TBP Balochi

دی بلوچستان پوسٹ

روکپتی بلوچستان ءَ جھانی ناداھی کرونا وائرس ءِ کچ گیش بیان اِنت، نوکیں مردمانی نادراھی ءِ گورجنگ ءَ کرونا وائرس ءَ گپتگیں مردمانی کَچ گیش بیتگ اَنت –

اھوالکار ءِ رد ءَ بیست ءُ چار ادارانی تہ ءَ یک سد ءُ ھپتاد ءُ پنچ کرونا نادراھی ءِ آماچ بیتگ اَنت کہ چریشانی تہ ءَ دَہ مردم بیران بیتگ اَنت –

اھوالکار ءِ رد ءَ نوکیں نادراھانی پدراھی ءَ پد روکپتی بلوچستان ءَ ھبدہ ھزار ءُ دو سد ءُ بیست ءُ دو مردمانی کَچ ءَ سر بیتگ اَنت –

کرونا وائرس ءَ بیران بیتگیں مردمانی کَچ ھپت سد ءُ چِل ءُ یک ءَ سر بیتگ اَنت –

چاگردی مردمانی گوشگ اِنت کہ سرکار نادراھانی ھیال ءَ کنگ ءَ نہ اِنت پرے ھاتر ءَ دمگ ءَ کرونا وائرس گیش ودان اِنت ءُ مردمانی ساہ ءَ گران اِنت –

نبشتانک: نمدی ءِ پہ وتی ماتی ءَ

نبشتہ کار: زمین زھگ

دی بلوچستان پوسٹ

ماتی!
ماتی دوشی من سک دیراں ودار کُت، بلے ودار ناسرجم بیتاں۔۔۔ شپ گوست ءُ بام ءَ ٹِک دات روچ زمین ءِ دلبند ءَ آستو آستو کپان اَت منی ودار مناں بے تاھیر کنگ ءَ اَت بلے منی ھیال گوں منی موبائل ءَ اَت –

ماتی! اے ھما روچ اِنت کہ من گِس یلہ دات۔۔۔ اے ھما روچ اِنت کہ تو ھمک سال ھمے روچ ءَ اے گپ لازم جتگ کہ بیا کہ نی تر ءَ دگہ سال ءِ سرجم بوت – ماتی انچوش کہ تو ھمک روچ ءَ گوں زھیر ءُ اُپاراں گوازین ئے شپ ءَ گوں یاتاں۔۔۔ انچوش مناں ھم ترا پہ سک زھیر کنت –

او ھمے ساھتاں ءَ سویس نبشتکار کارڈینال مرمیلوڈ ( cardinal Mermillod)ءِ گشتن مناں مدام گیر پیداک اِنت کہ ” مات ھما چیز انت کہ ھرکسی جاہ ءَ گیپت کنت بلے دگے چُشیں کس نیست کہ مات ءِ جاہ ءَ بہ گیپت ” منا باز رند ءَ تئی چارگے تلب بیتگ، وتی دردیگیں ساھتاں منی دیم ءَ بس تئی اکس زاھر بیتگ او پدا تئی زھیر، تئی مھرانی ھاتر ءَ من سک باز تلوس اتگاں—بلے۔۔۔ پد ءَ وتی پیسلہ ءُ جنگ۔

جنگ پہ باندات ءَ، جنگ گوں وت ءَ، جنگ زمینی ھداھانی تپاوت ءَ ھتم کنگ ءَ، جنگ پہ آزاتیں استان ءَ ۔۔۔ جنگ پہ وتی ھک ءِ ادا کنگ ءَ۔

ماتی بلوچ کواس کازی داد ریھان ءِ گوادر مُچی ءَ گوشتگیں گپ مناں سک دوست بیت – واجہ گوشیت کہ مناں ھم جنگ دوست نبیت بلے جنگ ءَ ابید بیا مناں دگے راھے بہ ڈس کہ ھما منی ایمنی ءِ راہ بہ بیت، ھما منی شھیدانی پیش داشتگیں راہ بہ بیت –

او ماتی! مناں ھم، من زاناں تو باز جیڑیتگ کہ من چتو اے پیسلہ زرتگ ءُ اے وتی نازرکیں کوپگاں اے جنگ جاہ داتگ کہ من ھما زھگ بوتگاں کہ مگرب ءَ پد گِس ءَ چہ در نہ کپتگاں مرچی چار سال انت کہ گِس ءِ جند نہ دیستگ –

ماتی یک سپاھیگ ءِ وتی مات ءِ نبشتہ کُتگیں کاگدے پسو ءَ ھمے گوشیت کہ مناں اگاں دو اُوپشن دئیگ بہ بیت چُٹی لوٹے یا جنگ جاہ ءَ رؤگ لوٹے؟ گڈا من جنگے ھاتر ءَ جاڑیگ باں، پمیشکہ کہ اے جنگ ءَ من پہ شما کنگ ءَ آں، اے ہرگز لازم نہ انت کہ منی پیسلہ چہ ھمے زانگ بہ بیت مناں پہ شما زھیر نہ کنت –

لبز گران ءُ سنگین اَنت، مُتاثر کننت، کار کنگے توکل ءَ دیاں اے مُرتگیں ارواہ ءَ، دَمبرتگیں پاداں جندے ساہ ءَ ھاٹیگ بکش انت – او ماتی مرچی مئے کرا ھما درور ھست اِنت۔۔ بیت کنت زیکیں جنگولانی کرا اے داستان ءُ اے درور نہ بوتگ اَنت – مرچی یک مات ءِ کہ بیرک ءَ وتی زھگے بڈا دئیگ ءَ اِنت ءُ پدائی کنگ ءَ پہ آئی ءِ مستریں توکل جوڈ بوھگ ءَ انت۔۔۔ یک پت ءِ کہ آئی دیم ءَ وتی جندے زھگے ناں بلکیں بلوچستان ءِ ھمک بزگیں مردمانی اکس گندگ ءَ پیداک اِنت –

ماتی اگاں کسے زانت ھما کشک ءَ آ راھی اِنت آ کشک آئی ءَ چہ پد ویران نہ بیت یا ھما توپک کہ آئی ءَ وتی کوپگاں دراتکگ پہ مکسدے ءَ ھما توپک آئی ءَ چہ پد ایر نہ بیت یا آ زانت کہ مناں بیر گروک ءِ ھستیں گڈا آ مرگے ھَمباز کنگ ءَ چک ءُ پد نہ بیت –

ماتی چوش ھم نہ انت کہ من تئی مھر ءَ نہ زاناں، تئی مھرانی کدر ءَ نہ زاناں۔۔۔۔، تئی جیڑگ پہ من چی اَنت سرپد نھاں چوش ھم نھیں۔۔- تئی مھر، تئی گوشتگیں سپت مناں زمین ءَ گوں بندوک کن انت ءُ زمین جنگے ءَ کپتگ۔۔۔ زمین ءَ ھون پکار اِنت –

ماتی من پہ تو ھچ نہ کُتگ، ءُ مناں ستک اِنت من ترا ھچ دات نہ کناں۔۔۔ بلے من دل ءَ جزماں پہ شما لگوری ءِ بدیں نامے ایر نہ کناں ءُ ناکے تو مناں شات بئے کہ کسے تر ءَ لگورئے ءِ مات بہ گُشیت –

اگاں ماتی اشی ءَ پد ھم تو گوشگ لوٹے واتر کن من واتر ھم بوتاں من تئی پیشی زھگ بوت نہ کناں ھچ ڈول ءَ، چیا کہ مروچاں منی مارشت، منی ارمان منی واھگ کُل گوں جنگ ءُ اے کشک ءَ بندوک اَنت کہ من راھی آں – چیاکہ اے جنگ منی جنگ اِنت، منی ھستی ءِ رکھینگ ءِ جنگ اِنت، منی آھوکیں پدریچ ءِ بقائے جنگ انت –

ماتی گڈی رند ءَ گوشگ لوٹاں اگاں پہ من دوا لوٹے، اے مہ لوٹ کہ من سلامت باتاں۔۔۔ اے ھم کہ من واتر بہ کناتاں۔۔۔۔، اگاں دوا لوٹے مئے سوبمندی ءِ دوا بہ کن کہ۔من گوں ھمراھاں مُدام سوب مند باتاں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچ آجوئی لوٹوکیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ پنچ شمبے ءِ روچ ءَ بلیدہ ءِ میتگ جاڑین ءَ دژمنیں پوج ءِ گون ءَ جنگ کنان ءَ گل ءِ کلانیں سنگت لیفٹیننٹ اسحاق بلوچ پنام ءِ رحمین شھید بوتگ –

راجی آجوئی ءِ جد ءُ جھد ءَ آئی ءِ گراں بھائیں دیمونی ءُ بے ستائیں کرد ءَ سھرچکیں دروت ندر کنیں –

گل ءِ جارکش ءَ دیمتر ءَ گوشتگ کہ شھید کمانڈر اسحاق بلوچ مشن ءِ ھاتر ءَ تر ءُ تاب ءَ بوتگ کہ زورگریں پاکستانی آرمی ءِ دوچاری بیتگ گڑا آھانی میان ءَ جنگ ءُ چوپ بندات بوتگ، اے جنگ داں دو ادار ءَ گیش برجاہ بوتگ شھید اسحاق بلوچ کمان کنان ءَ وتی سنگتاں چہ جنگ جاہ ءَ در کنگ ءَ سوبین بوتگ ءُ دژمن ءَ را مزنیں کساسے ءَ تاوانے داتگ وت گوں تمردی ءَ جنگ دیان ءَ شھیدی ءِ منگہ ءَ سر بوتگ –

جارکش ءَ گوشتگ کہ لفٹیننٹ اسحاق بلوچ گل ءِ ھما کماندارانی تہ ءَ ھوار بیت کہ آ چہ راجی جزبگ ءَ سریچ، مھنت، بے دروریں تمردی ءُ پوجی سِنچاں چہ یک زانتکار ءُ دمگ ءَ جوانیں وڑے ءَ وتی سرمچاریں سنگتانی کمانے کتگ –

بی ایل ایف ءِ جارکش ءَ گوشتگ کہ لفٹیننٹ اسحاق بلوچ ءَ کمے وھد ءِ تہ ءَ گل ءِ کلوہ سر کنگے ھاتر ءَ وتی کرد پیلو کرتگ – شھید اسحاق بلوچ بالگتر، کولواہ ، بلیدہ ءُ پروم ءِ وڑیں جنگ زدگیں اسٹریٹجک ءِ دمگانی تہ ءَ جنگی مھازانی سر ءَ سربراھی ءِ پرز ءِ پیلو کرتگ –

جارکش ءَ گوشتگ کی لیفٹیننٹ اسحاق بلوچ بالگتر ءِ تہ ءَجوانیں سنچداریں کماندار بوتگ کہ آئی ءِ کمان ءَ چہ سنگتاں سی پیک ءِ وڑیں سامراجی لٹ ءُ پُلانی بگیری ءَ بے دروریں کار سرجم کرتگ ءُ دشمن نیست نابود کرتگ –

دی بلوچستان پوسٹ

بلوچستان ءِ تہ ءَ جھانی وباء کرونا وائرس ءَ ھپت نودربراں ھوار سی ءُ یک نوکیں مردم اے نادراھی ءِ آماچ بوتگ ءُ دو بیران بوتگ اَنت –

بیست ءُ چار ادارانی میان ءَ ھپت نودربراں ھوار سی ءُ یک مردمانی کرونا وائرس ءِ کیس دیم ءَ اتکگ ، وھدیکہ دو نادراہ بیران بوتگ اَنت-

بلوچستان ءِ جانسلامتی گر ءُ دار کنوکاں کرونا وائرس سیل ءِ رپورٹ ءِ رِد ءَ شمبے ءِ روچ ءَ بلوچستان ءِ تہ ءَ ھپت نودربراں ھوار سی ءُ یک مردم اے نادراھی آماچ بوتگ اَنت کہ چریشی ءَ پد بلوچستان ءِ تہ ءَ کرونا وائرس ءِ نادراھانی ءِ کچ پانزدہ ھزار ءُ نُھ سد ءُ بیست ءُ ھپت ءَ سر بوتگ اَنت، دنیگت ءَ تاں بلوچستان ءِ تہ ءَ پانزدہ ھزار پنچ سد ءُ پنجاہ ءُ سَے مردم دراہ بوتگ اَنت – ھمے وڑ شمبے روچ ءَ یک ھزار ءُ یک مردمانی کرونا ٹیسٹ کنگ بوتگ اَنت بلے دنیگت ءَ آھانی رپورٹ نہ اتکگ انت – رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ دگہ دو مردم چہ اے نادراھی ءَ بیران بوتگ اَنت – چریشی ءَ پد بلوچستان ءِ تہ ءَ بیران بوتگیں مردمانی کچ یک سد ءُ پنجاہ ءُ یک ءَ سربوتگ اَنت –

دی بلوچستان پوسٹ

سر بیتگیں ھالانی رد ءَ گوادر ءِ کوھی دمگ ساھجی کوہ، دور کنڈگ، کنڈاسول، ھُر، بشولی، زریں بگ ءُ بازیں ھند ءُ دمگ پاکستانی پوج ءَ گوستگیں روچ ءَ انگیر ءَ کرتگ اَنت ءُ لشکر کشی بندات کرتگ –

دمگی مردماں ٹی بی پی ءَ گوں گپ کنان ءَ گوشتگ کہ گوستگیں روچ ءَ پاکستانی پوج بازیں کَچے ءَ دشت ءِ جتا جتائیں دمگاں اتکگ ءُ مُچ بیتگ اَنت کوھی دمگ پوج ءَ انگیر کرتگ ءُ لشکر کشی بندات کرتگ –

دمگی مردمانی رد ءَ گوادر ساھجی ءِ کوھی دمگ کنڈاسول ءَ پاکستانی پوج ءَ یک نوکیں بنجلے جوڑ کرتگ ءُ راہ ءُ در بستگ اَنت –

آیاں گوشت کہ گوستگیں روچ ءَ جھلی پوج ءِ کمک ءَ برزی ءَ بالگرد ھم بال بیتگ اَنت ءُ جاہ جاہ ءَ بالگردانی تیرگواری کنگ ءِ ھال ھم بیتگ اَنت –

زانگ بہ بیت بلوچستان ءِ جتا جتائیں جاھاں پوجی لشکر کشی برجاہ اَنت ءُ گوستگیں وھد ءَ پنجگور گچک ءَ پوجی لشکر کشی کنگ بیتگ ءُ ھمے لشکر کشی دراج کش کنگ ءُ کیچ ءُ گوادر ءِ دشت ءِ دمگاں کنگ بیگ ءَ اِنت –

زانگ بہ بیت گوستگیں ماہ ءَ اوماڑہ ءِ کوھی دمگ بزی ءِ کنڈگ ءَ پاکستانی پوج ءِ سر ءَ اُرش کنگ بیتگ اَت کہ اے اُرش ءِ زمہ واری بلوچستان ءِ آجوئی لوٹوکیں ھمسنتیں گل آجوئی سنگر “براس ” جارکش بلوچ ھان ءَ منّ اِتگ اَت –

اُرش ءَ پاکستانی پوج ءِ بازیں کارندھے جنگ بیتگ اَت ءُ آیانی اکس چاگردی رسانکدراں ھم شنگ بیتگ اِت اَنت –

بلوچستان ءِ سیاسی ءُ چاگردی مردمانی گوشگ اِنت کہ پوج ءِ سر ءَ بیتگیں اُرشاں پد پاکستانی پوج لس میتگانی سر ءَ بیڑ بارت ءُ لس دست ءُ گوشیں مردماں نشانگ کنگ ءَ اِنت –

گوادر ساھجی دشت ءِ پوجی لشکر کشی ءِ بارو ءَ تنی وھدی پوجی واکدارانی نیمگ ءَ ھچ ھال دیم ءَ نیاتکگ اَنت –

نبشتانک: آ یک انچیں سرمچارے اَت کہ بے تیر ءَ ھم آسے نہ دات ، گسان کناپانی

نبشتہ کار: شَے حق بلوچ

ودی بوگ ءِ روچ 9اپریل 1936
ودی بوگ ءِ جاہ ھکا ، پلستین
پولو پیر اے گوش اِیت، زُلم ءِ بِزانت ءُ متلب اِنت۔ کُلیں انسانانی کرّ ءَ یکین اِنت ، بِزانکہ دنیا ءِ توک ءَ ھرچ وھد ءَ ءُ ھرچ وڑیں انسان یا راجانی سر ءَ وھدے زُلم بیت گُڑا آ زُلم سرجمیں جھان ءَ یکیں اسرات ءَ ایر کنت ءُ بوت کنت آ زُلم ءِ ھتم کنگ ءِ راہ ءُ رھبند یکین اِنت- پمِشکہ مارا چوشیں انسان ءُ راجانی بارو ءَ سرپد بوَگ زَرورت ھست اِنت، پمِشکہ مرچی ما گسان کناپانی ءَ وانگ ءُ سرپد بوَگ ءَ اِنت –

کناپانی ءِ کماش مھمد پیز ابدالرزاک وکیل ءِ ءُ برتانیہ ءِ پلستین ءِ سرزمین ءِ سر ءَ کبزہ ءِ ھلاپ ءَ جُھدکارے بوتگ ءُ ھمے ھاتر ءَ باز رند ءَ اسیر کنگ ھم بوتگ ، کناپانی وتی پِس ءِ سیمی چُک اِنت۔ کناپانی ءَ وتی بُنُکّی وانگ جپا ءَ چہ پرانسیسی کیتولک دربرجاہ ءَ چہ سرجم کُتگ۔

1948 ءَ وھدے اسراھیل ءُ اَرب ریاستانی میان ءَ جنگ بِندات بیت ءُ جنگ وھدے کناپانی ءِ بُنُکّی جاہ ءَ سر بیت گُڑا کناپانی گوں وتی ھاندان ءِ ھمرائی ءَ ءُ دگہ بازے پلستینی جلاھی ٹولیانی ھواری ءَ دیم پہ دمشک ءَ لڈّ اَنت، اے وھد ءَ واجہ مالی ءِ رِد ءَ سک باز نزور بیت۔ کناپانی ءِ کماش دمشک ءَ وتی دپترے پچ کنت ءُ وت ءَ موشکول کنت ،ءُ کناپانی وتی ھاندان ءِ کمک کنگ ءِ ھاتر ءَ پہ وت ھم روزگارے شوھاز کنت- کناپانی وتی زانِشت ءَ دمشک ءَ سرجم کنت ءُ 1952 ءَ یونائیٹڈ نیشنز رلیپ اینڈ ورکس ایجنسی پار پلستینی ریپیوجیز (UNRWA) ءِ نیمگ ءَ استاد ءِ سنَد ءَ دست گِپت ءُ 1200 پلستینی جلاھی نودربر ءَ سبک دیگ بندات کنت۔ ءُ ھمے وھد ءَ کناپانی پہ ھمے نودربر ءَ آزمانک نبشتہ کنگ بندات کنت۔ اے آزمانکانی نبشتہ کنگ ءِ مول ءُ مراد ھمے بیت کہ اے نودربر وتی جیڑہ ءَ پوہ بِہ بنت۔ ھمے سال ءَ کناپانی یونیورسٹی آپ دمسکس ءَ اَربیک لیٹریچر ءِ ڈیپارٹمنٹ ءَ وانینگ بندات کنت، ھمے یونیورسٹیاں کناپانی ڈاکٹر جورج ھابش ءِ گوم ءَ نِند ءُ نیاد کنت ءُ ڈاکٹر کناپانی ءَ گوں سیاست ءَ ھمگرنچ کنت، ءُ مومنٹ آپ ارب نیشنلسٹ (MAN) ءِ واستہ کار کنگ بندات کنت، ھمے گل ءِ گوما سیادی دارگ ءِ سبب ءَ کناپانی چہ یونیورسٹیاں در کنگ بیت۔

1956 ءَ کناپانی گوں وتی گُھار پَیز ءَ کناپانی ءِ ھمراھی ءَ دیم پہ کویت ءَ روت ، ءُ ھمود ءَ وانینگ بندات کنت ھمے ساھت ءَ کناءَانی وتی گیشتریں وھد روسی لیٹریچر ءِ وانگ و پھمگ ءَ دنت، کناپانی ھمے سال ءَ مومنٹ آپ ارب نیشنلسٹ (MAN) ءِ روتاک “الراھی” (The Opinion) ءِ سرشونکار بیت – 1960 ءَ کناپانی ڈاکٹر ھباش ءِ پنت ءَ زور اِیت ءُ لڈّ اِیت ءُ دیم پہ بیروت ءَ رھادگ بیت، بیروت ءَ کناپانی(MAN) ءِ مستر ءِ توار “ال اوریا” ء واست ءَ نبشتہ کنگ بندات کنت، ھمے وھد ءَ کناپانی سیاست ءُ مارکسی پلسپہ ءَ ھُبّ زور اِیت۔ 1961 ءِ سال ءَ کناپانی ڈینمارکی زانتکار ءُ گْونڈیں چُکانی اوبال کار ءِ زالبول ھنی اووِر ( Anni Høver) ءَ گوں سانگ کنت، شست ءُ دو ءِ سال ءَ کناپانی ءِ کرّ ءَ کانودی سند نہ بوَگ ء سوب ءَ وت ءَ لبنان ءَ یک کسانیں مُدّتے ءِ واست ءَ گار ءُ بیگواہ کنت ، ءُ ھمے سال ءَ پد ءَ وت ءَ پدر کنت ءُ “المویر” ( Librator) نامی روتاک ءِ شونکاری ءِ ڈُبّہ ءَ زور اِیت۔ 1967 ءِ سال ءَ دگہ یک روتاکے”النور” (TheIllumination) ءِ واست ءَ گیدی ءِ نام پارس کارمرز کنت ءُ بُنگپّ نبشتہ کنت، ھمے سال ءَ کناپانی دی پاپولر پرنٹ پور لیبریشن آپ پلستین ( PFLP) ءَ بندوک بیت ءُ پہ “النور” ءِ واست ءَ کار کنگ ءَ یلہ دنت ءُ (PFLP) ھمک ھپتگ چاپ بیوکیں تاک “الھدپ”(The Target) ءَ پہ نبشتہ بندات کنت، PFLP ءُ الھدف ءِ واست ءَ پروگرام جوڑ کنگ ءِ ساھت ءَ کناپانی ءِ جھد مارکسی-لینن ازمی رنگ ءَ زور اِیت ءُ پد ءَ دیمتِر ءَ ھمے جُھد ءَ یک آشوبی ءُ پلستین ءِ راجی آزاتی ءِ جد ءُ جھد ءِ رنگ ءَ دیم ءَ روان بیت۔ PFLP ءِ بنیاد 1967 ءَ ایر کنگ بیت ءُ MAN ھتم کنگ بیت۔ PFLP ءِ بُنُکّی مول ءُ مراد پلستینیانی سر ءَ زُلم ءُ زوراکی ءِ ھلاپ ءَ زُلم ءِ دارگ ءُ پلستین ءَ یک جِتائیں ءُ آزاتیں ریاستے جوڑ کنگ، کہ اود ءَ انسانی آزادی ءُ دگہ انسانی ھکّانی پاسداری کنگ ءُ پلستینیاں وتی سر زمین ءِ سر ءَ وت واجھی بکشایگ بہ بیت۔
کناپانی یک سیاسی کواسے ءَ اَبید یک مھکمیں یاگی ءُھالکارے بوتگ، کناپانی وتی یک ریکاڑے کُتگ ءُ تامُر ءِ تہ ءَ گْوش اِیت کہ ” ادب ءِ یک مزنیں کِردے ھست اِنت منی سیاست ءَ یک شریں رنگ ءُ دروشم دیگ ءَ ، کناپانی ءَ شرگداری اندام ارزان ءُ تچک لیکگ بیت۔ پلستینی ءُ اربی ادب ءِ منوگِر کناپانی ءَ پلستینی ادب ءِ اولی دارَگی ادب ءِ ندکار لیک اَنت، ایرادگِر اوریٹ بشکن گْوش اِیت کہ کناپانی ءِ نبشتانک تُپُنگ ءَ سجدہ کنگ ءِ چھرگ ءَ جن اَنت، کناپانی سرپد بیت کہ پلستین ءِ جیڑہ ءِ توجیلّ بسّ مُسلا جھد ءِ توک ءَ اِنت۔

کناپانی ءَ آزمانکاری چہ جلائی کیمپ ءَ بندات کتگ اَت، کناپانی ءِ نبشتانک آئی ءِ سیاسی ھیال ءُ لیکھانی پدّری ءَ کن اَنت- کناپانی جاگھے گْوش اِیت کہ “پلستین ءِ ھاتر ءَ ندکار گوں وتی ھون ءَ نبشتہ بہ کن اَنت” – کناپانی وتی یک گُلگِدارے ءَ گوں آسٹریلین ھالکار ءِ توک ءَ وھدے کناپانی ءَ جُست کنگ بیت کہ آ پرچا گوں اسراھیل ءَ مزاکرات نہ کن اَنت گُڑا کناپانی پسو دنت “کہ آزادی ءِ ھاتر ءَ جھدکار ءُ یک دست گِیرے سامراج ءِ میان ءَ مزاکرات ھچ وڑ ءَ بوت کُرت نہ کنت ءُ گْوش اِیت کہ انچو زھم ءِ ءُ گردن ءِ میان ءَ مذاکرات بیت کُت کن اَنت انچو زوراک ءِ ءُ نزور ءِ میان ءَ مزاکرات بیت کُت نہ کنت۔” – کناپانی گْوش اِیت ” مئے(پلستینی) سرزمین ءِ آجوئی،وت واجھی، اِزت ءُ شرپ ،انسانی اوبالانی پاسداری، انچو لازم اِنت انچو کہ زندگی ءِ جند “-کناپانی ءِ گْوشتن ءَ اگاں ما بِزانتے ءِ بدے اِیں گُڑا آ چو اے وڑ ءَ بیت کہ ما وتی سرڈگار ھاتر ءَ پہ میرگ ھم ساڑی اِنت -کناپانی ءَ پہ آشوب ءُ آجوئی ءِ ھاتر ءَ وت ءَ کُربان کنگ ءِ متلب پھم اِتگ ءُ وت ءَ پہ وتی کوم ءُ راج ءَ ندر کُتگ، ءُ دگہ کوم ءَ ھمے شون داتگ کہ وتی آجوئی ءِ ھاتر ءَ وت ءَ کُربان بہ کن اَنت –
کناپانی ءِ کُوش8 جولاھی 1972، اے وھد ءَ کناپانی ءِ اُمر 36 سال اَت اسراھیلی انٹیلیجنس ایجنسی موساد 3 کِلو پلاسٹک بمب ءِ کناپانی ءِ گاڑی ءِ بمپر ءِ چیر ءَ ایر کن اَنت ءُ کناپانی گوں وتی کسان سالیں برازتک لمیس نجیمہ ھمے تراک ءِ آماچ بیت ءُ ابدمان بیت۔ ھمے ناگھانی کزا ءَ لھتے روچ پیسر لمیس وتی ناکو ءَ گوں گُش اِیت کہ تو پرچا وتی آشوبی سرگرمی ءَ یلا نہ کن ئے ءُ تو پرچا ایوک ءَ نبشتہ نہ کن ئے ؟ ءُ گْوش اِیت تئی آزمانک سک زیبدار اَنتم کناپانی پسو دنت من واتر بہ باں ءُ قصہ نبشتہ بہ کن آں؟- منی کِسّہ پمشکہ زیبدار اِنت پرچا کہ من یک مزنیں مکسدے ءِ سر مُھکم ءَ اگاں من وتی مکسد ءَ پادگْوز بہ کن آں گُڑا منی کسّہ ہم بے تام بنت، ھو اگاں من وتی کار ءَ یلہ بہ کناں گُڑا تو ھم من ءَ یلہ دے-

اے گپ ءَ چہ ھمے زاھر بیت کہ جھد ءُ مکسد ءِ سر ءَ مُھکمی مردم ءَ سوب مند کنت۔ کناپانی ءِ مرگ ءَ لھتے وھد ءَ پد موساد کناپانی ءِ کوش ءِ زمہ واری ءَ من اِیت۔ مرگ ءَ پد آئی ءِ بازیں نبشتانک ناسرجم ءَ مردم ءَ دست کپ اَنت-

30ھُمی 1972 ءَ تیلاویو ءِ روڑ ائیر پورٹ ءِ سر ءَ جاپانی ریڑ آرمی ءِ سے سپاھیگ اُرُش کن اَنت۔ اے اُرُش ءِ سبب ءَ 26 مردم بیران بیت ءُ 80 مردم زدگ بیت۔ ھمے اُرُش ءِ زمہ واری ءَ (PFLP) من اِیت ،ھمے درگت ءَ کناپانی(PFLP) جارکش بیت۔ ھمے اُرُش ءِ چپّیں کار ءَ اسراھیل کناپانی ءَ کُش اِیت-

کناپانی ءِ مرگ ءِ جار ءَ لبنانی روتاک (The Daily Star) نبیسّ اِیت کہ “آ یک انچیں سرمچارے اَت کہ یک تیرے ءَ ھم آس ئِے نہ دات، آئی ءِ توپک بال پواھنٹ ءُ آئی ءِ جنگ ءِ پیڈ روتاکانی تاک ءِ تہ ءَ” –
کناپانی ءِ لھتے نبشتانک-
“Men in the sun
Palestine’s children
All that’s left to you
The other thing
Stolen Shirt,The
Palestinian Literature of Resistance Under Occupation 1948 – 1968
Umm Saad
Death of Bed No. 12
A World Not Our Own
Resistance Literature in Occupied Palestine 1948 -1966
“A Bridge to Eternity

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ چھبار ءَ یک گاڑی ءِ چپ بیتگ ءُ یک مردمے بیران ءُ یکے زدگ بیتگ –

اھوالکار ءِ رد ءَ روکپتی بلوچستان ءِ تیابدپی شھر چھبار ءَ بریس ءَ رؤکیں گاڑی ءِ چپ بیتگ کہ چریشی ءِ سر ءَ یک مردمے بیران ءُ یکے زدگ بیتگ –

اھوالکار ءِ رد ءَ بیران بیتگیں مردم ءِ پجار عبدالکریم بلوچی ء شیر مھمد جھمنند ڈن سر گنداوگ ءِ نام ءَ زانگ بیتگ –

بیران ءُ زدگ بیتگیں مردم چھبار ءَ امام علی نادراہ جاہ ءَ برگ بیتگ اَنت –

ورنائیں بلوچ ریپر ھیثم ساونڈ کِلر ءِ نوکتریں ریپ سوت شنگ بیتگ۔

دی بلوچستان پوسٹ

بلوچستان ءِ بزگی، بیواری ءُ بلوچ راجی آجوئی جھد ءِ سر ءَ پر بستگیں ریپ ھیثم بلوچ ءِ یوٹیوب ءَ شنگ کنگ بیتگ۔

اے ریپ ءِ تہ ءَ ھیثم بلوچ ءَ بیگواھیں بلوچانی توار چِست کنگ ءَ ھوار ھوار، بلوچستان ءِ جھد ءِ آجوئی ءَ پہ نمیران بیتگیں نازینتگ اَنت۔

ھیثم ساونڈ کلر چہ گوستگیں شش سالاں بلوچی ریپ کنگ ءَ اِنت ءُ آئی ءِ گیشتریں ریپ بلوچستان ءِ آجوئی، بلوچ راجی بزگی ءُ بلوچستان ءِ تہ ءَ برجاھیں زوراکیانی درگت ءَ اَنت۔

ھیثم ساونڈ کلر ءَ گوستگیں روچاں وتی چاروک ءُ بلوچ راج ءَ چہ دزبندی ھم کُتگ اَت کہ منی جھد ءَ منی کمک ءُ ھمراھداری ء بہ کن اِت۔

ھیثم ساونڈ کلر ءِ ریپ جھل ءَ داتگیں لنک ءَ چارگ بیت کنت-

دی بلوچستان پوسٹ

جنزگ، اوپار دارگ، وت ءَ دردانی تہ ءَ چی ءَ دور نہ دیگ وتی سُد ءُ سما ءَ دارگ ءُ پروش نہ ورگ راستیں جد ءُ جھد ءِ چھرگ اَنت – اے گپانی درشان وائس فار بلوچ مسنگ پرسنز ءِ رھشون ماما قدیر بلوچ ءَ زھرشانی بنجل کرتگ اَنت –

شال ءِ پریس کلب ءِ دیم ءَ وی بی ایم پی ءِ زھرشانی بنجل ءَ چار ھزار ءُ یک سد ءُ ھبدہ روچ سرجم بیتگ -بلوچ نودربر گل پجار ءِ بنجاھی سرکماش زبیر بلوچ، کلانی کسان کمک سرکماش بوھر بلوچ، کسان کمک سرکماش گورگین بلوچ، دزکمکار نادر بلوچ، کلانی کسان کمک دزکمکار ابرار برکت، کسان دزکمکار وکرم بلوچ ءُ پتر ءِ دگہ باسکاں بنجل ءِ تر ءُ تاب کرتگ –

ماما قدیر بلوچ ءَ گوشت کہ کجام ھم راج ءَ وتی دوستگیں مردمانی یلہ کنائینگ ءِ ھاتر ءَ جتائیں رنجانی دیمپانی کنگ ءِ ھمراھی ءَ توپانی ءَ سرگوزگی ءَ پد رس اِیت،نا دمبرگ ءُ جُکگ ءِ رنگ ءَ انسان سرجم بیت کنت – ھمک ھما گامگیج زانتی ءِ رنگ ءَ کنگی اِنت –

آئی ءَ گْوشت کہ ھونانی پُشت ءَ دنیا ءِ ھمک گام ءَ یک سوبے بیت اِنت کہ چریشی ءِ پشدر ءَ یک نوکیں بانداتے بندات بیت اِنت – کہ راست ءُ راستگیری ءِ رندگیری ءَ بیت اِنت – ھون ریچ اَنت آئی ءِ راست ءُ راستگیری ءِ وشبو راستی ءَ پدر کن اَنت- زُلم ءِ ھلاپ ءَ آس برانز گپت ءُ لَٹ ءُ کُٹانی سر ءَ زالم ءِ پسو ھما زُلم ءِ نیمگ ءَ روان کنت کہ زالم مرگ ءُ زیردست زندگی ءِ گاماں بیت اِنت وھدیکہ ھون ءُ جون کپ اَنت گڑا زالم وتی زورگیری ءِ دراج کش کنگ ءَ زیردستانی ھوناں ریچ ایت –

نبشتانک: وتن ءِ دیوانگ شھید میرجان

نبشتہ کار: چوکّین بلوچ

دی بلوچستان پوسٹ

میرو منی ارواہ من ءَ پھل کن منی کد ءُ زانت اِینچو نہ اِنت بلے تئی زھیراں من ھم روچ پْرشت ءُ پْروش کن آں ءُ ٹُکُّر ٹکُّر کن آں، چوناھا جنگانی کسّہ ءِ کنگ سک وش اِنت بلے جل ھما پُسّگان اِنت کہ پہ زمین ءَ دژمن ءِ گوما انچیں جنگ کن اَنت کہ آیانی جنگ ءَ دژمن پْرشت ءُ پْروش بیت، میرجان ءِ شھیدی ءِ ھال من اِشکُت اِے واد پہ من چو کھریں کیامت ءَ بیت۔

شپ ءَ ھال اَت دو سنگت ءِ لاش پوج ءَ تمپ ءِ پولیس ءَ داتگ ، بلے من ءَ ھچ سما نیست اَت من بے سما اِت آں، من شام کُت ءُ بِستر پچ کُت اَنت من وپت آں ءُ سُھب ءَ من موبائل پچ کُت چارگ ءَ آں لگّ اِتگ میرجان ءِ اکس دیم ءَ کپت چیر ءَ نبشتہ اَت ھمبلو تو سُست ئے من سک پریشان بیت آں بے تاھیر بیت آں، منی دست ءِ ھاٹیگ شُت دست ءِ موبائل کپت۔

اے وھد ءَ مردم چہ وتی توک ءَ پْرشت ءُ پْروش ءِ آماچ بیت بلے اے ھونانی گندگ ءَ گوں مردم پھر ھم بند اِیت کہ آئی ءَ وتی زمین ءِ ھک ادا کُتگ پہ مردی شھید بیتگ بلے وتی سلاہ ئِے دور نہ دات لگوریں دُژمِن ءِ دیم ءَ سر ءِ جَھل نہ کُت داں گُڈی تیراں جنگ ئِے کُت ءُ وت ءَ ابدمان ئِےکُت۔

تیر ءُ بمبانی توار سرجمیں کُلبر جکسگ ءَ اَت، ھَو نوں ما پہ شانے گُش اِیں، مرچی مارا زمین ھمباز اِیت وتی سینگ ءَ جاہ دنت۔

مرچی کہ اے ھون آجوئی ءِ راہ ءَ رِچگ اَنت پہ زمین ءَ آ سرپد اَنت کہ ابید ء ھون ءِ ریچگ ءَ مئے زمین چہ گُلامیں سانکلاں نہ سِد اِیت الّم پہ زمین ءَ وتی ساہ ءُ جان ندر کنگی اِنت۔

بلے اے گپ ءَ دُژمن ءُ دُژمن ءِ داشتگیں ھون وار شرّی ءَ سرپد اَنت کہ ما بلوچ راج ءِ ھما سر ءَ گوں دیم پہ دیم ایں کہ زمین ءُ راج ءِ ھاتر ءَ وتی ساہ ءُ جان ءِ پرواہ ءَ نہ کن اَنت-

میرجان ءِ بامردی ءُ جنگانی کسّہ ءَ منی وڑیں نابزانتے کُت ئِےنہ کنت چوناھا میرو ءِ اُمر کسان اَت گوں بلوچ ءِ جُنزاں ھور بیت ءَ میرو پہ مِنڈی چم ءَ یک وبا یے ءِ جان ءَ اَت گوں دُژمِن ءِ سر ءَ سک نپرت ئِے اتک۔

من اے ھبر ءَ پہ دل گُش آں میرجان ءَ وتی زمین ءِ ھکّ ادا کُت ءُ ما ھم وامدار اِیں بلوچ راج ءِ سر مُدام بُرز بیتگ ءُ دائِمی بُرز بیت داں کہ تی وڑیں وتن گنوکے ءِ سر ھست پہ مسکیں زمین ءِ دیمپانی ءَ ساڑی اَنت میرو اِے وھد ءَ من نشتگ ءَ تئی جنگانی کِسّہ ءَ کنگ ءَ آں تھنا دو سنگت ءَ اِنچو دیر ءَ گوں لگوریں دُژمِن ءُ آئی ءِ کاسگ چٹّاں جنگ داتگ پد ءَ پہ زمین ءَ ابدمان بوتگ ئے۔

2013 اَت میرجان ءَ بی ایل ایپ ءَ بھر زُرت وتی راج ءِ کاراناں دیم ءَ بُرت، میرجان آجوئی ءِ بند بُرّیں سرمچارانی کُوپگ اَت پہ درتہ پُچّیں مردماں یک گم وارے اَت پہ بلوچ راج ءِ مڑاہ داریں باندات ءَ جنگ ئِے کُت۔

ھمے وڑ ءَ شھید میرجان گوں سنگتاں دُژمِن ءَ سر ءَ اُرش کن اَنت دُژمِن ءِ دو تیر میرجان ءِ کُوپگ ءَ سُمب اِیت میرجان بلے چو کُوہ ءَ مُھکم بیت سنگت پہ دراھگ ءَ سوبمند بنت سنگت شھید میرجان ءِ الاج ءَ کن اَنت وش بیت ءُ گْوستگیں روچاں پد ءَ دُژمِن میرجان ءِ ءُ میرجان ءِ سنگتانی سر ءَ اُرش کنت سنگت پہ دراھگ ءَ سوبمند بنت بلے میرجان گوں مُشیر جان ءَ پہ زمین ءَ ندر ءُ نمیران بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔