بلوچستان ءَ بیگواھیں مردماں بندیگ جاھاں یکشل ءَ کُشگ ءُ چگل دیگ ءَ انت کہ اے درچ گوستگیں لھتے ماھانی توک ءَ یک رندے پد ءَ ترند کنگ بیتگ-
بلوچستان ءِ سرکار بندیگیں مردماں بندیگ جاھاں کُشگ ءُ پد ءَ آیاں سی ٹی ڈی ءِ نامیں پورسز ءِ گون ءَ میڑ ءِ نام دیگ ءُ تالان کنگ ءَ انت-
بلوچ مھلوک ءُ سیاسی ھلکانی گوشگ انت کہ سرکار بندیگیں مردماں بندیگجاھاں کُشگ ءُ آیانی لاشاں ویرانگ ءُ جنگلاں چگل دیگ ءَ انت اے یکشلیں انسانی ھکانی لگتمالی ءُ بلوچ ورنایانی پدریچ کوشی ءَ کنگ ءَ انت-
بلوچستان ءَ کُشت ءُ کوشانی ھلاپ ءَ توار چِست کنوکانی توک ءَ بلوچ انسانی ھکانی باسک ءُ بلوچ رھشون ڈاکٹر ماہ رنگ بلوچ ءُ آئی ءِ ھمراہ بلوچستان ءَ زُلمانی ھلاپ ءَ توار ءِ چِست کنگ ءِ پژدر ءَ بازیں وھداں بندیگ انت کہ آیانی ھمک ماہ ءِ یل بوگ ءَ پد آ گیش بندیگی ءِ دیمپان کنگ بوگ ءَ انت-
چہ مشکے ءَ سال 2024 ءِ 23 دسمبر ءَ آوار جنگ بیتگیں نزر احمد ء جان مھمد ءُ 1 فروری 2025 ءَ چہ مشکے بازار کنڈری ءَ آوار جنگ بیتگیں علی محمد ء حکیم ءِ تیرسپتگیں لاش گوستگیں روچ ءَ مشکے ھسپتال ءَ آرگ بیتگ انت-
ھمے وڑ ءَ چہ ڈیرہ بگٹی ءَ سال 2024 ءِ 18 اکتوبر ءَ آوار جنگ بیتگیں زاھد بگٹی ء عثمان بگٹی ءُ یوسف پنام ءِ وڈو ء شاھنواز بگٹی ءُ 2025 ءِ 19 مارچ ءَ آوار جنگ بیتگیں علی بیگ ء پاھی بگٹی کُشگ بیتگ ءُ لاش چگل دیگ بیتگ انت-
بلوچستان ءَ بندیگیں مردمانی کُشگ ءِ درچ بازیں وھداں برجاہ انت بلے سال دوھزار ءُ بیست ءُ پنچ ءَ اے درچ یکدم گیشی ءَ گندگ بوگ ءَ انت-
بلوچ سیاسی ھلک ء پھناتانی گوشگ انت کہ اگاں مھلوک ءَ گیش بے تواری ءَ وت ءَ داشت گڑا بازیں کچے ءَ بندیگیں ورنا ھمے ڈول ءَ کُشگ ءُ ریچگ ءُ ڈلگ ءُ دور دیگ بنت اِنت کہ اے پالیسی گوست ءَ ھم بیتگ ءُ نی گیش کپتگ کہ سرکار ءَ نوکیں نام دیگ بندات کتگ انت-