ٹی بی پی شونگال

مئی ءِ اولی روچ ءَ دی بلوچستان پوسٹ ءِ ھال پتر ءَ کلات ءِ کوھی دمگاں یک سلاھبندیں ویلے ءِ ھال داتگ اَت، کہ ایشی ءِ تہ ءَ دوئیں نیمگاں چہ مردمی تاوان ءِ ٹاہ دیگ بیتگ اَت۔ دومی روچ ءَ بلوچ سلاھبندیں گل بلوچ لبریشن آرمی ءَ وتی یک شنگ کُتگیں درشانے ءِ تہ ءَ اے ھال ءِ پدراھی کنان ءَ گُشتگ اَت کہ اے سلاہ بندیں ویل پاکستانی لشکر ءُ آیانی گل ءِ نیام ءَ بیتگ، ءُ داں بازیں ادارے ءَ بیوکیں اے جنگ ءِ نیام ءَ آیانی گل ءِ دو سرمچار شھداد بلوچ ءُ اھسان بلوچ بیران بیتگ اَنت۔

گل ءَ اے گُشتگ اَت کہ ھردوک اھسان ءُ شھداد گوستگیں یک سالے ءَ چہ بی ایل اے ءِ بھر جوڑ بیتگ اَنت۔ رند تر ءَ گیشتریں ھال دیم ءَ اتکگ اِت اَنت کہ دوئیں ورنا مزنیں کساسی ءَ وانندگ بیتگ اَنت، ءُ پاکستان ءِ نامی ئیں وانگجاہ کائد ء آزُم شھدربر جاہ ءَ چہ ماسٹرز کُتگ اِش ءُ چہ ایشاں یکے ءَ کرونا نادراھی ءَ چہ پیش ایم فل ھم کنگ ءَ بیتگ اے ھال پہ آیانی سنگت، ھمراھیں نودربر، اُستاد ءُ لس مردمانی ھاترءَ ابکہ کنوکیں ھالے اَت ۔ پہ بلوچ چاگرد ءَ اے گپ ءَ الم ءَ ابکہ کنوکے اَت کہ یک سلاہ بندیں گلے ءِ بھر بیگ ءُ کار کنگ ءِ گپ ءَ داں یک مزنیں وھدی ءَ چیر دیگ ءُ چون سوبمبند بیتگ اَنت، بلے آ اے گپ ءَ ابکہ نہ بیتگ اَنت کہ ایشانی کر ءَ مزن شھدربرجاہ ءِ ڈگری بیتگ اَنت۔

وھدے کہ پاکستانی لس مردم اے گپ ءَ ابکہ بیتگ اَنت کہ چون دو وانندگیں ورنا یک انچیں سلاہ بندیں گلے ءِ بھر بیتگ اَنت ،کہ پاکستان ءِ ھلاپ ءَ پہ بلوچستان ءِ آجوئی ءَ جنگ کنگ ءَ اِنت۔ آہانی اے بے باوریں ھوش، بُن ازل ءَ بلوچستان ءَ دو دیھک ءَ چہ جنزوکیں آجوئی ءِ جھد ءِ بارو ءَ نزانتکاری ءُ راستی ءَ چہ دیری ءِ سوب ءَ اِنت۔ اے گپ ءِ سر ءَ باوست بیت کُت کنت کہ بلوچستان ءِ جاوراں چہ زوریں پندل سازوکے ءِ بھر اِنت، دانکہ مردماں آیانی لوگ ءِ تھی جیڑہ ءَ چہ گیش سرپدی مہ بیت۔

پاکستان ءِ وانندگیں مردم اے گپ ءَ بہ زان اَنت کہ اھسان ءُ شھداد اولی وانندگیں بلوچ نہ اَنت کہ آجوئی ءِ جھد ءِ بھر اَنت۔ بلوچستان ءِ انیگیں جھد گیشتر وانندگیں راجداریں جھد کار ءُ سلاہ بندیں جھد کارانی سر ءَ بندوک اِنت۔

بلوچستان ءَ دو مستریں سلاہ بندیں گلانی سروک ھمے پیمیں وانندگیں بلوچ اَنت، کہ آیاں وانگ ھلاس کنگ ءَ پد کار ءُ روزگار ءِ پُشت ءَ نہ تتکگ اَنت بلکیں سلاہ بندیں جھد ءِ بھر جوڑ بیتگ اَنت۔ ایشانی تہ ءَ بلوچستان لبریشن فرنٹ ءِ سروک ڈاکٹر اللہ نظر بلوچ، کہ یک گولڈ میڈلسٹ ایم بی بی ایس ڈاکٹر ئِے ءُ بلوچ لبریشن آرمی ءِ سروک بشیر زیب بلوچ اِنت کہ آئی ءَ بلوچستان شھدربر جاہ ءَ چہ ماسٹرز کُتگ ۔

یک جوانیں بنگپ ءِ ایش اِنت کہ دوئیں بلوچستان ءَ نودربرانی رھشونی ءَ بھر بیتگ اَنت ءُ بلوچستان ءِ مستریں وانندگ گل بلوچ اسٹوڈنٹس ارگنائزیشن ءِ چیرمین بیتگ اَنت۔ لس لیکہ ءَ ابید دوئیں ٹکی ھاکمدار ھم نہ اِنت بلکیں لس مھلوک ءِ لوگ ءَ چہ سیادی دارنت۔

اے گپ ءَ سرپد بیگ اژدری اِنت کہ بلوچستان ءِ وانندگیں ورنایاں کس رد دیگ ءَ نہ اِنت ءُ یک زوراکیں لشکرے ئِے ھلاپ ءَ مِڑگ ءِ ھاتر ءَ بلوچ آجوئی ءِ جُنز ءَ ھوار کنگ ءَ نہ اِنت، بلکیں اے جُنز وت پہ ھمے وانندگیں ورنایاں بندات کنگ بیتگ ۔

بلوچستان ءِ بنجاھی شھر شال ءَ وائس فار مسنگ پرسنز ءِ زھرشانی بنجل ءَ سَے ھزار ءُ نُہ سد ءُ پنجاہ ءُ پنچ روچ سرجم- چاگردی باسک سلیم بلوچ ءَ بنجل ءِ تر ءُ تاب کرتگ –

ھمے وھد ءَ وی بی ایم پی ءِ رھشون ماما کدیر بلوچ ءَ وتی ھیال لیکہ درشان کنان ءَ گْوشت کہ پاکستان ءَ مروچی ءَ داں بلوچستان ءَ انسانی ھکانی پادمالی کنگ یکشل ءَ داشتگ، بازیں کَچے ءَ انسانی ھکانی لگتمالی ءُ میان اُستمانی رھبند لگتمالی ءَ سرگوستگ اَنت، بلے میان اُستمان ءَ ھوار انسانی ھکانی ٹاہ دیوکیں کجام ھم ادارہ بلوچستان ءِ ھونریچیں جاور ءُ انسانی ھکانی لگتمالی ءِ سرپد نہ بیتگ –

آئی ءَ گْوشت کہ نوزدہ سد ءُ چِل ءُ ھشت ءَ انسانی ھکانی بنرھبند ءَ منّگ ءُ چریشی ءَ پد انسانی ھکانی بارو ءَ ٹاہ دیگ ءُ آئی ءِ منّگیانی سر ءَ ابید شش دیھکاں بلوچ ءِ نسل کُشی برجاہ اِنت –

ماما کدیر ءَ گْوشت کہ پاکستان جھان ءِ کجام ھم انسانی ھکانی مسام بندی ءِ بروبری ءَ گون نہ اِنت، بلوچستان ءَ ھوار پاکستان ءِ تہ ءَ ھم انسانی ھک پادمال بیگ ءَ اَنت کہ ایشی ءِ سھرائی میان اُستمانی ڈیھ ءُ امریکہ ءَ ھوار سرجمیں جھان ءِ انسانی ھکانی کارکنوکاں کرتگ اَنت بلے ایشی ءَ ابید ھم پاکستان ءَ میانی اُستمانی جھان ءِ بے تواریں کمک گون اِنت

بلوچ نیشنل مومنٹ ءِ پیسریگیں کارگشاد ءُ بلوچ نودربر گل آزاد ءِ گوستگیں سرکماش رھیم بلوچ ایڈوکیٹ ءَ چاگردی رسانکجاہ ٹوئیٹر ءَٹویٹ کنان ءَ گْوشتگ کہ گوستگیں روچ ءَ بلوچستان ءِ دمگ تربت ءَ جنگ بیتگیں پاکستانی لشکر ءِ میجر ندیم بَٹی انسانی ھکانی پادمالیشھریانی لوگ ءُ زورگارانی سوچگ ءَ لشکر ءِ داشتگیں چریکیں سلاہ بنداں کامرد کنگ ءُ نشہ ءِ باپاری کار ءُ بار ءِ وڑیں جرماں دزمانجن ءُیک جنگی ڈودارے بیتگ –

آئی ءَ وتی ٹویٹ ءَ گُشت کہ میجر ندیم بَٹی ءِ لھتے اکس شنگ بیتگ کہ آ پاکستانی لشکر ءِ داشتگیں مردم کوشیں چریکی ءَ ھوار بلوچستان ءِگوستگیں مزن وزیر ڈاکٹر مالک ءِ ھمراھی ءَ گندگ بیت –

زانگ بہ بیت میجر ندیم بٹی کہ بلوچستان ءَ پرنٹیئر کور ءِ جاڑیگیں میجرے  بیتگ کہ لھتے روچاں پیسر بلوچ سلاہ بندیں گل بی ایل اے ءِیک اُرشے ءَ دگہ شش ھمراھانی ھمراھی ءَ جنگ بیتگ –

نبشانک: زِر ءِ پھازُکانی اولی سال روچ اِنت

نبشتہ کار: مزار کریم

من مروچی ھما زَھم جَن ءُ دِلیر ءُ سُھرچَم ءُ مزار بیمیں راج دوستانیں شھیداں سُھرچکیں دروت ندر کن آں آ پہ بلوچ ڈیھ ءُ بلوچ ءِ مَڈیانی ھاتر ءَ پہ زِر ءِ پھازگ ءَ گون دَھر ءِ زوٗراکان پہ مَڑ ءَ ءُ مَنگِھ میڈیتگ اَنت ءُ زوراک پروٗش اِش دات بَلےَ وَت اِش پروٗش نَہ وارت مڈی پُلوکانی
دَست اِش ماں دپّ ءَ داتَگ اَت۔

دِلیر ءُ سُھرچَم ءُ مزار بیمیں بلوچ بچّاں ھچبر پروش نہ وارت ناکہ زمین ءِ سودا اِش جت ناکہ جیڑ اِت اِش اے درگت ءَ سوداگراں مدام گْوشت اَت کہ بدے اِت زمیناں بھا اِش کن اِت بلے نہ من اِت سُھرچَم ءُ مزار بیماں پرچا اے زمین ءَ بھا بہ کن اِیں اے ماتیں مات ءِ سودہ جنگ نہ بیت ماں چوں وتی مات ءِ سودہ ءَ جِت کن ئے۔

مروچی تو مئے ڈیھ سرڈگار پہ زُراں سَری وتی پنجگّاں کُتگ۔مئے ڈیھے ورنا ءُ کماش ءُ پیرزال ءُ زالبول تو درانڈیھ کُتگ اَنت ھما بلوچ کہ مازِندران ءُ اَلبُرز ءُ دِھلی ءُ مَشکَت ءَ آیانی بوٗراں تِرَڈّ اِتَگ مَروچی ماں مَشکَت ءُ مَترَہ ءُ مَزن ھور ءِ آدِگے مُلک ءُ یورُپ ءُ اَمریکا ءُ جَرمن ءُ ھِند ءُ پَرانس ءُ اُسترالیا ءُ اَپریکا ءَ وَدَگ وَدَگ ءُ شِنگ ءُ تالان ءُ جَگانسَر اَنت۔
ماں اگاں مروچی وتی ڈیھ ءِ وتواجَہ وت بوت اِیں ماں چوں جَگانسَر نہ اِت ایں
چہ آ زمانگاں تاں مروچیگ ءَ دگنیا ءُ جِھانیانی توک ءَ باز دِگِری آتکَگ۔
دِلیر ءُ سُھرچَم ءُ مزار بیمیں پُسگاں زانتگ اَت کہ آجوئی ءَ ھون ءِ دَرکار اَنت بے ھون ءَ اے تُن مرکیں چگرد پُل نہ بنت۔ مارا ھون دیگی انت ماں ھون دے ایں ماں ھون داتگ ماں وت ءَ نبشتہ کن اِیں گوں ھِنّی ئیں ھونانی مھلبیں لیکاں وت ءَ راجدپتر ءَ ابدمان اِیں۔

اے راہ کربانی ءِ راہ اَنت اے دِگ دیم ھونی ءِ دِگ انت ا ے راہ بزگی ءِ راہ انت بلے اے کِشّک گوں بلوچ ءِ مرگ ءُ زند بندوک انت۔

اے پند پہ زمین ءَ بُرّگی اَنت اِد ءَ پھتویں پگر ءِ ھمراھی ءَ پولاتیں جوزگ درکار انت کندن بوگی انت ھرچی سگگی انت بلے نود شنزیں سنگر یل کنگی نہ انت۔

گوستگیں سال ءَ بزان یازدہ سوچکان دوھزار نوزدہ ءَ ھما زَھم جَن ءُ دِلیر ءُ سُھرچَم ءُ مزاراں گوادر ءَ پاکستان ءِ بستگیں پی سی ہوٹل ءِ تھ ءَ پُتر اَنت بازیں کلاکاں گوں دژمن ءِ داشتگیں مڈی پُلوکانی سَر ءَ اُرش کن اَنت ءُ پی سی ھوٹل ءَ سرجم ءَ تباہ کن اَنت تاں گڈی تیر ءَ گوں وتی دستاں وت ءَ وت جَن اَنت ءُ شھادت نوش کن اَنت۔

بَلے وت ءَ دژمن ءِ دست ءَ ندے اَنت گڑا پاکستان ءَ اے ھبر پھمگ لوٹ اِیت کہ بلوچ اے جنگ ءَ ھچبر دستکش نہ بیت داں یک بلوچے ھست ءُ ھیات اِنت اے جنگ دیم ءَ جُنزان کنت۔
پدائی زَھم جَن ءُ دِلیرانی جُھد ءَ را سَد سلام اِنت کہ سرجمیں دگنیا ءِ دیم اِش گوں وت کُتگ اَت۔
اے کاروان مجید برگیڈ ءِ کاروان اِنت کہ مروچی دیم ءَ جُنزان اِنت آشوب وت یک نوکیں دْروشمے ءَ وت ءَ مھلوک ءُ دگنیا ءِ دیم ءَ زاھری کنگ اِنت کہ بلوچ آجوئی لوٹ اِیت بلوچ بلوچستان ءِ ھَکی وارث اَنت بلوچ گوں پاکستان ءَ ھَوار بُوَگ نہ لوٹ اَنت بلوچ ءَ ھپتاد سال ءَ ساری اے جنگ بندات کُتگ داں روچ ء مروچی انگہ جُنزان اِنت بلوچ پہ وتی ھَک ءِ واست ءَ چہ مَرگ ءَ چَک ءُ پَد نہ بیت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گران نھادی ءَ لس نیزگاریں مردمانی اڑ ءُ جنجال دومی نیمگ ءَ دکاندارانی بگیری ءَ سرکاری گامگیج،

تربت ءَ گران نھادی، دیرگوستگیں ءَ سپا نہ کرتگیں شِیرانی دکان بند کنگ بیتگ –

دمگی مھلوک ءِ گوشگ ئے پدا ڈپٹی کمشنر کیچ میجر مھمد الیاس کبزئی ءِ پرمان ءَ اسسٹنٹ کمشنر تربت ھرم ھالد ءَ لیویز لشکر ءِ ھمراھی ءَ تربت ءَ زگریں شِیر ءُ مَستگ بھاکنوکانی دکانی سر ءَ بیڑ برتگ ءُ بند کرتگ اَنت –

ھمے وڑ ءَ ردیگ ءِ سیمسراں چَہ چاردہ کنٹینر وردنی سامان ءَ پُر بیتگ ءُ دیم پہ تربت ءَ سر بیتگ اَنت ءُ نھادجاھاں وردنی سامانی پجانگ بروبر بیتگ –

دمگدار ءَ گْوشت کہ مروچی سھب ءَ ایران ءَ چَہ دو بائوزر ایل پی جی، دو کنٹینر کِٹیگ ءُ دَہ کنٹینر شِیر، روگن، ناہ ءُ دگہ ھواریں وردنی سامان ءَ پُر بیتگ ءُ اتکگ اَنت –

آئی ءَ گوشت کہ ما بازیں منت ءُ زاریاں پد چہ ایران ءِ سیمسراں اے وردنی سامان آھورتگ ءُ تربت ءِ نھاد جاھاں سر کرتگ اَنت –

آئی ءَ گوشت کہ ھپتگے ءِ تہ ءَ پانزدہ کنٹینر آرگ بیت ءُ سامان ءِ پجارینگ ءَ دکاندار ءُ باپاری مردم اے مسام ءَ بہ دار اَنت ھما نھاد سرکاری رد ءَ کنگ بیتگ ھماھی ءَ گیشتر کسے ءَ مہ گر اَنت –

گُلامی مارِشت ودی کنت

نبشتہ کار: مھناج مُکتار

من ءَ یات انت دو ھزار سینزدہ ءِ گپ انت کہ ما لھتیں سنگت چہ وتی اوتاک ءَ لڈ ات ءُ دگہ اوتاکے ءِ نیمگ ءَ جنز ات ایں گُڑا ما گپّڑے راہ ءَ شت ایں کہ دو گونڈیں زھگ مارا سنگتاں گوانک جنگ ءَ ات! سنگتاں چک جت داں گِند ایں کہ دو گونڈیں زھگ انت ءُ ایشانی اُمر چہ شش یا ھپت سال ءَ گیش نہ ات انت کمیں پَس اش گون ات بلے ما اوشتات ایں ءُ مئے نزیک ءَ کہ گونڈل اتک انت۔ ما گند ایں کلیگے آپ ءُ چادرے ءَ گونڈیں گِرھن ءِ بستگ ات اش ، گونڈلان ءَ کوش پاد ءَ نیست ات۔ گُڑا چہ دوئیناں مئے سنگتاں جُست کُت “ھال کن ات چون ات شما ؟
گونڈلاں درّائینت “مارا گوں وت بر اِت ، ما گوں شُما کا ایں گوں ،،
سنگتاں کند ات ءُ گْوشت کہ شُما گوں ما آتک نہ کن اِت، شُما گونڈ ات ءُ شُمارا کوش چمپل پاد ءَ نیست۔ شُما اے گرم ءِ جل ءَ نہ سُچ ات ؟ شُما وانگ ءَ پرچا نہ رو ات؟”

مستریں گونڈو ءِ چم گُلگُل بوت انت ءُ گُشت ئِے “ما پمیشکا گوشگ ءَ ایں کہ مارا گوں وتی ھمراھی ءَ بر ات گوں کہ مارا دگہ ھچ نیست، کمیں پس ھست کہ ما سھب ءَ پاد کا ایں ھمے نزّیک ءُ گوراں چارین ایں، پد ءَ دِیگر ءَ گِس ءَ رو ایں، مئے ورگ پسانی شیر انت ءُ منی مات دو نگن سھب ءَ پچ ایت، من ءَ ءُ منی برات ءَ دنت، ما ھمے دوئیں نانان زور اینلں ءُ گرم ءَ پسے دوش این ءُ ور ایں، منی پت ءُ ماتاں دگہ ھچ نیست۔ ما گریب ایں، ما پمیشکا گُشگ ءَ ایں کہ مارا بر ات گوں ما اگاں دگہ مزنیں کارے کت نہ کن ایں پہ شُما دارے چِت کن ایں ، آپے آؤرت کن ایں، مارا گُنجائش نہ کنت کہ ما شھراں وانگ ءَ بہ رو ایں، مئے ھلک ءَ وانگجاہ نیست شُما مارا بہ وانین ات۔۔”

من وھدے گونڈل ءِ گپ اِش کُت انت گُڑا منی دل ءَ انچیں دردے زُرت ءُ چم گُلگُل بوت انت۔ من سنگتاں یک یک ءَ چارگ ءَ ات آں ھر یکے چہ من ءَ گنتر انت گڑا مارا دو سے کماشیں سنگت ھم ھمراہ ات، گونڈلاں سرپدی اِش دات ءُ گْوش اِش “شُما مئے چُک اِت، مئے سنگت اِت ، دل ءَ دلجم بِہ بِہ اِت کہ شُما مستر بِہ اِت گڑا ما شمارا وتی ھمراہ کن ایں”
ھر سنگتے ءَ کہ زر گون ات، گیشتریں سنگتاں یک سد دو سد یکے پنچ سد ھمے وڑ ءَ زر دات کہ شُما پہ وت ءَ گُد بہ زور ات ءُ کوش بہ زور ات ءُ تسلّا دات انت۔ گُڑا ما در کپت ءُ پہ وتی منزل ءَ رھادگ بوت ایں۔ ما دانکہ منزل ءَ سر نہ بوتگ ات ایں، ما ھمے گونڈوانی بارہ ءَ گپ کنان ات ایں کہ باریں دگہ چُنت زھگ ءُ زالبول ھمے گُلامی ءِ پنجگاں بے وس انت ءُ آیانی ھال چی انت۔

وھد گوزان ات ءُ ھُدا بزانت اے ھبر ءَ را سے سال گْوست اگاں کمیں گیشتر گڑا چہ مئے ھما ھمراھاں دو سنگت پد ءَ ھما نیمگ ءَ سپرے ءَ بنت کہ اناگاہ ھمے دوئیں گونڈل یک سنگتے ءَ پجّا کار انت، گڑا سنگت گوش ایت ھمے گونڈلاں من ءَ گوانک کتگ او پلانی او پلانی گُڑا من چک جتگ داں گِند ایں کہ دو کسانیں ورنا انت ما اوشتاتگ ءُ آتکگ ایں، سلام اِش داتگ ءُ من جُست کتگ “شُما کئی زھگ اِت؟”
گونڈلاں درّائینت کہ مارا پجا نیار ات سنگت گوش ایت “اِنّاں!!”
گْوشتگ اِش”ما ھما زھگ ایں کہ ما شمارا گْوشتگ مارا گون وتی ھمراھی ءَ بر اِت، شما مارا نہ بُرتگ گون بلے زر داتگ کہ پہ وت ءَ چمپل ءُ گُد بہ زور ایں ، ما ھما گونڈل ایں۔ سنگت گوش ایت من گُشتگ “ھو ھو!! شمارا زان آں”

گڑا گوشت اِیت ما درچکے ءِ بُن ءَ نشتگ ءُ گپ ءُ ھال کُتگ گڑا پد ءَ مارا گُشتگ اش نوں مارا بر ات گوں ۔
من گْوشتگ “ما انوں دگہ نیمگے ءَ روگ ءَ ایں، پد ءَ انشااللہ شمارا بر ایں گوں”
گْوشتگ اش “شر اِنت ما درکپتگ ایں ءُ پیداک ایں۔”

شمارا سِتک ءُ باور کنت من چنچو رند ءَ ند ءُ کاگد زرتگ انت کہ اے سرگوست ءَ نبشتہ بہ کن آں ءُ ھر وھدے کہ من ھمے ھیال ءَ کپ آں من اے دگنیا ءَ نہ باں چم گُلگُل بنت۔

اے گپ ءَ من پمیشکا گُشت کن آں کہ گُلامی مارشت پیداک کنت پرچی ءَ کہ من ھمے دوئیں زھگانی مارشت اش کُت انت ۔من ھمے سرپد بوت آں کہ گُلامی انچیں ھِلّتے کہ سما ءَ پاد کنت ءُ مارشتاں زندگیں وابے دنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن پرنٹ ءِ جارکش میجر گوھرام بلوچ ءَ کیچ ءَ چار لشکری کارمندانی کوش ءِ زمہ واری منّ اِتگ ءُ گْوشتگ کہ یک شمبے ءِ روچ ءَ کیچ ءِ دمگ کڈ ء ھوٹل ءَ ھستیں پاکستانی لشکر ءِ بنجل ءِ سر ءَ سنائپر، راکٹ ءُ نوکیں سلاھانی گون ءَ اُرش کرتگ ءُ سَے کارندہ کُشتگ ءُ بازیں کارمندے زدگ کرتگ –

ھمے وڑ ءَ کیچ ءِ دمگ مند ءَ اپسار لشکری چیک پوسٹ ءِ سر ءَ سنائپر ءِ گون ءَ اُرش کرتگ ءُ یک کارمندے کُشتگ –

میجر گْوھرام بلوچ ءَ گْوشت کہ زورگریں لشکر ءِ سر ءَ اُرش زیردستیں بلوچستان ءِ آجوئی ءَ برجاہ بنت

بلوچستان: بھاؤلدین زکریا شھدربرجاہ ءِ نودربر ءَ ھوار پنچ مردم بیگواہ

دی بلوچستان پوسٹ

بلوچستان ءِ دو جتائیں دمگاں پاکستانی لشکر ءَ دو نودربراں ھوار چار مردم دزگیر کرتگ ءُ پھمیانگیں جاھاں برتگ اَنت –

سر بیتگیں ھالانی رد ءَ گوستگیں روچ ءَ بھاؤالدین زرکریا شھدربرجاہ ملتان ءَ دو نودربر ناسر ء پُلان ءُ اوتل شھدربرجاہ ءِ نودربر جھانزیب تربت ءِ دمگ آپسر ءَ پاکستانی لشکر ءَ دزگیر کرتگ ءُ پھمیانگیں جاھاں برتگ اَنت کہ چریشی ءَ پد آیانی ھچ وڑیں ھال نیست –

ہیومین رائٹس کمیشن آپ بلوچستان (ھکپان) ءِ شنگ بیتگیں ھال ءَ کیچ ءَ پاکستانی لشکر ءَ نزیر دودا ءِ برات ولی مھمد ءُ آئی ءِ سیاد تنگئی ء ھاشم ءِ ھمراھی ءَ دزگیر کنگ ءُ بیگواہ کنگ بیتگ اَنت –

ھکپان ءِ رد ءَ بیگواہ بیتگیں نزیر دودا دوھزار ءُ چاردہ ءَ چاردہ ماہ ءَ بیگواہ کنگ ءَ پد یلہ کنگ بیتگ – آ پاکستان ءُ ایران ءِ سیمسری دمگ مند مھیر ءِ نندوک اِنت –

چار روچ پیسر ھمے دمگ ءَ پاکستانی لشکر ءَ دو مردم دزگیر کرتگ ءُ برتگ الت کہ آیانی تہ ءَ جاوید ء ایوب ءُ نجیب ء بیری ءِ ناماں بیتگ اَنت –

وائس پار بلوچ مسنگ پرسنز ءَ بیگواہ بیتگیں ورنایانی یل کنگ ءِ دزبندی کرتگ –

چریشی ءَ ابید وی بی ایم پی ءِ رھشون ماما کدیر بلوچ ءَ وتی شنگ کرتگیں یک تامربندے ءَ گَشتگ کہ کراچی ءَ بیگواہ بیتگیں نسیم بلوچ ءِ بیگواھی ءَ یک سالے سرجم بوگ ءَ چاردہ مئی ءَ وی بی ایم پی چاگردی رسانکجاہ ٹوئیٹر ءَ یک کمپئین ءِ بندات کنت –

زانگ بہ بیت گوستگیں سال ءَ ھانی گُل نامی ئیں بلوچ جنینے ءَ شال ءِ پریس کلب ءِ دیم ءَ وائس پار بلوچ مسنگ پرسنز ءِ بنجل ءَ رسانکدرانی اھوالکارانی گون ءَ گپ کنان ءَ پدراھی کرتگ اَت آ ءُ آئی ءِ دیشتار پاکستانی چیریں ادارھاں کراچی ءَ بیگواھی ءِ آماچ کرتگ ءُ اود ءَ لٹ شاپیانی دیمپان ھم بیتگ اَنت –

ھانی گُل بلوچ ءِ رد ءَ آ سَے ماہ ءَ چیریں ادارھانی زوراکیانی آماچ بیگ ءَ پد یل کنگ بیتگ بلے آئی ءِ دیشتار مھمد نسیم انگت ءَ بیگواہ اِنت

منی لِچی یے گِس انگیر ءَ اَت

نبشتانک: منظور بلوچ

Happymotherday

اے لِچ ءِ گس منی ماس ءَ سک دوست ات ایشی توک ءَ یک دار ءِ گوانزگے ِ ھست ات سُھر ءُ سبزیں رنگ داتگیں گوانزگے ، منی پس ءَ چہ کراچی ءَ تھت ءِ ھمراھی ءَ زرتگ ات ، کساس بیست سال ءِ بوت پچ کتگ ءُ تھت ءِ چیر ءَ ایر ات ءُ منی ماس ءَ مدام کہ گس رپت ہلھمے گوانزگ ئِے اوں ساپ کت ءُ تھت ءِ چیر ءَ چیر دات ، اے ھما گوانزگ ات کہ پیرک جان ءَ ایشی توک چنڈینتگ ات ایشی زردیں چٹ انگت ءَ ھما وڑ ءَ سلامت ءُ سابت اِت اَنت ، منی ماس ءَ باز رند ءَ گپ گپ ءَ ھمے گوانزگ ءِ زیبائی ءِ ءُ مُھر ءُ مھکمی گپ جت ، من وتی ماس ءِ چمانی تہ ءَ ھمے دیست کہ آ انگت گوانزگ وھدے کہ پچ کنت ءُ چاریت آ پیرک جان ءَ ھمے گوانزگ ءِ تہ ءَ بچکندگ ءَ گِند ایت ءُ گیشتر کہ پیرک جان کوہ ءَ دیر بکتیں گڑا منی ماس ءَ ھمک ھپتگ ھمے پوتینکان ءَ نیمون ساپ کنگ پَٹ ات انت آئی پیرک ءِ زھیر ءُ ترانگ ہلھمے لچ ءِ گس ءِ تہ ءَ پٹ ات انت ءُ وت ءَ را سھڈینت۔۔۔

بلوچستان ءِ آجوئی جنز ءَ کہ سر چست کت اے لچ ءِ گس ءِ ساھگ ءَ باز سرھیلیں ورنا ھمے گس ءَ وتی ساھگ ءَ جاگہ دات ، اے گس نوں من ءَ اوں دوست ات ایشی گرماں ساھگ سرد ءُ زیمستان ءَ چُل ءِ سر سک باپ ءُ وش ات ۔
زیمستانیں شپاں ھمیشی چُل ءِ سر ءَ ڈاکٹر کمبر مبارک، شبیر لکمیر، ڈاکٹر منان جان ،بچو جان ، التاپ آپتاب ، پاروک تلار، مھراب اُمر ، آبد رسول ، نواز گلاب ، وھاب نوروز ، دگہ بازیں سنگت کہ ھست ءُ سلامت انت (اللہ پاک سلامت اش بکنات ) ءُ دگہ بازیں کہ دشمن ءِ مرچی بور ءَ سوار انت پیرک جان ءُ نابودیں من پہ دیوان گوں سنگتاں شپ روچ کتگ انت ،

سال شش ماہ ھینچو روان ات اَنت ءُ سنگت پد ءُ پیش ، پاکستان ءِ زورگریں لشکر وتی داسپان اَنت ھرچ ھلک ءُ میتگاں جنان ات سوچگ ءُ ماندارگ آئی مستریں سلاہ ات ھچ چشیں ھلکے نیست ات بلوچستان ءَ کہ نہ سھتگ ءُ پر نہ بوتگ ات ھچ چشیں گسے نیست ات کہ آئی ءِ توک ءَ بلوچ مھلوک ءِ پِس ءُپیرکی ءُ زھگ نماسگی یات نہ سھتگ ءُ پُر نہ بوتگ ات اَنت ءُ ھچ چشیں دل سھتگیں بلوچ ءِ نیست ات ءُ انگت ءَ نیست کہ وتی یاتانی سچگ ءِ باریگ ءِ ودار ءَ نہ انت ۔

ھمے لچ ءِ گس باز گشت آں پاکستان ءِ زورگریں لشکر ءِ انگراں بوتگ ءُ گوں وتی پلیتیں بوٹاں ایشی تگرد اش لگت داتگ انت ءُ ماس ءُ گھارانی پُچ ءُ نپاد اش شنگ شانگ کتگ انت ۔

چار سال پیش سیمی رند ءَ اے لچ ءِ لوگ پد ءَ پاکستان ءِ لگوریں لشکر ءِ انگراں بوت ءُ اے رندی لشکر انچش باز ات اَنت کہ کلیں پروم اش پہ بوٹ پلک کتگ ات ۔
من گوں ھمراھاں اے کلیں ندارگاں گسانی دیم ءِ کوہ ءِ سر ءَ نشتگ ءُ چارگ ءَ اتاں کلیں کشک ءُ دگاں پوجی گاڑیانی دنز چو ایروپ ءَ مک ات اَنت ءُ دیر نہ بوت ھمے گس ءِ دوت آزمان ءَ مک بوت انت ءُ منی ھیال وتی ماس گھاراں پد ھمے گوانزگ ءَ شُت کہ منی ماس ءَ سک دوست ات ءُ آئی ءَ وتی پیرک جان ءِ کسانی ءِ بچکند ھمیشی توک ءَ دیستگ ات اَنت ,

بلے وھدے ما میتگ ءَ سر بوت ایں مات ءَ نہ گوانزگ ءِ گپ جت نہ وتی سھتگیں دست ءِ تھنا ھمے گشت ئِے کہ من ءَ آچ ءَ موہ نہ داتگ شمے درسیں کتاب سھتگ انت من ءَ تھنا نیم سھتگیں کران دست کپتگ.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھشت مئی ءَ بیتگیں رسانکی دیم پہ دیمی مراگشے ءَ یورپی یونین ءِ باسکانی ھمراھی ءَ بلوچ رھشون مھران مری ءَ ھم وتی ھیال درشان کنان ءَ گْوشتگ کہ میان اُستمان ءِ سیکٹری جنرل انٹو نیوگوٹیرس جھان ءَ اے گوشتگ اَت کہ ھر کجا جنگ بوگ اِنت آ اے وبائی نادرھائی آیگے سوب ءَ جنگ بندی بہ کن انت بلے پاکستان اے مسام ءِ بگیری ءَ کنگ ءَ اِنت پاکستانی لشکر ءَ بلوچستان ءِ تہ ءَ وتی لشکر کشیاں گیشی آؤرتگ ءُ بلوچ، سندھی، پشتون ءُ کشمیری لس مھلوک ءِ چُکچینی ءَ کنگ ءَ اِنت-

مراگش ءَ تران کنان ءَ آئی ءَ گُشتگ کہ نِی ھما بن گپ ءِ سر ءَ کایاں کہ ھمائی ءِ سر ءَ اے مراگش برجم دارگ بوتگ بلوچستان ءِ تہ ءَ انسانی ھکانی لگتمالی الکاپی ءَ بوگ ءَ اِنت، بلوچ اھوالکار ساجد ھُسین ما سویڈن ءَ آئی ءِ کوش دردناک انت ما سویڈن ءِ واکداراں چہ امیت داریں کہ آ ساجد ھسین ءِ درگت ءَ پٹ ءُ پول کن اَنر سویڈن ءِ سرکار ءِ نیمگ ءَ چہ دنیگت ءَ پشدری پسو نہ رس اِتگ بلے من پدر کنگ لوٹاں کہ ساجد ھُسین ءِ کوش ءِ پژدر ءَ پاکستانی چیریں ادارہ ءُ لشکریانی دست تچکی ءَ مان اِنت –

آئی ءَ دیمتر ءَ گُشتگ کہ بلوچستان ءِ تہ ءَ اے مدامی ءَ بوگ ءَ اَنت کہ بلوچ رھشون، دانشور ءُ زانتکار ءُ راجداریں باسک ءُ وانندھیں نودربراں ریاست وتی ناشرکاری ءِ نشانگ جوڑ کنت ھر کسے کہ راجداری ءُ چاگردی راجی مزانی یا آجوئی ءِ گپ ءَ کنت گڑا آئی ءَ بے بنیں ریاست ءَ چہ ترس اِنت- بلوچستان ءَ ھپتاد ءُ دو سالاں چہ تھنا پاکستان ءِ زوگری نہ انت بلکیں پنجاپی زوردستانی ءِ انگیر ءِ تہ ءَ اِنت جیو اسٹریجک پوزیشنگ ءِ ھاتر ءَ میان استمان ءِ رھبند ءَ یک جتائیں جاھے ءُ چین وتی سرجمیں جھد ءَ کنگ انت کہ انسانی ھکانی کونسل میان اُستمان ءَ وتی وتمانی ءَ برجم بداریت – انسانی ھکانی ادارہ چائینہ ءِ بگیری ءَ گپ جنگ ءَ ترس انت پہ درور ءَ وھدے سوائن پلو تالان بوتگ گڑا میان استمان ءَ آئی ءِ بھتان میکسیکو سر ءَ لڈتگ وھدیکہ کرونا وایروس ءِ نادراھانی دار ءُ مدار چائینہ اِنت میان استمان وڑیں ادارھانی بے تواری اجکہ کنت ءُ من ءَ پاکستان ءُ چائینہ ء یکجاھیں جھد سبب جینوا میان اُستمان ءَ انسانی ھکانی مراگش ءَ من ءَ وتی راج ءِ توار جوڑ بوگ ءَ دارگ بوتگ جھانی انسانی ھکانی ادارہ بس ندارہ چاروک انت –

آئی ءَ تران کنان ءَ گُشت کہ بلوچستان ءَ انسانی ھکانی لگتمالی مشرپ ءِ دور ءَ چہ بندات انت. پاکستانی لشکر ءِ شور بلوچستان ءِ درگت ءَ پدر انت، مشرپ وت یک تامرے ءِ تہ ءَ درشان کنت کہ ما بلوچاں ھمود ءَ جن ایں کہ آھاں ھچ گمان نہ بیت. مرتگ چمیں دژمن وتی شَورانی سر ءَ چادر پردیگ ءِ ھاتر ءَ آئی ءَ نواب اکبر ھان بگٹی، منی برات بالاچ مری، گلام مھمد، لالا منیر ءُ دگہ بازیں بلوچ رھشون شھید کرتگ. پاکستانی ریاست ءَ بلوچ چکچینی ءِ شَور بندات کتگ مشرپ وتی دگہ گلگدارے ءَ اے ھم گُش اِیت کہ دری ڈیھاں پاکستان ءِ دژمن نشتگ انت آ ھم کُشگ بنت ءُ ایشی ءَ ھر ھما چیریں کنت ما جھان ءَ انسانی ھکانی ادارھاں چہ لوٹ کن ایں کہ آ گامگیج بزور انت –

آئی گشتگ کہ 28 مئی 1998 بلوچ راج ءُ بلوچستان ءِ واستا دردناک انت. کہ ھمے روچ ءَ پاکستان ءَ بلوچستان ءِ کوھاں وتی آس ریچیں تراک چکاس کرتگ اَنت – کہ مئے راج ءِ واستا ھیروشیما، ناگاساکی ءُ 9/11 انت. کہ آئی تابکاری ءَ چہ لس مھلوک ارجان بوتگ کوھاں وتی دروشم مٹینتگ، ردومیں مڈی ءَ چہ پُریں بلوچستان ءَ پنجابی جنرل وتی ھیش ءُ نوش ءِ واستا لُٹگ ءَ انت آ بادشاہ جوڑ بوتگ انت. بلوچستان ءَ سرکاری نام ءِ سر ءَ کاسگ چٹ جام کمال ءِ دروشم ءَ اَنت ءُ اے وڑیں مردم بس وٹسپی گروپ کارمرد کنگ ءِ مانزمان اَنت-

پی ٹی ایم ءِ رھشون پزل الرھمن آفریدی ءَ گُوشتگ کہ ما پشتوناں سوج ءُ سر کنگ ءَ اَنت کہ پاکستان ءِ پنجاپی مارا بلوچانی بگیری ءَ کارمرز کنگ اِنت پرنٹیر کور ھمنکس کہ پشتون انت ما آھاں گُشگ لوٹیں کہ بلوچستان ءَ وتی براتانی چکچینی ءَ پنجاپیانی دیمکار جوڑ مہ بنت-

بلوچ رھشون مھران مری ءَ پی ٹی ایم ءِ رھشون پزل الرھمن ءِ دانکانی منت گپتگ ءُ گُشتگ کہ پی ٹی ایم پشتون راج ءِ ھاتر ءَ یک دادے ءَ چہ کمتر نہ انت پشتونانی گون ءَ مئے دیرگیں سیادی ھست ما ھندی، چاگردی تک ءُ پھناتاں یکیں وڑ ءَ بندوک انت. پشتون ورنایاں پنجاپی اسٹپلمنٹ یک سنچ ءُ سمائی ردے ءَ کارمرد کنگ انت پشتون ورنایاں پرنٹیر کور ءَ برتی کنت انت بلوچستان ءَ دیم دنت ءُ آ بلوچ چکچینی ءَ ھوار انت کہ آئی ءِ سوب ءَ بلوچستان ءَ ھمے سوچ کنگ بوگ ءَ انت کہ پنجاپیانی ھواری ءَ پشتون ھم بلوچ ءِ چکچینی ءَ کنگ ءَ اَنت پی ٹی ایم باسکانی نیمگ ءَ اے گپانی پدرائی وش آھتی اِنت کہ آ اے چیزاں مارگ ءَ اَنت –

یک جست ئِے پسو ءَ مھران بلوچ ءَ گُشت کہ پاکستان ءَ وتی ردیانی پسو کنگ ءِ سنچ دارگ ءَ وت ءَ رد دیگ ءَ انت ما امیت دار ایں یک روچے مارا مُز الم رس اِیت آئی ءَگُشت کہ آ روچ دور نہ انت وھدیکہ زیردستیں بلوچ ءُ پشتون شاتمانی کن اَنت –