سلمان بلوچ ءِ کیس درکنگ آئین ءِ ھلاپ ورزی اِنت، جج انساپ ءِ نہ اَنت بلکیں ریاستی زوراک ءِ پھازوک جوڑ بیتگ اَنت- سعدیہ بلوچ

پاکستانی پوج ءِ دست ءَ زورانسری بیگواہ سلمان بلوچ ءِ گْھار سعدیہ بلوچ ءَ وتی برات ءِ ایف آئی آر درگت ءَ تُرندیں زھر درشان کنان ءَ گْوشتگ کہ جسٹس امان اللہ یاسین زئی ءِ نیمگ ءَ چہ کیس درکنگ بیتگ، آ ناں تھنا آئین ءِ آرٹیکل نُھ ءُ A-10 ءِ تچکی ءَ ھلاپ ورزی اِنت، بلکیں اے پدر کنت کہ آ انساپ اناں بلکیں ریاستی زوراک ءِ پھازوک جوڑ بیتگ اَنت-

سعدیہ بلوچ ءَ گْوشتگ کہ بیگواھیں مردم مئے پائلیں نہ اَنت، بلکیں مئے ساھانی بھر اَنت، ما ھمکروچ اشانی ساڑی نہ بیگ ءَ گم ءُ رنج گوازین ایں-

آئی ءَ دیمتر ءَ گْوشتگ کہ سلمان بلوچ سیزدہ نومبر 2022 ءَ چہ شال ءَ زورانسری بیگواہ کتگ ءُ داں روچ مرچی آئی ءِ ھچ ھال نیست-

آئی ءَ ریاستی ادارھاں ءُ آمیدگس ءَ چہ جُست گپتگ کہ اگاں آئین ءَ دیگ بیتگیں بُنکی انسانی ھک دیگ نہ بیت گُڑا لَس شھری کجا بہ رو اَنت-

گُڈی ءَ سعدیہ بلوچ ءَ انسانی ھکانی گلاں ءُ سول سوسائٹی ءَ چہ دزبندی اِنت کہ آ بیگواھیں مردمانی کھول ءِ ھمراھداری بہ کن اَنت ءُ جُھد ءَ آئی ءِ توار بہ بہ اِت-