چَہ چیدگ ءَ ھما دیم
ٹی بی پی شونگال
جون ءِ 29 رمس ءَ چار سلاہ بندیں مردماں پاکستان ءِ اسٹاک ایکسچینج (پی ایس ای) ءَ بیڑ برتگ ءُ ماڑی ءِ تہ ءَ روگ ءِ جھد اِش کرتگ اَت، سرزاھری ءَ اے اُرش کارانی واھگ ماڑی ءِ تہ ءَ پترگ ءُ آئی ءِ گرگ بیت اِنت۔ سرکاری بنشونانی رد ءَ اے دیمپانی ءَ پھزدارانی چار کارندہ مرتگ ءُ شش زدگ بیتگ ءُ وھدیکہ اے دیمپانی چاریں اُرش کارانی جنگءَ پد ھلاس بیت۔ بلوچ آجوئی دوستیں سلاہ بندیں گل بلوچ لبریشن آرمی ءَ اے اُرش ءِ زمہ واری منّ اِت ءُ گوشتگ اَت کہ اشانی مول ءُ مراد نا ایوک ءَ پاکستان بلکیں چین ءِ زرکاری ءِ نشانگ بیتگ پرچاکہ چین پی ایس ای ءَ چِل درسد بھرمند اِنت –
پاکستان ءِ اسٹاک ایکسچینج ءِ چیئرمین ءِ رد ءَ آئی ءَ یک “پول پروپ ” ئِے پھزداری ءِ داشتگ۔ ماڑی ءِ نگھپانی ءَ ڈنی 25 پھزداراں ابید پولیس ءِ کمانڈوز ھم نگھپان کرتگ اَنت، کہ اشاں ماڑی سئیں نیمگاں پھزداری ءِ سنگر داشتگ اَنت۔ بلے سلاہ بند اے ترندیں پھزداری ءَ ابید ھم پھزداری ءِ پروشگ ءُ تہ ءَ پُترگ ءَ سوبمند بیتگ اَنت بلے وتی ساہ ءِ ندری ءِ نھاد ءَ۔
اے گپ تچکی ءَ زانگ بیتگ کہ اے یک چیدگی اُرشے بیتگ، بلے 29 جون ءَ بی ایل اے ءِ اُرشانی ترندی ءِ زورانی چیدگی ءَ چہ دیم بیتگ۔
سندھ ءِ سروزیر مراد الی شاہ ءَ یک درشانے ءَ گْوشتگ کہ اگاں اے اُرش دارگ نہ بیت اَنت اے پاکستان ءِ واستا باز بیمناکیں رنگے ءَ بنت، ھما کچ ءَ ورلڈ ٹریڈ سینٹر ءِ سر ءَ اُرش ءَ امریکہ ءَ تاوان بیتگ۔ بیت کنت آ اے گپ ءَ مسکراھی یے سرپد بنت بلے مراد الی شاہ رد نہ اِنت، پاکستان ءِ زرکاری یک ناوڑیں جاورھالے ءِ دیمپانی ءَ گوزگ اِنت ءُ زبھری ءِ سیمسراں درنجوک اِنت ۔ اے وڑیں جاورھالاں یک سوبمندیں اُرشے زرکاریانی سِتک ءِ پروشگ ءِ ھاترءَ پہ بس بیتگ اَت، کہ پاکستان ءِ زرکاری ءِ جون ءِ سراگُڈی کِلاہ ءِ منانک بیتگ اَت۔
رسانکدرانی ھرچ ٹاھے داتگ، چریشی ءَ ابید راستی ءَ اُرش ءِ لھتے ادارھاں پد پاکستان ءِ زرکاری ءَ اے اُرش ءِ سانانی چارگ بندات بیتگ، بازار ءَ کم نھادی بندات بیتگ چریشی ءِ سوب ءَ انڈیکس 220پوائینٹساں جھل اتکگ۔ ھمے وڑ ءَ پیسر ءَ چہ نیزوریں پاکستانی زر ءِ نھاد ءَ گیشتر جھلی اتکگ ۔ دومی روچ ءَ ڈالر ءِ کچ ءَ کلدار ءِ نھاد 0.3 درسد جھلی اتکگ چریشی ءِ سوب ءَ ڈالر 167.6 ءَ سر بیتگ ۔
دورچاریں چماں اے اُرش ءَ چہ پیداک بیتگیں زرکاری ھترمال ءَ، پاکستانی سیکیورٹی اسٹبلشمنٹ ءِ واستا درستاں گیشتر گمانی گپ بلوچستان ءَ برجاھیں جنگ ءِ بلوچستان ءِ سیمسراں درکپگ ءُ بلوچ سلاہ بندانی اُرشانی تھءَ گھتریں زور مندی اِنت، کہ پاکستان ءِ زرکاری ءِ بنجاھی بنجل کراچی ءِ نامی ئیں ءُ مھکم تریں جاھاں کہ کسانیں وھدے ءَ پد مہ پد دوبر نشانگ کنگ بیتگ اَنت (پی ایس ای ءُ چینی کونسل ھانہ)-
پھازوکیں زانتکارانی رد ءَ ھما وڑ ءَ کہ جوانیں سلاہ چہ اُرشکارانی گور ءَ دزکپتگ اَنت، چریشی ءَ چَہ اے گپ پدر بیت اِنت کہ بی ایل اے ءَ سبک سبک ءَ داں سلاھانی نھادی ءِ چیریں نھاد جاھاں وت ءَ سر کرتگ ۔
اے اُرش ھما چیدگی ءِ درشان اِنت کہ دو دھکاں برجاھیں جنگ ءَبی ایل اے ءَ “اربن گوریلہ جنگ” ءِ نوکیں اھدے ءَ رس اتگ کہ گوست ءَ چہ گیشتر نی ھترناک بیت کنت۔
بی ایل اے ءَ اے اُرش ءِ بارو ءَ کہ سرجمیں درشان شنگ کرتگ اَت، آئی ءِ رد ءَ آیاں اے اُرش ءَ سندھی راج ءِ سرجمی ءَ کمک گون بیتگ۔ چریشی ءَ چَہ زانگ بیت کہ اے اُرش یک ھمساھگیں راجے ءِ سیمسرانی تہ ءَ روگ ءُ کنگ نہ بیتگ بلکیں “ھمگرنچیں دشمن” ءِ ھلاپ ءَ داوت ءِ بیتگ۔ چہ اِشی ءَ ھمے گمان کنگ بیت کہ آؤوکیں وھداں گیش ھمگرنچیں اُرش بیت کن اَنت۔
