مھروانیں ھمبلو شھید شیھو جان
نبشتہ کار: سَول بلوچ
دی بلوچستان پوسٹ
منی ءُ شیھو جان ءِ اولی گِند ءُ نِند 26 جنوری 2018 روچ ءَ بوت، من چہ سنگتے ءَ جست کت ھمے سنگت کے انت؟
سنگت ءَ پَسّہ دات: اے بی آر اے ءِ کماندرے ءُ سنگت ءِ نام شیھک بلوچ اِنت، بَلے ما چہ دوستی ءَ شیھو ءِ نام ءَ توار ئِے کن اِیں.
مئے سنگتانی گپّ ءُ دیوان اَت، مزاک ءُ مسکرائی اَت،گُڑا شَپ ءَ وپسگ ءِ وھد اَت، ما ھر یک سنگتے وتی نپادانی سر ءَ وپ اِیں ءُ اگاں کسّے ءِ گاٹ اَت گُڑا آ وتی گاٹ شُت. گُڑا منی نپاد شیھو ءِ کش ءَ اَت ،شیھو جان ءَ گُشت سنگت بہ بکش من ترا بیسر ءَ نہ دیستگ ءُ تو کجام گَل ءِ سنگتے ئے؟
من بی ایل ایف ءِ سنگتے آں.
باز جْوان جگر، بَلے وتی زمہ واریاں گوں شرّیں وڑے ءَ سرجم ءُ برجم بدار ءُ مارا ھمے تُپنگ کہ بَڈ ءَ اِنت ،گُڑا مارا ھمے تُپنگ ءِ ارشت زانگی اِنت کہ ھمے تُپنگ مارا کجا ءُ چوں کارمرز کنگی اِنت.
ھمے وڑ ءَ ما یکجاہ اِت اِیں ءُ من چہ ایدگہ سنگتاں چہ دْرستاں کستر اَت آں، شیھو جان ءَ من ءَ سک مھر دات ءُ شیھو جان سکّیں مھروانیں ءُ زانتکاریں سنگتے اَت،من چہ شیھو جان ءَ باز دربرتگ. من ھما روچاں زانت کہ شیھو جان یک ازیمیں ھستی یے.
یک سُھبے ءَ شیھو جان پاد اتک چاھے وارت ءُ سنگتان ءَ گْوشت ئِے کہ من سپرے ءَ روگ ءَ آں ءُ انشاءاللہ پد ءَ زوت مِل اِیں.
من گُڑا سک پریشان بوت آں کہ منی مھروانیں سنگت چو زوت روگ ءَ اِنت، وھدے کہ شیھو جان ءَ من ءَ گْور ءُ ھمباز کرتگ ءُ گْوشت ئِے سَول جان تو وت چو پریشان مہ کن انشاءاللہ زوت مِل اِیں ءُ تو وت ءَ چو پریشان کن ئے وھدے کہ من شھید بوتاں گُڑا…….؟
اناں شیھو جان اے وڑیں گپ مہ کن، اللہ ترا چو زوت مارا چہ جتا مہ کنات ءُ بازیں زمہ واری یے تی کوپگان اِنت ءُ ما گْوش اِیں، ترا زوت سالونک بہ کن اَیں ءُ اُستاد میر اھمد ءُ اُستاد مھناج مکتار ءَ تئی سور ءَ بیار اَیں ءُ ترا پہ مرادے سور بہ دے اَیں.
منی سور ھما روچ ءَ بیت کہ من سرڈگار ءِ باھوٹ کنگ بہ بنت.
من ھچ نہ گْوشت من زانت کہ شیھو جان گلزمین ءِ آشکے.
شھیو جان گشت شمئے کپ سک وش اَنت، بلے من رو آں کہ منی سپر اِنت، گڑا شیھو جان چہ مارا موکل کت ءُ سپر ءَ رھادگ بوت.
لھتیں وھد ءَ پَد وھدے بی آر اے( مزار بلوچ) ءَ واجہ گلزار امام ءَ چہ بی آر اے ءَ کش اِت، گُڑا بی آر اے دوجاہ ءَ بوت، واجہ گلزار امام ءَ بی آر اے ءِ کاروان ءِ دیم ءَ برگ ءِ ھاتر ءَ یک دیوانے لوٹائینت ءُ دیوان ءَ پہ بی آر اے ءَ واست ءَ نوکیں جارکشے( بیبگر بلوچ ءِ نام ءَ) دیم ءَ آورت ءُ وتی کار گوں ادارھی بنیاد ءَ بندات کرت اَنت ءُ شیھو جان واجہ گلزار امام ءِ کاروان ءَ ھَوار بوت ءُ بی آر اے بنجائی کونسل کمانڈ ءِ یک جْوانیں باسکے جوڑ بوت ءُ گوں ایمانداری ءَ وتی کارانی دیم ءَ برگ ءَ اَت.
شھیو جان یک سکیں وانندگیں ءُ زانتکاریں سنگتے اَت ءُ مدام پہ یکمُشت ءُ تپاکی ءِ واست ءَ جد ءُ جھد کنگ ءَ اَت، مدام ھمے گپ ئِے گشت، مارا اگاں وتی ھمے شھیدانی کاروان، بلوچ راجی جھد یک منزلے ءَ سرکنگی اِنت ،گُڑا مارا یکجاہ بُوَگ لوٹ اِیت، پرچاکہ یکجاہ ءُ تپاکی مئے منزل اِنت.
شھیو جان گلزمیں آشکے اَت،شیھو جان دہ سال گوں سِلاہ بندیں گَلاں ھمگِرنچ بیت ءُ سِلاہ بند بُوَگ ءَ پیسر دوھزار شش ءَ بگر داں دوھزار نھ ءَ شیھو جان بی ایس او آزاد ءِ یک جْوانیں باسکے بیت ءُ شپ ءُ روچ پہ گَل ءِ کاراں گلائش بیت.
شھیو جان ءِ من کجام مھرانی ءُ کربانیانی تاریپ ءَ بکناں، شیھو جان مدام مارا مھکم ءُ کتاب ءِ وانگ ءِ سوج ءِ داتگ کہ کتاب بوان اِت ءُ ھمروچیں ھالاں بوان اِت کہ دنیا ءِ تہ ءَ چے بُوَگ ءَ اِنت ءُ دنیا ءِ ھالات کجام وڑ ءَ گوں تْرندی ءَ روگ ءَ اَنت ءُ مارا گوں دنیا ءَ چوں ھمگِرنچ بُوَگی اِنت ءُ ما وتی توار ءَ دنیا ءَ چوں سر کرت کن اِیں؟
مارا دنیا ءِ تب ھروھد سرپد بُوَگی اِنت، وھدے کہ ما دنیا ءِ تب ءَ سرپد بوت نہ کن اِیں ،گُڑا ما کدی وتی منزل ءَ سر بوت نہ کن اِیں ءُ دومی گپ مارا کدی پردانی سر ءَ بروسہ کنگی نہ اِنت ءُ ما کدی اے مہ گْوش اِیں کہ پِلاں مردم ءَ بلوچ راجی جُنز داشتگ یا اللہ مہ کنت آ شھید کنگ یا ریاست ءِ دیم ءَ یک ڈیلے بہ کنت، گُڑا بلوچ راجی جنز ھلاس بیت؟ اناں……. بلکین ءَ مارا وتی گَل ءُ پارٹیانی سر ءَ بروسہ کنگی اِنت ءُ مارا گوں گل ءُ پارٹیاں بندوک بُوَگی اِنت نہ کہ گوں پرداں.
شیھو جان ءِ نام شیھک اَت، بَلے ما سنگتاں پہ مھر شیھو ءِ نام ءَ توار جتگ ءُ من ءَ یات نہ بیت کہ یکروچے یک سنگتے ءَ شیھو جان ءَ شیھک ءِ نام ءَ توار جتگ، بس سنگتانی دپ ءَ مدام شیھو اَت.
شھیوجان ءِ شھید بُوَگ ایوک ءَ پہ بی آر اے ءَ نہ بلکین ءَ بلوچ راج ءَ را یک مزنیں تاوانے بوتگ، پرچاکہ شھیو جان ءِ اوپار، گوں راج ءَ نزیکی، سنگتانی ءُ گَل ءِ دارگ ءَ سکیں لاھکیں سنگتے اَت ءُ شیھو جان ایوک ءَ پہ بی آر اے ءِ کاراں گلائش نہ اَت ،بلکن ءَ آ پہ ایدگ گَل ءُ پارٹیانی واست ءَ ھم مدام ساڑی اَت، کدی چُش نہ گشتگ کہ من بی آر اے ءِ سنگتے آں من ءَ گوں ایدگ ءَ گَل ءُ پاٹیانی کاراں چے کار اِنت، اِنّاں شیھو جان ءَ کدی اے ھبر وتی ءَ مجگ ءَ نیاورتگ.
شھیو جان من ءَ پَھِل کن کہ گُڈّی ساھت ءَ من تئی ھمراہ نہ بوت آں ءُ تئی دیدارے کرت نہ کرت ءُ تو من ءَ چو ھم گشتگ اَت باندا مئے ھوتاک ءَ بیا من کمو دور سپرے ءَ روگ ءَ آں بوت کنت پَد ءَ ما ھم دیوان بوت مہ کن اِیں.
من ترا پَسّو دات، اناں شیھو جان اللہ ترا چہ مارا جُتا مہ کنت ءُ انگت سرڈگار ءَ را تئی وڑیں بچانی درکار اِنت، بَلے من مرچی سک پَژنیگ آں کہ شُمئے ھوتاک ءَ اتکک نہ کرت.
شھید شھیو جان 2006 داں 2008 ءَ بی ایس او آزاد ءِ یک جْوانیں باسکے بیت ءُ پَد ءَ 2008 ءَ کہ بی ایس او آزاد ءِ پارگ بیت گُڑا ایدگہ آشوبی گَلاں ھَوار بیت ءُ 2011 ءَ بی آر اے پلیٹ فارم ءَ وتی کاراں بِندات کنت داں گُڈی ساھت ءَ بی آر اے سنگتے بیت .
شیھو جان وتی زند ءِ تہ ءَ ھر وڑیں مشکل گژن، تنّ، پند ، سردی ءُ لِوار دیستگ. دژمن ءِ دیم ءَ چو کوہ ءَ اُوشتاگ،شیھو جان ءَ گوں وتی وش بویں ھوناں گلزمین ءُ بالگتر ڈاک وش بو کتگ.
زِند ءِ تہ ءَ ھنچیں سنگت دیم ءَ کیت کہ آیانی روگ ءَ مردم ءَ را نہ زمین پہ وت زور اِیت ءُ آزمان ، مردم انچو بیت گش ئے زاناں مردم نیم انسان اِنت ،بلے شھیو جان منی چمّاں یک پرشتھے زانگ بوتگ، پرچاکہ شیھو جان ملنگ تبیں سنگتے اَت، ھر وھد ءَ بدیستیں دپ ءِ پہ کندگ ءَ پُر اَت، ھر وھد ءَ مزاک ءُ مسکرا اَت، من ءَ انگت ھوش نہ کنت کہ یک روچے شھیو جان دیم تھار بوتگ.
شھیو جان ءِ سپر ءِ ششمی روچ ءَ من گوں سنگتاں مزاک ءُ مسکرا اَت آں ،گُڑا من وتی موبائل چار اِت داں سنگتے ءَ اسٹیٹسے ایر کرتگ ،، دورگے بہ بات،،، من سنگت ءَ را سک باز کلوہ راہ دات کہ سنگت ھیر اِنت، چے بوتگ؟ بَلے سنگت پَسّو نہ دات.
من سک پریشان بوتاں کہ سنگت ءَ پرچا منی کلوہ پَسّو نہ کت اَنت، گُڑا منی کَش ءَ سنگتے نشتگ اَت جُست ئِے کت سنگت تو چو سک مُلور بوت ئے ھیر اِنت.؟ من ھم چو ھما سنگتے ءِ وڑ ءَ ھچ نہ گُشت،
20 دمان ءَ پَد سنگت ءَ منی کلوھانی پَسّو دات کہ شیھو جان زی سی پیک ءِ دگ ءِ سر ءَ شھید کنگ بوتگ.ھمے ھال ءِ اِش کنگ ءَ گوں منی چمّانی ارس یلہ بوتگ اَنت ءُ یکبرے پَد ءَ منی کش ءِ سنگت ءَ جُست کت ترا ھیر اِنت تو گِریوگ ءَ ئے؟
جگر ھیری کج اِنت ءُ گپ چہ ترا چیر نہ اِنت، زی سی پیک ءِ دگ ءِ سر ءَ شیھو جان شھید کنگ بوتگ، ھمے گپّ ءَ گوں سنگت ھاوش بوت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
