گوادر ءَ پاکستانی پوج ءِ چوکی سر ءَ اُرش، یک کارندھے بیران ءُ یکے ٹپی بیتگ

بلوچستان ءِ تیاب دپی شھر گوادر ءِ تھسیل جیونی ءَ فرنٹیئر کور ءِ یک چیک پوسٹ ءِ سر ءَ اُرش ءَ یک کارندھے بیران وھدے کہ دومی ٹپی بیتگ-

وئیل چارشمبے ءِ نیمروچ ءَ ھما وھد ءَ بیتگ وھدے یک گاڑی ءَ سوار سلاہ بندیں مردماں اناگاہ ءَ چیک پوسٹ سر ءَ تیرگواری کتگ-

سیکیورٹی رِد ءَ ، جیونی شے آباد ھند سر ءَ ایف سی چیک پوسٹ سر ءَ یک لینڈ کروزر گاڑی یے ءَ چیک پوسٹ نزیک ءَ آیگ ءَ تیرگواری بندات کتگ-

اُرش ءِ آسر ءَ کانسٹیبل اللہ داد جاہ پہ جاھی بیران بیتگ، وھدے کہ آئی ءِ ھمراھیں کارندہ سک ٹپی بیتگ- ٹپی کارندہ زوت الاج کنگ ھاتر ءَ نادُراھجاہ ءَ برتگ کہ اود ءَ آئی ءِ جاور نگیگ گوشگ بیگ ءَ اَنت-

وئیل ءَ پد سیکیورٹی فورسز ءَ دمگ انگر ءَ کتگ لشکر کشی بندات کتگ- تھی ءُ ڈنی راھانی سر ءَ پٹ ءُ پول بندات کتگ-

تنی وھدے اُرش ھچ وڑیں گلے ءَ نہ زرتگ-