِ لیکہ ءَ اگاں ما بچار ایں گڑا مارا ابن ء کُلدوم ءِ اسبیت we-feeling ءِ دیدانک دیم ءَ کیت ءُ مجگ ءَ جاگہ کنت۔ اسبیت ءِ مارشت ابرم ءَ ھر راج ءِ تہ ءَ ھست اِنت۔ ایشی ءِ درور ءَ تو اے پیم ءَ دات کُت کن ئے کہ اگاں یک بلوچے توری آ اوگانستان ءَ بہ بیت یا ایران ءُ یا کہ دگنیا ءِ ھر کُنڈ ءَ بہ بیت آئی ءِ گوم ءَ نا انساپی ءُ زُلم بہ بیت گڑا رودراتکی ءُ یاکہ روکپتی بلوچستان ءِ بلوچانی تہ ءَ اسبیت ءِ مارشت ودی بیت ءُ پد ءَ ھمے بلوچ وتی زِد ءُ کینگ ءَ دژمن ءِ بگیری ءَ سَھرا کن اَنت۔ اگاں من ابن ء کُلدوم ءِ اسبیت ءِ لیکہ ءِ گوناب ءَ گوں herd-psychology ءَ بہ کناں گڑا اے دوئینانی میان ءَ مارا نزّیکی ءُ سیادی گندگ ءَ کیت۔ واجہ سورت ھان مری وتی کتاب ءِ تہ ءَ نبشتہ کنت کہ اگاں یک ڈنّی راجے بئیت ءُ یک نزوریں راجے ءِ سر ءَ اُرش ءُ کبزہ بہ کنت گڑا چہ ابرم ءَ دومی راج ءِ لس مھلوک وتی زاتی جاوراں یکے دومی ءَ گیش ءُ گیوار کنگ ءِ سوڑگ ءَ کن اَنت ءُ دژمن ءِ بگیری ءَ جنگ کن اَنت۔ اے پیمیں یکمُشتی ءِ جزبات ءَ ما انگریزی ءَ herd-psychology گوش ایں۔ اگاں ما رینان ءِ لیکہ ءِ گوناب ءَ گوں ابن ء کُلدوم ءِ اسبیت ءَ بکن ایں گڑا اے دوئینانی میان ءَ مارا نزّیکی گندگ ءَ کیت ءُ ایشانی لیکہ herd-psychology ءِ گوم ءَ ھم باز نزّیکی کیت۔

ایشی ءَ چہ ابید اے کتاب نوکیں راجدوستی modern nationalism ءِ نیزوریانی سر ءَ اوں گپ ءُ تران کنت ءُ آیانی تہ ءَ دو نزوری گِندگ ءَ کیت کہ چینچو مھلوک چہ آجوئی ءِ جھد ءَ دلپروش بنت۔ یک نزوری یے نوکیں ترز ءِ جنگ اِنت ءُ دومی زرداری capitalism اِنت۔ اولی ءِ تہ ءَ ما گندیں کہ انیگیں دور ءَ زورگیریں راجانی کرّ ءَ ایٹم بمب، ڈرون، اِسپاھی وائر spyware، چِپ Chip ءُ دگہ بازیں انیگیں جنگی ترز ءُ اوزار ھست اَنت کہ چہ آیاں لس مھلوک آجوئی ءِ جھد ءِ ھاتر ءَ دلپروش اَنت۔ اسل ءَ مھلوک دلپروش اِنت ءُ آ ھر وھد ءَ گوش اَنت آجوئی گرگ گْران اِنت بلے اے پیم ھم نہ اِنت کہ سرجمیں مردم دلپروش اَنت۔ ایشانی تہ ءَ اگاں ما اِسپائی وائر ءِ گپ ءَ بہ جنیں گڑا ما اسرائیل ءِ درور ءَ دات کُت کنیں۔ اسرائیل ءِ اڈ کُتگیں اسپائی وائر یک انچیں ساپٹ وائرے کہ موبائل ءُ لیپٹاپ ءِ تہ ءَ بَگر تئی موکل permission ءَ پُتر ایت ءُ موبائل ءُ لیپٹاپ ءِ درستیں توار، تامر، ءُ ایس ایم ایساں دومی مردم ءِ کرّ ءَ زوت بارت ءُ سر کنت۔ ھالتاکانی رِد ءَ اسرائیل ءَ اے ساپٹ وائر بازیں ملکاں پہ بھا کنگ ءَ داتگ ءُ آیانی تہ ءَ پاکستان ھم گون اِنت۔ ایشی ءَ چہ ابید زرداری ءَ مردم تبکانی تہ ءَ بھر کُتگ۔ سیر سیرتر بوگ ءَ اِنت ءُ نیزگار نیزگارتر بوگ ءَ اِنت۔ اے گپ ءَ کارل مارس ھم جنت۔ گوشگ ءِ مول ءُ مراد ایش اِنت کہ نیزگار زرداری ءِ نزام ءَ دلپروش کُتگ۔ نیزگار بس دو وھد ءِ نان ءَ گیشتر نہ سوچ ایت ءُ اے پیمیں مردم جھد ءِ آجوئی ءِ جنز ءَ باز دلپروش ءُ گِستا اَنت۔

اے کتاب مارا سرپدی دنت کہ 1945 ءِ دور ءَ راجدوستی ءِ لیکہ سکّ ءَ مُھر اَت ءُ اے دور ءَ یورپ ءِ گیشتریں، کسانیں ءُ مزنیں راج شوشلزم ءُ کمیونزم ءِ منّوک ات اَنت چمیشکا ھمے دوران ءَ بازیں راج آجوئی گیپت۔ بلے 1970 ءُ 1980 ءِ وھد ءَ زورگیریں راج وتی پندلانی سازگ ءَ دست گٹ ات اَنت ءُ زرداری ءِ نوکیں دْروشم دگنیا ءِ بھرے جوڑ کُت۔ زرداری ءِ نوکیں دْروشم ءَ ما گلوبلائیزیشن globalization گوش ایں۔ گڑا زورگیریں راج وتی پندلانی سازگ ءَ سوبمند بوت اَنت پرچاکہ گلوبلائیزیشن سوشلزم ءُ کمیونیزم ءَ پروش دنت ءُ انگت تک دیگ ءَ اِنت ئِے۔

سورت ھان مری ءِ کتاب ءِ رد ءَ گلوبلائیزیشن یونائیڈد نیشن ءِ کمک ءَ گیشتر ایشیا ءُ میڈل ایسٹ ءِ تہ ءَ توانگر اِنت۔ چوناھا دامگ internet گلوبلائیزیشن ءِ یک نوکیں رنگے ایشی ءِ وسیلہ ءَ ملکانی میان ءَ تھنا کراس ٹریڈ انّا بلکیں اے ملکاں یکجاہ ھم کنگ ءَ اِنت ءُ آیانی سیاسی ءُ زرّی سِیتّاں interests روچ پہ روچ گیشتر کنگ ءَ اِنت۔ ملکانی سیاسی ءُ زرّی سیادی گلوبلائیزیشن ءِ سبب ءَ تُرند اَنت چمیشکا ما اے دگنیا ءَ گلوبل ویلیج گوش ایں۔ چوناھا انیگیں ٹیکنولوجی ءَ گلوبلائیزیشن آرتگ ءُ اے گپ و راست اِنت کہ ٹیکنولوجی ءَ دگنیا ءَ باز آسراتی داتگ ءُ ھر ھما آسراتی داتگ کہ آ آسراتی مئے اُمیت ءَ چہ ڈنّ بیتگ اَنت بلے ٹیکنولوجی ءَ را راجی آجوئی ءِ جھد پشت ءَ اوں چگل داتگ۔ اے کتاب ایشی ءِ سببانی بابت ءَ وش چیزان ءَ درشان کنت اگاں ما اے کتاب ءَ بہ وان ایں گڑا ما چہ بازیں راستیاں چہ آگاہ بَہ ایں۔ گلوبلائیزیشن ٹیکنولوجی ءِ یک بھرے ءُ ھمے گلوبلائیزیشن ءَ ما آمریکنائیزیشن ھم سرپد بَہ ایں پرچاکہ آمریکہ ءَ دامگ ءِ وسیلہ ءَ وتی زبان، دود ءُ ربیدگ، تامُر، سوت، لبزانک ءُ ھر ھما چیز کہ یک راجے ءَ را زندگ کنت دیم ءَ آؤرتگ۔ گڑا اے چیز پھمگ لوٹ ایت کہ گلوبلائیزیشن نوآبادکاری ءِ یک اوزارے کہ چینچو نزوریں راجاں ایردست کنت۔

انچوش گوش اَنت چہ سرد جنگ cold war ءَ پد وِسٹ، یوروپ، ءُ ایشیا ءِ تہ ءَ گلوبلائیزیشن شینگ اِتگ ءُ راج، راجدوستی ءُ راجی جزبگ پروش داتگ۔ پد ءَ زورگیریں راج یک مزنیں گیٹے پچ کن اَنت آ گیٹ ءِ نام world trade organization بیت ءُ ایشی ءِ وسیلہ ءَ آیاں گیشتر ایردستیں راج لگت مال کُتگ ات اَنت ءُ انگت تک کنگ ءَ اَنت اش۔

سورت ھان مری ءِ کتاب مارا اے چیز ءِ بابت ءَ سرپدی دنت کہ چہ 9/11 ءَ پد امریکہ ءُ آ دگہ زورگیراں وتی چمّ بلوچستان ءِ سر ءَ سک داتگ اَنت۔ چہ اے وئیل ءَ پد مئے ریجن بلوچستان ءِ تہ ءَ گلوبلائیزیشن ءُ بازیں زرّی ادارگ multi-national companies کار ءُ بار ءِ پائدگ ءِ ھاتر ءَ راجدوستی ءُ راجی اِستان ءِ لیکہ ءَ زوال کن اَنت۔ آ مرچی سوبمند اَنت ءُ ما چہ راستی ءَ پراموش ایں۔

چہ اے کتاب ءَ من اے دربرتگ کہ یک راجے ھما وھد ءَ زندگ بوت کنت وھدیکہ ھمے راج ءِ لس مھلوک وتی زبان، دود ءُ ربیدگ، گوستانک، شائِری ءُ لبزانک ءَ بستار دنت۔ اگاں یورپ ءِ تہ ءِ راجاں اے سرجمیں کار مہ کُتین اَنت گڑا یورپ ءِ تہ ءِ راجاں آجوئی بھ نہ گیپتگ ات۔ نوکیں راجدوستی ءِ نزوری ھما وھد ءَ ھتم بنت وھدیکہ لس مھلوک ءِ تہ ءَ آگاھی بئیت۔ اگاں آیانی تہ ءَ اینچو بودِشت ھست کہ دگنیا ءِ تہ ءَ ھچ نوکیں جنگ ءِ ترز آیانی آجوئی ءِ جھد ءَ داشت کُت نہ کن اَنت، گڑا آیانی پجّار رکینگ بیت ءُ آ آیوکیں وھداں یک زندگیں راجے ءِ ھدابند بوت کن اَنت۔ ایشی ءَ چہ ابید گلوبلائیزیشن ءَ انیگیں وھد ءَ مارا آسراتی ءُ سیت داتگ پرچاکہ ما چہ رسانکدر ءَ وتی کاراں کُت کنگ ءَ ایں بلے گیشریں سیت زورگیریں راج ءَ داتگ ءُ دیگ ءَ اِنت ئِے ھم۔ مارا اے چیز پوہ بوگی اِنت کہ گلوبلائیزیشن یک اوزارے امریکہ، بریٹش، چائینا، پاکستان، ءُ یونائیڈڈ نیشن ایشیا ءُ میڈل ایسٹ ءَ لُٹ ءُ پل ءِ ھاتر ءَ کارمرز کنگ ءَ اَنت ئِے۔ گلوبلائیزیشن آیانی پروپیگنڈا ءَ روچ پہ روچ توانگر کنگ ءَ اِنت تاکہ نیزوریں راجانی لُٹ ءُ پل ءَ بہ کن اَنت۔ گڈی ءَ من شمارا اے پنت ءُ سوجاں دیاں کہ زوت سورت ھان مری ءِ کتاب ءَ بہ وان اِت تاکہ شما چہ بازیں چیریں راستیاں سرپد بہ بہ اِت ءُ شما دژمن ءِ اڈ کُتگیں پندلاں ھم سرپد بہ بئیت کہ چینچو سد سال ءَ بُرز بریٹش ءَ اے جھد کُتگ کہ بلوچستان ءِ گھگیری ءِ لیکہ ءَ بہ دار ایت ءُ انّی ھپتاد سال ءَ بُرز اِنت کہ پاکستان ھمے پیم کنگ ءَ اِنت۔۔۔ مدام بلوچ بات اِت وتی زبان ءَ ھبر کنان بات ات۔ سبز بات بلوچستان۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ کیچ ءِ تھسیل تمپ ءِ دمگ بالیچاہ ءَ پاکستانی پوج ءَ چارشمبے ءُ پشمبے ءِ میانی شپ ءَ۔یک مردمے آوار جتگ ءُ بیگواہ کتگ-

بیگواہ کنگ بیتگیں مردم ءِ پجّار شوکت ء ایوب نام ءَ چہ بیتگ-

بیست سے اپریل ءِ شپ ءَ کساس ءَ ساھت یازدہ ءَ پاکستانی پوج ءَ شوکت آئی لوگ ءَ چہ آوار جتگ چریشی ءَ پد آ بیگواہ اِنت-

دمگی اِھوالکار گوشگ اِنت کہ شوکت وتی لوگ دیم ءَ پکوڑا بھا کتگ وتی لوگ لاپ دیگ ءَ بیتگ- آئی ءِ بیگواھی ءَ سے روچ گوستگ-

بلوچستان ءِ آجوئی ءِ ھاتر ءَ جنگولیں سلاہ بندیں گلاں وتی شنگ کتگیں درشاناں پاکستان لشکر ءُ دگہ کارجاھانی سر ءَ جتا جتائیں اُرشانی زمہ واری من اتگ انت-

بی ایل ایف ءَ شش جتاجتائیں کاروائیاں پاکستانی پوج، پولیس ءُ راشن سر کنوکیں گاڑی نشانگ کتگ اَنت ءُ یو بی اے ءَ ٹاور ءِ سر ءَ بیتگیں اُرش زمہ واری منّ اِتگ-

بلوچستان لبریشن فرنٹ ءَ شنگ کتگیں درشان ءِ تہ ءَ گْوشتگ کہ مئے سرمچاراں دہ اپریل ءَ دشت ءِ دمگ سیاھلو ءَ زورگریں پاکستانی پوج نیمگ ءَ چہ جنگ بیتگیں سرویلنس کیمرہ، سولر سسٹم ءُ دگہ ھال اھوال نزام نشانگ کتگ ءُ تاوان داتگ اَنت-

جارکش ءَ گْوشتگ کہ بیست دو اپریل ءَ تربت ءِ دمگ جوسک ءَ گل ءِ سرمچاراں گشت کنوکیں پولیس ءِ گاڑی داشتگ ءُ مانداشتگ ءُ پولیس کارندھاں گاڑی یل داتگ ءُ تتکگ اَنت – بلے سرمچاراں گل ءِ پالیسی رِد ءَ پولیس نشانگ نہ کتگ اَنت-

جارکش ءَ گْوشتگ کہ شپ ءِ گشت میان ءَ سرمچارانی ٹولی ءَ ڈی بلوچ ءَ برجاھیں پولیس تھانہ سر ءَ اُرش کتگ ماڑی تاوان داتگ اَنت-

جارکش ءَ گْوشتگ کہ ھمے یکیں شپ ءَ سرمچارانی دگہ یک ٹولی ءَ گشت میان ءَ تربت ءِ دمگ گھنہ ءَ زورگریں پاکستانی پوج ءَ گوں دیم پہ دیم بیتگ اَنت ءُ چریشی ءَ میڑ برجاہ بیتگ- میڑ ءَ دُژمن ءِ بازیں پوجی یے ٹپی کتگ اَنت چریشی ءِ آسر ءَ دُژمنیں پوج پُشتکنز بیتگ ءُ واتر بُنجل نیمگ ءَ شُتگ-

جارکش ءَ گْوشتگ کہ بیست پنچ اپریل ءِ شپ ءِ یازدہ چل ءَ، سرمچاراں مند سورو ءَ ملٹری انٹیلی جنس ءِ کارگس دیم ءَ پیسر ءَ چہ ساڑی ئیں کارندہ نشانگ کتگ ءُ کُشتگ اَنت اشی ءَ پد کارگس مزنیں سلاھاں چہ نشانگ کتگ اَنت-

جارکش ءَ دیمتر ءَ گْوشتگ بیست شش اپریل ءِ نیم روچ دوازدہ ءِ نزیک ءَ بی ایل ایف ءِ سرمچاراں ھاران شھر ءَ برجاھیں ایف سی بُنجاھی بُنجل سر ءَ گرینیڈ لانچر ءِ بازیں گولھے آس داتگ، وتی نشانگ سر ءَ کپتگ-

جارکش ءَ گْوشتگ بیست شش اپریل ءِ روچ ءَ نیم روچ دوازدہ ءِ نزیک ءَ اپسی کھن ءُ ھمزئی ءِ میانی ءَ پوجی بُنجل ءَ سامان بروکیں گاڑی بمب اُرش ءِ نشانگ کتگ – زانگ بہ بیت کہ گاڑی ءِ واھنند شفیع محمد پنّام ءِ شُپک ءَ گوستگیں بازیں ماہ ءَ چہ بیھار دیگ بیگ ءَ اِنت بلے اشی ءَ اَبید آ اے کارپداں شر نہ بیتگ- مروچی کڈنی ھساب ءَ آئی ءِ یک گاڑی یے سر ءَ اُرش کتگ – مروچی یکرندے پد ءَ رسانکدر ءَ چہ جار جن ایں کہ اگاں آ نی اے مراگشانی بھر بیت گُڑا تُرندیں اُرش کنگ بیتگ-

جارکش ءَ گْوشتگ اے جتاجتائیں کاروائیاں زورگریں پاکستانی پوج ءُ پولیس جانی ءُ مالی تاوان ءِ دیمپانی کنگ کپتگ وھدے کہ سرمچاراں پہ سلامتی مُھریں اوتاکاں سر بیتگ اَنت-

ھمے وڑ کچی موباھل ٹاور ءِ تباہ کنگ ءِ زمہ واری یو بی اے ءَ منّ اِتگ

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں گوستگیں شپ دوازدہ ءِ نزیک ءَ کچی ءِ دمگ سنی لنڈو ءَ برجاھیں یوپون موباھل ٹاور مشینری ءَ ھوار مانداشتگ ءُ تباہ کتگ-

یو بی اے ءِ جارکش رِد ءَ موباھل ٹاور دمگ ءَ بلوچ سرمچارانی چاریگی ءِ واستا پوج ءِ کارمرزی ءَ بیتگ-

جارکش ءَ دیمتر ءَ گْوشتگ کہ مئے اُرش آجو بلوچستان ءِ وتواجھی ءَ تاں اُرش برجاہ بنت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ گوشتگ کہ مئے سرمچاراں تربت، ھوشاپ ءُ مستونگ ءَ سَے اُرشاں پاکستانی پوج ءُ مادن بروکیں گاڑیانی سر ءَ اُرش کتگ – اُرش ءَ زورگریں پوج ءِ دو کارمند مُرتگ انت ءُ سَے گاڑیاں تاوان رس اتگ –

جارکش ءَ گوشتگ بلوچ لبریشن آرمی ءِ سرمچاراں گوستگیں شپ ءَ تربت سیٹلائٹ ٹاون ءَ بالی پٹ دگ ءَ زورگریں پاکستانی پوج ءِ کاروانے ءِ سر ءَ گوں تراکناکیں شورواں اُرش کتگ – کہ دژمن ءِ بکتر بند گاڑی ءِ اُرش ءِ زد ءَ اتکگ ءُ چریشی ءَ یک دژمن کارمندے ھما دمان ءَ مُرتگ ءُ دو زدگ بوتگ انت وھدیکہ گاڑی ءَ تاوان رس اِتگ –

آئی ءَ گوشتگ کی بلوچ لبریشن آرمی ءِ سرمچاراں دومی اُرش کیچ ءِ دمگ ھوشاپ دمب ءَ پاکستانی پوج ءِ بنجل ءِ سر ءَ اُشتاتگیں کارمندانی سر ءَ کتگ –

سرمچاراں دژمن ءِ کارمندانی سر ءَ ھما وھد ءَ اُرش کتگ کہ بنجل ءَ ڈن ترءُ گرد ءَ بوتگ انت – اُرش ءَ یک کارمندے ھما دمان ءَ مُرتگ وھدیکہ دگہ دو زدگ بوتگ انت –

آئی ءَ گوشتگ کہ سیمی اُرش مروچی مستونگ ءِ دمگ چوتو ءَ بلوچ راجی مڈیانی بروکیں دو گاڑیانی سرا کنگ بوتگ، لٹ پُل کنوکیں دو گاڑی تیرگواری کتگ ناکارہ کتگ انت –

درشان ءِ گڈسر ءَ جارکش ءَ گوشتگ کہ بلوچ لبریشن آرمی اے اُرشانی زمہ واری ءَ منّ ایت –

بلوچستان ءِ ھَند ھزدار ءِ جاگہ کانک ءِ جاھمنند بی بی درھاتون ءَ گوں دگہ ھمراھیں زالبولاں یک ھنگامی پریس کانفرنس ءَ پدّر کُتگ کہ 7 کرّا 2025 ءِ بیگاہ ءَ 6 مردم گوں توپکانی ھمراھی ءَ آئی ءِ لوگ ءَ پُتر اَنت ءُ 16 سالی جنک نسرت بی بی بیگواہ کُتگ ءُ گوں وت بُرتگ ءُ لوگ ءِ زالبولانی سر ءَ لٹ ءُ کُٹ ھم کتگ۔

زالبول ءِ گْوشگ اِنت بیگواہ کنوک ھما ساھت ءَ آئی ءِ لوگ ءِ گوانکو ءُ دگہ کیمتی ئیں چیز گوں وت بُرتگ اَنت۔

بی بی درھاتون ءِ رِد ءَ بیگواھی ءِ وھد ءَ گِر ءُ چیلی ءَ یک ملزمے ءِ دیم ءِ پُچ دورآتکگ، آئی ءِ پجّار کُتگ ءُ ھزدار ءِ تھانہ ءَ ایف آئی آر دزنبشت کُتگ۔

آئی ءِ گُشگ اَت کہ پولیس ءَ یک ملزمے دزگیر کُتگ بلے آئی ءَ را مھمانانی وڑ ءَ تھانہ ءَ نندارینتگ ئِے ناں آئی ءِ سر ءَ جوانیں چار ءُ تپاس کنگ بوگ ءَ انت ءُ بلکے آئی درکنگ ءِ ٹھ ءُ شور کنگ بوگ ءَ انت۔

آوار جنگ بوتگیں جنک ءِ مات ءَ الزام جتگ کہ ایس ایچ او سٹی پولیس ءِ مبینہ بے پروائی ءُ ملزم ءِ ھلاپ ءَ نرمیں رویہ ءِ سبب ءَ نسرت بی بی انگت ءَ در کنگ نہ بوتگ۔ پولیس ایف آئی آر ءِ تہ ءَ نام گرگ بوتگیں سدام ءَ ھوار دگہ ملزماں دزگیر کنگ ءَ ھم چک ءُ پد اِنت۔

بی بی درھاتون ءَ بلوچستان ءِ سر وزیر آئی جی پولیس بلوچستان ، ڈی آئی جی کلات رینج ءُ ایس ایس پی ھزدار ءَ گوں دزبندی کتگ کہ آوار جنگ بوتگیں مردم ءِ پجارینگ ءُ ملزم ءَ را کیس ءِ دیم ءَ آرگ ءِ واستا زوت دزمانجنی بہ کن انت۔

آئی ءَ ھُشدار داتگ کہ اگاں آوار جنگ بوتگیں جنک مرچی سھب ءَ تاں رکّینگ نہ بوت گڑا آ ءُ آئی ءِ لوگ بانک شال ءُ کراچی مزن دگ ءِ سر ءَ دھرنہ ءِ زھرشانی کن اَنت ءُ قرآن مجید ءَ وتی دست ءَ دار اَنت ءُ اے دھرنہ ھما وھد ءَ برجاہ بیت داں آئی ءِ جنک رکّینگ نہ بیت ءُ مجرماں سزا دیگ نہ بیت۔

آئی ءَ گیش گوشت کہ ایف آئی آر ءِ تہ ءَ نام گپتگیں ملزم سانمند اَنت ءُ پولیس ایشانی ھلاپ ءَ تچکیں کارروائی ءَ چہ رکّگ ءَ اِنت، ایشی ءِ سبب ءَ آوار جنگ بوتگیں مردم ءِ جان ءَ را مزنیں ھترہ ءِ تہ ءَ اِنت۔

زانگ بہ بیت کہ ھزدار ءِ دمگ ءَ قبائلی ءُ سرکاری آھوک ءُ رھوک ءِ واھندیں سلاہ بندیں گلانی نیمگ ءَ زالبولانی آوار جنگ ءِ بازیں وئیل دیم ءَ آتکگ انت۔

اے سال ءِ پروری ءَ چہ ھزدار ءَ بگر داں ریاستی سیمسر ءَ کار کنوکیں ڈیتھ اسکواڈ ءِ مردماں یک لوگے ءِ سر ءَ اُرش کتگ ءُ مردم اِش ٹارچر کتگ ءُ یک جنینے اسماء جتک آوار جتگ کہ ایشی ءَ چہ سرجمیں بلوچستان ءَ زھرشانی ءِ سبب جوڑ بوتگ۔

ھزدار ءِ جاور ءَ ھوار بوتگیں ملزم تنی وھدی دزگیر کنگ نہ بوتگ اَنت۔